གཞུང་པ་ཚེ་དབང་བསོད་ནམས།
འདས་པའི་མི་ལོ་དྲུག་བཅུ་ལྷག་ཙམ་རིང་ང་ཚོའི་བོད་དོན་བདེན་མཐའ་སེལ་ཐབས་ལ་གཞུང་མང་གཉིས་ནས་ཐབས་ལམ་འདྲ་མིན་བརྒྱུད་ནས་གང་ཡོང་ཅི་ཡོང་བྱས་ཡོད་ན་ཡང་བོད་རྒྱའི་དཀའ་སྙོགས་སེལ་མ་ཐུབ་པ་མུ་མཐུད་ནས་དཀའ་ངལ་ནང་ལྷག་ཡོད་པ་ནས་ད་ཆ་ང་ཚོའི་ལོ་ཟླ་ཉིན་འབུད་ཞག་འགྱངས་བྱས་ནས་རྒྱལ་སྤྱིའི་ཆབ་སྲིད་རགས་པ་ལ་མགོ་འཁོར་ནས་དུས་ཚོད་འཕྲོ་ལྷག་མ་བཏང་བར་དུས་ཚོད་ལ་བསྲི་ཚགས་བྱས་ནས་བོད་རྒྱའི་དཀའ་སྙོགས་དེ་བོད་རྒྱ་གཉིས་ས་འབྲེལ་ཆབ་སྲིད་༼ Geopolitics ༽ ལ་འགན་འཁུར་ནས་མི་དང་མི་གདོང་ཐུག་ནས་ཕར་བཤད་ཚུར་ཉན་དང་ཚུར་བཤད་ཕར་ཉན་བརྒྱུད་ནས་༧ གོང་ས་མཆོག་གི་སྐུ་དུས་འདིར་བོད་རྒྱའི་དཀའ་སྙོགས་སེལ་དགོས་པ་དེ་བོད་རྒྱ་མི་རིགས་གཉིས་ལ་བསམ་ན་ཤིན་ཏུ་ནས་གལ་ཆེན་ནང་གི་དོན་ཆེན་ངོ་མ་དེ་ཡིན་པའི་ངོས་འཛིན་ཞུ་གི་ཡོད།
བོད་རྒྱ་གཉིས་ས་འབྲེལ་རྒྱལ་ཁབ་ལ་སོང་ཇི་སྲིད་འཇིག་རྟེན་གྱི་ས་ཆེན་པོ་འདི་མ་ཞིག་བར་དེ་སྲིད་དུ་བོད་རྒྱ་གཉིས་ས་འབྲེལ་རྒྱལ་ཁབ་ཀྱི་ངོ་བོར་གནས་དགོས་པ་དེ་དགའ་ནས་གནས་དང་སྡུག་ནས་གནས་གང་ལྟར་མུ་མཐུད་ནས་གནས་དགོས་པ་ལས་འཛམ་གླིང་གི་ས་ཁྲའི་ནང་ཡོད་པའི་ང་ཚོ་བོད་ཀྱི་ས་ཆ་དེ་ཚུར་སྐོག་ནས་འཛམ་གླིང་གི་ལུང་པ་གཞན་ལ་སྤོ་ཐུབ་པའི་ནུས་པ་ད་ལྟའི་ཆ་ལ་སུ་གཅིག་ལའང་མེད་པ་ནས་བོད་རྒྱ་གཉིས་ཀྱི་མ་འོངས་མི་རབས་གསར་པ་ཚོ་ཞི་བདེ་བག་ཕེབས་དང་འཆམས་མཐུན་གྱི་སྤྱི་ཚོགས་ཞིག་ཏུ་གནས་ཐུབ་པའི་འགན་དེ་ད་ལྟའི་བོད་རྒྱ་གཉིས་ཀྱི་མི་ཐོག་འདིའི་ལས་འགན་ཡིན་པའི་ངོས་འཛིན་དང་བཅས་ང་ཚོའི་ད་མུས་བཞིན་འཛམ་གླིང་ནང་ཁ་དམག་རྒྱབ་ནས་དུས་ཚོད་འཕྲོ་ལྷག་ནམ་ཡང་གཏོང་མི་ཉན་པ་དང། སྤྱི་ལོ་ ༡༩༩༧ སྤྱི་ཟླ་ ༩ པའི་ཚེས་ ༡༨ ཉིན་སྤྱི་འཐུས་གྲོས་ཚོགས་ནས་སྤྱི་མོས་གཏན་འབེབས་གནང་བའི་གྲོས་ཆོད་དེ་ནུས་ལྡན་ཐོག་བསྡད་ཡོད་ན་དབུ་མའི་ལམ་གྱིས་དགོས་འདུན་ ༼ རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་མི་རིགས་ས་གནས་རང་སྐྱོང་གི་བཅའ་ཁྲིམས་ནང་གསལ་བའི་རང་སྐྱོང་གི་གནས་བབས་ཚད་ལྡན་ཞིག་གི་དགོས་འདུན་སྟོན་ཡོད་ན། ༽ རྒྱ་ནག་གི་རྩ་ཁྲིམས་ནང་ཡོད་པའི་ཆ་རྐྱེན་དེ་རྒྱ་མིའི་ལག་ནས་ང་ཚོར་ཐོབ་དགོས་པ་ལས་རྒྱ་མིའི་རྩ་ཁྲིམས་ནང་ཡོད་པའི་ཆ་རྐྱེན་དེ་ཕྱིའི་རྒྱལ་ཁབ་སུ་གཅིག་གི་ང་ཚོར་ནམ་ཡང་སྤྲོད་ཀྱི་མ་རེད་ལ་སྤྲོད་ཆོག་པའི་ཁྲིམས་ལུགས་རྒྱལ་ཁབ་སུ་གཅིག་གི་རྩ་ཁྲིམས་ནང་མེད་པ་མ་ཟད་འཛམ་གླིང་མཉམ་འབྲེལ་རྒྱལ་ཚོགས་ཀྱིས་བཅའ་ཁྲིམས་ནང་དུ་ཡང་གསལ་མེད་པ་ངས་ཚིག་ཐག་གཅད་ནས་བཤད་ཐུབ། རྒྱལ་ཁབ་སུ་འདྲ་ཞིག་ཡིན་ཡང་སོ་སོའི་རྩ་ཁྲིམས་ནང་ཡོད་པའི་ཆ་རྐྱེན་དེ་མི་གཞན་ལ་སྤྲོད་རྒྱུའི་དབང་ཆ་དེ་རྒྱལ་ཁབ་དེ་རང་ལ་ཡོད་པ་ལས་གཞན་སུ་ལ་ཡང་མེད་པ་དང། དབུ་མའི་ལམ་གྱི་དགོས་འདུན་དེ་རྒྱ་ནག་གི་རྩ་ཁྲིམས་ནང་ཡོད་པའི་ཆ་རྐྱེན་དེ་ང་ཚོར་དགོས་ཡོད་བཤད་འདུག་ན་དེ་རྒྱ་མིའི་ལག་ནས་ང་ཚོར་ཐོབ་དགོས་སྟབས་རྒྱ་ནག་དང་མཉམ་མི་དང་མི་གདོང་ཐུག་ནས་ཕར་བཤད་ཚུར་ཉན་དང་ཚུར་བཤད་ཕར་ཉན་བརྒྱུད་ནས་བོད་རྒྱའི་དཀའ་སྙོགས་སེལ་དགོས་པ་དེ་ས་འབྲེལ་ཆབ་སྲིད་ལ་འགན་འཁུར་དགོས་པ་དང། ང་ཚོའི་རང་བཙན་བརྩོད་ཀྱི་ཡོད་ན་ཕྱིའི་རྒྱལ་ཁབ་ལ་རོགས་རམ་ཞུས་ནས་རང་ཡུལ་ལེན་ཐུབ་དགོས་པ་ནས་ང་ཚོའི་རང་བཙན་བརྩོད་ཀྱི་མེད་པ་ནས་ཕྱིའི་རྒྱལ་ཁབ་ལ་རོགས་པ་འཚོལ་རྒྱུ་དེ་ནམ་མཁའ་སྟོང་པ་ལ་ལག་མྱུལ་རྒྱབ་ཀྱི་ཡོད་པ་མ་རེད་དམ། གལ་སྲིད་ང་ཚོའི་རང་བཙན་བརྩོད་རྒྱུ་ཡིན་ན་དེ་སྔོན་སྤྱི་འཐུས་གྲོས་ཚོགས་ནས་སྤྱི་མོས་གྲོས་ཆོད་བཞག་པ་དེ་ནུས་མེད་དུ་བཏང་ནས་བཅའ་ཁྲིམས་དོན་ཚན་བཅོ་ལྔའི་ནང་གསལ་བའི་བོད་དོན་བདེན་མཐའ་གསལ་ཐབས་ཟེར་བའི་ཐ་སྙད་དེའི་ཚབ་ཏུ་བོད་རང་བཙན་བརྩོད་ལེན་ཟེར་བའི་ཐ་སྙད་ལ་བསྐྱར་བཅོས་འགྲོ་དགོས་པ་མ་རེད་དམ། ད་ལྟའི་འཛམ་གླིང་གི་ཆབ་སྲིད་འཕེལ་རིམ་ལ་ང་ཚོའི་འགན་འཁུར་ནས་བོད་དོན་བདེན་མཐའ་སེལ་ཐབས་ཀྱི་ཁ་ཕྱོགས་དེ་ནམ་ཡང་ནོར་མི་ཉན་པ་དང། ས་འབྲེལ་རྒྱལ་ཁབ་ཀྱི་ཆབ་སྲིད་ལ་འགན་འཁུར་ནས་བོད་རྒྱ་གཉིས་ཞི་བདེ་མཉམ་གནས་ཐུབ་པའི་གཉིས་མོས་གན་ཡིག་བརྒྱུད་ནས་བོད་རྒྱ་མི་རིགས་གཉིས་འཚོ་ཐུབ་པའི་ཆབ་སྲིད་ཀྱི་གཞི་བརྟན་བཟོ་དགོས་པ་དེ་བོད་རྒྱ་གཉིས་ཀྱི་འགོ་ཁྲིད་ཚོའི་གཡོལ་ཐབས་མེད་པའི་ལས་འགན་ལྕི་པོ་ཞིག་ཡིན་པའི་ངོས་འཛིན་ཞུ་གི་ཡོད། འདས་པའི་མི་ལོ་དྲུག་བཅུ་ལྷག་ཙམ་རིང་ང་ཚོའི་ནུས་པ་གང་ཡོད་དང་ཐབས་ལམ་གང་ཡོད་ཆ་ཚང་བེད་སྤྱད་ནས་བོད་དོན་བདེན་མཐའ་གསལ་ཐབས་ལ་མི་རེ་ངོ་རེའི་ལས་འགུལ་སྤེལ་བའི་བརྒྱུད་རིམ་ནས་ང་ཚོར་ཉམས་མྱོང་དང་བསླབ་ཆ་ཐོབ་པ་རྣམས་ལ་ང་ཚོའི་འགན་འཁུར་ནས་ད་ཆ་ང་ཚོའི་ཆབ་སྲིད་ཀྱི་ཁ་ཕྱོགས་ལ་འགྱུར་བ་བཏང་ནས་བོད་རྒྱ་གཉིས་ས་འབྲེལ་ཆབ་སྲིད་༼ Geopolitics ༽ ལ་འགན་འཁུར་ནས་བོད་རྒྱའི་དཀའ་སྙོགས་སེལ་དགོས་པའི་དུས་ལ་བབས་པ་ནས་རྒྱལ་སྤྱིའི་ནང་ཁ་དམག་ལ་འགན་འཁུར་ནས་སླར་ཡང་དུས་ཚོད་འཕྲོ་ལྷག་ནམ་ཡང་གཏོང་མི་ཉན་པ་ནི་རྒྱལ་ཁབ་དང་མི་རིགས་ཀྱིས་རྩ་དོན་ལ་སོང་བོད་རྒྱའི་དཀའ་སྙོགས་དེ་ས་འབྲེལ་ཆབ་སྲིད་ལ་འགན་འཁུར་ནས་སེལ་དགོས་པའི་དུས་ལ་བབས་མི་འདུག་གམ་། གཞུང་པས། ༢༠༢༣/༠༥/༡༤