བོད་རང་བཙན་ཆེད་ཞི་བའི་གོམ་བགྲོད།

རྒྱལ་སྤྱིའི་བོད་རང་བཙན་ལས་འགུལ་ཚོགས་པས་(www.circlethebayfortibet.org) གོ་སྒྲིག་གནང་བའི་གོམ་བགྲོད་ཐེངས་བཅུ་དགུ་བ་དེ་དངོས་སུ་དབུ་བཙུགས་ནས་ཉིན་ ༦ འགྲོ་བཞིན་ཡོད་པ་དང་། ཨ་རི་བ་བཞི་དང་བོད་མི་བཅུ་གྲངས་རེ་བཅས་ ཉིན་རེ་ལ་མེལ་ལེ་ བཅོ་ལྔ་ཙམ་རེ་བསྐྱོད་ཀྱི་ཡོད་འདུག་ལ། དེ་ཡང་བྱང་ཨ་རིའི་མངའ་སྡེ་ཀེ་ལི་ཕོར་ནི་ཡའི་གྲོང་ཁྱེར་ཨོཀ་ལེནཌ་ནས་རྒྱལ་ས་ སན་ཕ་རན་སི་ཀོ་ བར་མེལ་ལེ་ ༡༠༨ བར་ཉིན་གྲངས་ ༨ རིང་གོམ་བགྲོད་བྱེད་རྒྱུ་ཡིན་པ་རེད།

རྒྱལ་སྤྱིའི་བོད་རང་བཙན་ལས་འགུལ་ཚོགས་པའི་འགན་འཛིན་ཚོགས་མི་དང་གོམ་བགྲོད་པ་སྐུ་ཞབས་ངག་དབང་ནོར་བུ་ལགས་ཀྱིས་གསུངས་པ་ལྟར་ན། གོམ་བགྲོད་པ་དག་ནི་ཉིན་རེའི་ཆུ་ཚོད་ ༩ པ་ཙམ་ནས་ཉིན་རྒྱབ་ཆུ་ཚོད་ ༥ ཙམ་བར་དུ་གོམ་བགྲོད་གནང་བཞིན་པའི་ཁར། གོམ་བགྲོད་ཀྱི་ལམ་དུ་རླངས་འཁོར་བ་ཚོས་ཁོང་ཚོའི་གོམ་བགྲོད་མཐོང་འཕྲལ་ཧ་ཅང་རྒྱབ་སྐྱོར་རྣམ་པ་སྟོན་པ་སོགས་བོད་ཀྱི་གནད་དོན་དྲིལ་བསྒྲགས་ཆེན་པོ་ཡོང་བ་མ་ཟད། ས་གནས་ནས་བོད་རིགས་དཔེར་ན་དགུང་ལོ་ ༧༣ ལ་ཕེབས་པའི་ཨ་མ་གཡང་དཀར་ལགས་སོགས་གོམ་བགྲོད་ལ་མཉམ་ཞུགས་གནང་བ་དང་། གོམ་བགྲོད་ལ་མ་ཞུགས་པ་རྣམས་ཀྱིས་ཀྱང་གནས་ཚང་གཡོར་བ་དང་ཟས་འདྲེན་པ་སོགས་སྤྱི་དོན་ལ་དམིགས་པའི་རྒྱབ་སྐྱོར་ཤུགས་ཆེན་གནང་བྱུང་བས་སེམས་ཤུགས་འཕར་བཞིན་ཡོད་ཅེས་འགྲེལ་བརྗོད་གནང་སོང་།

རྒྱལ་སྤྱིའི་བོད་རང་བཙན་ལས་འགུལ་ཚོགས་པའི་དྲ་བ་ནང་གོམ་བགྲོད་ཀྱི་དམིགས་ཡུལ་སྐོར་འཁོད་དོན། “ཐེངས་འདིའི་གོམ་བགྲོད་ཀྱི་འབོད་སྒྲ་གཙོ་བོ་ནི། ཉེ་ལམ་བོད་ནང་གཞིས་ལུས་བོད་རིགས་སྤུན་ཟླ་དཔའ་བོ་དཔའ་མོ་རྣམས་ནས་༧གོང་ས་མཆོག་བོད་ནང་གདེན་ཞུ་དགོས་པ་དང་བོད་ལ་རང་དབང་དགོས་པའི་འབོད་སྒྲ་བསྒྲགས་ཤིང་། གཅེས་པའི་རང་ལུས་མེར་བསྲེགས་གཅིག་མཇུག་གཉིས་མཐུད་ཀྱིས་གནང་བའི་གཟི་བརྗིད་ཅན་གྱི་ལས་འགུལ་དེར་གདུང་སེམས་མཉམ་བསྐྱེད་དང་། ལྷག་པར་དུ་ཁོང་རྣམ་པའི་ཞལ་ཆེམས་དང་དགོངས་འདུན་ཇི་ཡོད་རྒྱལ་སྤྱིའི་སྡིངས་ཆའི་སྟེང་བསྐྱལ་ཐུབ་ཐབས་དང་། ཨ་རིའི་དམངས་ཁྲོད་དུ་གནས་ཚུལ་ཇི་མ་ཇི་བཞིན་གོ་རྟོགས་སྤེལ་རྒྱུའི་ཆེད་ཡིན།” ཞེས་གསལ་འདུག

ལས་འགུལ་འདི་ཟླ་འདིའི་ཚེས་ ༣༠ ཉིན་མཇུག་སྒྲིལ་རྒྱུ་ཡིན་པ་དང་། འདི་ནི་རྒྱལ་སྤྱིའི་བོད་རང་བཙན་ལས་འགུལ་ཚོགས་པས་གོ་སྒྲིག་ཞུས་པའི་ལས་འགུལ་ཐེངས་ ༡༩ བ་དེ་ཡིན་པ་རེད། དེའི་སྐོར་གནས་ཚུལ་ཞིབ་ཕྲ་མཁྱེན་རྟོགས་དགོས་མི་རྣམས་ནས་རྒྱལ་སྤྱིའི་བོད་རང་བཙན་ལས་འགུལ་ཚོགས་པསི་ཚོགས་གཙོ་བྷེན་ཇ་མིན་ (Benjamin Cox) cell # ༼༧༧༣༽398 1178 , ངག་དབང་ནོར་བུ་ ༧༨༡ ༥༧༢ ༥༦༡༡ ༼༧༨༡༽ 572 5611 གློག་འཕྲིན་ཁ་བྱང་ ngawang16@yahoo.com དང་། རྒྱུན་ལས་བསྟན་འཛིན་རྣམ་རྒྱལ། ལག་འཁྱེར་ཁ་པར་ཨང་གྲངས་ ༣༡༧ ༦༥༤ ༩༧༤༢ ༼༣༡༧༽ 654 9742 ཐོག་འབྲེལ་བ་ཞུ་དགོས་ཡོད་འདུག

གོམ་བགྲོད་སྐབས་ཀྱི་པར་རིས་ཁག་གཤམ་གསལ།