བྱིས་དུས་ཀྱི་ཕྱིར་དྲན།

སློབ་དཔོན་འཇིགས་མེད་བློ་གྲོས་རྒྱལ་མཚན།

༼རང་ཉིད་ཀྱི་ལོ་རྒྱུས་མི་ཚེའི་དོན་སྙིང་རྙེད་པའི་སྤོབས་པ་ལས་ཟུར་འདོན་ཞུས་པ།༽

ཀློག་མཁན་གྲོགས་པོ་རྣམ་པ། ཆོས་ནོར་གཉིས་མེད་ཀྱི་འདུ་ཤེས་གསུམ་པ་བ་བདག་ལ། མི་ཚེའི་སྐྱིད་སྡུག་གི་ལོ་རྒྱུས་དེབ་རྒན་ལག་པས་ཁྱོག་ཚད་ཅིག་ཡོད་པ་དེ་སྤྱིའི་ཆ་ནས་ཁྱེད་རྣམ་པའི་སྤྱན་ལམ་དུ་འབུལ་བར་འོས་པ་ཞིག་མེད་ཀྱང་། དེའི་ནང་བོད་ཀྱི་ཆོས་དང་རིག་གཞུང་། ཆབ་སྲིད་རྣམས་ཀྱི་སྐོར་ལ་སྐད་ཆ་ཕྲན་བུ་རེ་བཤད་ཁུལ་བྱས་ཡོད་པ་རྣམས་རིམ་གྱིས་ཁྱེད་རྣམས་ཀྱི་སྤྱན་ལམ་དུ་འབུལ་རྒྱུ་ཡིན་པས། དུས་ཚོད་བྱུང་སྐབས་སྤྱན་རས་རེ་གཡོ་བར་ཞུ་རྒྱུ་དང་། བཀའ་བཀྱོན་དང་ལམ་སྟོན་ཅི་ཡོད་འཛེམ་དོགས་མེད་པར་གནང་རོགས་ཞུ་བ་ལགས།

ཁོ་བོ་ཕྱི་ལོ་༡༩༥༨དང་༡༩༥༩ལོའི་བོད་ཀྱི་དུས་འགྱུར་ཡ་ང་བ་དེ་དག་གི་འཇུག་ཏུ་སྐྱེས་པས། འཕགས་མཆོག་ཕྱག་ན་པདྨོའི་ཞིང་ཁམས་སུ་མེ་སྒྱོགས་ཀྱི་དུད་པས་གང་ཞིང༌། ཁྲག་དྲོན་གྱིས་མཚེའུ་སྟོང་ཕྲག་མང་པོ་འདབས་འབྲེལ་དུ་འཁྱིལ་བ་དང༌། བར་དོ་གསར་བ་པའི་རྣམ་ཤེས་ཀྱི་བུ་ཡུག་འཚུབས་ཤིང༌། ཡུག་མོ་དང་དྭ་ཕྲུག་གི་འོ་དོད་ཀྱིས་དམྱལ་བ་ངུ་འབོད་ཀྱི་གནས་རིས་མིའི་འགྲོ་བའི་མིག་ལ་མངོན་སུམ་དུ་སྣང་བར་བྱས་པའི་ཁ་བ་རི་བའི་སྐྱོ་གར་ཆེན་མོའི་ལོ་རྒྱུས་རྣམས། སྐབས་དེར་གཤིན་རྗེའི་འཕྲང་མོ་ཆེར་ཐེངས་དགུར་ཕྱིན་ཀྱང་གཤིན་རྗེ་ཆོས་རྒྱལ་གྱིས་ཕྱིར་བདས་པའི་ནང་མི་རྒན་པ་ཚོའི་ངག་ལས་ཐོས་པ་མ་གཏོགས་དངོས་སུ་རང་གི་ཐོག་ལ་མ་བབས་ཀྱང༌། རིག་གནས་གསར་བརྗེ་ཆེན་མོ་ཟེར་བ་ བསམ་བློ་རྙིང་པ་དང༌། ལུགས་སྲོལ་རྙིང་པ། གོམས་གཤིས་རྙིང་པ། རིག་གཞུང་རྙིང་པ་བཞི་རྩ་གཏོར་དུ་གཏོང་བའི་སྲིད་ཇུས་དང༌། སྲིད་ཇུས་དེའི་ལག་ལེན་གྱི་ཆ་ཤས་ལམ་ཕྱོགས་སློབ་གསོ་ཟེར་བའི་གདུག་རྩུབ་ཅན་གྱི་ལས་འགུལ་དེའི་ནང༌། ལོ་ཆུང་རུང་འཇིགས་སྐྲག་དང་ཁོང་ཁྲོའི་ཚོར་སྣང་མང་པོ་རང་ཐོག་ཏུ་དངོས་སུ་བྱུང་མཁན་ཞིག་ཡིན་པས། བྱིས་པ་ཞིག་གི་ཚོད་ཀྱི་མཐོང་ཐོས་རྣམས་ལ་མཚམས་འདིར་ཕྱིར་དྲན་ཕྲན་བུ་ཞིག་བྱེད་འདོད་ཡོད།
ངས་དྲན་སོས་པའི་དུས་ནས་ང་ལ་ནང་མི་རྒན་པ་ཚོས། མི་སུ་ཞིག་གིས་ཁྱེད་ཚང་ལ་ཕྲེང་བ་དང༌། འཁོར་ལོ། ཡི་གེ གསེར་སྐུ། དམ་རྫས། སྲུང་འཁོར། མདུད་པ་སོགས་ཨེ་ཡོད་ཅེས་འདྲི་ན་མེད་ཅེས་ཤོད་དགོས། ཁྱེད་ཚང་གི་ཨ་རྒྱ་དང་ཨ་མ། ཨ་མ་ཅོས་ལོ། ཨ་ནེ་རྣམས་ཀྱིས་མ་ཎི་འདོན་གི་ཨེ་འདུག་ཟེར་ན་མི་འདུག་ཟེར་དགོས། གོ་ཨེ་ཐལ། སེམས་ལ་ཟུངས་ཨ་སོགས་གསུངས་ནས། གདོང་ལ་འཛུབ་མོ་བཙུགས་ཏེ་ནན་ཏན་ཆེན་པོས་ཡང་ནས་ཡང་དུ་སློབ་པར་བྱེད་ཅིང༌། ངས་ཞང་པོ་མཆོག་ལ་ཨ་རྒྱ་ཟེར་ཀྱི་ཡོད་སྟབས། ཁྱོད་ཀྱིས་ཕྲེང་བ་འཁོར་ལོ་སོགས་ཡོད་རབས་དང༌། ཁ་ཏོན་འདོན་གྱི་འདུག་ཅེས་ཁ་ནས་ཤོར་ན་ཨ་རྒྱ་ཁྲིམས་ཁང་དུ་ཁྲིད་ནས་གསོད་འཇོག་གི་རེད། དེ་ནས་ཁྱོད་ལ་ཨ་རྒྱ་ཡོད་པ་མ་རེད་སོགས་གསུངས་ཀྱི་ཡོད་པས་ང་ཧ་ཅང་སྐྲག་གི་ཡོད།
