ད་ཐེངས་ཀྱི་ཏོག་གསར་ནད་དུག་ཨོ་མི་ཁེ་རུང་ཞེས་པ་ནི་སྔར་ཚུལ་གྱི་ཡུན་ཐུང་བ་དང་། འགོས་ཁྱབ་ཀྱི་འགྲོས་མགྱོགས་ལ་འགོས་སྟོབས་ཆེ་བ་གང་ཞིག ། ནད་ཞུགས་ཡུལ་གཙོ་བོ་གློ་ཡུ་དང་གྲེ་བ་ལྟ་བུ་དབུགས་ལམ་སྟོད་དུ་གནས་པས་ཁྱོན་ཡོངས་ནས་ནད་རྟགས་དང་ནད་གཞིའི་དཀྱེལ་ཆུང་བའི་རྣམ་པ་དང་ཁྱད་ཆོས་ལྡན་པ་ཞིག་ཏུ་སྣང་།
དེ་ཡང་ནད་ཀྱི་ཞུགས་ཡུལ་དང་། ནད་རྟགས། གསོ་ཚུལ་བཅས་གསུམ་གྱི་ཐད་ནས་གཞིགས་ན་རང་རེའི་གཞུང་གི་ཆམ་རིམས་གསོ་བ་ལས་གྲེ་ཆམ་དང་འདྲ་བའི་ཆ་མང་དུ་སྣང་ཞིང་། ལྷག་པར་ནད་རྟགས་མི་མངོན་པའི་ནད་པ་དང་ནད་གཞི་དཀྱེལ་ཆུང་བའི་ནད་པ་ལྟ་བུ་ལ་མཚོན་ན། མིག་སྔའི་གསོ་ཚུལ་གྱི་རྩ་དོན་ཡང་གཙོ་བོ་ཟུར་བཀག་བལྟ་སྐྱོང་བྱེད་པ་གཙོ་ཆེ་ཞིང་། དེ་ནི་རང་རེའི་རྒྱུད་ལས། བཅོས་ཐབས་གྲེ་ཆམ་ཟས་སྤྱོད་གཟབས་པས་འཚོ། ཞེས་གསུངས་པ་དང་གཞི་རྩའི་དགོངས་དོན་གཅིག་མཚུངས་ལྟ་བུར་སྣང་།
སྐབས་བབས་བཅོས་བསྐྱེད་ཀྱི་ཚད་གཞི་ཇི་ལྟ་བུ་ཞིག་ལ་བརྟེན་ནས་བོད་ལུགས་གསོ་རིག་གིས་ད་ཐེངས་ཏོག་གསར་ནད་གཞི་སྨན་བཅོས་བྱས་པའི་ཁྱད་ཆོས་དང་དགེ་མཚན་མངོན་པར་བྱ་དགོས་མིན་ནི། རང་རེས་ཏོག་གསར་བཅོས་པའི་རྒྱུད་རིམ་ཧྲིལ་པོའི་ནང་ཡིད་གཟབ་དང་དོ་སྣང་བྱ་དགོས་པ་ཞིག་ཡིན་ཏེ། མིག་སྔར་རང་རེའི་གསོ་ཐབས་སྤྱོད་བཞིན་པའི་ནད་རྟགས་མི་མངོན་པ་དང་ཡང་ན་དཀྱེལ་ཆུང་བའི་ནད་པ་ལྟ་བུར་མཚོན་ན། དེ་བས་ཀྱང་རང་ལུགས་གཞུང་དང་འཚམས་ལ་སྐབས་བབ་ནད་གཞིའི་ཁྱད་ཆོས་དང་མཐུན་པའི་བཅོས་བསྐྱེད་ཚད་གཞི་ཡང་དག་ཅིག་མེད་ན་མི་རུང་ཞིང་། དེ་ལ་བརྟེན་ནས་རང་རེའི་གསོ་རིག་གི་གསོ་བཅོས་ཁྱད་ཆོས་མངོན་ཐུབ་པ་བྱ་རྒྱུ་ནི་གལ་ཆེ་བ་ཡིན།
