གཡང་སྐྱབས་རྒྱལ།
————————
ངས་འཐེན་ཐུག་བསྐོལ་རྒྱུའི་ཆེད་དུ་གྲོ་ཕྱེ་བརྫིས་ཚར། ཚལ་དང་ཤ་གཏུབས་ནས་རྔོ་རྒྱུའི་གྲ་སྒྲིག་བྱེད་བཞིན་ཡོད། དུས་དེར་རྒྱ་གྲི་རྣོན་པོ་དེའི་ཁ་ཤོར་ནས་ངའི་ལག་གཡོན་མའི་མཐེ་བོང་གི་རྩེའི་སེན་མོ་ལ་ཕོག སེན་མོའི་དཀྱིལ་ལ་འཁེལ་ནས་མར་ཟུག་སྟེ་མཐེ་བོང་གི་ཤ་ངོ་ནས་བཅད། ཁྲག་དམར་ཚར་རེ་ཐོན།
ངའི་ཤག་རོགས་ཚེ་རིང་ཡང་ལས་ཀ་གྲོལ་ནས་ནང་ལ་སླེབས་ཡོད་ཅིང་། ཁོས་བརྙན་འཕྲིན་ནང་གི་གསར་འགྱུར་ལ་ལྟ་བཞིན་འདུག ངས་སྐད་བརྒྱབ། “ཁོ་རེ། ཁྲུས་ཁང་ནང་ནས་རྨ་དཀྲིས་ཤིག་འཁྱེར་ཤོག་དང་”
“གང་བྱས་སོང་།”
“ངས་མཛུ་གུ་གཏུབས་སོང་། གྲིའི་ཁ་ཤོར་ནས།” ངས་རང་གི་ལག་པ་གཡས་པས་མཐེ་བོང་དེ་དམ་པོར་བསྡམས། ཁྲག་གི་ཐིགས་པ་རྣམས་ཕྱི་ལ་མི་ཤོར་བའི་ཐབས་བྱས། མཚམས་དེར་ཚེ་རིང་རྒྱུགས་ནས་སླེབས་སོང་།
“ག་པར། ག་པར་” ཟེར། རྨ་དཀྲིས་ཀྱི་ཐུམ་རལ་ནས་གྲ་སྒྲིག་བྱས། ངས་ཀྱང་མཐེ་བོང་ཕྱི་ལ་བཏོན་ནས་ཁོར་བསྟན། ཁོས་རིམ་གྱིས་ངའི་མཐེ་བོང་དེ་རྨ་དཀྲིས་ཀྱིས་བཏུམས་རྗེས། “ཁོ་རེ། འདི་ལ་གཏུབས་སོང་ཟེར་གི་མ་རེད། གཏུབས་ན་མཛུ་གུའི་ཕྱེད་ཀ་ས་ལ་ལྷུང་འགྲོ་བ་ཞིག་དགོས་པ་རེད། འདི་ལ་རྨ་བཟོ་སོང་ཟེར་གི་རེད། རྨ་ཆུང་ཆུང་ཆུང་ཞིག་བཟོས་སོང་ལབ་ན་འགྲིག་པཱ།”
“མ་རེད། རྨ་བཟོ་སོང་ཟེར་བ་དེ་ཁྱེད་ཚོ་ལྷ་སའི་ཚིག་རེད། ང་ཚོ་ཨ་མདོ་བས་ མཛུ་གུ་གཏུབས་བཞག་ཐ། ཟེར། ཡང་མིན་ན། མཛུ་གུ་བཅད་བཞག་ཐ་ཟེར། དེ་མིན་ན། ཅུང་ཙམ་གཤགས་བཞག་ཐལ། ཟེར།” ངས་འཐེན་ཐུག་གི་དགུང་ཟས་བསྐྱུར་ནས་བྱ་ཚིག་གི་རྩོད་པའི་ནང་ཞུགས།
“ག་རེ་ལབ་གི་ཡོད་རང་། བཅད་དང་གཏུབས་གང་ཡིན་ཡང་དུམ་བུ་དུམ་བུ་བཟོ་དགོས་རེད། འདི་རྨ་རེད། བྱས་ཙང་རྨ་བཟོ་སོང་ཟེར་དགོས་རེད། ཨ་མདོ་ནི་ཨ་མདོ་རང་ཡིན།”
ངས་བསམ་བློ་ཞིག་བཏང་། གྱེན་དུ་སྐྱེས་པའམ་ཡོད་པའི་ཅ་ལག་ཅིག་གཏུབས་ན་བཅད་ཟེར། དཔེར་ན། རྩྭ་བཅད། ཤིང་བཅད། འཕྲེད་དུ་སྐྱེས་པའམ་ཡོད་པའི་ཅ་ལག་ཅིག་གཏུབས་ན་གཏུབས་ཟེར། དཔེར་ན། ཤ་གཏུབས། ཚལ་གཏུབས། གཏུབས་དང་བཅད་ལ་དུམ་བུར་འགྲོ་དགོས་པའི་ངེས་པ་མེད། ཟུར་ཙམ་གཏུབས་པའམ་ཡང་ན་ཕྱེད་ཙམ་གཏུབས། ཡང་ན་ཧྲིལ་པོར་གཏུབས་པ་གང་ཡིན་ཡང་གཏུབས་དང་བཅད་གཉིས་ཀ་འཇུག་བསམས། ངའི་ང་རྒྱལ་ཇེ་ཆེར་སོང་།
