ཚེ་དབང་བསོད་ནམས།
ཆབ་སྲིད་ཀྱི་གནད་དོན་ ༼ Political issue ༽ དང་ཆབ་སྲིད་ཀྱི་དཀའ་རྙོགས་༼ Political Conflict ༽ ཆབ་སྲིད་ཀྱི་འགྲན་རྩོད་ ༼ Political Challenge ༽ ག་འདྲ་ཞིག་ཡིན་ཀྱང་ས་བབ་ཀྱི་གནས་སྟངས་དང་། མི་རིགས་ཀྱི་ངོ་བོ་། སྤྱི་ཚོགས་ཀྱི་འཕེལ་རིམ་། འཁོར་ཡུག་གི་གནས་སྟངས་། རྒྱལ་སྤྱིའི་ཆབ་སྲིད་། ལོ་རྒྱུས་ཀྱི་རྒྱབ་ལྗོངས་སོགས་ཕྱོགས་མང་པོ་ཞིག་ལ་འགན་འཁུར་ནས་ཆབ་སྲིད་ཀྱི་ཐབས་ལམ་ཚོལ་དགོས་པ་ལས་གཡས་ལྟ་དང་གཡོན་ལྟ་གང་ཡང་མ་བྱས་པར་ཆབ་སྲིད་རག་པ་ལ་འགན་འཁུར་ནས་མདུན་འཕྱོངས་བྱེད་ཐུབ་པ་ཙམ་གྱི་ཆབ་སྲིད་ལ་རྒྱལ་ཁ་ཐོབ་རྒྱུ་དང་། ཆབ་སྲིད་ཀྱི་དཀའ་རྙོགས་སེལ་ཐུབ་རྒྱུ་ནི་ཉིན་སྐར་ཙམ་ལས་མ་འདས་པ་དང་། བོད་རྒྱའི་དཀའ་རྙོགས་དེ་སེལ་ཐུབ་པ་ལ་ས་འབྲེལ་ཆབ་སྲིད་ ༼ Geopolitics ༽ ལ་འགན་འཁུར་ནས་གཉིས་སྨན་དབུ་མའི་ལམ་ ༼ Middle way Approach ༽ བརྒྱུད་ནས་བོད་རྒྱ་གཉིས་ཀྱི་འགོ་འཁྲིད་བར་མི་དང་མི་ཐུག་ནས་ཕར་བཤད་ཚུར་ཉན་དང་ཚུར་བཤད་ཕར་ཉན་བྱས་ནས་གཉིས་མོས་ཀྱི་ཐབས་ལམ་ཚོལ་དགོས་པ་ལས་རྒྱལ་སྤྱིའི་སྟེང་ཁ་དམག་ལ་འགན་འཁུར་ནས་བོད་རྒྱའི་དཀའ་རྙོགས་དུས་ནམ་ཡང་སེལ་མི་ཐུབ་པ་ནི་འདས་པའི་མི་ལོ་དྲུག་བཅུ་ལྷག་ཙམ་གྱི་ཉམས་མྱོང་ནས་ང་ཚོར་ངོ་འཕྲོད་ཐུབ་པ་དང་། གཉིས་སྨན་དབུ་མའི་ལམ་གྱིས་དགོས་འདུན་དེ་ཕྱོགས་གཉིས་ངོས་ནས་ཞིབ་ཚགས་པོ་བྱས་ནས་གསལ་པོ་ཤེས་ཐུབ་པ་དང་གོ་རྟོགས་ཐུབ་པའི་ཆེད་སློབ་སྦྱོངས་བྱས་ནས་གཉིས་སྨན་དབུ་མའི་ལམ་ལ་ཡིད་ཆེས་དང་ངེས་པ་རྙེད་ནས་བརྐྱངས་བསྐུམ་ཆབ་སྲིད་ལ་འགན་འཁུར་ནས་ནུས་པ་སྟོན་ནས་ས་འབྲེལ་ཅན་གྱི་བོད་རྒྱ་མི་རིགས་གཉིས་ཀྱི་མ་འོངས་མི་རབས་གསར་པའི་མི་ཚེའི་མདུན་ལམ་དེ་འཆམས་མཐུན་དང་བདེ་སྐྱིད་ལྡན་པའི་སྤྱི་ཚོགས་
