དགེ་མཐར།
བོད་རྒྱ་གྲོས་མོལ་ཐེངས་བརྒྱད་པ་དེ་ཕྱི་ལོ་ ༢༠༠༨ ཀྱི་ཟླ་བ་ ༡༠ ཚེས་ ༣༠ ནས་ ཟླ་བ་ ༡༡ ཚེས ༥ ཚེས་ནས་ཚེས་བར་རྒྱ་རི་བློ་གྲོས་འཁོར་རྒྱ་ནག་ལ་ཐོན་པ་དང་རྒྱ་ནག་ཏུ་སླེབས་རྗེས་གནས་ཚུལ་གང་ཡང་མེད་པར་ཉིན་གྲང་མང་ཆེ་བ་བལྟ་སྐོར་ལ་ཕྱིན་ནས་མཐའ་མ་ཉིན་གཉིས་རིང་བགྲོ་གླེང་ཚོགས། ཚོགས་འདུའི་རྗེས་རྒྱ་གར་དུ་བསླེབས་མཚམས་ལྡི་ལིར་བཀའ་ཁྲི་ལ་ངོ་ཐུག་དང་བཀའ་ཁྲི་ནས་སྐབས་འདིའི་གྲོས་མོལ་གྱི་སྐོར་གསར་འགོད་གསལ་བསྒྲགས་དེ་དམིགས་གསལ་ཚོགས་འདུའི་རྗེས་སུ་མ་གཏོགས་མ་བཤད་རྒྱུའི་འབོད་བསྐུལ་གནང་ཚུལ་བརྗོད་དེ་བོད་མི་མང་རྣམས་རྣ་ཅོག་ཀྲོང་ངེར་བཞག སྐབས་འདིར་བསམ་དགོས་པ་ལ་རྒྱ་ནག་ལ་བལྟ་བསྐོར་ལ་བཏང་བ་ཡིན་ནམ་བགྲོས་མོལ་ཆེད་བཏང་བ་རེད་དམ། དུས་ཚོད་མང་བ་བལྟ་སྐོར་ལ་བཏང་དགོས་པ་གང་ཡིན་ནམ། དེ་ནས་གསར་འགོད་གསལ་བསྒྲགས་སྐབས་མཚམས་སུ་མ་གནང་བའི་དགོས་ལ་རྒྱཱུ་མཚན་གང་ཡིན་བཅས་སུས་ཀྱང་རྟོགས་པར་བཀའ།
ཕྱི་ཟླ་ ༡༡ ཚེས་ ༦ ནས་རྒྱ་ནག་གཞུང་ནས་མུ་མཐུད་སྐབས་འདིའི་བགྲོས་མོལ་སྐོར་གྱི་གསར་འགོད་གསལ་བསྒྲགས་རྒྱ་ཆེ་ཞིག་སྤེལ་བ་དང་རྒྱ་རི་བློ་གྲོས་འཁོར་བཅས་ནས་དམིགས་གསལ་ཚོགས་འདུའི་ཉིན་སྔོན་མ་ཕྱི་ཟླ་ ༡༡ ཚེས་ ༡༦ ཉིན་དེ་ལ་གསལ་འགོད་གསལ་བསྒྲགས་ཤིག་སྤེལ། འཆར་གཞི་ལྟར་ན་དམིགས་གསལ་ཚོགས་འདུའི་རྗེས་སུ་མ་གཏོགས་གསལ་བསྒྲགས་དེ་མ་སྤེལ་རྒྱུ་ཡིན་པ་རེད། བགྲོས་མོལ་བརྒྱད་པའི་གསལ་བསྒྲགས་དེ་ད་ལེན་གྱི་དམིགས་བསལ་ཚོགས་འདུའི་སྔོན་ལ་མི་མང་ནས་ཤེས་མི་ཆོག་པ་དང་གསལ་བསྒྲགས་གནང་མི་ནུས་པ་ལ་དགོས་པ་ངེས་ཅན་ཞིག་ཡོད་ངེས་རེད། འགྲོ་ལུགས་ལྟར་ན་བགྲོས་མོལ་བརྒྱད་པའི་གསལ་བསྒྲགས་དེ་མི་མང་ནས་གང་མགྱོགས་ཤེས་དགོས་པ་དང་། དམིགས་གསལ་ཚོགས་འདུའི་སྔོན་ལ་དོན་གནད་དེའི་ཐོག་བསམ་གཞིག་གནང་ཐུབ་པ་ཞིག་དགོས་ན་ཡང་བོད་གཞུང་དབང་འཛིན་པ་རྣམས་ནས་དེ་ལས་ལྡོག་པའི་འཆར་གཞི་འཛིན་པ་དེ་ལ་དགོས་པ་རྒྱུ་མཚན་གང་ཡོོད་ཀྱང་ད་བར་མི་མང་ལ་གསལ་པོ་བཟོས་མེད།