“ཁོ་རེ། ཁ་བཙུམས། ཁྱེད་རང་ལྷ་ས་བ་ཚོས་བྱ་ཚིག་ཤེས་མི་ཡོང་། རྨ་བཟོ་ཟེར་གི་རེད། རྨས་གཅིག་པུ་ལབ་ན་སྐྱོན་ག་རེ་ཡོད་རེད། ཚིག་འཕར་མ་ལ་དགའ་འ་ལ། དཔེར་ན། འཛིན་བཟུང་བྱས། གསལ་བསྒྲགས་བྱེད། ཁྱོད་ཚོ་ལ་ཚིག་འབྲུ་གསུམ་ལས་ཉུང་བའི་བྱ་ཚིག་ཅིག་མེད་པཱ།” མུ་མཐུད་ནས་རྩོད་པ་བྱེད་འདོད།
“ཁོ་རེ། འགྲིག་ག འགྲིག་ག ང་གྲོད་ཁོག་ལྟོགས་གི ཐུག་པ་དེ་མགྱོགས་ཙ་བསྐོལ་ད། འོང་གོ”
ཐག་པ་དང་སྐུད་པ། བར་མཚམས། ཁྲག་སོགས་བཅད་ནས་ཆད།
གྲི་ཡིས་ཤ་བཅད་ནས་ཆོད།
ཟོར་བས་རྩ་བྲེགས་ནས་ཕྲོགས
ཟོག་ལེས་ཤིང་གཏུབས།
ཁེ་གྲིས་སྐྲ་བཞར།
མཚོན་གྱིས་རྨ་བཏོད་ལྟ་བུ་མཚམས་རེར་བྱེད་པ་པོ་ཕལ་བ་གང་ཡིན་ལ་ཡང་འབྲེལ་བ་མེད་འགྲོ ཡིན་ན་ཡང་། སྐད་ཟེར་བ་འདི་ལ་དག་མ་དག་ཅིག་བཤད་རྒྱུ་ཨེ་ཡོད། རྒྱུན་སྤྱོད་ཀྱི་སྐད་ཅིག་ཡིན་ཕྱིན་དེ་ཡི་གེའི་ནང་བྲིས་ནས་འགྲོ་རྒྱུ་རང་རེད། ཡི་གེའི་ནང་ཁྲིམས་ཤིག་བཟོས་ནས་དུས་ནས་དུས་སུ་འགྱུར་བའི་རང་བཞིན་ཅན་གྱི་སྐད་དེ་འགྱུར་མེད་གནས་དགོས་པར་བསམ་ན་དེ་ནི་རྨི་ལམ་སྐྱིད་པོ་ཞིག་རྨིས་པ་ཙམ་རེད།
ལུང་ཚན་གྱི་སྐད་མ་གཅིག་པ་ལ་བརྟེན་ནས་གད་མོ་ཤོར་དགོས་པ་དེ་འདྲ་ཡང་སེ་ཡོང་གི་འདུག ངས་ཕ་ཡུལ་དུ་ད་ཟ་མ་བཟོ་ཞེས་བཤད་པར་ཚང་མས་ང་ལ་འཕྱ་ལས་རྒྱབ་སོང་། ཟ་མ་ལས་དགོས་རེད། ཁབ་ཀྱིས་བཟོ་དགོས་རེད་ཟེར། ཡང་ཐེངས་གཅིག་གློག་བསད་ཤོག་ཟེར་ནས་ཡང་སྐྱར་འཕྱ་དགོད་ཅིག་ཉོས། གློག་སེམས་ལྡན་མིན་ན་ཆི་གས་གསོད་དགོས་རེད་ཟེར། གློག་བཏའ་དགོས་རེད་ཟེར། དེ་ནི་སྐད་རེད། དེ་ལ་འགྲིག་མ་འགྲིགས་ཤིག་བཤད་རྒྱུ་ཡོད་མ་རེད།
ཟོག་ལེ་ཟེར་ཡ་ཡོད་མ་རེད། སོག་ལེ་བྲིས་ལོ།
ཧ་ཅང་ཡག་པོ་ཞིག་བྲིས་འདུག ངེད་ཀྱིས་མགྱོགས་པོར་རང་གི་གྲོགས་པོ་གསུམ་ལ་གློག་འཕྲིན་བརྒྱུད་ནས་རྩོམ་ཐུང་འདི་བསྐུར་བ་ཡིན།