༼ Harmony and Happiness Society ༽ཞིག་བསྐྲུན་དགོས་པ་དེ་ད་ལྟའི་བོད་རྒྱ་གཉིས་ཀྱིས་མི་རབས་འདིའི་གཡོལ་ཐབས་མེད་པའི་ལས་འགན་ཞིག་ཡིན་པའི་ངོས་འཛིན་ཞུ་གི་ཡོད་ལ་འདས་པའི་གནས་དོན་ལས་ད་ལྟའི་གནས་སྟངས་དེ་གལ་ཆེ་བར་ངོས་འཛིན་ཞུ་གི་ཡོད་ལ་ད་ལྟའི་གནས་སྟངས་ལས་མ་འོངས་པའི་མདུན་ལམ་དེ་དེ་བས་ཀྱང་གལ་ཆེ་བར་ངོས་འཛིན་ཞུ་གི་ཡོད་ན་བོད་རྒྱ་གཉིས་ཀྱི་འགོ་འཁྲིད་ཚོ་དྲང་བདེན་དང་འདྲ་མཉམ་།ལྷག་བསམ་དང་འགན་འཁུར་།ཆེ་མཐོང་དང་གུས་བརྩི་།རྣམ་དཔྱོད་དང་ཡིད་ཆེས་།ཆོད་སེམས་དང་ནུས་པ་།ཕྱི་གསལ་ནང་གསལ་བྱས་ནས་ས་འབྲེལ་ཅན་གྱི་བོད་རྒྱའི་དཀའ་རྙོགས་དེ་གོང་ས་མཆོག་གི་སྐུ་དུས་འདིར་ངེས་པར་དུ་སེལ་དགོས་པ་ནི་ཆེས་ཛ་དྲག་ཅན་གྱི་གནད་དོན་ཞིག་ལ་ངོས་འཛིན་ཞུ་གི་ཡོད་ལ་གལ་སྲིད་བོད་རྒྱའི་དཀའ་རྙོགས་དེ་གོང་ས་མཆོག་གི་སྐུ་དུས་འདིར་སེལ་མ་ཐུབ་ཚེ་བོད་རྒྱའི་དཀའ་རྙོགས་དེ་རྒྱལ་སྤྱིའི་ཆབ་སྲིད་རྩོད་གླེང་ནང་ཚུད་ནས་ང་གསོན་དང་ཁྱོད་ཤི་ཟེར་བའི་མི་གསོད་ཁྲག་སྦྱོར་གྱི་རྒྱལ་ཕམ་ལོ་རྒྱུས་ནང་ང་ཚོ་ཡང་ཚུད་ནས་བོད་དོན་བདེན་མཐའ་སེལ་རྒྱུ་ཕར་བཞག་ནས་ནང་བསྟན་ཆོས་ལུགས་ནས་བསྟན་པའི་བྱམས་པ་དང་།སྙིང་རྗེ་།འཚེ་བ་མེད་པ་།གཞན་ཕན་ཟེར་བའི་ཐེག་པ་ཆེན་པོའི་ཆོས་ཀྱི་བསླབ་བྱ་དེ་ཚོ་ཡང་བདག་མེད་གོ་མེད་ཚོར་མེད་དུ་མི་ལྷག་པའི་ངེས་པ་མེད་ན་བཙན་བྱོལ་བོད་མིའི་བཅའ་ཁྲིམས་དོན་ཚན་གསུམ་པའི་ནང་འཁོད་པའི་འཚེ་མེད་ཞི་པ་ཟེར་བའི་ཐ་སྙད་དེ་ལ་ང་ཚོའི་འགན་འཁུར་ནས་བོད་རྒྱ་གཉིས་ས་འབྲེལ་ཁྱིམ་མཚེས་རྒྱལ་ཁབ་ལ་བརྩི་བཀུར་ཞུས་ནས་༼ Geopolitics and Neighbourhoods ༽མེ་རྩེ་མེ་གཏུག་དང་ལན་དགུ་ཆད་འཐུད་བྱས་ནས་བོད་རྒྱའི་དཀའ་རྙོགས་སེལ་དགོས་པ་དེ་བོད་རྒྱ་མི་རིགས་གཉིས་ལ་འཁྲི་པའི་ལས་འགན་ཞིག་ཡིན་པ་མ་ཟད་འཛམ་གླིང་གི་ས་ཆེན་པོ་འདི་མ་འཇིག་བར་བོད་རྒྱ་གཉིས་ས་འབྲེལ་ཁྱིམ་མཚེས་བྱས་ནས་བུ་རབས་ཚ་རྒྱུད་རྣམས་མི་ཐོག་ནས་མི་ཐོག་བརྒྱུད་ནས་མི་ཚེ་བདེ་སྐྱིད་ཀྱིས་འཚོ་བ་ལ་རོལ་ཐུབ་པའི་འཁོར་ཡུག་བཟང་པོ་བསྐྲུན་དགོས་པ་དེ་ང་ཚོ་བོད་རྒྱ་མི་རིགས་གཉིས་ཀྱི་མི་ཐོག་འདིའི་ཕྲག་ཏུ་བབས་པའི་གཡོལ་ཐབས་མེད་པའི་ལས་འགན་ཞིག་མ་རེད་དམ་།
ཀོ་ལི་གྷལ་གཞིས་ཆགས་གཞུང་པ་ཚེ་དབང་བསོད་ནམས་ནས་སྤྱི་ལོ་ ༢༠༢༢/༡༡/༡༤ ཉིན་རང་ཁྱིམ་དུ་ཟིན་བྲིས་སུ་བཏབ་།