ཕྱི་ནང་གི་གསར་གནས་བརྒྱུད་ལམ་ཁག་ནས་ད་ལམ་གྱི་དམིགས་བསལ་ཚོགས་འདུའི་གནས་ཚུལ་ཉན་སྐབས་ཚོགས་མི་མང་ཆེ་བ་ནས་སྔར་གྱི་བཀའ་མོལ་གསུང་རྒྱུན་སྙིང་པ་རྣམས་སྐྱར་བཟློས་ཙམ་ལས་ཐབ་ལམ་གསར་པ་གང་ཡང་བཤད་རྒྱུ་མེད་པ་ལྟ་བུ་འདུག ད་ལེན་ཚོགས་འདུ་འདིར་བོད་ཀྱི་གཞོན་ནུ་ཚོགས་པའི་ལངས་ཕྱོགས་བོད་རང་བཙན་གཙང་མའི་ལས་འགུལ་དེ་མི་མང་གི་ལས་འགུལ་ཞིག་ཏུ་མི་འགྱུར་བར་བཟོ་ཐུབ་པ་དང་། མི་མང་ནས་བཀའ་སྤྱིའི་བཀའ་གང་གནང་འོག་རལ་གྲི་གནམ་གཡུག་ལྟར་འགྲོ་རྒྱུ་ཞིག་གཏན་འབེབ་ཐུབ་ཡོད་པ་སྲིད། བོད་རང་དབང་རང་བཙན་ནི་ཐོག་མ་ནས་ད་བར་བོད་མི་རྣམས་ཀྱི་ཉིན་རེའི་སྨོན་ལམ་དང་ཉལ་བའི་གཉིད་ལམ། སྐྱོ་བའི་གླུ་ཚིག་དང་ངར་བའི་འབོད་ཚིག སྙིང་གི་ནོར་བུ་དང་གཅེས་པའི་རྒྱུ་ནོར་ལྟར་བཅངས་པ་དེ་ད་ཆ་གཏན་བརྗེད་དུ་གཏོང་དགོས་པ་ཡིན་ནམ།
ཚོགས་མི་མཁྱོན་ཆེ་བ་གཞུང་བཀོས་ལས་སྣེ་བ་ཡིན་སྟབས་ཁོང་ཚོས་གཞུང་གི་ལམ་ལུགས་ལས་ལོགས་སུ་བཤད་ཐབ་མེད་པ་གསལ་པོ་ཡིན་པར་སོང། དོན་དངོས་ལ་ཚོགས་ཆེན་འདིར་མི་མང་སྐྱུས་མའི་བསལ་ཚུལ་ངོ་མ་མཚོན་ཐུབ་བཀའ་བ་ཡང་དོ་སྣང་ཅན་རྣམས་ནས་གསལ་པོ་ཤེས་ཐུབ་པ་ཆགས་ཡོད་པ་ཡིན། མི་མང་གི་ཚོགས་ཆེན་ནི་མི་མང་ནས་གདམས་པའི་འཐུས་མི་རྣམས་ཚོགས་དགོས་པ་ལས་གཞུང་བསྐོས་ལས་མི་མང་ཆེ་བའི་ཚོགས་འདུ་དེས་མི་མང་གི་ཚོགས་ཆེན་ངོ་མ་མཚོན་བཀའ་བས། ད་ལེན་གྱི་ཚོགས་ཆེན་གྱི་ལས་འཆར་བཀོད་བསྒྲིགས་པ་རྣམས་ནས་འགན་ཡག་པོ་ཞིག་མཁྱེར་མ་ཐུབ་པ་དང་ཚོགས་འདུ་འདི་༧གོང་ས་ཆེན་པོའི་བཀའ་དགོངས་དང་བཅའ་འཁྲིམས་ཀྱི་ཚིག་དོན་དང་མཐུན་པ་ངོ་མ་ཞིག་ཆགས་མེད་པར་བློ་ཕམ་ཆེའོ།།
ཐེངས་འདིའི་ཚོགས་འདུ་ལ་བཞག་པའི་སྡོམ་ཚིག་ནག་ལྡང་མ།
ཨ་རི་ཡོ་རོབ་ཕྱོགས་ནས་ཕེབས་པ་དང་། །
ལྷོ་ཕྱོགས་བལ་བོའི་ཡུལ་ནས་བསླེབས་པ་ཚོའི། །
ཨམ་ཕྲག་ནང་གི་ལག་དངུལ་ཉུང་ཉུང་དེ། །
རྒྱ་གར་ཇ་ཁང་ཞིག་ལ་སྤྲད་པ་ཙམ། །
༄༅།། རྩོམ་ཡིག་འབྲི་བའི་དགོས་པ་ཤེས་པ་ནི། རྩོམ་པ་པོ་ཞིག་ལ་མཚོན་ན་གཞི་རྩའི་ཤེས་བྱ་ཞིག་ཏུ་གྱུར་ཡོད། རྩོམ་ཡིག་འབྲི་བའི་དགོས་དོན་ཇི་བཞིན་མ་རྟོགས་པའི་བར་གཞན་ཕན་གྱི་རང་བཞིན་ལྡན་པ་དང་། སྤྱི་ཚོགས་ལ་ཁ་ཕྱོགས་སྟོན་ཐུབ་པའི་རྩོམ་ཡིག་ཅིག་འབྲི་བའི་ནུས་པ་དང་འདུན་པ་གཉིས་ཆ་མེད། དེར་བརྟེན་དྲ་གྲོགས་ཚོས་རང་གི་བཤད་འདོད་དང་འབྲི་འདོད་ཙམ་མིན་པར་བྲིས་པ་དང་བཤད་པ་དེ་ལ་ནང་དོན་ཡོད་པ་ཞིག་ཅིས་ཀྱང་བྱ་དགོས། འདི་ངའི་རྩོམ་པ་པོ་དང་སྐད་ཆ་པ་ཚོ་ལ་གཞི་རྩའི་ལྟ་ཚུལ་ཡིན།