བྱ་ཚིག་དང་བརྡ་སྤྲོད་པའི་སྐོར་ལ་རྨང་གཞི་ཡག་པོ་ཞིག་མེད་ན། ཡིག་རྩ་བརྟན་པོ་ཞིག་མི་འཁྱོངས་བ་ཡང་བདེན་པ་རེད་སྙམ།
བྱ་ཚིག་གི་རྯོད་པ་བྱས་པ་ཧ་ཅང་གི་ཡག་པོ་འདུག་ རྗེས་ལ་ཤ་ཐུག་གི་རྩོད་པ་མ་སོང་ངམ
ཕན་ཐོག་གི་མ་རེད། སྐད་གཅིག་པ་བཟོ་དགོས་རེད། དེ་ནས་ཡི་གེ་གཅིག་པ་བཟོ་དགོས་རེད། ལྐུགས་པ་ནི་ལྐུགས་པ་རང་རེད། ག་དུས་ཡིན་ནའི་རྟ་མཇུག་ལ་དབྱུགས། འཁོར་ལོ་སྔོན་ལ་འབུད་མཁན་ཤ་སྟག་རེད།
དང་པོ་ཨམ་སྐད་དེ་མེད་པ་བཟོས། གཉིས་པ། ཁམས་སྐད་དེ་མེད་པ་བཟོས། གསུམ་པ་ལྷ་སའི་ཡུལ་སྐད་དེ་མེད་པ་བཟོས་ནས། བོད་སྤྱི་ལ་དབང་བའི་སྐད་གཅིག་བཟོ་དགོས་རེད། དེ་ནས་སྐད་དེ་ཡི་གེ་ལ་བཀོལ་བྱེད་སྤྱི་སྐད་ཀྱི་བོད་ཡིག་གཅིག་བཟོ་དགོས།
ཕན་མི་ཐོག་པའི་བྱ་ཚིག་རྐྱང་པ་གཅིག་གཉིས་ལ་བརྩོད་པ་བརྒྱབ་ནས་སྡད་ན་གཟི་བརྗིད་རེད་བསམ་གྱི་འདུག་གམ།
ཨ་ག་རེ། ཁྱོད་ཤོད་དང་། མཛུ་གུ་བཏུབས་ཟེར་དུས། ཕྱེད་ཀ་ས་ལ་ལྷུངས་ནས། སྐད་ངན་ཤོར་ཡས་ཀྱི་སྒང་ལ་སླེབས་འཚར་ཡོད། ཤ་བཏུབས་ཟེར་དུས། ཤ་ལ་གྲི་ཆུང་ཆུང་ཞིག་བརྒྱབ་ནས་བཞག་ན་དེ་ལ་བཏུབས་ཟེར་རམ།
ཨ་ཙི། ལྐུགས་པ་ཁྱོད་ཚོས་ངོ་མ་བོད་འདི་ལ་རེ་བ་མེད་པ་བཟོ་བཞིན་འདུག
གྲོགས་པོ་རྣམ་པ། བོད་ལ་སྤྱི་ལ་ཁྱབ་པའི་སྐད་ཡིག་ཅིག་བཟོ་དགོས་པ་ངེས་བདེན་རེད། ཡིན་ན་ཡང་ཨམ་སྐད་དང་ཁམས་སྐད་མེད་པ་བཟོ་ཉན་གྱི་མ་རེད་ད། ཨམ་མདོའི་སྐད་མེད་པ་བཟོ་དུས་ཨམ་མདོ་བ་མེད་པ་བཟོ་གི་ཡོད་རེད། དེ་ག་ནང་བཞིན་ཁམས་སྐད་མེད་པ་བཟོ་དུས་ཁམས་པ་བཟོ་གི་ཡོད་རེད། ཨམ་མདོ་དང་ཁམས་པ་མེད་པ་བཟོ་ནས་དབུས་གཙང་པ་གཅིག་ལ་ཐུག་དུས་བོད་པ་ག་པ་སླེབས་ཚར་རེད། བསམ་བློ་ཞིག་ཐོངས་དང་། མ་ཟད་ཨམ་མདོ་དང་ཁམས་པ་སོགས་མེད་པ་བཟོ་དུས་ཡང་ལས་སླ་པོ་ཞིག་བྱས་ནས་བཟོ་ཐུབ་ཀྱི་མ་རེད། འདི་མེད་པ་བཟོ་ཐུབ་ཐུབ་ལ་དཀའ་སྡུག་ཆེན་པོ་མྱོང་གི་རེད། བོད་པ་ནང་ལ་འཛིང་འཁྲུགས་བྱུང་གི་རེད། དེ་འདྲ་མ་གསུངས་རོགས་གྲོགས་པ་ཚོ།
གང་ལྟར་ཡང་བྱ་ཚིག་གི་རྩོད་པ་འདི་དཔེ་ཡག་པོ་ཞིག་འདུག། ད་དུང་དེ་འདྲ་ཡོད་པས། ཡོད་ན་འབྲི་རོགས་གནང་དང་།