བྱང་ཨ་རིའི་སྤྱི་འཐུས་པདྨ་ཕྱག་མཛོད་ཚང། ཐུགས་རྗེ་ཆེ།

སྐལ་བཟང་ཕུན་ཚོགས།

ཉེ་ཆར་སྐབས་བཅུ་དྲུག་པའི་བོད་མི་དམངས་སྤྱི་འཐུས་ལྷ་ཚོགས་ཀྱི་གྲོས་ཚོགས་ཚོགས་དུས་དྲུག་པའི་སྟེང་། བྱང་ཨ་རིའི་སྤྱི་འཐུས་པདྨ་ཕྱག་མཛོད་ཚང་གིས་ས་ཁུལ་ཁ་ཤས་ཀྱི་དངོས་ཡོད་གནས་སྟངས་དཔེ་མཚོན་དུ་བཀོད་ནས། བྱང་ཨ་རིའི་ནང་གི་བོད་རིགས་གནས་སྡོད་ས་ཁུལ་ཁག་ཅིག་ན་གཞི་རིམ་གྱི་དཀའ་ངལ་ཕྲན་བུ་ཡོད་པའི་གནས་སྟངས་ཀྱི་ཟུར་ཞིག་བོད་མི་མང་གི་སྐུ་ཚབ་སྤྱི་འཐུས་རྣམ་པ་དང་གཞུང་གི་མཛད་གཙོ་ལྷན་རྒྱས་ལ་སྙན་སྒྲོན་གནང་སྟེ། མ་འོངས་པའི་ནང་གཞུང་གི་ངོས་ནས་བྱང་ཨ་རིའི་བོད་མིའི་སྤྱི་ཚོགས་ནང་ལའང་གཞིས་ཆགས་ཁག་ནང་བཞིན་དབུ་མའི་ལམ་གྱི་སྐོར་གོ་རྟོགས་སྤེལ་ནས་མི་མང་ནང་གོ་རྟོགས་གོང་འཕེལ་ཡོང་བ་དང་། བཙན་བྱོལ་སྒྲིག་འཛུགས་ཀྱི་གནས་སྟངས། བོད་མིའི་ཛ་དྲག་གི་གནས་སྟངས་ལ་སོགས་པ་དུས་བསྟུན་འགྲེལ་བཤད་དང་དཀའ་ངལ་ཆེ་ཆུང་ཅི་ཡོད་སེལ་ཐབས་ལམ་སྟོན་གནང་དགོས་པའི་རེ་སྐུལ་ཞུས་གནང་སོང་བར་ཐུགས་རྗེ་ཆེ་ཞུ་བ་ཡིན། དེ་ཡང་བྱང་ཨ་རིའི་ནང་གི་བོད་རིགས་གནས་སྡོད་ས་ཁུལ་ཉི་ཤུ་རྩ་གཅིག་ཚང་མ་ལ་ཁྱབ་པ་ཞིག་གནང་རོགས་ཞུས་སོང་བ་ཡག་བྱུང་། དེ་འདྲ་བྱུང་བ་ཡིན་ན། གཞུང་དང་མང་ཚོགས་གཉིས་ཀྱི་བར་ཐག་ཉེ་རུ་འགྲོ་བ་དང་། གཞུང་གིས་མང་ཚོགས་ཀྱི་གནས་སྟངས་ཤེས་རྟོགས་དང་། མང་ཚོགས་ཀྱིས་གཞུང་གི་གནང་ཕྱོགས་ཤེས་པ་ཡོང་གི་རེད། དེ་ནི་ང་ཚོའི་རྩ་དོན་གྱི་ནུས་པ་གོང་སྤེལ་ལ་ཕན་པ་ཞིག་ཀྱང་ཆགས་ཡོད་པ་རེད།

