རས་པ།
—རྡ་རམ་ས་ལའི་”ས་མཐའི་ཁ་བརྡ་”ཞེས་པའི་མཉམ་འཛོམས་སྟེང་བཏོན་པའི་བསམ་ཚུལ་ཅིག
གལ་སྲིད་སྙན་ངག་ནི་བུད་མེད་ཅིག་ཡིན་པའི་དབང་དུ་བཏང་ན་ང་ཚོས་དེ་ལ་ཡག་རབས་རྒྱན་རབས་ཀྱི་སྐད་ཆ་མང་དག་ཅིག་བཤད་པའི་དགོས་པ་ཡོད་སྲིད་མོད། སྙན་ངག་ནི་བུད་མེད་མ་ཡིན་པར་བུད་མེད་ དང་བཅས་པའི་འཚོ་བའི་དགོས་མཁོ་ཞིག་ཡིན་པས་དགོས་མཁོ་དེ་མི་སྡེའི་འཚོ་བའི་ཁྲོད་ཇི་ལྟར་མུ་མཐུད་དུ་འཇུག་རྒྱུ་ཡིན་མིན་གླེང་བ་རྩ་བའི་གནད་འགག་ཡིན། དེ་ཡི་རྐྱེན་གྱིས་ཁོ་བོས་སྙན་ངག་ནི་འཛིན་སྐྱོང་ནས་གླེང་བར་བསམ་སྟེ། དེ་ཡང་ཧ་ཅང་ཉམས་ཆུང་བའི་བཙན་བྱོལ་བའི་འཚོ་བ་འདི་བཞིན་དུ་གླེང་བར་འོས། གྲོགས་པོ་མི་ཉུང་བ་ཞིག་གིས་འཛིན་སྐྱོང་ཞེས་པའི་ཚིག་འདི་གོ་བའི་ཚེ་ཆབ་སྲིད་ཅེས་པའི་ཡོངས་ཁྱབ་རིག་གནས་ཀྱི་འཛིན་སྐྱོང་དེ་ཐུགས་དགོངས་སུ་འཆར་སྲིད་མོད། དེ་ལ་གུས་པས་སྣང་བ་ཅི་ཡང་མི་གཏོང་བར་མུ་མཐུད་ནས་སྙན་ངག་འཛིན་སྐྱོང་གི་གཏན་ཚིགས་རྒྱས་སྤྲས་བྱེད་པར་མོས་པ་ཧ་ཅང་ཆེ། བཙན་བྱོལ་སྤྱི་ཚོགས་ཁྲོད་སྙན་ངག་གམ་སྒྱུ་རྩལ་རྩོམ་རིག་ལ་ཆེ་མཐོང་མེད་པ་དང་། སྒྱུ་རྩལ་རྩོམ་རིག་གིས་མིའི་འཚོ་བའི་དགོས་མཁོ་སྐོང་མི་ཐུབ་པར་ལྟ་བའི་ལྟ་ཚུལ་ཐོན་པ་ལ་ཁོ་བོས་རང་རེའི་སྤྱི་ཚོགས་ལ་རྒྱུས་མེད་ཡིན་པའི་ལྟ་ཚུལ་འཛིན་གྱི་ཡོད་ཅིང་། དེ་ཡི་རྒྱུ་མཚན་ནི་མ་མཐའ་ཡང་སྒྱུ་རྩལ་རྩོམ་རིག་གི་ཆེད་དུ་མཉམ་འཛོམས་བྱེད་ཐུབ་པའི་མིག་ཁག་ཅིག་མངོན་སུམ་འཛེམས་མེད་ཀྱིས་ཡོད་པས་ཡིན།