སྔར་༡༩༥༨སོགས་ཀྱི་སྐབས་སུ། བོད་ཀྱི་ས་ཆ་སྤྱི་མཚུངས་ལྟར་ང་ཚོའི་ཡུལ་དུ་ཡང་མི་ཁ་ཤས་ཀྱི་སེམས་ལ་རྒྱ་འདྲེ་ཞུགས་ནས། མཆོག་གསུམ་ལ་དད་པ་ལོག་པ་དང༌། གོ་རེ་སྐམ་པོ་རེའི་མགོ་རྔར་བལྟས་ཏེ་བླ་མ་དང་མཆེད་གྲོགས་རྣམས་ལ་རྒྱབ་ཀྱིས་ཕྱོགས་ཏེ་ནང་རུལ་བྱེད་པ། བླ་མ་དང་མཆེད་གྲོགས་ལ་བརྡུང་པ། བླ་མའི་སྐེ་ཐོག་ཏུ་ཞོན་པ། བཀའ་འགྱུར་གྱི་སྟེང་དུ་གཅིན་བཏང་བ། གུ་རུ་རིན་པོ་ཆེའི་གསེར་ཐང་གིས་ཉལ་གདན་བྱེད་པ། གླིང་བླ་མ་ཆོས་ཀྱི་རྡོ་རྗེ་ལས་ས་རྐོ་བྱེད་ཀྱི་ལྕགས་ཁེམ་འདི་དགའ་གི་རེད་ཟེར་མཁན་སོགས་མི་སྤགས་འདྲེ་བཏུམ་གྱི་བརླ་བཙོང་ཁ་ཤས་བྱུང་འདུག་པ་རྣམས་ཀྱི་མིང་ལ། ངའི་དྲན་པའི་དུས་སུ་ཡང་སྔོན་ཐོན་པ་ཟེར་གྱི་འདུག་ཅིང༌། མི་དེ་༡༩༥༨ལོའི་སྔོན་ཐོན་པ་རེད་ཟེར་དུས་ཡུལ་མི་ཀུན་གྱིས་གསོན་འདྲེ་མངོན་རྒྱུགས་ལྟ་བུ་ཞིག་ལ་བརྩི་གིན་འདུག སྔོན་ཐོན་པ་ཟེར་བ་འདི་༡༩༥༨ལོར་རྒྱ་མིའི་ཕྱོགས་ནས་ཆེ་བསྟོད་བྱས་ཏེ་སྤྲད་པའི་མིང་ཡིན་པས། བོད་མིའི་ཕྱོགས་ནས་མཚང་མིང་མཐར་ཐུག་ཡིན་པ་སྨྲོས་མ་དགོས།
ངའི་དྲན་པའི་དུས་སུ་ཛ་དྲག་ཆེན་པོ་དེ་ཙམ་མེད་ཀྱང༌། ད་དུང་རང་གིས་རང་ཚུགས་མི་ཐུབ་པར། རྒྱ་ཕྱོགས་ལ་ཁ་འཁོར་མཁན་དང༌། རྒྱ་མི་དང་ལག་རྡང་སྦྲེལ་མཁན་རེ་གཉིས་འདུག་པ་རྣམས་ལ། ཀླད་སྲབ་དང༌། བསམ་འཆར་མཐོན་པོ་ཟེར་ཞིང༌། ཡུལ་མི་ཀུན་ཀྱིས་དགྲ་རུ་བལྟས་ཏེ་དོགས་ཟོན་ཚད་མེད་བྱེད་པ་དང༌། དེ་ལས་ལྡོག་སྟེ་རང་གིས་རང་ཚུགས་བརྟན་པོར་བཟུང་ནས། མཆོག་གསུམ་དང་ལས་འབྲས་ལ་རྒྱབ་མི་གཏོད་ཅིང༌། བླ་མ་དང་མཆེད་གྲོགས་རང་སྡེ་རྣམས་མི་བསླུ་བ་རྣམས་ལ་ཀླད་འཐུག་དང༌། བསམ་འཆར་དམའ་མོ་ཟེར་ཞིང་རྩིས་ཚོད་ཆེ། ཁྱད་པར་ལས་བྱེད་ཀླད་འཐུག་རྣམས་ལ་ཡུལ་མི་ཀུན་གྱིས་རེ་བ་དང་རྩིས་ཚོད་ཆེ་བས་གུས་བཀུར་ཆེན་པོ་བྱེད་པ་དང༌། ཁ་ལས་ཧ་ཅང་དགེ་པོ་འདུག དེས་ན་དུས་ཚོད་འདི་དག་གི་རིང་མིའི་རུས་རྐང་བཟང་ངན་དང༌། རིན་ཐང་ཆེ་ཆུང་ལ་ལོ་རྒྱུས་མང་པོ་བགྲང་མི་དགོས་པར། སྔོན་ཐོན་པ་དང༌། ཀླད་སྲབ་དང་ཀླད་འཐུག བསམ་འཆར་མཐོན་པོ་དང་བསམ་འཆར་དམའ་མོ་ཟེར་བ་ཙམ་གྱིས་མི་དེའི་རིན་ཐང་དང༌། བྱ་སྤྱོད་ཆ་ཚང་ལག་ནང་དུ་བླངས་པ་ལྟར་མཚོན་གྱི་ཡོད་པ་རེད།
ལོ་རྒྱུས་ཀྱི་དཀྱིལ་ནས་རྡོ་རྗེ་སྐེད་འཇུ་བྱས་ན་ནུབ་ཕྱོགས་ཀྱིས་མཚོན་ཕྱིའི་རྒྱལ་ཁབ་ཁག་གི་ཀློག་མཁན་གྲོགས་པོ་རྣམས་ལ་བརྗོད་དོན་གསལ་བོར་ངོ་སྤྲོད་མི་ཐུབ་པས། སྐབས་འདིའི་གླེང་གཞི་ལྟ་བུར་བོད་ཁ་བ་ཅན་གྱི་རྒྱལ་ཁམས་སྤྱི་མཚུངས་ལྟར་ང་ཚོ་མདོ་སྨད་མགོ་ལོག་གི་ཡུལ་དུ་རྒྱ་མི་ཇི་ལྟར་སླེབས་པ་དང༌། བཙན་གནོན་དང་མནར་གཅོད་ཇི་ཙམ་བྱས་ཚུལ། ཁྱད་པར་དུ་བོད་མི་རིགས་ཀྱིས་རང་གི་ཚེ་སྲོག་ལས་ཀྱང་གཅེས་པར་འཛིན་པའི་རྒྱལ་བའི་བསྟན་པ་རིན་པོ་ཆེ་འདི་ལ་ཆེས་ཚབས་ཆེན་གྱི་གཏོར་བཅོམ་ཇི་ལྟར་བྱས་ཚུལ་མདོ་ཙམ་བརྗོད་ན།
