མཚམས་སྦྱོར་བ། ཀླུ་རྒྱལ་དོན་འགྲུབ།
ཡོ་རོབ་བོད་ཀྱི་གཞོན་ནུས་གོ་སྒྲིག་འོག་སུད་སིར་བོད་སྐད་ཡིག་ཡིག་རྨོངས་སེལ་བའི་བོད་ཡིག་འཛིན་གྲྭ་འགོ་བཙུགས་གནང་སོང་། ཟླ་སྔོན་མའི་ཚེས་ཉི་ཤུ་ནས་སུད་སིའི་གནས་སྡོད་བོད་མིའི་སྤྱི་ཚོགས་སུ་གཞོན་སྐྱེས་མང་པོར་བོད་ཀྱི་སྐད་ཡིག་ལ་དོ་སྣང་གསར་བ་ཞིག་ཡོང་བཞིན་པ་དང་བསྟུན་ནས་བོད་ཡིག་འཛིན་གྲྭ་འགའ་མངའ་སྡེ་གསུམ་གྱི་ནང་དུ་འགོ་བཙུགས་གནང་ཡོད་འདུག
འཛིན་གྲྭ་དེར་གོ་སྒྲིག་བྱ་རྒྱུའི་བརྡ་སྦྱོར་བཀྲམ་པ་དང་སུད་སིར་གནས་སྡོད་བོད་ཀྱི་གཞོན་སྐྱེས་མང་པོས་བོད་ཡིག་ལ་དོ་སྣང་སྔར་ལས་བྱེད་བཞིན་ཡོད་པ་དང་། ཐོ་འགོད་བྱས་ནས་འཛིན་གྲྭར་ཞུགས་བཞིན་པའི་སློབ་མ་༥༠ ལྷག་ཅིག་ཡོད་པ་དང་། ཐོ་འགོད་རྗེས་ལུས་ཐེབས་པ་དང་ས་གནས་ཁ་ཤས་སུ་གནས་སྐབས་ཀྱི་རིང་སློབ་མའི་གྲངས་མ་ལོང་བ། དགེ་རྒན་སོགས་ཀྱི་དཀའ་ངལ་གྱིས་འཛིན་གྲྭ་འཚོགས་ཐུབ་ཀྱིན་མེད་པ་སོགས་ཀྱི་དབང་གིས་གཞོན་སྐྱེས་མང་པོས་འཛིན་གྲྭ་རྗེས་མར་ཐོ་འགོད་བྱེད་པར་སྒུག་འདུག
གོང་གི་འཛིན་གྲྭ་དེ་དག་འཛུགས་སའི་ས་ཁུལ་ནི་གྲོང་ཁྱེར་འཛུ་རིག་དང་ཡོ་ན། དེ་བཞིན་བེལ་སོགས་ཡིན་འདུག ད་ལྟ་དངོས་སུ་བོད་ཡིག་སློབ་ཁྲིད་འགོ་བཙུགས་འདུག་ལ་སློབ་མ་ཚོས་ཀྱས་རང་ངོས་ནས་ཐབས་ཤེས་གང་ཡོད་ཀྱིས་རང་མི་རིགས་ཀྱི་སྐད་ཡིག་འདི་སློབ་སྦྱོང་བྱེད་པར་ནུས་ཤུགས་གང་ཡོད་འདོན་བཞིན་འདུག
བོད་ཡིག་འཛིན་གྲྭར་དོ་སྣང་ཡོང་བཞིན་པའི་སྐོར་ལ་འཛིན་གྲྭར་ཡོང་བཞིན་པའི་བུ་མོ་བསྟན་སྒྲོལ་ལགས་སུ་སྐད་ཆ་དྲིས་པར་ཁོང་མོས། ༼ཆུང་དུས་བོད་ཡིག་སྦྱངས་མྱོང་ཡོད་མོད་ཁོར་ཡུག་གི་དབང་གིས་བེད་སྤྱོད་གཏོང་ས་མེད་པས་དྲན་པ་བརྗེད་འདུག བོད་ཀྱི་རིག་གཞུང་དང་སྐད་ཡིག་སོགས་ལ་དོ་སྣང་བྱེད་དགོས་རྒྱུ་ནི་ང་ཚོ་བོད་མི་རྣམས་ཀྱི་འགན་ཞིག་ཏུ་མཐོང་གི་ཡོད་༽ཟེར། འཛིན་གྲྭའི་དུས་ཡུན་ལོ་གཅིག་གི་རིང་ལ་ཁྱེད་རང་གིས་རེ་བ་ཇི་འདྲ་ཞིག་བཅངས་ཀྱི་ཡོད་པའི་སྐོར་ལ་སྐད་ཆ་དྲིས་པར་ཁོང་མོས་༼ང་རང་ལ་མཚོན་ན་བོད་ཡིག་ཡར་རྒྱས་སུ་གཏོང་འདོད་ཡོད་མོད་རང་ཁྱིམ་དུ་ཨ་མས་བོད་ཡིག་མི་ཤེས་སྟབས་བོད་ཡིག་ཡར་རྒྱས་སུ་གཏོང་བར་དཀའ་ངལ་ཧ་ཅང་ཆེན་པོ་འདུག