ནད་གཞི་འདིའི་གསོ་ཚུལ་དང་གསོ་ཐབས་ཀྱི་གཉེན་པོ་ནི་ཏོག་གསར་གློ་ཚད་ནད་ཀྱི་བོད་ལུགས་གསོ་བ་རིག་པའི་འགོག་བཅོས་ཇུས་གཞིར་༼ཚོད་སྤེལ་ཐེངས་བཞི་པ་༽གཏན་འཁེལ་ཟིན་པའི་ནང་དོན་ལྟར་ལག་ལེན་དང་ལག་བསྟར་བྱས་ན་ཆོག་ཅིང་། གཤམ་ལ་ཏོག་གསར་ནད་གཞི་ལས་ནད་རྟགས་མི་མངོན་པ་དང་ནད་གཞི་དཀྱེལ་ཆུང་གཉིས་ཀྱི་བཅོས་བསྐྱེད་ཚད་གཞི་དང་དེའི་ཐབས་ལམ་འཆར་འགོད་ཐད་ལ་བསམ་འཆར་འགའ་ཞུ་འདོད་དེ།
དང་པོ། ནད་རྟགས་མི་མངོན་པའི་ནད་པའི་བཅོས་བསྐྱེད་ཚད་གཞི་འཛིན་སྟངས།
༡ གདགས་གཤིས་ནས་སྲིབ་གཤིས་སུ་འགྱུར་བའི་དུས་ཚད།
རྒྱལ་ཁབ་ཀྱི་ཏོག་གསར་གློ་ཚད་འགོག་བཅོས་ཇུས་གཞི་༼ཨང་དགུ་པ་༽ལྟར་ན། ནད་རྟགས་མི་མངོན་པའི་ནད་པ་དག་གྲུ་ཚང་སྨན་ཁང་དུ་ཉར་ནས་བལྟ་ཞིབ་བྱ་བའི་ཚད་གཞི་སྤྱིར་བཏང་ཉིན་བདུན་དུ་གསུངས་ཡོད་ཅིང་། དེས་ན་རང་རེའི་གསོ་ཐབས་སྤྱད་པ་དང་མ་སྤྱད་པའི་ནད་པའི་བར་གྱི་གདགས་གཤིས་ནས་སྲིབ་གཤིས་སུ་འགྱུར་བའི་དུས་ཚད་ནི་གཞི་འཛིན་ས་ཞིག་ཏུ་འཇོག་ཆོག་སྙམ།
༢ ནད་རྟགས་མེད་པ་ནས་ནད་རྟགས་ཅན་དུ་འགྱུར་བའི་ཚད།
ནད་རྟགས་མི་མངོན་པའི་ནད་པ་འགའ་རེ་ནད་འགྱུར་དབང་གིས་ནད་རྟགས་ཅན་དུ་འགྱུར་བ་ཡིན་ཞིང་། དེས་ན་རང་རེའི་གསོ་ཐབས་སྤྱད་པའི་ནད་པ་དག་ནད་རྟགས་ཅན་དུ་འགྱུར་མི་འགྱུར་དང་། དེའི་བསྡུར་ཚད་ལ་ཤུགས་རྐྱེན་ཇི་ཙམ་ཐེབས་མིན་དེ་ཡང་གཞི་འཛིན་ས་ཞིག་ཏུ་འཇོག་ཆོག་སྙམ།
༣ ཉིང་སྐྱུར་བརྟག་དཔྱད་ཀྱི་Ctགྲངས་ཚད།
རྒྱལ་ཁབ་ཀྱི་ཏོག་གསར་གློ་ཚད་འགོག་བཅོས་ཇུས་གཞི་༼ཨང་དགུ་པ་༽ལྟར་ན། ནད་རྟགས་མི་མངོན་པའི་ནད་པ་གྲུ་ཚང་སྨན་ཁང་དུ་བལྟ་ཞིབ་བྱས་ནས་ཉིན་དྲུག་པ་དང་བདུན་པ་སོ་སོར་ཉིང་སྐྱུར་བརྟག་དཔྱད་རེ་བྱ་དགོས་ཤིང་། དེའི་ཚད་གཞི་ནི་Ct值均≥35དང་ཡང་ན་སྲིབ་གཤིས་མངོན་ཚེ་གཞི་ནས་གྲུ་ཚང་ནས་ཕྱིར་ཐོན་པའི་ཚད་དུ་འཛིན། དེས་ན་གལ་ཏེ་ཆ་རྐྱེན་ལྡན་ཚེ་རང་རེའི་གསོ་ཐབས་སྤྱད་པའི་ནད་པའི་གསོ་བཅོས་སྔ་རྗེས་ཀྱི་ཉིང་སྐྱུར་Ctགྲངས་ཚད་༼ནད་དུག་འགོས་ཚད་༽དེ་ཡང་གཞི་འཛིན་ས་ཞིག་ཏུ་འཇོག་ཆོག་སྙམ།
༤ ནད་གཞི་བསྐྱར་ལོག་འབྱུང་ཚད།
ནད་རྟགས་མི་མངོན་པའི་ནད་པ་དག་གསོ་བཅོས་རྗེས་སྲིབ་གཤིས་སུ་འགྱུར་ནས་གྲུ་ཚང་སྨན་ཁང་ནས་ཕྱིར་ལོག་རྗེས། བསྐྱར་དུ་ནད་པ་དེ་དག་ལ་གསོ་རིག་བལྟ་ཞིབ་ལེགས་པར་བགྱིས་ཏེ་ནད་གཞི་བསྐྱར་ལོག་གམ་ཡང་ན་ཡང་བསྐྱར་གདགས་གཤིས་སུ་འགྱུར་མིན་དེ་ཡང་གཞི་འཛིན་ས་ཞིག་ཏུ་འཇོག་ཆོག་སྙམ་ལ། འདིའི་བལྟ་ཞིབ་ཀྱི་དུས་ཚད་ནི་ནད་པ་དྲག་བསྐྱེད་བྱུང་ནས་བརྩིས་པའི་ཟླ་བ་གཅིག་ཙམ་བཟུང་ན་ཅུང་ཟད་འཚམས་པར་མངོན།
༥ ནད་རོའམ་ནད་གཞུག་ལུས་མིན་གྱི་བལྟ་ཞིབ།
སྤྱིར་ན་ཏོག་གསར་ནད་དུག་འགོས་པའི་ནད་རྟགས་མི་མངོན་པའི་ནད་པ་དང་ནད་གཞི་དཀྱེལ་ཆུང་བ་སོགས་ལ་ནད་གཞུག་ལུས་པ་ཧ་ཅང་དཀོན་པར་གསུངས་ཤིང་། འོན་ཏེ་ཆ་རྐྱེན་ཡོད་མཁན་ཚོས་ནད་པ་དེ་དག་ལ་རྒྱུན་བསྲིངས་ཏེ་བརྩད་འདྲིའི་ལམ་ནས་བལྟ་ཞིབ་འདྲ་བྱ་ཐུབ་ནའང་ལེགས་པར་མངོན་ལ། དེ་ཡང་གཞི་འཛིན་ས་ཞིག་ལ་འཇོག་ན་ཆོག་སྙམ། འོན་ཏེ་འདིའི་བལྟ་ཞིབ་ཀྱི་དུས་ཡུན་ཅུང་ཟད་རིང་བ་ཡིན།
གཉིས་པ། ནད་གཞི་ཡང་བའམ་དཀྱེལ་ཆུང་བའི་ནད་པའི་བཅོས་བསྐྱེད་ཚད་གཞི་འཛིན་སྟངས།
༡ ནད་རྟགས་ཀྱི་ཞི་ཚད།