ད་རེས་བྱང་ཨ་རིའི་སྤྱི་འཐུས་པདྨ་ཕྱག་མཛོད་ཚང་གིས་ཁ་ན་ཌིིིའི་ཨལ་སྦར་ཌ་མངའ་སྡེའི་ཁ་ལི་གྷི་རི་གྲོང་ཁྱེར་དུ་ཆེད་བཅར་གྱིས་ས་གནས་དེའི་དངོས་ཡོད་གནས་སྟངས་རྟོག་ཞིབ་བྱས་པ་སྙན་སྒྲོན་དང་། སྦིར་ཐྲེ་ཞི་མངའ་སྡེའམ་བསྡུས་མིང་ལ་སྦི་སི་མངའ་སྡེ་ཟེར་བའི་ནང་ལ་གནས་སྡོད་བོད་མིའི་ནང་ལ་དཀའ་ངལ་ཅུང་ཡོད་པ་གོ་རྒྱུ་འདུག་ཅེས་གནས་ ད་རེས་སྤྱི་འཐུས་ལྷན་རྒྱས་དང་གཞུང་གི་མཛད་གཙོ་རྣམ་པར་སྙན་སྒྲོན་གནང་སོང་བ་ཡག་པོ་བྱུང་།

ངས་རྒྱུས་ལོན་ཏོག་ཙམ་བྱས་ནས་ཤེས་རྟོགས་བྱུང་བ་ལྟར་ན། སྦི་སི་མངའ་སྡེ་ནང་བོད་པའི་བོད་རིགས་ལ་མཚོན་ན། ཁ་ན་ཌའི་ནང་ལ་རྒྱ་གར་བྱང་ཤར་བོད་མིའི་གཞིས་ཆགས་ནས་གནས་སྤོས་ཀྱིས་ཕེབས་པའི་བོད་མི་རྣམས་ས་གནས་ལྔ་ལ་ཁག་བགོས་ཀྱིས་གཞིས་སྡོད་བྱས་ཡོད་པའི་ནང་གི་གཅིག་ཆགས་ཡོད། ཕལ་ཆེར་སྦི་སི་མངའ་སྡེའི་ནང་ལ་རྒྱ་གར་བྱང་ཤར་ཁུལ་ནས་འབྱོར་བའི་བོད་རིགས་སྤུན་ཟླ་ཉིས་བརྒྱ་ཡས་མས་ཡོད་པ་དང་། ཁོང་ཚོ་ནི། སྦི་སི་མངའ་སྡེའི་རྒྱལ་ས་ཝེ་ཀི་ཌོ་རི་ཡ་དང་ཝན་ཁོ་ཝ་གྲོང་ཁྱེར་གཉིས་ནང་སྡོད་ཀྱི་ཡོད་པ་རེད།

སྦི་སི་མངལ་སྡེའི་བོད་རིགས་མི་མང་ནང་གི་དཀའ་ངལ་གཅིག་ནི། མངའ་སྡེའི་རྒྱལ་ས་ཝེ་ཀི་ཌོ་རི་ཡ་ནང་ལ་སྔོན་ནས་དེར་གནས་སྡོད་དང་རྒྱ་གར་བྱང་ཤར་ཁུལ་ནས་འབྱོར་བ་གཉིས་ཀ་བསྡོམས་ན་བོད་རིགས་བརྒྱ་ཕྲག་གཅིག་ཡས་མས་ཡོད་འདུག ཡིན་ནའང་། ཁོང་ཚོ་སྦི་སི་བོད་རིགས་ཚོགས་པའི་འོག་ལ་མེད་པར་ཟུར་གནས་ཀྱིས་ཡོད་འདུག མ་གཞི་ཁོང་ཚོ་སྦི་སི་མངའ་སྡེའི་ནང་ཡོད་ཙང་། སྦི་སི་བོད་རིགས་ཚོགས་པའི་ཁོངས་ཆགས་ཡོད་ནའང་། ཁོང་ཚོ་དང་སྦི་སི་བོད་རིགས་ཚོགས་པའི་བར་ལ་འབྲེལ་བ་མེད་པ་འདྲ་པོ་ཆགས་ཡོད་འདུག དཔེར་ན། སྦི་སི་བོད་རིགས་ཚོགས་པ་ཡིས་རྒྱུན་ལས་འདེམས་པའི་སྐབས་ལ་ཁོང་ཚོ་ལ་བརྡ་ལན་ཙམ་ཡང་བྱེད་ཀྱི་མེད་པ་རེད་འདུག དེར་བརྟེན་ཁོང་ཚོས་བོད་རིགས་ཚོགས་པ་ཟུར་འཛུགས་བྱེད་པའི་སྐོར་སྐུ་ཚབ་དོན་གཅོད་ཁང་ལའང་བཀའ་འདྲི་ཞུས་མྱོང་ཡོད་འདུག

