བོད་མིའི་སྒྲིག་འཛུགས་ཀྱིས་བསྟི་གནས་རྡ་ས་གངས་སྐྱིད་དུ་འབྱོར་བའི་མཐོང་ཚུལ་དང་ལྔ་དང་ལྔ་བཅུའི་འཆར་སྣང་ལ་དཔྱད་པའི་གཏམ།

ཚེ་དབང་བསོད་ནམས་ནས།
 
ཉེ་ལམ་ཟླ་འདིའི་ནང་པཎ་འཇབ་ལུ་ཐི་ཨ་ནར་བལ་གོས་ཉོ་འདོན་དུ་འགྲོ་ཞོར་རྡ་སར་ལས་དོན་ཞིག་དང་འབྲེལ་ནས་འཁྱུག་ཙམ་རིང་གངས་སྐྱིད་དུ་འབྱོར་སྐབས། ང་ལ་མཐོང་ཚུལ་དང་བསམ་ཚུལ་གང་བྱུང་བ་དེ་འདིར་གླེང་འདོད་བྱུང་ལ། དབུས་བོད་མིའི་སྒྲིག་འཛུགས་ཀྱི་མཐོ་རིམ་མི་སྣ་སུ་འདྲ་ཞིག་གཞིས་ཆགས་ཁག་ཏུ་གཟིགས་བསྐོར་དུ་ཕེབས་སྐབས་གཞིས་ཆགས་བསྲ་བརྟན་དང་རྒྱུན་གནས་དགོས་པའི་བཀའ་སློབ་ཕེབས་བཞིན་པ་དང་། ལྔ་དང་ལྔ་བཅུའི་འཆར་སྣང་དང་འབྲེལ་བའི་གཞིས་ཆགས་བསྲ་བརྟན་དང་རྒྱུན་གནས་ཐུབ་པའི་ལས་འཆར་བཀོད་སྒྲིག་ཇི་ཡོད་མ་ཤེས་ཀྱང་། དབུས་བོད་མིའི་སྒྲིག་འཛུགས་ཀྱིས་བསྟི་གནས་གངས་ཅན་སྐྱིད་གཤོངས་སུ་གནས་པའི་ལྷན་ཁང་ཁག་གི་ལས་ཁུང་དང་། ཚོགས་ཁང་། སྣུམ་འཁོར་འཇོག་ས་སོགས་མཐོང་སྐབས་དབུས་བོད་མིའི་སྒྲིག་འཛུགས་ཀྱི་འཆར་སྣང་ལྔ་དང་ལྔ་བཅུའི་ལས་འཆར་ནས་ལྔ་བཅུའི་ལས་འཆར་ལ་སྔོན་ཐོན་གནང་ནས་འཛུགས་བསྐྲུན་འདི་དག་ལ་བསམ་སྐབས། ལོ་ལྔ་བཅུ་ཕར་བཞག་ནས་ལོ་བརྒྱ་ཕྲག་མི་ཡུལ་དུ་བསྡད་ནས་རང་བཙན་འཐབ་རྩོད་མུ་མཐུད་ནས་མི་ཐོག་ནས་མི་ཐོག་བྱ་དགོས་བྱུང་ཡང་། གཞན་བསྟེན་མི་དགོས་པར་རང་རྒྱུ་རང་བདག་གི་ལམ་ནས་མི་ཡུལ་དུ་ལོ་བརྒྱ་ཕྲག་འགར་འཚོ་ཐུབ་པའི་འཛུགས་བསྐྲུན་འདི་དག་ལྔ་དང་ལྔ་བཅུའི་འཆར་སྣང་གི་གྲུབ་འབྲས་རླབས་ཆེན་ཞིག་ལ་ངོས་འཛིན་ཞུ་གི་ཡོད་ལ།