གོ་སྐབས་འདི་རྒྱུད་ནས་ངས་ཧུར་བརྩོན་གྱིས་ལོ་གཅིག་གི་ནང་དུ་འབྲི་ཀློག་ཡག་པོ་ཞིག་ཡོང་ཐུབ་ཀྱིན་པའི་ཡིད་ཆེས་བྱེད་ཀྱི་ཡོད་༽ཟེར།
ད་ལྟའི་འཛིན་གྲྭ་འདི་ནི་སུད་སིར་གསར་ཏུ་འབྱོར་བའི་གཞོན་སྐྱེས་དྲུག་གིས་དགེ་རྒན་དང་བླངས་དང་། ཡོ་རོབ་གཞོན་ནུས་འཛིན་སྐྱོང་གོ་སྒྲིག་སོགས་ཀྱི་མཐུན་རྐྱེན་འོག་བདུན་ཕྲག་གཅིག་གི་ནང་དུ་ཐེངས་གཅིག་འཚོགས་བཞིན་པ་ཞིག་རེད་ལ། འཛིན་གྲྭར་ཞུགས་མཁན་གྱི་སློབ་མ་རྣམས་ནི་ལོ་བཅུ་དྲུག་ནས་སུམ་བཅུ་བར་གྱི་གཞོན་སྐྱེས་ཤ་སྟག་རེད་འདུག
༄།ཡག་པོ་རེད་བཀའ་དྲིན་ཆེ་ བོད གཞོན་ཚོ།
བོད་མི་ཚོ་རྨོངས་གཉིད་ལས་སད་ཡོང་གི་ཡོད་པའི་རྟགས་རེད། ཧ་ཅང་བཟང་། ངོ་མ་བཤད་ན་བཀའ་ཁྲི་ཟམ་གདོང་རིན་པོ་ཆེ་ཡན་ཆད་ཀྱི་བཙན་བྱོལ་གཞུང་གི་ཤེས་ཡོན་སྲིད་ཇུས་ལ་ནོར་འཁྲུལ་ཆེན་པོ་ཤོར་ཡོད་པ་ནི་བཙན་བྱོལ་ནང་གི་མི་རབས་གཉིས་པའི་ཤེས་ཡོན་དང་ཀུན་སྤྱོད་ནས་མཐོང་ཐུབ་པ་ཞིག་རེད། ད་དུང་མུ་མཐུད་ནས་དེ་ལྟར་སོང་ན་བོད་པ་ཞེས་པའི་མིང་ཙམ་ལས་ཅི་ཡང་མི་ལྷག་པ་ཟུར་བལྟས་ལེབ་མཐོང་རེད།
ཤ་ཚ་ལོ་དེ་ག་ཙམ་སླེབ་ཟིན་པ་རྣམས་བོད་ཡིག་སྦྱངས་དགོས་དཀའ་ལས་ཆེ་ཙམ་ཡོད་རེད།
ཡག་པོ་ཡིན་དང་ཡིན་བོད་པའི་བོད་ཡིག་མ་སྦྱང་ན་རྒྱ་ནག࿒མར་གཞུང་ཧ་ཅང་དགའ་།
ཕྱི་རྒྱལ་དུ་ཡོད་པའི་བོད་ཕྲུག་ཚོས་བོད་ཡིག་ལ་དོ་སྣང་བྱས་པ་ཤིན་ཏུ་ལེགས། བཀའ་ཁྲི་ཟམ་གདོང་སྐབས་བོད་ཡིག་སྤྱོད་པའི་ཁོར་ཡུག་རྒྱས་ཐབས་སུ་བོད་མི་ནང་ཁུལ་ཡིག་འགྲུལ་བོད་ཡིག་ཁོ་ནར་སྤྱོད་དགོས་པའི་བཀའ་རྒྱ་ཕེབས་པ་དང། གཞུང་འབྲེལ་ཡིག་ཆ་ཁག་བོད་ཡིག་ཁོ་ན་སྤྱོད་བཞིན་པ་ཡིན་ཀྱང་ད་ལྟ་གཞུང་འབྲེལ་ཡིག་འགྲུལ་དབྱིན་ཡིག་ཐོག་སྤྱོད་རྒྱུ་རྡ་ས་ནས་འགོ་བཙུགས་ཟིན་འདུག་པས་སྤྱོད་རྒྱ་མེད་པའི་བོད་ཡིག་ཀྱི་ལས་དབང་ཇི་འདྲ་ཆགས་མིན་མི་ཤེས།