གལ་སྲིད་རང་རེའི་ཚོགས་སྡེ་འདི་ནི་སྒྱུ་རྩལ་རྩོམ་རིག་དང་ཁ་བྲལ་ན་སྐད་ཡིག་དང་སྐད་ཆའི་མཛེས་པ་ཟེར་བ་རི་མགོ་མཐོན་པོའི་ན་བུན་བཞིན་རིམ་པར་ཡལ་འགྲོ་རྒྱུ་ཡིན་པའི་བསམ་བློ་གཏོང་སྟངས་ཤིག་ཁོ་བོར་ཡང་ཡང་སླེབས་ཀྱི་འདུག སྤྱི་ཚོགས་སྐད་བརྡ་རིག་པའི་ངོས་ནས་བཤད་ན་སྐད་ཆ་ནི་མཛེས་པ་ནས་མཛེས་པར་ཕྱོགས་ཤིང་། སྐད་ཆའི་མཛེས་པ་ནི་སྒྱུ་རྩལ་རྩོམ་རིག་གི་བརྗོད་ཐབས་ཀྱི་མཛེས་པ་དེ་ཉིད་རིམ་པ་གཉིས་པར་བགྲོད་པ་ཞིག་ཡིན། སྒྱུ་རྩལ་རྩོམ་རིག་གི་མཛེས་པ་ཡིས་མི་དང་མིའི་དབར་གྱི་འབྲེལ་ལམ་རྒྱུན་གནས་ལ་ནུས་པ་བླ་ན་མེད་པ་ཐོན་ཡོད། འབྲེལ་ལམ་རྒྱུན་གནས་ཀྱི་ནུས་པ་འདི་ནི་སྒྱུ་རྩལ་རྩོམ་རིག་ལ་བརྟེན་ནས་བྱུང་ཞིང་། སྐད་ཆའི་བཤད་ཐབས་ཀྱི་ནུས་པ་དེའང་སྒྱུ་རྩལ་རྩོམ་རིག་གིས་སྤྱི་ཚོགས་ལ་ཤུགས་རྐྱེན་ཐེབས་པ་ལས་འབྱུང་གི་ཡོད། འདི་དག་ནི་སྙན་ངག་ངོས་ནས་བཤད་ན་ཆ་ཤས་ཤིག་ཡིན་ཞིང་། སྙན་ངག་ཟེར་བའི་རིག་གནས་འདི་གླེང་དགོས་ན་ཐད་ཀར་བསམ་པའི་དཔལ་ཡོན་གྱི་ཁོར་ཡུག་དེ་རུ་འགྲེལ་བ་འཛུགས་དགོས། སྙན་ངག་ནི་བསམ་པའི་དཔལ་ཡོན་ཁྲོད་ཀྱི་གལ་ཆེའི་གོ་གནས་འཛིན་པའི་རིག་གནས་མ་ལག་ཅིག་ཡིན་པས་འདི་ཡི་འཛིན་སྐྱོང་སྤྱི་ཚོགས་ཁྲོད་ཕྱིར་འདོན་བྱེད་པ་ལའང་འཛིན་མཁན་དག་གི་བསམ་པའི་དཔལ་ཡོན་ལ་ངོས་འཛིན་གསལ་བོ་དགོས་པ་ཧ་ཅང་གལ་ཆེན་ཡིན།
ང་ཚོས་སྙན་ངག་དང་སྒྱུ་རྩལ་རྩོམ་རིག་སྤྱི་ཚོགས་ཐོག་བཀྲམ་ཐུབ་པ་དང་། དེ་ཡི་ཁོར་ཡུག་རྒྱ་བསྐྱེད་དགོས་ན་གཙོ་བོ་མི་སྒེར་སོ་སོའི་ངོས་ནས་སྒྱུ་རྩལ་རྩོམ་རིག་གི་ལྟ་བ་གསལ་འདོན་བྱེད་ཐུབ་དགོས་ཤིང་། མི་སྒེར་སོ་སོའི་ལྟ་བ་ནི་ད་གཟོད་སྒྱུ་རྩལ་རྩོམ་རིག་རྒྱུན་