ཡང་དཔེར་ན། སྦི་སི་མངའ་སྡེའི་ནང་རྒྱ་གར་བྱར་ཤར་བོད་མིའི་གཞིས་ཆགས་ཁག་ནས་ཝན་ཁོ་ཝར་གྲོང་ཁྱེར་ཁུལ་ལ་འབྱོར་མཁན་ཚོར་སྦི་སི་བོད་རིགས་ཚོགས་པའི་ངོས་ནས་ཟླ་བ་ཁ་ཤས་རིང་ལ་སྡོད་ས་རིན་མེད་བཀོད་སྒྲིག་དང་། ད་དུང་འཚོ་བའི་འགྲོ་གྲོན་ཆེད་ལག་དངུལ་གང་འཚམ་ཞིག་ཀྱང་སྤྲད་པ་དེ་འདྲ་བྱུང་ཡོད་འདུག ཡིན་ནའང་། མངའ་སྡེའི་རྒྱལ་ས་ལ་ཝ་ཀི་ཌོ་རི་ཡ་ལ་འབྱོར་ཞིང་དེར་སྡོད་མཁན་ཚོར་སྦི་སི་བོད་རིགས་ཚོགས་པའི་ངོས་ནས་སྡོད་ས་དང་འཚོ་བའི་ཁ་སྣོན་ལ་རོགས་དངུལ་སྤྲོད་པ་དེ་འདྲ་དམིགས་བསལ་གྱི་ལྟ་རྟོག་དེ་རིགས་བྱས་མྱོང་མེད་པ་དེ་འདྲ་ཆགས་ཡོད་འདུག

ད་དུང་ཉེ་ལམ་དྲ་ལམ་ཁག་ལ་སྦི་སི་བོད་རིགས་ཚོགས་པའི་རྩིས་ཁྲའི་སྐོར་གྱི་ཡིག་ཆ་ཞིག་ཀྱང་འགྲོ་བཞིན་འདུག ཕལ་ཆེར་ལོ་ཁ་ཤས་ཀྱི་སྔོན་གྱི་རྩིས་ཁྲའི་སྐོར་ཞིག་ཡིན་པ་འདྲ། གོ་ཐོས་ལ། རྩིས་ཁྲ་དེ་ཡི་སྐོར་ཚོགས་འདུ་སྐབས་མང་པོ་ཞིག་གི་རིང་ལ་གླེང་གཞི་ཆེན་པོ་ཆགས་མྱོང་འདུག་པ་དང་། མང་ཚོགས་ནང་ན་ད་དུང་ཡང་རྩིས་ཁྲ་དེའི་སྐོར་གླེང་གིན་འདུག་ཟེར་བ་གོ་རྒྱུ་འདུག འདིའི་སྐོར་གྱི་གནས་སྟངས་དངོས་གང་འདྲ་ཡིན་མིན་སྐོར་ས་གནས་རང་ལ་སྡོད་མཁན་བོད་མི་ཚོར་འདྲིོ་བརྩད་ཞུས་ན་ཁོང་ཚོར་གསུང་རྒྱུ་གླེང་རྒྱུ་སྣ་ཚོགས་འདུག

མང་ཚོགས་ཀྱིས་སོ་སོའི་ས་གནས་ཀྱི་གནས་སྟངས་རང་རང་ས་གནས་ཀྱི་སྤྱི་འཐུས་རྣམ་པར་སྙན་སེང་ཞུ་བ་དང་། ཡང་ན། གཞུང་གི་མཛད་གཙོ་རྣམ་པར་ཐད་ཀར་ཞུས་པ་ཡིན་ན། གཞུང་གིས་ས་གནས་ཀྱི་གནས་སྟངས་མཁྱེན་རྟོགས་ཡོང་བ་ལ་ཕན་གྲོགས་ཡོང་གི་རེད།

ད་རེས་བྱང་ཨ་རིའི་སྤྱི་འཐུས་པདྨ་ཕྱག་མཛོད་ཚང་གིས་ས་གནས་གནས་སྟངས་ལ་ཞིབ་འཇུག་དང་བརྩད་ཞིབ་བྱས་ནས་གཞུང་གི་མཛད་གཙོ་རྣམ་པར་སྙན་སྒྲོན་གནང་བ་ལ་བསྐྱར་དུ་ཐུགས་རྗེ་ཆེ་ཞུ་འདོད་བྱུང་། ཐུགས་རྗེ་ཆེ།