དེ་དང་ཕྱོགས་མཚུངས་གངས་ཅན་སྐྱིད་གཤོངས་ནི་དབུས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱིས་གཙོས་པའི་ལྷན་ཁང་ཁག་དང་། གཞུང་འབྲེལ་དང་གཞུང་འབྲེལ་མ་ཡིན་པའི་སྤྱི་ཚོགས་ཞབས་ཞུའི་ཚོགས་སྡེ་ཁག་བཅས་ཡོད་པ་དང་། རྒྱ་བལ་འབྲུག་གསུམ་དང་ཕྱི་རྒྱལ་སོགས་ཕྱོགས་མཐའ་ཁག་ནས་ཕེབས་པའི་མི་སྣ་ས་ཁུལ་འདིར་གཉེན་སྤུན་ཐུག་འཕྲད་དང་། ཕྲུ་གུ་སློབ་འཇུག་སོགས་ལ་བདེ་སྡུག་ཞུ་མཁན་འཛོམས་ཆེ་བའི་ས་གནས་གལ་ཆེན་འདིར་མི་མང་གསང་སྤྱོད་༼Public Toilet ༽མེད་པའི་ཚོར་སྣང་ཞིག་བྱུང་ལ། ཕྱི་ནས་ཕེབས་མཁན་ཚོར་མི་མང་སྤྱི་སྤྱོད་གསང་སྤྱོད་མེད་པའི་དཀའ་ངལ་ལས། ལྔ་དང་ལྔ་བཅུའི་འཆར་སྣང་དེ་དག་གལ་ཆེན་དོན་ཆེན་ལ་རྩིས་ཏེ་ལྔ་ཡི་ལས་འཆར་ལ་འགན་འཁུར་གྱིས་མི་མང་སྤྱི་སྤྱོད་གསང་སྤྱོད་རྒྱ་སྐྱེད་མ་གནང་བ་དེས་མི་མང་གི་འཕྲོད་བསྟེན་དང་། འཁོར་ཡུག་གཙང་སྦྲ་ལ་དབུས་བོད་མིའི་སྒྲིག་འཛུགས་འཕྲོད་བསྟེན་ལྷན་ཁང་ནས་ཐུགས་སྣང་དང་ཐུགས་འགན་མ་བཞེས་པ་ལ་ནམ་ཡང་ངོས་འཛིན་ཞུ་གི་མེད་ཀྱང་། དེང་སྐབས་འཛམ་གླིང་གི་ཡུལ་གྲུ་ག་འདྲ་ཞིག་ཏུ་སླེབས་ཀྱང་མི་མང་སྤྱི་སྤྱོད་ཀྱི་གསང་སྤྱོད་ནི་ཡག་སྡུག་ལ་མ་བལྟས་པར་མི་མང་གིས་བེད་སྤྱོད་བཏང་ཆོག་ཡོད་པ་ནི་མི་མང་གི་དཀའ་ངལ་སེལ་བ་དང་། འཁོར་ཡུག་སྲུང་སྐྱོབས་དང་གཙང་སྦྲ་འཕྲོད་བསྟེན་སོགས་དང་འབྲེལ་བ་གཏིང་ཟབ་ཡོད་པས་ན། བོད་མིའི་སྒྲིགས་འཛུགས་འཕྲོད་བསྟེན་ལྷན་ཁང་གིས་གངས་སྐྱིད་ཉེ་འཁོར་དུ་མི་མང་གསང་སྤྱོད་དང་འཁྲུས་ཁང་ ( Public Toilet Cum Bathroom ) རྒྱག་ཐུབ་ན་ཕྱོགས་མཐའ་ནས་ཕེབས་མཁན་ཚོར་ཕན་ཐོག་དང་འཁོར་ཡུག་དང་གཙང་སྦྲ་འཕྲོད་བསྟེན་སོགས་ལ་སྲུང་སྐྱོབས་ཡོང་རྒྱུ་བཅས་གང་ཟག་སྒེར་གྱི་བསམ་ཚུལ་གསལ་སྟོན་ཞུས་པ་ལས་སྐྱོན་འཛུགས་མིན་པ་དེ་ཡང་མཁྱེན་དགོས་པ་བཅས།

སླར་སྨྲས་པ།
མ་བསམ་མ་མཐོང་ཐམས་ཅད་རྗེས་ལུས་ཡིན་།
བསམ་པ་མཐོང་བ་ཐམས་ཅད་སྔོན་འཐོན་ཡིན་།
སྔོན་འཐོན་རྗེས་ལུས་ཚོད་དཔག་མ་ཐུབ་ན་།
ཆབ་སྲིད་རིག་པར་རྒྱལ་ཁ་ཉིན་སྐར་ཙམ་།

ཀོ་ལི་གྷལ་གཞིས་ཆགས་གཞུང་པ་ཚེ་དབང་བསོད་ནམས་ནས་ཕྱི་ལོ་༢༠༡༨ཕྱི་ཟླ་༩པའི་ཚེས་༡༩ཉིན་ཟིན་བྲིས་སུ་བཏབ་།