བྱིའུ་ཆུང་ཞིག

ཁ་བའི་ལྷ་མོ།

བྱིའུ་ཆུང་ཞིག
རྒྱང་རིང་ནས་བསླེབས་སོང
བདག་གི་ཉལ་ཁང་གྲུ་བཞིའི
སྒེའུ་ཁུང་གི་ལྕགས་ཁྲའི་སྟེང་བབས་ནས
བདེན་པའི་གནད་དོན་ཞིག་ཞུ་བ་བཞིན
རིམ་པར་ཅིར་ཅིར་མང་པོ་འདོན

བདག་གིས་ཁོ་ལ་རྣ་བ་གཏད་དེ
མིག་ཟུང་ནན་གྱིས་ཅེར
ཡུན་རིང་མ་འགོར་བར
བྱིའུ་ཆུང་ཆུང་དེ་བདག་གི་ཁང་ཁྱིམ་དུ་འཛུལ་བྱུང
བྱིའུ་ཆུང་དེ་རྒྱུན་ལྡན་ཞིག་མ་རེད
བྱིའུ་ཆུང་བདག་གི་མཐེ་བོང་འདྲ་བ་ལས་མེད་པ
ཁ་དོག་ལྗང་སེར་ཅན་ཞིག་ཡིན

མིག་རིལ་ཆུང་ཆུང་གཉིས་མྱུར་མོར་འཁོར་བར
མཇུག་སྒྲོ་རིང་བོ་མེད་པ
བྱིའུ་ཆུང་དེ་རྒྱུན་ལྡན་ཞིག་མ་ཡིན་པར
བྱིའུ་ཆུང་དེ་དངངས་མ་སྐྲག་གི་ངང་ལ་གནས
བྱིའུ་ཆུང་དེ་ངའི་ཉལ་ཁང་ལ་སྡོད་ལོང་མེད་པར
གཡས་འཕུར་གཡོན་འཕུར་དང
ཕར་འཕུར་ཚུར་འཕུར་ཇེ་མང་ནས་ཇེ་མང་རེད
བྱིའུ་ཆུང་དེ་ལྷོད་ལ་འབབ་ཕྱིར
ང་རང་གི་གཟུགས་ཕུང་འགུལ་ཙམ་ཡང་མ་བྱས་པས
བྱིའུ་ཆུང་དེ་རེམ་མར་ལྷོད་ལ་འབབ་པ་བཞིན
ཅིར་སྐད་རྒྱག་མཚམས་ཆད

བསྐྱར་དུ་སྒེའུ་ཁུང་གི་ལྕགས་ཁྲར་འབབ་དུས
བྱིའུ་ཆུང་དེ་ད་གཟོད་མཛེས་སྡུག་གི་མེ་ཏོག་བཞིན
རྒྱང་རིང་གི་བར་སྣང་ནས
ཉི་མ་དང་འོད་ཟེར་སྒོམ་ཞིང
གཤོག་ཟུང་མཐའ་ལ་བརྐྱངས་ནས་འཕུར་སོང
འཕུར་འཕུར་ནས་དགུང་ཨ་སྔོན་གནམ་འཕང་བཅད་ཅིང
ས་ཆེན་པོའི་ལོ་རྒྱུས་ཀྱི་དཔང་རྟགས་འཁྱེར་ནས
འབག་བཙོག་གི་མཁའ་དབུགས་དང
མུན་ནག་གི་ཡུལ་ཁམས་ལ
རང་དབང་དང་གནས་ལུགས་ཞུ་བར་བཞུད
བྱིའུ་ཆུང་ཆུང་དེ
སླར་ཡང་དྭངས་གཙང་གི་མཁའ་མཐར་འཕུར་དགོས
རྒྱལ་བར་སྨོན

༢༠༡༨/༡/༡༠