རྔ་བཟའ་བདེ་པོ་འཚོ།
———–སྐུའི་འཁྲུངས་སྐར་ལ་ཕུལ།
མདང་དགུང་ང་ཡི་རྨི་ལམ་ནང་ནས་ཁྱེད་ཉིད་མཇལ།།
མུན་པའི་གཉེན་པོ་ཟླ་བའི་གཟུགས་སུ་ཕེབས་པ་རྨིས།།
རྨོངས་པའི་རྩ་བ་རྨག་མེད་གཏོར་ནས་འཕྲོས་པ་རྨིས།།
འཇིག་རྟེན་འདི་ཡང་འོད་ཀྱི་གོང་བུར་བསྒྱུར་བ་རྨིས།།
དུས་ཀྱི་འགྱུར་ལྡོག་རྒྱ་མཚོའི་རྦ་རླབས་གཡོ་ཞིང་འཕྱུར།།
རྐང་གཉིས་སེམས་རྒྱུད་དུག་སྦྲུལ་ནག་པོས་བཙིར་ཞིང་ངལ།།
སྐལ་ངན་དུས་འདིར་སངས་རྒྱས་ཁྱེད་ཉིད་ལེགས་བྱོན་ནས།།
དབྱེར་མེད་འགྲོ་བའི་སྡུག་བསྔལ་བྱམས་ཀྱིས་སེལ་བ་རྨིས།།
ཕྱི་སྣོད་འཕེལ་ཁ་འོ་སྤྲིས་བརྩེགས་མ་རྒྱས་ཤིང་འཕེལ།།
ནང་བཅུད་སེམས་ཀྱི་རི་མོ་འཁྱོགས་པོ་གཡོ་ཞིང་ཟོལ།།
ཕྱི་ནང་མི་མཚུངས་ལྡོག་པའི་ཁ་ལོ་ཤུགས་ཀྱིས་བསྒྱུར།།
སངས་རྒྱས་ཉིད་ཀྱིས་འདི་ཀུན་བརྩེ་བས་བཅོམ་པ་རྨིས།།
རྟ་བདུན་དབང་པོ་འཇིག་རྟེན་ཕེབས་པར་དགའ་སྤྲོ་བརྟས།།
ཞི་བདེའི་གཟི་དཔལ་གླིང་བཞི་མཚམས་བརྒྱད་འོད་དུ་འབར།།
ཆོས་ལུགས་མི་རིགས་དབྱེར་མེད་སྐྱེ་འགྲོ་བདེར་འགོད་པའི།།
བྱམས་བརྩེའི་མངའ་བདག་ཁྱེད་ཀྱི་འཁྲུངས་སྐར་དད་བརྒྱས་བསུ།།
2015-07-06
རྨི་ལམ་ཡག་རྨིས་འདུག
རྨི་ལམ་ཡག་པོ་རྨིས་འདུག