ཏོག་གསར་ནད་དུག་ཨའོ་མི་ཁེ་རུང་ཞུགས་སའི་གནས་ཀྱི་ཁྱད་པར་སོགས་ལས་ནད་རྟགས་གཙོ་བོ་ཚ་བ་རྒྱག་པ་དང་། གློ་ལུ་བ། མགོ་ན་བ། གྲེ་བ་དང་རྐན་མཚུལ་ཚ་བའམ་ན་བ། ལྕེའི་རོ་ཚོར་ཉམས་པ་སོགས་འབྱུང་བར་བཤད་ཅིང་། དེས་ན་ང་ཚོའི་གསོ་ཐབས་སྤྱད་པའི་ནད་པ་དག་ལ་གསོ་བཅོས་ཀྱི་རྒྱུད་རིམ་ཧྲིལ་པོའི་ནང་གོང་གི་ནད་རྟགས་རྣམས་ཀྱི་ཞི་ཚད་ལ་བལྟ་ཞིབ་གང་ཡག་བགྱིས་པ་དང་། ལྷག་པར་གསོ་ཐབས་གཞན་སྤྱད་པའི་༼ཕྱི་ལུགས་ཀྱི་སྨན་ལྟ་བུ་༽ནད་པ་ཁག་དང་བསྡུར་བ་བྱ་ཐུབ་ན་དེ་བས་ལེགས་པར་མངོན།
༢ རྩ་ཆུ་ལྕེ་གསུམ་དང་ལུས་པོའི་མངོན་ཚུལ་གཞན་གྱི་གཞི་འཛིན་ས།
གསོ་བཅོས་སྔ་རྗེས་གཉིས་སམ་ཡང་ན་གསོ་བཅོས་ཀྱི་རྒྱུད་རིམ་ཁྲོད་རྩ་ཆུ་ལྕེའི་ཁྱད་པར་དང་དེ་བཞིན་ལུས་པོའི་མངོན་ཚུལ་གཞན་ལ་བལྟ་ཞིབ་ཐུབ་ན་ཤིན་ཏུ་ལེགས་ཀྱང་སྐབས་བབས་ནད་གཞི་འདི་ཉིད་འགོས་ཁྱབ་ཆེ་བ་སོགས་ཀྱི་རྐྱེན་ཅི་རིགས་པས་འདི་ནི་སྒྲུབ་དཀའ་བ་ཞིག་ཡིན།
༣ གདགས་གཤིས་ནས་སྲིབ་གཤིས་སུ་འགྱུར་བའི་དུས་ཚད།
གོང་གི་ནད་རྟགས་མི་མངོན་པའི་ནད་པའི་གདགས་གཤིས་ནས་སྲིབ་གཤིས་སུ་འགྱུར་བའི་དུས་ཚད་དང་གཞི་འདྲ་བར་འཆར་འགོད་བྱས་ན་ཆོག །
༤ ནད་གཞི་དཀྱེལ་ཆུང་བ་ནས་དཀྱེལ་ཆེ་བར་འགྱུར་བའི་ཚད།
ནད་གཞི་ཡང་བའམ་ནད་རྟགས་ཆུང་བ་ནས་ནད་གཞི་ལྕི་བའམ་ནད་རྟགས་ཆེ་བར་འགྱུར་བའི་ཚད་དང་། དེ་ལ་ཞིབ་བསྡུར་གྱིས་རང་རེའི་གསོ་ཐབས་ཀྱིས་ཐོན་པའི་ནུས་པའམ་ཤུགས་རྐྱེན་ཇི་ཙམ་ལྡན་མིན་དག་གཞི་འཛིན་ས་ཞིག་ཏུ་འཇོག་ཆོག་སྙམ། གལ་ཏེ་རང་རེའི་གསོ་བཅོས་ཀྱི་ཐབས་ལམ་ལ་བརྟེན་ནས་ནད་གཞི་ལྕི་བར་འཕེལ་འགྱུར་བྱ་ཚད་ལ་ཚོད་འཛིན་ཐེབས་ཚེ། དེ་ནི་བཅོས་བསྐྱེད་ཚད་གཞི་ཤིན་ཏུ་ལེགས་པ་ཞིག་ཡིན།
༥ ཉིང་སྐྱུར་བརྟག་དཔྱད་ཀྱི་Ctགྲངས་ཚད།
གོང་གི་ནད་རྟགས་མི་མངོན་པའི་ནད་པའི་ཉིང་སྐྱུར་བརྟག་དཔྱད་ཀྱི་Ctགྲངས་ཚད་དང་འདྲ་བར། ནད་གཞི་ཡང་བའི་ནད་པའི་གསོ་བཅོས་སྔ་རྗེས་ཀྱི་Ctགྲངས་ཚད་ལ་དཔྱད་དཔོག་བྱ་རྒྱུའང་གཞི་འཛིན་ས་ཞིག་ཡིན།