གནས་དང་། གོང་འཕེལ། སྲོག་ཤིང་ཡོད་པ་ཅན་དུ་བགྲོད་པའི་ཁྱབ་བསྒྲགས་ཡིན། ལྟ་ཚུལ་འདི་ཡི་ངོས་ནས་བཤད་ན་”ས་མཐའི་ཁ་བརྡ་”ནི་ང་ཚོའི་མི་སྒེར་སོ་སོའི་སྒྱུ་རྩལ་ལྟ་ཚུལ་གསལ་འདོན་བྱེད་རྒྱུ་ནས་མགོ་བརྩམ་ན་ཡང་དག་པ་ཡིན། བོད་ཀྱི་སྒྱུ་རྩལ་རྩོམ་རིག་ནི་རང་གི་ལོ་རྒྱུས་ངོས་ནས་ཀྱང་ཡུལ་མི་དག་གིས་རང་བཞིན་གྱིས་ངོས་ལེན་བྱས་པ་ཞིག་ཡིན་པ་ལས། ངོས་ལེན་བྱེད་ཆེད་སྤྱི་ཚོགས་ལ་ཤུགས་རྐྱེན་ཐེབས་པར་ལས་རིམ་དེ་འདྲ་བྱུང་མྱོང་མེེད། ཚུལ་འདི་ནི་ང་ཚོས་གནའ་བོའི་ཡར་ཀླུང་གི་རས་པའི་ཚོགས་སྙན་ངག་འཚོ་བའི་ཁྲོད་དུ་སྤྱི་ཚོགས་ལ་ཇི་ལྟར་མཉམ་ཞུགས་གནང་བའི་ལོ་རྒྱུས་ལ་ཕྱིར་རྟོག་གནང་ཚེ་གསལ་མཁྱེན་ཡོང་ངེས།
དུས་ཕྱིས་སུ་༸རྗེ་བཙུན་མི་ལ་རས་པ་དང་། ༸རྒྱལ་བ་ཚངས་དབྱངས་རྒྱ་མཚོ་སོགས་ཀྱིས་སྒྱུ་རྩལ་རྩོམ་རིག་གི་ལམ་ཁ་དེ་རྒྱུན་འཛིན་གནང་ཡོད་ནའང་༼སྙན་ངག་མེ་ལོང་མ་༽བོད་བསྒྱུར་རྗེས་ནས་བོད་ཀྱི་སྙན་ངག་གིས་རང་བྱུང་གི་རྣམ་པ་དེ་དོར་ནས་རིག་གཞུང་གཅིག་གི་ཁོར་ཡུག་གི་སྙན་ངག་ཏུ་སོང་ཡོད་པ་དང་། དེ་ཡང་སངས་རྒྱས་ཆོས་ལུགས་ཀྱི་ཁྱབ་བསྒྲགས་རིག་གནས་དང་། ཆོས་ལུགས་པའི་མངོན་འདོད་རྒྱུད་བསྒྲགས་ཀྱི་ལམ་ཁ་ལྟ་བུ་ཞིག་ཏུ་གྱུར་ཡོད། འདི་ལས་ང་ཚོས་ཚོར་ཐུབ་པ་ནི་༼སྙན་ངག་མེ་ལོང་མ་༽བོད་དུ་དར་བ་ནས་བོད་ཀྱི་རྩོམ་པ་པོ་རྣམས་ནས་རྩོམ་པ་པོའི་དམིགས་བསལ་གཤིས་ཀ་དོར་ནས་རིག་གནས་གཅིག་ཁྱབ་སྤེལ་མཁན་གྱི་རྣམ་དཔྱོད་འོག་ཏུ་ཚུད་སོང་བ་དེ་རེད། ༼སྙན་ངག་མེ་ལོང་མ་༽རང་ངོས་སུ་བལྟས་ཚེ་སྙན་ངག་འདི་དག་ནི་༼སྙན་ངག་མེ་ལོང་མའི་༽ཤུགས་རྐྱེན་ཡིན་པར་ངོས་འཛིན་མི་བྱེད་པར་རང་རེའི་ཡུལ་གྱི་རྩོམ་པ་པོ་རྣམས་སྐུ་གསུང་ཐུགས་ཀྱི་ཡོན་ཏན་བརྗོད་པའི་བསྟོད་རྩོམ་དེ་དག་ལས་འདའ་མ་ཐུབ་པར་ངོས་འཛིན་བྱེད་ཀྱི་ཡིན།