དེ་ཡང་ཕྱི་ལོ་༡༩༤༩ལོར་ད་ལྟའི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཟེར་བ་འདི་མགོ་ཚུགས་པའི་ཁྱབ་བསྒྲགས་བྱས་རྗེས་མའོ་ཙེ་ཏུང་གི་བློ་སྟོབས་ཆེར་འཕེལ་ནས་སྔར་ཁོ་རང་གིས་ཀྱང་ཕྱི་རྒྱལ་དུ་བརྩི་བཞིན་པའི་བོད་ཀྱི་རྒྱལ་ཁབ་ཧྲིལ་པོ་ཟ་རྒྱུའི་ངན་སེམས་བཅང་བ་དང༌། ༡༩༤༩ལོ་ནས་བཟུང་རིམ་བཞིན་བོད་ཤར་ཕྱོགས་ཀྱི་མཐའ་མཚམས་ཁུལ་ནས་དྲག་པོས་བཙན་འཛུལ་བྱེད་རྒྱུའི་མགོ་བཙུགས། ང་ཚོ་མགོ་ལོག་འབུམ་པ་ཁག་གསུམ་གྱི་ཡུལ་དུ་མཱ་བན་ལིས་ཟེར་བའི་རྒྱ་དཔོན་དེས་མགོ་ཁྲིད་པའི་རྒྱ་དམག་གི་ཤོག་ཁག་དང་པོ་དེ་༡༩༥༢ཀྱི་ལོར་སླེབས་འདུག་ཅིང༌། ལོ་དེར་མགོ་ལོག་གི་ས་ཆར་བཀྲ་མི་ཤིས་པའི་ཁྲག་མདོག་གི་དར་ཆ་དམར་པོ་ཐོག་མར་བཙུགས་པ་ནས་བཟུང་དུས་ད་ལྟའི་བར་དུ་མགོ་ལོག་གི་ཁྲག་དང་མིག་ཆུའི་ལོ་ཟླ་རིང་པོ་དེ་མུ་མཐུད་ནས་བྱུང་བ་ཡིན། གོང་དུ་ཕྱོགས་ཙམ་བརྗོད་ཟིན་པ་ལྟར་ཟི་ལིང་དུ་རྟེན་གཞི་བྱས་པའི་མཱ་ཆིས་ཕ་བུ་རྣམས་ཀྱི་དམག་དཔུང་གིས་ཡུན་རིང་པོར་མགོ་ལོག་ལ་བཙན་འཛུལ་ཚོད་མེད་བྱས་པས། མགོ་ལོག་པ་རྣམས་ཨ་ཆད་འུ་ཐུག་གི་ངང་དུ་སྡོད་བཞིན་པའི་མུར་ཡང་བསྐྱར་གུང་ཁྲན་གྱི་དམག་དཔུང་སླེབས་པ་ཡིན་ལ། སྐབས་དེར་གུང་ཁྲན་གྱི་དམག་དཔུང་གིས་ཕྱོགས་གཅིག་ནས་མཱ་ཇག་གི་གནོད་འཚེའི་རྒྱུན་བཅད་པ་དང༌། ཕྱོགས་གཉིས་ནས་དཔོན་འབངས་ཡོངས་ལ་དངུལ་དང་ཇ་ནག་སོགས་ཀྱི་གནང་སྦྱིན་མང་པོ་བྱས་པས། ཐོག་མར་མགོ་ལོག་གི་ཡུལ་མི་ཚོས་རྒྱ་མི་ལ་གཉེན་གྲོགས་ཀྱི་འདུ་ཤེས་བཟུང་ནས་སྣེ་ལེན་དང་གུས་བརྩི་གང་ལེགས་བྱས་འདུག་ན་ཡང༌། རིམ་གྱིས་གཡང་མོ་ལུག་གི་རྩེ་རོགས་འཕར་བ་དང་སྤྱང་གི་གཉིས་ཀྱི་གང་ཡང་མིན་པར་ཐག་ཆོད་པ་རེད། ཐང་རྒྱལ་རབས་ཀྱི་མངའ་ཐང་རྒྱ་བསྐྱེད་སྐབས་དང༌། སོག་པོ། སི་ཁྲོན། མཱ་ཆིས་རྣམས་ཀྱི་དམག་འོག་ཏུ་མ་ཤོར་བའི་མགོ་ལོག་དཔའ་བོའི་ཡུལ་ཁམས་ཆེན་པོ་དེ་སྐད་ཅིག་ཉིད་ལ་ཀླ་ཀློ་གུང་ཁྲན་གྱི་བཙན་འོག་ཏུ་བཅུག་རྗེས། ༡༩༥༨ཀྱི་ལོ་ནས་མགོ་བཙུགས་ཏེ་ཆོས་ལུགས་ལ་དུག་ཏུ་བལྟ་བའི་སྲིད་ཇུས་ཀྱིས་མགོ་ལོག་ཁག་གསུམ་ལ་དགོན་པ་བརྒྱད་ཅུ་ཙམ་ཡོད་པ་གཅིག་ཀྱང་མ་ལུས་པར་གཏོར་བཤིག་བྱས་ཤིང༌། གྲྭ་མང་རྣམས་བཙན་ཤེད་ཀྱིས་ཁྱིམ་སར་ཕབ་པ་དང་བླ་སྤྲུལ་དང་དགེ་བསྐོས་སོགས་གནད་ཡོད་ཀྱི་མི་སྣ་ཕལ་མོ་ཆེ་ངན་གསོད་དང་བཙོན་ཤི་མུག་ཤིར་བཏང༌། ཐུན་མོང་ཡོངས་ལ་དབང་བའི་ལམ་ལུགས་སམ་མགོ་ལོག་གི་ཡུལ་སྐད་དུ་སྤྱི་ཁང་གི་ཟུར་ཆག་པས་སྐྱི་ཁང་ཟེར་ཟེར་བའི་འོག་ནས་ཡུལ་གང་པོའི་ཁྱིམ་ཚང་ཡོངས་རྫོགས་ཀྱི་རྒྱུ་དངོས་ཁབ་སྐུད་ཙམ་དང༌། བཟའ་ཆས་ཕོར་བ་གང་ཙམ་ཡང་ཁྱིམ་དུ་མ་བཞག་པར་གཞུང་ལེན་བྱས་ཤིང༌། མི་མང་སྤྱི་ཁང་ཟེར་བ་གཞུང་གིས་བཙུགས་པའི་ཐབ་ཚང་ནས་བཟའ་བཏུང་བྱེད་རྒྱུ་མ་གཏོགས། ཁྱིམ་ཚང་སྒེར་གྱི་ཁྱིམ་དུ་བཟའ་བཏུང་གི་རིགས་ཉར་བ་ལྟ་ཅི་ཐ་ན་མེ་ཙམ་ཡང་གཏོང་མི་ཆོག་པའི་ཁྲིམས་བཟོས། མི་མང་སྤྱི་ཁང་ནས་ལྟོ་བ་འགྲངས་བའི་བཟའ་བཏུང་ཞིག་གཏན་ནས་རག་གི་མེད་པས་མི་མང་པོ་མུག་ཤི་ཐེབས་པ་དང༌། འགའ་ཞིག་གིས་ལྡུམ་བུ་རོག་སྡེར་ཟེར་བ་སོགས་རྩྭ་ལྡུམ་སྣ་ཚོགས་ཟོས་པས་རྐྱེན་འདས་སུ་ཕྱིན། ཉིན་རེ་བཞིན་མི་རྣམས་ཀྱིས་བཙོག་པ་གཏོང་སར་ཞིབ་འཇུག་བྱེད་ཅིང༌། མི་སུ་ཞིག་གིས་བཙོག་པ་ཆེ་ཙམ་བཏང་བ་མཐོང་ན་ཁྱིམ་ནང་དུ་བཟའ་ཆས་གང་ཞིག་ཉར་ཡོད་མེད་ཀྱི་ཞིབ་བརྩད་དང་སྐྱོན་བརྗོད་བཅར་རྡུང་སོགས་བྱས། དམངས་གཙོ་བཅོས་བསྒྱུར་དང་གྲྭལ་རིམ་འཐབ་རྩོད་ཟེར་བའི་འོག་ཏུ་ཕྱུག་པོའི་ཁྱིམ་ཚང་རྣམས་ལ་ཕྱུག་བདག་གྲྭལ་རིམ་དང༌། འབྱོར་ལྡན་གྲྭལ་རིམ་ཟེར་བའི་མིང་བཏགས་ཤིང༌། གང་ཟག་རང་རང་སོ་སོའི་བསོད་ནམས་དང་འབད་བརྩོན་གྱི་དབང་གིས་རྒྱུ་ནོར་འཛོམས་པོ་བྱུང་བ་དེ། འབྱོར་མེད་གྲྭལ་རིམ་ལ་བཤུ་གཞོག་བྱས་པ་དང༌། འབྱོར་མེད་གྲྭལ་རིམ་གྱི་ཟུངས་ཁྲག་འཇིབ་པ་ལས་བྱུང་བའི་ཉེས་མིང་བཀལ་ནས་ཕྱུག་པོའི་ཁྱིམ་ཚང་ཡོངས་རྫོགས་ཀྱི་ཁྱིམ་བདག་ཕལ་མོ་ཆེ་རྣམས་དམར་གསོད་དང་བཙོན་ཤི་མུག་ཤིར་བཏང༌། སྐྱོན་བརྗོད་ཀྱི་ཚོགས་ཆེན་རེ་རེའི་ཐོག་ནས་བུས་ཕ་ལ་རྡུང་དུ་བཅུག་ཅིང་བུ་མོས་མ་ལ་རྡུང་དུ་བཅུག ཆུང་མས་ཁྱོ་བོ་ལ་རྡུང་དུ་བཅུག་ཅིང་སློབ་མས་བླ་མ་ལ་རྡུང་དུ་བཅུག དབུལ་བོས་ཕྱུག་པོ་ལ་རྡུང་དུ་བཅུག་ཅིང་གཡོག་པོས་སྦྱིན་བདག་ལ་རྡུང་དུ་བཅུག གཞན་ཡང་ཁྱོ་གའི་མགོ་བཅད་ནས་ཆུང་མའི་སྐེ་ལ་བཏགས་སྟེ་འཐད་རྩོད་བྱེད་པ་དང༌། ས་སྣུམ་བླུགས་པའི་ལྕགས་ཀྲིན་སྐེ་ལ་བཏགས་ནས་ཁྲོམ་བསྐོར་དུ་ཁྲིད་རྗེས་ས་སྣུམ་དེ་ལུས་ལ་བཤོས་ནས་གསོན་པོར་མེར་བསྲེགས་བཏང་པ་སོགས་འགྲོ་བ་མིའི་རིགས་ཀྱི་ཡིད་ཆེས་པར་ཤིན་ཏུ་དཀའ་བའི་བྱ་སྤྱོད་ངན་དགུ་སྣ་ཚོགས་ཤིག་ལག་ལེན་དུ་བལྟར་ཡོད་འདུག
ཕྱི་ལོ་༡༩༥༨ལོར་མགོ་ལོག་ལ་མི་འབོར་ཁྲི་༡༣ལྷག་ཡོད་ཀྱང་༡༩༦༤ལོར་མི་འབོར་ཁྲི་༦ཙམ་ཁོ་ན་ལས་ལྷག་མེད་པས། ལོ་བདུན་གྱི་རིང་མི་འབོར་ཁྲི་༧ལྷག་མར་ཆག་པ་དེ་གོང་བཤད་ཀྱི་རིག་གནས་གསར་བརྗེ་དང་གྲྭལ་རིམ་འཐབ་རྩོད། ད་དུང་དར་དམར་གསུམ་ཞེས་སྤྱིའི་ལམ་ཕྱོགས་ཟེར་བ་དང༌། མཆོངས་བསྐྱོད་ཆེན་མོ་ཟེར་བ། མི་མང་ཀུང་ཧྲེ་ཟེར་བ་རྣམས་ཀྱི་སྐབས་སུ་རྒྱ་ནག་གཞུང་གིས་དམར་བསད་དང་བཙོན་ཤི་མུག་ཤིར་བཏང་བ་ཡིན་ཞིང༌། དེའི་ནང་དུ་ཡ་ང་བའི་མནར་གཅོད་ལ་བཟོད་སྲན་བྱེད་མ་ཐུབ་པར་རང་ཤི་བརྒྱབ་པ་ཡང་མང་པོ་ཡོད་འདུག
ཁྱད་པར་དུ་མའོ་ཙེ་ཏུང་གིས་༧གོང་ས་སྐྱབས་མགོན་ཆེན་པོ་མཆོག་ལ། ཆོས་ནི་དུག་རེད། དེ་ལ་སྐྱོན་ཆེན་པོ་གཉིས་ཡོད། མི་རིགས་འཕེལ་རྒྱས་དང་ཡུལ་གྱི་ཡར་རྒྱས་ལ་བཀག་འགོག་བྱེད་ཀྱི་རེད། བོད་དང་སོག་པོ་གཉིས་ཀར་ཆོས་ཀྱི་དུག་དེ་འབྱམས་པ་རེད་ཅེས་བཤད་ཚུལ་ྋགོང་ས་ཆེན་པོའི་རང་རྣམ་ངོས་ཀྱི་ཡུལ་དང་ངོས་ཀྱི་མི་མང་ལས་གསལ་བ་བཞིན། ཆོས་ལུགས་རྩ་མེད་དུ་གཏོང་རྒྱུར་དམིགས་བསལ་གྱིས་ནུས་ཤུགས་ཡོད་དགུ་རྩལ་སྤྲུགས་བྱས་