༦ ནད་གཞི་བསྐྱར་ལོག་འབྱུང་ཚད།
ནད་གཞི་ཡང་བའི་ནད་པ་དག་གསོ་བཅོས་རྗེས་སྲིབ་གཤིས་སུ་འགྱུར་ནས་སྨན་ཁང་ནས་ཕྱིར་ལོག་རྗེས། བསྐྱར་དུ་ནད་པ་དེ་དག་ལ་གསོ་རིག་བལྟ་ཞིབ་ལེགས་པར་བགྱིས་ཏེ་ནད་གཞི་བསྐྱར་ལོག་གམ་ཡང་ན་ཡང་བསྐྱར་གདགས་གཤིས་སུ་འགྱུར་མིན་དེ་ཡང་གཞི་འཛིན་ས་ཞིག་ཏུ་འཇོག་ཆོག་སྙམ་ལ། འདིའི་བལྟ་ཞིབ་ཀྱི་དུས་ཚད་ནི་ནད་པ་དྲག་བསྐྱེད་བྱུང་ནས་བརྩིས་པའི་ཟླ་བ་གཅིག་ཙམ་བཟུང་ན་ཅུང་ཟད་འཚམས་པར་མངོན།
༧ ནད་རོའམ་ནད་གཞུག་ལུས་མིན་གྱི་བལྟ་ཞིབ།
སྤྱིར་ན་ཏོག་གསར་ནད་དུག་འགོས་པའི་ནད་གཞི་དཀྱེལ་ཆུང་བ་དག་ལ་ནད་གཞུག་ལུས་པ་ཧ་ཅང་དཀོན་པར་གསུངས་ཤིང་། འོན་ཏེ་ཆ་རྐྱེན་ཡོད་མཁན་ཚོས་ནད་པ་དེ་དག་ལ་རྒྱུན་བསྲིངས་ཏེ་བརྩད་འདྲིའི་ལམ་ནས་བལྟ་ཞིབ་འདྲ་བྱ་ཐུབ་ནའང་ལེགས་པར་མངོན་ལ། དེ་ཡང་གཞི་འཛིན་ས་ཞིག་ལ་འཇོག་ན་ཆོག་སྙམ། འོན་ཏེ་འདིའི་བལྟ་ཞིབ་ཀྱི་དུས་ཡུན་ཅུང་ཟད་རིང་བ་ཡིན།
གོང་གི་ནད་པ་དག་ལ་ད་དུང་གསོ་བཅོས་ཀྱི་ཕན་ནུས་ལ་དཔྱད་དཔོག་བྱ་ཕྱིར་དེང་རབས་བརྟག་ཐབས་ལས་ལུས་པོའི་ནད་འགོག་གི་བརྟག་དཔྱད་རྣམ་གྲངས་དང་། དེ་བཞིན་ནད་གཞི་ལྕི་བར་འགྱུར་རིགས་ལ་གློག་པར་ཁང་གི་བརྟག་དཔྱད་ཁག ། དེ་མིན་བཅོས་དང་ནད་གཉི་གའི་ཆ་ནས་ལུས་པོའི་དོན་སྣོད་སོགས་ཀྱི་ནུས་པར་ཤུགས་རྐྱེན་ཐེབས་མིན་གྱི་གཞི་འཛིན་ས་དེང་རབས་ཀྱི་མཆིན་པ་དང་མཁལ་ནུས་ཀྱི་བརྟག་དཔྱད་སོགས་བྱུང་ན་བཅོས་བསྐྱེད་ཀྱི་ཚད་གཞིར་རུང་ཡང་། སྐབས་བབབ་མཐུན་རྐྱེན་དང་ནད་གཞིའི་འགོས་ཁྱབ་ཤུགས་ཆེ་བ་སོགས་ཀྱི་རྐྱེན་ཅི་རིགས་པས་ཅུང་ཟད་སྒྲུབ་དཀའ་བར་སྣང་། གཞན་ད་དུང་གོང་ཞུས་བཅོས་བསྐྱེད་ཚད་གཞི་ཁག་ཕུད་པའི་གཞན་ཅི་རིགས་མཆིས་ཀྱང་འདིར་ལྷན་ཐབས་སུ་མཐུད་ན་ཆོག་པས་རྣམ་དཔྱོད་ཅན་ཚོས་ ཐུགས་སྣང་མཛོད།