༼སྙན་ངག་མེ་ལོང་མ་༽ས་མཚམས་དབྱེ་འབྱེད་ཀྱི་མཚམས་ཚིགས་སུ་བཞག་པ་ནི་༼སྙན་ངག་མེ་ལོང་མས་༽བོད་ཀྱི་སྙན་ངག་གི་བསམ་བློ་དང་ཚོར་བ་སོགས་སུ་ཤུགས་རྐྱེན་ཐེབས་པར་བརྗོད་པ་མ་ཡིན་པར་བོད་ཀྱི་སྙན་ངག་གིས་ཕུལ་དུ་བྱུང་བའི་རང་བྱུང་གི་རྣམ་པ་ནས་མགོ་བརྩམས་ཏེ་སྙན་ངག་བསླབ་གཞི་ཅན་དུ་སླེབས་སྐབས་སྙན་ངག་ཆོས་ལུགས་སུ་གྱུར་བར་བློ་ཕམ་སྐྱེས་པས་ཡིན། ཡིན་ནའང་། འབྲི་ཐབས་ཀྱི་ཆ་ནས་བཀའ་དྲུང་ཤེལ་དཀར་གླིང་བ་དང་། མཁས་དབང་དགེ་འདུན་ཆོས་འཕེལ་སོགས་ཁ་ཤས་ཀྱིས་ཚགས་ཡངས་པའི་སྙན་ངག་བྲིས་ཡོད་ཅིང་། འདི་དག་ནི་སྔ་རབས་བོད་ཀྱི་སྙན་ངག་པའམ་གཞུང་ལུགས་སྨྲ་བ་དེ་དག་ལ་རྒྱུན་འཛིན་དང་གསར་གཏོད་ཀྱི་ཁྱད་ཆོས་གཉིས་འཛོམས་སུ་ཁ་ཕྱོགས་ཏེ་ང་ཚོར་སྙན་ངག་བྱུང་བའི་ཁྲོད་ཀྱི་ལེགས་སྐྱེས་གལ་ཆེན་ཆགས་ཡོད། དུས་རབས་གོང་མའི་ལོ་རབས་བརྒྱད་ཅུ་བ་ནས་བྱུང་བའི་བོད་ཀྱི་སྙན་ངག་གིས་ཕྱི་རབས་པའམ་དེང་གི་རྩོམ་འབྲི་བ་རྣམས་ལ་རྩོམ་རིག་གསར་བའི་བྱུང་བ་གླེང་སྐབས་ལོ་ངོ་ཁ་ཤས་ཀྱི་སྣོན་པ་རྒྱབ་ཡོད་མོད། རང་རེའི་རྩོམ་ཡིག་མང་དག་ཅིག་ནི་རྩོམ་རིག་གི་གཤིས་ཀའི་ངོས་ནས་བཤད་ཚེ་འཚོ་བའི་ཁྲོད་ཀྱི་རྒྱུན་གནས་བྱ་སྤྱོད་བསྐྱར་འགོད་བྱས་པ་ཞིག་དང་། འཚོ་བའི་ཁྲོད་ཀྱི་གནད་དོན་ཡིག་ཐོག་ཏུ་ཕབ་པ་ཞིག་ལས་ངོས་འཛིན་གསར་བ་དང་། ཀློག་པ་པོར་དྲི་བ་གསར་བ་སླེབས