ཏེ། ཆོས་པ་རྣམས་ལ་ཡ་ང་བའི་བཅར་བརྡུང་དང་མནར་གཅོད་ཀྱི་རིགས་འདི་མ་བྱས་བྱ་བ་གཅིག་ཀྱང་མེད་ཅིང༌། བླ་སྤྲུལ་མཁན་གསུམ་གྱི་ཁྲོད་ནས་སྐུ་ལུས་ལ་མཚོན་བཞེས་མཁན་རྣམས་མེ་མདའ་དང་མེ་མདའི་རྩེ་གྲི་སོགས་ཀྱིས་དམར་བསད་བྱས་ཤིང༌། མཚོན་མི་བཞེས་པ་རྣམས་གཅེར་བུར་འཁྱགས་རོམ་གྱི་སྟེང་དུ་བཀྱིགས་ནས་འཁྱག་ཤི་ཐེབས་སུ་བཅུག་པ་དང༌། ཡང་གཅེར་བུར་བཀྱིག་པའི་སྟེང་དུ་ལུག་བསྐོར་ཏེ་ལུག་གིས་བརྫིས་ནས་གསོད་དུ་འཇུག་པ་དང༌། མགོ་ལུས་མེད་པར་དབྱུག་བརྡུང་བྱས་ནས་གསོད་པ་དང༌། སྐེ་ཐག་པས་བསྡམས་ནས་གསོད་པ་སོགས་གསོད་ལུགས་མི་འདྲ་བ་སྣ་ཚོགས་བྱས་ཤིང༌། དེང་སང་སྐུ་འཚོ་ཞིང་བཞུགས་པའི་མགོ་ལོག་གི་བླ་སྤྲུལ་རྒན་རིམ་རྣམས་ཀྱང་ལོ་ཉི་ཤུ་ཡར་མར་ལ་རྒྱ་མིའི་བཙོན་ཁང་དུ་བཞུགས་མ་མྱོང་མཁན་ཧ་ལམ་མེད། མི་མང་དཀྱུས་མ་ཞིག་གིས་མ་ཎི་རྡོག་པོ་གཅིག་ཙམ་བཏོན་པ་མཐོང་ན་དེའི་ཆེད་དུ་ཚོགས་ཆེན་བསྡུས་ཤིང༌། མི་མང་གི་དཀྱིལ་ནས་ཡར་འགྲེང་དུ་བཅུག་སྟེ་ལོག་སྤྱོད་པ་ཟེར་བ་ཏང་ཀྲུང་དབྱང་ལ་ངོ་ལོག་བྱས་པ་སོགས་ཀྱི་སྐྱོན་བརྗོད་དང་བཟོད་པར་དཀའ་བའི་བཅར་བརྡུང་ཡ་ང་བ་བྱས་ཤིང༌། ཆོས་ལུགས་མི་དགོས་ཟེར་མཁན་དང༌། སངས་རྒྱས་བྱང་སེམས་དང་བླ་མ་དགོན་སྡེ། ཚེ་སྔ་ཕྱི་དང་ལས་རྒྱུ་འབྲས་སོགས་ལ་ཡིད་ཆེས་མི་བྱེད་ཟེར་མཁན། གྲྭ་རོགས་གྲོགས་མཆེད་དང༌། ནང་མི་ཉེ་འབྲེལ་ཡུལ་མི་སུ་ཡང་རུང་བས་ཕྲེང་བ་དང་འཁོར་ལོ་དམ་རྫས་སོགས་ལྐོག་ཏུ་ཉར་བའམ། ཡང་ན་སྐྱབས་འགྲོ་དང་མ་ཎི་སོགས་ལྐོག་འདོན་བྱེད་པ་མཐོང་ན། མི་འདི་དང་འདིས་འདི་འདྲ་དང་དེ་འདྲ་བྱེད་ཀྱི་འདུག་ཟེར་ནས་གཞུང་ལ་ཡར་ཞུ་བྱེད་མཁན་ཚོར་སྔོན་ཐོན་པའི་མིང་བཏགས་ནས་བྱ་དགའ་སྤྲོད་པ་དང༌། ཆེ་ཆུང་ལ་མ་ལྟོས་པའི་གོ་གནས་ཕྲན་བུ་རེ་ཡང་སྤྲོད་ཁུལ་བྱས་པས་གོང་སྨྲོས་ལྟར་སྔོན་ཐོན་པ་ཡང་ཉུང་ཤས་ཤིག་བྱུང་ཡོད་འདུག
དེ་ལྟར་རིག་གནས་གསར་བརྗེ་དང་ཐུན་མོང་ཡོངས་ལ་དབང་བའི་ལམ་ལུགས། གྲྭལ་རིམ་འཐབ་རྩོད། དར་དམར་གསུམ་ཟེར་བ་སོགས་མུན་ནག་མདའ་འཕེན་དང༌། རི་བོང་ཅལ་འདྲོག་གི་སྲིད་ཇུས་དེ་དག་ལ་མཐའ་འཇུག་འབྲས་བུ་ཅི་ཡང་མ་ཐོན་པས། མགོ་ལོག་གིས་མཚོན་བོད་ཆོལ་ཁ་གསུམ་གྱི་ཐོག་ཏུ་མི་འབུམ་ཕྲག་བཅུ་གཉིས་ལྷག་གི་ཚེ་སྲོག་གིས་ཚོད་བལྟ་ཐེངས་གཅིག་བྱས་པ་ལྟ་བུ་ཞིག་ལས་བྱུང་མེད་རུང༌། སྐབས་དེའི་བོད་མི་རྣམས་ཀྱིས་དེ་ལྟར་དམྱལ་བའི་འགྲོ་བ་དང་ཡི་དྭགས་ཀྱི་འགྲོ་བ་མིའི་ཡུལ་དུ་སླེབས་པ་ལྟ་བུའི་སྡུག་བསྔལ་ཞིག་མྱང་དགོས་བྱུང་ཡོད་པ་རེད།