མདོར་ན། རང་རེའི་གསོ་རིག་གིས་ཏོག་གསར་ནད་གཞི་འདི་ཉིད་གསོ་བཅོས་བྱ་བར་རིག་གཞུང་གི་རྨང་གཞི་ཁུངས་བཙུན་པ་དང་། གསོ་བཅོས་ཀྱི་གཉེན་པོ་ཕུན་སུམ་ཚོགས་པ། གོང་རིམ་གྱི་རྒྱབ་སྐྱོར་ཤུགས་ཆེ་བ། སྨན་པ་ཚོའི་ལྷག་བསམ་ཁ་དཀར་བ་སོགས་ཀྱི་མཐུན་རྐྱེན་དང་ཁྱད་ཆོས་དུ་མ་མངའ་ཞིང་། དེར་བརྟེན་རང་རེའི་གསོ་ཐབས་ཀྱི་ཐུན་མིན་ཁྱད་ཆོས་དང་ཕན་འབྲས་དག་དེང་རབས་ཀྱི་དགོས་མཁོ་དང་འཚམས་པར་ར་སྤྲོད་གསལ་སྟོན་བྱ་ཆེད། འདིར་ཕན་འབྲས་དཔྱད་དཔོག་གམ་བཅོས་བསྐྱེད་ཚད་གཞི་ཁག་ཅིག་གྲུ་ཚང་སྨན་ཁང་གི་སྨན་པར་མྱོང་བ་དངོས་ཀྱི་བཀའ་འདྲི་དང་། དེ་བཞིན་འབྲེལ་ཡོད་མཁས་པ་འགར་བཅར་འདྲི་དང་གྲོས་མོལ་ཞུས་པ་བརྒྱུད་དེ་དག་ལ་ཕྱོགས་བསྡོམས་ཀྱིས་གང་ནུས་འགོད་པར་བྱས་ཤིང་། ཞིབ་ཕྲའི་འཆར་འགོད་ཇི་འདྲ་བྱ་མིན་ནི་རང་རང་གི་སྐབས་བབས་མཐུན་རྐྱེན་ལ་གཞིགས་ནས་གང་ལ་དེ་འཚམས་འཆར་འགོད་བྱས་ན་ཆོག ། འདི་ལ་ད་དུང་ཆད་ལྷག་ལོག་པའི་རིགས་མཆིས་ན་ལྷག་བསམ་ཅན་ཚོས་མ་གསང་མྱུར་དུ་ཡོ་བསྲང་ཡོད་པ་མཁྱེན། །
བོད་རང་སྐྱོང་ལྗོངས་སྨན་རྩིས་ཁང་། བུ་ཆུང་ཚེ་རིང་།
སྤྱི་ལོ་༢༠༢༢ལོའི་ཟླ་༨ཚེས་༢༢ཉིན།
དཔྱད་གཞིའི་ཡིག་ཆ་གཙོ་བོ།
བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད།
རྒྱལ་ཁབ་ཀྱི་ཏོག་གསར་གློ་ཚད་འགོག་བཅོས་ཇུས་གཞི་༼ཨང་དགུ་པ།༽
ཏོག་གསར་གློ་ཚད་ནད་ཀྱི་བོད་ལུགས་གསོ་བ་རིག་པའི་འགོག་བཅོས་ཇུས་གཞི།༼ཚོད་སྤེལ་ཐེངས་བཞི་པ།༽