མགྲིན་སྒྲ།
<<ཡ་ཧུ་དཱ་པའི་སློབ་གསོའི་མན་ངག>>བཀླགས་རྗེས་ཞོར་དུ་བོད་ཀྱི་ལོ་ཙཱ་རྣམས་ལ་བཀའ་དྲིན་ཞུས་པ།
ལྟོས་བཅས་ཀྱིས་བཤད་ན། ང་ཚོས་བོད་འགྱུར་དཔེ་ཚོགས་ཕོན་ཆེན་ཞིག་མཇལ་ཐུབ་ཀྱི་ཡོད་ཅིང་། འདི་དག་ཀློག་རིམ་བཞིན་ང་ལ་རྟག་པར་དགའ་བ་དང་སྤོབས་པ་གང་འཚམ་སྦྱིན་གྱི་འདུག་ལ་ཡང་སྒོས་ལོ་ཙཱ་བ་རྣམས་ཀྱི་བཀའ་དྲིན་དམིགས་བསལ་ཚོར་འཇུག་གི་འདུག
ང་ཚོས་ནམ་ཞར་སྔར་གྱི་ལོ་ཙཱ་བ་རྣམས་ཀྱི་བཀའ་དྲིན་ནི་བརྗོད་ཀྱིས་མི་ལང་ཞེས་ལབ་ཀྱང་ལབ་ཀྱི་ཡོད་ཅིང་དོན་དུའང་དེ་ག་རང་རེད། དེ་བཞིན་ཕྱིས་སམ་དེང་གི་ཆར་ཡང་ཡིག་རིགས་འདྲ་མིན་ནས་རིག་ཚན་སྣ་ཚོགས་བོད་སྒྱུར་གནང་བཞིན་པས་ཀྱང་རང་རེའི་བློ་གྲོས་ཀྱི་སྒོ་མོ་འབྱེད་པར་དངོས་སུ་རམ་འདེགས་གནང་བཞིན་ཡོད་ཅིང་། མ་ཟད། བོད་འགྱུར་དེབ་ཅིག་བཀླགས་པའི་བློ་བསྐྱེད་དེ་གཞན་ཡིག་ནས་དེབ་མང་བཀླགས་པའི་བློ་བསྐྱེད་ལས་ལྷག་སྟེ། དུས་ཚོད་མང་ཆེ་བ་ནི་གདམ་གསེས་ལ་རྨོངས་འགྲོ་བ་ཡིན་ནོ་ཞེས་རོགས་ཤིག་གིས་བཤད་མྱོང་ལ་རང་གིས་ཀྱང་གཏམ་འདི་ནི་ཤིན་ཏུ་འཐད་པར་འདོད་དེ། དམིགས་ཡུལ་དང་དུས་ཚོད། རྣམ་གྲངས། སྤུས་ཀ་བཅས་ཕྱོགས་གང་ཐད་ནས་བལྟོས་ཀྱང་དཔེ་དེབ་ཀློག་རྒྱུ་ཙམ་མིན་པར་གདམ་གསེས་ཤེས་རྒྱུའང་ཤིན་ཏུ་གནད་འགག་ཡིན་པས་སོ།།
<<ཡ་ཧུ་དཱ་པའི་སློབ་གསོའི་མན་ངག>>ཀྱང་རང་རེའི་ན་ཆུང་རྣམས་ཀྱི་མཐོང་རྒྱར་དམིགས་ཏེ་དེང་གི་ཁ་ལུགས་དང་མཐུན་ཞིང་མཚམས་རེར་གནའ་ཡི་གསུང་སྒྲོས་ཀྱི་ཁྱད་ཆོས་ཀྱང་སྦྱོར་འདུག ལྷག་པར་དུ་བརྗོད་བྱ་ནི་ཆེད་དུ་རང་རེའི་དངོས་ཡོད་སློབ་གསོའི་དཀའ་ངལ་སེལ་ཐབས་སུ་དམིགས་ཏེ། ཡ་ཧུ་དཱ་པའི་གཏམ་རྒྱུད་སྒུལ་ཤུགས་ཅན་གང་མང་མཆན་འགྲེལ་ལྟ་བུས་མཚམས་སྦྱོར་དང་བཅས་ཏེ་སྒྱུར་སྒྲིག་གནང་འདུག་ཅིང་། དཔེ་དེབ་འདི་ནི་ཆེད་དུ་བོད་ཀྱི་ཕ་མ་རྣམས་ལ་དམིགས་ཏེ་སྒྱུར་སྒྲིག་གནང་ཡོད་པའི་གསལ་འདེབས་ཀྱང་གནང་འདུག
དོན་ངོ་མར་འཁང་ར་དང་འཁོན་སེམས་ཀྱིས་མི་ཚེ་བརླག་བརྩིས་མེད་ཀྱང་། ཉེ་བའི་ཆར་སྲིད་སྟེགས་ཆུང་ཆུང་ཞིག་དང་ཕྱོགས་གཏོགས་ཉི་ཚེ་བའི་ཕྱིར་དུ་གོང་འོག་ཚང་མ་སྨྱོས་པ་ལྟར་དངོས་ཡོད་སོ་སོ་ཐེ་བའི་མང་ཚོགས་ལ་སེམས་ཁུར་བྱ་རྒྱུ་ལྟ་ཅི། ཤེས་བཞིན་དུ་གཏམ་འཆལ་གང་ཐུབ་ཀྱིས་འཆད་དེ། མཐར་གཏུགས་ན་སོ་སོ་རང་ཉིད་མགོ་སྐོར་བའི་སྣང་ཚུལ་ཡི་མུག་པ་སྤེལ་གྱིན་པ་འདིར་བལྟོས་ནས་བཤད་ན། དཔེ་དེབ་འདི་ནི་དོན་ངོ་མའི་མང་ཚོགས་ལ་སེམས་ཁུར་དང་མང་ཚོགས་ཀྱི་དཀའ་ངལ་སེམས་ཐབས་སུ་སྣང་བས། འདི་ནས་དེབ་འདིའི་སྒྱུར་སྒྲིག་པ་སྐུ་ཞབས་ཉི་གཞོན་ལགས་གཙོས་པའི་བོད་ཀྱི་ལོ་ཙཱ་བ་ཡོངས་ལ་ཀློག་པ་པོ་སྒེར་ངོས་ནས་ཐུགས་རྗེ་ཆེ་ཞེས་སེམས་གཏིང་ནས་ཞུ་བ་འདོད་དོ།།
ཞེས་2016.3.11 དགོང་མོར་<<ཡ་ཧུ་དཱ་པའི་སློབ་གསོའི་མན་ངག>>བཀླགས་གྲུབ་པ་དང་སྐད་འཕྲིན་གྱི་བར་སྟོང་དུ་ཤར་མར་བྲིས་སོ།།
ཡིག་སྒྱུར་པ་ཚོར་སྔོན་ཆད་འཇིག་རྟེན་མིག་ཅེས་བཏགས་པ་འདིས་ཁོང་ཚོར་གདེང་འཇོག་ཅི་ཙམ་བྱས་ཡོད་མེད་ཤེས་ཐུབ་ཀ