ངེད་ཅག་གི་རུ་བ་རྣམས་དར་ཡུལ་སྟོད་སོགས་སུ་སྡོད་སྐབས། དབྱར་དགུན་གྱི་མཚེར་ས་གང་དུ་སྤོར་ཀྱང་ངེད་ཚང་ལ་གསེར་སྐུ་ཁ་ཤས་དང༌། ཡི་གེ་དུམ་པ་བཅུ་གྲངས་ཤིག མཎྜལ་ཆེ་ཆུང་གཉིས། ངའི་ཡབ་ཀྱི་གདུང་རུས་དང་དབུ་སྐྲ། དེ་ལས་གཞན་པའི་དམ་རྫས་དང༌། བདུགས་ཤུག་སོགས་ཕྲན་བུ་ཡོད་པ་སྦྲའི་ཉེ་འཁོར་ཤིག་དུ་ས་སྐུང་བྱེད་ཀྱི་འདུག་ཅིང༌། ངེད་ཚང་ལ་ཧུ་ལུ་ཟེར་བ་གནའ་སྔ་མོ་རྒྱ་ནག་ནས་ཐོན་པའི་ཆང་རྫ་ཆེན་པོ་ཞིག་ཡོད་པ་དམིགས་བསལ་གྱིས་ཅ་ལག་དེ་ཚོ་སྐུང་སྣོད་བྱེད་ཀྱི་འདུག ང་ལོ་ན་ཧ་ཅང་ཆུང་བའི་དུས་སུ། ངའི་ཁ་ནས་ཤོར་བར་དོགས་པས་ས་སྐུང་བྱེད་པ་ང་ལ་མཐོང་དུ་མི་འཇུག་ཀྱང༌། ངས་བསམ་ཤེས་རྗེས་ས་སྐུང་བྱེད་སར་ཁྲིད་ཀྱི་འདུག་པ་དང༌། སྐབས་རེར་ས་སྐུང་གི་ཟུར་དུ་ངའི་རྩེ་ར་བསྒྲིགས་ཀྱི་ཡོད། ནང་མི་ཚོས་གལ་ཏེ་ས་སྐུང་ཡོད་སའི་ཟུར་ཡར་མར་ལ་ལས་བྱེད་སླེབས་སོང་ན། ཁྱོད་ཀྱིས་ས་སྐུང་ཡོད་སར་མིག་ཤོར་མི་ཉན་གསུངས་ཀྱི་འདུག་ཅིང༌། ངས་ཀྱང་ལས་བྱེད་ཐོན་དུས་ས་སྐུང་གི་ཕྱོགས་ལ་གཏན་ནས་བལྟ་གི་མེད། མཚམས་མཚམས་སུ་དམར་ཕྱོགས་གྱི་དག་ཐེར་ཐོན་སྐབས། ངས་ལྷ་སྐུ་ཡིན་ཁུལ་དང༌། མཆོད་རྟེན་ཡིན་ཁུལ་བྱས་ནས་བཟོས་པ་རྣམས་ལ་འཛུབ་མོ་བཙུགས་ཏེ། འདི་ཅི་རེད་ཅེས་འདྲི་དུས། ནང་མི་རྣམས་ཀྱིས་བསླབས་པ་བཞིན་གནམ་བདེ་སྒོ་མོ་ཆེ་དང༌། སྐར་ལྔའི་དར་དམར། མའོ་ཀྲུའུ་ཞི་སོགས་ཡིན་རབས་བཤད་ནས་མགོ་སྐོར་གྱི་ཡོད།
ཐེངས་ཤིག་འབྲོག་པ་རྣམས་རྒན་གཞོན་མེད་པར། ཀེ་མེན་ཅུན་རིན་ཟེར་བ་སོགས་ཀྱི་རྒྱ་གླུ་མང་པོ་སློབ་དགོས་པ་བྱུང་ཡང༌། འབྲོག་པ་ཚོས་རྒྱ་སྐད་མི་ཤེས་པས་རྒྱ་གླུའི་སྒྲ་གདངས་གཏན་ནས་མི་ཐོན། འོན་ཀྱང་ཆད་པ་བཅད་ཀྱི་ཡོད་དམ་ཡང་ན་འཐབ་རྩོད་བྱེད་ཀྱི་ཡོད་པ་འདྲ། གང་ལྟར་ཡང་འབྲོག་རྒན་རྣམས་ཀྱིས་ཨུ་ཚུགས་ཆེན་པོས་རྒྱ་གླུ་མ་བསླབ་ཐབས་མེད་བྱུང་འདུག་པས། ནང་ཤིག་མདའ་བའི་བཀྲ་ཆོས་ངེད་ཚང་ལ་ཕེབས་ཏེ། ཤིང་བུ་ཞིག་གིས་རྫ་མ་བརྡུངས་བཞིན། ཀེ་མེན་ཅོན་རིན་ཀུ་ཀུ་ཡོ་ལོ་ཆས།། སན་ཏ་ཅེ་ལས་པ་ཤང་ཀྲུའུ་ཞི།། སོགས་གསུངས་ནས་ངེད་ཚང་གི་རྒན་རྒོན་གཉིས་ལ་རྒྱ་གླུ་བསླབས་པ་དང༌། ངའི་མ་ཡར་གྱིས་སྒྲ་གདངས་གཏན་ནས་མ་ཐོན་པས་ཁོང་ཚོ་གད་མོ་མིག་ཆུ་ཤོར་བ་བགད་ཀྱི་འདུག ངེད་ཚང་གི་རྒན་རྒོན་གཉིས་དང་འདྲ་བར་རུ་སྐོར་གྱི་རྒན་པ་ཚོ་ཆ་ཚང་གིས་རྒྱ་གླུ་མི་ཤེས་པའི་ཁར། ཕྲུ་གུ་མང་པོ་ཡོད་ཀྱང་ཕྲུ་གུ་ཚོས་ཀྱང་རྒྱ་གླུ་ཡག་པོ་ཤེས་ཀྱི་མེད་པས་རྒན་པ་ཚོས་སེམས་ཁྲལ་ཆེན་པོ་བྱེད་ཀྱི་འདུག འོན་ཀྱང་ཁོང་ཚོ་ལ་རེ་བ་བྱེད་ས་གཅིག་རང་ཡོད་པ་དེ་ང་ཡིན་ཞིང༌། ངས་རྒྱ་མི་རང་གི་ཕྲུ་གུས་སློབ་པ་ཅི་བཞིན་ཤེས་ཀྱི་ཡོད་པས། བཞི་རྒྱལ་སང་སོགས་རུ་སྐོར་རྣམས་ཀྱིས་གྲོས་བྱས་ཏེ། ནམ་རྒྱ་མིའི་ལས་བྱེད་སླེབས་ཀྱང་ཐོག་དང་པོར་ངེད་ཚང་དང་ཐུག་ཐབས་བྱེད་རྒྱུ་བྱས་སོང༌།
ཉིན་ཞིག་ལས་བྱེད་དངོས་སུ་སླེབས་དུས། དང་པོར་མི་ཚང་གཞན་ཞིག་ལ་སླེབས་འདུག་ཀྱང༌། གཡོ་ཐབས་བྱས་ནས་ངེད་ཚང་ལ་ཁྲིད་བྱུང་བར་ལས་བྱེད་བཞི་ལྔ་ཞིག་འདུག