་པ། བརྗོད་ཐབས་གསར་བའི་འཕེལ་རྒྱས་བཅས་ལ་དོ་སྣང་གནང་མེད་པའི་ཚད་དུ་ཡོད། དེའི་རྐྱེན་གྱིས་ཚོར་བ་གསལ་བོ་ཡིན་པའི་ཚོགས་སྡེ་ཁྲོད་དུ་སྒྱུ་རྩལ་རྩོམ་རིག་ལའང་སྤྱི་ཡོངས་མཉམ་འཇུག་གི་རྒྱུན་གཤིས་ཆགས་ཤིང་། རང་ཉིད་ཀྱི་ཟུར་བཏོད་ཁྱད་ཆོས་གསལ་བོར་མངོན་མ་ཐུབ་པ་དེ་ནི་སྒྱུ་རྩལ་རྩོམ་རིག་གི་འཛིན་སྐྱོང་འཐུས་ཤོར་ཆེ་ཤོས་དང་། རྩོམ་པ་པོ་རེ་རེས་རང་ཉིད་ཀྱི་རྣམ་དཔྱོད་ལ་ཉམས་ཉེས་བཏང་བ་ཁོ་ནར་ཐུག་འདུག
ངས་བསམ་པ་ལ་རང་རེའི་སྤྱི་ཚོགས་འདིའི་ནང་དུ་སྒྱུ་རྩལ་རྩོམ་རིག་གི་རྣམ་པ་གསལ་བོ་དང་། བརྗོད་ཐབས་གསར་བ། ངོས་འཛིན་བརྟན་པོ་བཅས་སླེབས་ཐུབ་པ་ཡིན་ན་ད་གཟོད་སྒྱུ་རྩལ་རྩོམ་རིག་ལ་རང་བཞིན་གྱིས་མོས་པ་ཅན་ཐོན་ཞིང་། མོས་པ་དེ་ནི་འདུན་པ་དང་། ལེགས་བཅོས། གསར་གཏོད་སོགས་ཀྱི་ཕུལ་དུ་བྱུང་བའི་སྔོན་འགྲོ་ཡིན། འདི་ནི་བརྗོད་ཐབས་གཞན་བྱས་ན་སྒྱུ་རྩལ་རྩོམ་རིག་གིས་མི་རྣམས་ལ་ཚོར་བ་ཅི་སླེབས་དངོས་སུ་མྱང་དུ་བཅུག་སྟེ་རང་མོས་ཀྱིས་གདམས་ཀ་བྱེད་པར་ནུས་པ་འདོན་རྒྱུ་དེ་ཡིན། ང་ཚོས་སྒྱུ་རྩལ་རྩོམ་རིག་མི་རྣམས་ཀྱི་སེམས་སུ་དྲིལ་བསྒྲགས་ཀྱི་རྣམ་པ་སྤྱད་ནས་ཚུར་བོས་པ་ཡིན་ན། མི་དེ་དག་ལ་སྒྱུ་རྩལ་རྩོམ་རིག་གི་མྱོང་རྒྱུས་ཟབ་པའི་བག་ཆགས་སླེབས་མི་ཐུབ་པ་མ་ཟད། ཐ་ན་ཁོ་ཚོ་སྒྱུ་རྩལ་རྩོམ་རིག་གི་ཀློག་པ་པོ་ཙམ་ཡང་འཁྱོངས་མི་ཐུབ་པ་ཡིན། ཡིན་ནའང་། སྒྱུ་རྩལ་རྩོམ་རིག་གིས་སྤྱི་ཚོགས་ལ་མཉམ་ཞུགས་བྱེད་དགོས། བཤད་སྟངས་འདི་ནི་སྤྱི་ཚོགས་ལ་ཡོངས་སུ་བསྟུན་དགོས་པར་གོ་བ་བླངས་ཚེ་རྩོམ་པ་པོའི་གསར་གཏོད་ཀྱི་ཧམ་སེམས་ལ་དོ་ཕོག་འབྱུང་རྒྱུ་ཡིན་པ་ཀུན་གྱིས་མཁྱེན་ངེས་རེད།
སྙན་ངག་མཁན་ཐའེ་ཀོར་ལགས་ཀྱིས་རང་བྱུང་ཁོར་ཡུག་གི་མཛེས་པ་སྤྱད་ནས་མི་རྣམས་ཀྱི་སེམས་སུ་འཛུལ་བ་དང་། རང་བྱུང་ཁོར་ཡུག་གི་མཛེས་པ་གཅིག་པུ་ད་གཟོད་ཁོང་གི་བྱེད་ཐབས་དང་མངོན་མཚོན་ཐ་སྙད་དུ་བླངས་ཡོད་པ་དང་། ལྷག་པར་ཏུ་སྙན་ངག་མཁན་ཐའེ་ཀོར་ལགས་ནས་རྒྱ་གར་རང་གི་གནའ་བོའི་ངོས་འཛིན་ལྟ་ཚུལ་དང་སྒེར་གྱི་ལྟ་སྟངས་གཉིས་ཟུང་འབྲེལ་གྱིས་སྙན་ངག་གི་རྒྱས་སྤྲས་མཛད་པ་ནི་ཁོང་རྩོམ་པ་པོའི་མིང་མཛོད་ནང་དུ་མ་ནུབ་པར་ཡུན་རིང་གནས་ཐུབ་ཡོད་པའི་རྒྱུ་མཚན་གསལ་བོ་དེ་ཡིན། གཞན། ཧྥ་རིན་སའི་སྙན་ངག་པ་བྷོ་རྡི་ལེར་ལགས་ནས་བྱ་དངོས་དག་ལ་འགྲེལ་བཤད་གསར་བ་བསྐྱོན་ནས་མི་རྣམས་ཀྱི་ཀླད་པའི་བར་སྟོང་དུ་དྲི་རྟགས་བཞག་པ་ནི་ང་ཚོའི་མིག་དཔེ་ལྟ་ཡུལ་ཡིན་འོས་ཤིང་། ཁོང་གི་འདམ་སྙིགས་གསེར་བསྒྱུར་གྱི་རིག་པ་ནི་རང་རེ་རྣམས་སྤྱི་ཚོགས་ཞེས་ཕལ་བ་རྣམས་ཀྱི་བློ་ཡུལ་དུ་མི་ཤོངས་པ་དེ་རུ་འཇུག་པའི་ཐབས་ཡང་དག་པ་ཞིག་ཏུ་བསམ། འདི་ལྟ་བུའི་སྙན་ངག་གི་ཡིད་འགྱུ་གསལ་འདོན་སྒྱུ་རྩལ་ནི་རང་ཅག་ལ་ཧ་ཅང་གི་རྒྱུས་མེད་མ་ཡིན་པར་རང་རེའི་སྙན་ངག་གི་ལོ་རྒྱུས་ལ་ཕྱིར་བལྟས་བྱས་པ་ཞིག་ཏུའང་གྱུར་ཡོད།
གནའ་བོའི་བོད་ཀྱི་སྙན་ངག་ཁྲོད་ཚོར་བ་རང་བྱུང་ཁམས་སུ་སྤེལ་བ་དང་། རང་བྱུང་ཁམས་ཚོར་བར་བསུས་པའི་ཕུལ་དུ་བྱུང་བའི་ཚོར་བརྗེས་ལག་ཐབས་ཀྱི་སྒྱུ་རྩལ་མངའ་བའི་སྙན་ངག་”ང་ཡི་ཆུང་འདྲིས་བྱམས་པ།། རྫ་རིའི་འོག་གི་ཆུ་རེད།། ཆུ་སྒྲ་ཤང་ཤང་མ་གཏོགས།། ཆུ་རྒྱུན་མཐོང་རྒྱུ་མི་འདུག །”ཅེས་པ་ལྟ་བུ་ཡོད་ཅིང་། འདི་ལྟ་བུའི་སྙན་ངག་གིས་ང་ལ་སྒྱུ་རྩལ་རྩོམ་རིག་གི་ཀློང་ཁམས་ཆེན་མོར་མྱུར་དུ་བགྲོད་པའི་རྨི་ལམ་ཡང་ཡང་གཏོང་དུ་འཇུག་པ་མ་ཟད། འདི་ལྟ་བུའི་སྙན་ངག་འཛིན་སྐྱོང་གི་གཏན་ཚིགས་ལ་བསམ་བློ་བཏང་ནས་”ང་ཚོའི་”གཤིས་ཀ་ལ་ཟུར་བཏོད་ཀྱི་ཁྱད་ཆོས་བསྐྲུན་རྒྱུར་གལ་འགངས་ཆེ་བའི་བསམ་ཚུལ་བསྐྲུན་ཡོང། ཡིན་ནའང་། འདི་ནི་རྩོམ་འབྲི་བར་བློ་མོས་ཡོད་པ་ཞིག་གིས་ཧམ་སེམས་ཀྱི་ངོས་ནས་བཤད་པ་ལས་གུས་པོ་རང་ཉིད་ལ་ད་དུང་འབད་བརྩོན་གྱི་ཡུལ་དུ་ལྷགས་ཡོད།
[གསལ་བཤད།] འདི་ནི་ཕྱི་ལོ་ ༢༠༠༩ ལོའི་བོད་ཀྱི་ལོ་སར་ཚེས་གཅིག་ཉིན་ཡུལ་གྱར་རྩོམ་པ་པོ་ཁག་ཅིག་གི་འདུ་འཛོམས་”ས་མཐའི་ཁ་བརྡ་”ཞེས་པའི་འཛོམས་ཐེངས་གསུམ་པའི་སྐབས་སུ་བསམ་ཚུལ་སྙན་སྒྲོན་ཞུས་པའི་མ་ཟིན་ཞིག་ཡིན།
མ་གོ་ཐལ། ཅིག་བཤད་ནི་ཡོད་རྒྱུ་རེད། མེ་ལོང་མས་ཅང་མི་རིག་གི། ཐེ་ཀོར་དང་བྷོ་རྡི་ལེར་གཉིས་ལས་རྐུ་བཤུས་རྒྱོབས་ལབ་གི་ཡོད་པ་ཨེ་རེད། ཨེ་ཡིན།
སྒྱུ་སྩལ་བ་ཞིག་བྱེད་འདོད་ན། དང་པོ་རང་ཉིད་སྤྲང་པོའི་མི་ཚེ་ལ་ལོངས་སྤྱོད་པའི་འདོད་པ་དང་བློ་སྤོབས་ཡོད་དགོས་བ་རེད། སྒྱུ་སྩལ་བ་དང་ཡི་གེ་བ་གཉིས་ཁ་ཁ་རེད། ཡི་གེ་བ་ཡིན་ཚད་སྒྱུ་སྩལ་བ་ཡིན་མི་དགོས།
ཡི་གེ་ནི་འཚོ་བའི་ལག་ཆ་ཞིག་ཡིན། སྒྱུ་སྩལ་ནི་དུང་པའི་ཁ་ཕྱོགས་ཤིག་ཡིན།
༼གུས་པོ་རང་ཉིད་(ལ)་ད་དུང་འབད་བརྩོན་གྱི་ཡུལ་དུ་ལྷགས་ཡོད།༽ ལ་དོན་དེ། ཐེཀོར་གྱི་འབྲི་ཚུལ་རེད་དམ། བྷོ་རྡི་ལེར་གྱི་རེད། མེ་ལོང་མ་ན་དེ་འདྲ་ཞིག་མེད་ཚོད་ཡིན། ཧ་ཧ་ཧ།
ཡག་གི་