ངའི་ཞང་པོ་མཆོག་གིས་ལས་བྱེད་ཚོར། ད་ང་ཚོ་མི་རྒན་པ་རྣམས་ལ་མགོའི་ཉི་ཟེར་དང་འདྲ་བས། ཏང་ཀྲུང་དབྱང་ལ་རྒྱུན་འཛིན་དང་ཞབས་ཕྱི་ཞུ་བསམ་རུང་ཞུ་རྒྱུའི་ནུས་པ་མེད། འོན་ཀྱང་ང་ཚོ་ལ་ཡོད་པ་དེ་ཕྲུ་གུ་འདི་ཚོ་ཡིན་པས། འདི་ཚོར་ཀྲུང་དབྱང་གིས་སྲིད་ཅུས་ལྟར་གྱི་སློབ་སྦྱོང་སྤྲོད་ཐབས་བྱེད་ཀྱི་ཡོད། ཁྱེད་རྣམས་པས་ལྟོས་དང་ག་འདྲ་བྱུང་འདུག་གསུངས་ནས་ང་ལ་མིག་བརྡ་བྱས། ངའི་མ་ཡར་གྱི་ནུ་མའི་ནང་འོ་མ་མེད་ཀྱང༌། ང་ལོ་ཆེན་པོ་མ་ཆགས་བར་ཁོང་གི་རུམ་དུ་ཉལ་བ་དང་ནུ་མ་ནུ་བའི་ལུགས་སྲོལ་ཡོད། སྐབས་དེར་ངས་སྤོབས་པ་ཆེན་པོས་གསལ་དག་སྙན་གསུམ་དང་ལྡན་པའི་ངང་རྒྱ་གླུ་ཁག་ཅིག་གི་རྒྱུགས་སྤྲད་རྗེས་མ་ཡར་གྱི་ནུ་མར་འཐམས་པས། ལས་བྱེད་ཚོས་རེ་ཞིག་གཅིག་ངོར་གཅིག་བལྟ་བྱས་ནས་སྡོད་ཀྱི་འདུག དེ་རྗེས་ཁོང་ཚོས། ང་ཚོ་ལས་བྱེད་བྱས་ནས་ལོ་མང་པོ་སོང་ཀྱང༌། ད་བར་འབྲོག་པའི་ཕྲུ་གུ་ཞིག་གིས་འདི་འདྲའི་རྒྱ་གླུ་ཡག་པོ་གཏོང་ཐུབ་པ་མཐོང་མ་མྱོང༌། ནུ་མ་ནུ་བཞིན་པའི་ཕྲུ་གུ་ཞིག་གིས་འདི་འདྲ་ཅི་ལྟར་བྱས་ནས་ཤེས་པ་རེད་ཟེར། ལག་ཕྱིས་དང༌། རྡོ་ཀ་ར་སོགས་ཀྱི་བྱ་དགའ་སྤྲད་པར་མ་ཟད། ང་ཡོད་པ་ཁོ་ན་ལ་བརྟེན་ནས་ཕྲུ་གུ་སློབ་སྦྱོང་ཅན་གྱི་བྱ་དགའ་ཡང་ང་ཚོའི་དོས་ཆུང་ལ་སྤྲད་བྱུང༌།
ཐེངས་ཤིག་ཞང་པོ་མཆོག་སོགས་མི་མང་པོ་ལྐོག་ནས་སྟོང་གཟའ་མཁན་ཆེན་གྱི་སྐུ་མདུན་དུ་ཆོས་ཞུ་བར་ཕྱིན་སོང་ཞིང༌། ཕྱིར་སླེབས་པའི་རྗེས་ནས། ཀ་དག་གི་ངང་ལས་སེངྒེ་དང་པདྨ་ཉི་ཟླའི་གདན་ལ་ཞེས་སོགས་དང༌། ཨཱཿ ཀ་དག་གཏིང་གསལ་ཆོས་ཀྱི་སྐུ།། ལྷུན་གྲུབ་རང་རྩལ་ལོངས་སྤྱོད་རྫོགས།། ཞེས་སོགས་དང༌། འོད་གསལ་སྣང་བཞི་མཐར་ཕྱིན་ནས།། རིག་པ་མི་འགྱུར་སྐུ་ལྔར་བཞེངས།། འཇའ་ལུས་འཕོ་ཆེན་དྭངས་མའི་གཟུགས།། འཆི་མེད་བི་མ་མི་དྲ་ཀྱཻ།། བདག་ལ་ཐུགས་རྗེས་བརྩེར་དགོངས་ལ།། མངོན་སུམ་བྱིན་བརླབས་དེང་སྩོལ་ཅིག ཨོཾ་ཨ་ཧཱུྃ་མ་ཧཱ་གུ་རུ་བི་མ་ལ་ཞེས་སོགས་ཀྱི་འདོན་པ་ཞིག་འདོན་རྒྱུ་འདུག་ཅིང༌། མཚམས་རེར་ནམ་མཁའ་ལ་བལྟས་ནས། ཡུན་རིང་པོར་འགུལ་སྐྱོད་མི་བྱེད་པར་གསེར་སྐུ་ལྟར་སྡོད་ཀྱི་འདུག དེའི་གསང་བ་ཕྱི་ལ་ཤོར་བའི་རྐྱེན་གྱིས། ཉིན་ཞིག་ཟང་ཐར་ཟེར་བའི་རྒྱ་དཔོན་ཞིག་དང༌། ལས་བྱེད་ཁ་ཤས། སྐད་བསྒྱུར་བ་ནོར་དགེ་ཟེར་བ་ཞིག་རྣམས་གློ་བུར་དུ་ངེད་ཚང་ལ་སླེབས་ནས། ཁྱེད་སུ་ཚང་ཡིན་ཟེར། ངའི་མ་ཡར་གྱིས་བཀྲ་འོད་སང་ཡིན་ཟེར་བས། བཀྲ་འོད་བཀྲ་འོད། བཀྲ་ཆོས་བཀྲ་ཆོས་ཟེར་བཞིན་ཚང་མ་རྟ་ལས་བབས། ཁྱིམ་དུ་སླེབས་རྗེས་སྐད་ཤུགས་ཆེན་པོས་ཇ་བླུགས་ཤོག་ཟེར། མ་ཡར་གྱིས། ཨ་ཡེ་རྒན་མོ་ན་གི་འདུག་སྟབས་ཇ་བསྐོལ་མི་ཐུབ། འཐུང་དགོས་ན་ཁྱེད་རང་ཚོས་སྐོལ་ཞེས་བཤད་སོང་བར་ནོར་དགེས་ངས་བསྐོལ་ཆོག་ཟེར། ཇ་བསྐོལ་ཚར་བའི་རྗེས་སུ་ཡང་སྐད་ཆེན་པོས་ཕོར་བ་ཁྲུས་ཤོག་ཟེར་བར་མ་ཡར་གྱིས། ཨ་ཡེ་རྒན་མོའི་ལག་པ་མི་བདེ་བས་འཁྲུ་མི་ཐུབ། འཁྲུ་དགོས་ན་ཁྱེད་རང་ཚོས་ཁྲུས་ཟེར་བར་ཡང་ནོར་དགེས་བཀྲུས་སོང༌། དེའི་རྗེས་ལ་ནོར་དགེས། ཨ་ནེ། ང་ཚོ་ཉེ་འབྲེལ་ལ་འགྲོ་གི་ཡོད་པ་རེད། ང་ཨེ་ཤེས་གི་ཟེར། ངའི་མ་ཡར་གྱིས་སྔ་ས་ནས་ཤེས་འདུག་ཀྱང་ཆེད་དུ་མི་ཤེས་ཁུལ་བྱས་ནས། ངས་ཤེས་ཀྱི་མི་གདུག་ཁྱོད་སུ་ཚང་གི་རེད་ཟེར། ནོར་དགེས་ཁོ་རང་གི་ཕ་ཡི་མིང་བཤད་ནས་ང་དེ་ཚང་ཡིན་ཟེར་བས། མ་ཡར་གྱིས་ལག་པས་རང་གི་འགྲམ་ཤ་འཐེན་ཞོར། ཨོ་ཧ་བོ། ཁྱོད་རང་གི་ཕ་གསེར་དང་འདྲ་བའི་མི་དེ་ཇི་འདྲའི་ཆོས་པ་བཟང་པོ་ཞིག་རེད། ཉི་མ་ལྷ་ས་བར་དུ་ཕྱག་འཚལ་ནས་ཕྱིན་པ་རེད། ཕ་རྒོད་པོ་ཤ་ཟན་ཅིག་ལ། བུ་ཁྭ་ཏ་སྐྱག་ཟན་ཁྱོད་འདྲ་བ་ཞིག་སྐྱེས་འདུག བུ་རྒོད་པོ། འཆུགས་མི་ཉན། ཕ་བརླ་བཙོང་ཅི་ཐུབ་གྱིས་ཨ་ཟེར་བར། ང་སྐྲག་ནས་མ་ཡར་ལ་དེ་འདྲ་མ་ཟེར་ཞེས་བཤད་པ་ཡིན།
ཁོང་ཚོས་ཇ་འཐུང་བཞིན་པའི་སྐབས། ཡང་ལས་བྱེད་རྟ་པ་ཁ་ཤས་ཛ་དྲག་གིས་སླེབས་སོང་བས་འཐུང་འཕྲོ་བྱས་ཏེ་འུར་དིར་གྱིས་ཕྱིན་སོང༌། ཉིན་དེར་མདའ་བའི་བཀྲ་ཆོས་དང༌། ཞང་པོ་མཆོག་གཉིས་སྟོང་གཟའ་མཁན་ཆེན་གྱི་སྐུ་མདུན་དུ་འགྲོ་བཞིན་པར་ལམ་ནས་བཟུང་སྟེ། མདའ་བའི་བཀྲ་ཆོས་ལ་ཁོང་རང་ཉིད་ཀྱི་ལམ་གྲོའི་ཆེད་རྩམ་པ་སྒྲོ་བ་གང་ཁུར་དུ་བཅུག་ནས་ཕྱག་གཉིས་འབྲེང་བས་བསྡམས་ཏེ། རྐང་ཐང་མར་བཤས་ལུག་ལྟར་ངེད་ཚང་གི་སྒོ་ནས་ཚུར་དེད་བྱུང་བ་དང༌། ཞང་པོ་མཆོག་གིས་ཀྱང་ངེད་གཉིས་ལྷན་དུ་ཁྲིད་རོགས་ཟེར་འོ་དོད་ཆེན་པོ་འབོད་བཞིན་མཉམ་དུ་སླེབས་སོང༌། ང་ཞེ་སྡང་གིས་ཤི་གྲབས་བྱས་རུང་ལོ་ཆུང་བས་ནུས་པ་གང་ཡང་མེད། འོན་ཀྱང་ཁོང་ཁྲོ་ལངས་ཆེས་པས་ངུ་འདར་རྒྱག་བཞིན་རང་གི་མ་ཁར་སོ་བཏབ་ནས་པགས་པ་ཡང་སྐྲང་འདུག ང་ཚོས་རྒྱ་མི་ལ་ཨ་ལོ་སང་ཟེར་ཞིང༌། སྔོན་ཨ་ལོ་སང་གིས་ང་ལ་རྒྱ་གླུ་ཤེས་པའི་བྱ་དགའ་སྤྲད་སྟབས། ང་ཨ་ལོ་སང་ལ་ཧ་ཅང་དགའ་ཡང༌། ཉིན་དེ་ནས་བཟུང་ཨ་ལོ་སང་ལ་དགྲ་ཡི་འདུ་ཤེས་ཤིག་བྱུང་བས། རྗེས་སུ་རྒྱ་གླུ་ཡང་རྩ་བ་ནས་སློབ་རོགས་མ་བྱས། ངེད་ཚང་ལ་ནག་ར་ཟེར་བའི་རྟ་ནག་པོ་ཞིག་ཡོད་ཅིང༌། རྟ་དེ་ཅུང་རྒོད་པོ་ཡིན་རུང་ཞང་པོ་མཆོག་གཅིག་པོ་ལ་ཧ་ཅང་མཛའ་མདོག་བྱེད་པའི་རྟ་བསམ་ཤེས་ཤིག་ཡིན། ཞང་པོ་མཆོག་གིས། ད་སང་ཉིན་གནང་ཉིན་ཞིག་ལ་ང་ཡང་འཛིན་བཟུང་བྱེད་པར་ཡོང་གི་རེད། བཀྲ་ཆོས་དང་འདྲ་བར་རྐང་ཐང་ལ་སྐྱ་བདའ་བླངས་སོང་དུས་ངས་གཟུགས་པོས་མི་ཕེར་གསུངས་ནས། རྟ་དེ་ཉིན་མང་པོར་སྒོ་ལ་བཏགས་སོང་ཡང་ཞང་པོ་མཆོག་འཛིན་པར་སླེབས་མ་སོང༌།
ཉིན་མང་པོའི་རྗེས་ནས་མདའ་བའི་བཀྲ་ཆོས་ཕྱིར་ཕེབས་ཏེ། ངེད་ཚང་ལ་ཁོང་བཅིང་སྡོམ་དང༌། འདྲི་ཕྱུངས་བྱས་པའི་ལོ་རྒྱུས་མང་པོ་གསུངས་ཀྱི་འདུག་པའི་ནང༌། ལས་བྱེད་ཚོས་ཁོང་གི་དཔུང་ཚིགས་གཉིས་ཀ་ཕུད་ནས་ལག་གཉིས་རྒྱབ་ཏུ་བཅིངས་པ་དང༌། མི་ཤུགས་ཆེན་གཉིས་གསུམ་མཉམ་རུབ་ཀྱིས་རྩྭ་ཐག་རྩུབ་མོས་བསྡམས་པས། དུས་ཡུན་རིང་ཙམ་སོང་རྗེས་རྩྭ་ཐག་ཤ་གསེང་དུ་ཕར་ཐིམ་སྟེ། ཐག་པའི་གོང་འོག་གི་ཤ་གཉིས་མཉམ་དུ་ཐུག་པའི་བར་ན་གཉེར་མ་ལྟ་བུ་ཞིག་ཡོད་པ་ཙམ་མ་གཏོགས། ཐག་པ་རྩ་ནས་མཐོང་གི་མི་འདུག་གསུངས་བྱུང་ཞིང༌། མ་ཡར་གྱིས་ཁ་མི་དགེ་རྒྱུ་སང་ཟེར། ཨ་ལོ་སང་ལ་གཤེ་ཞོར་མང་པོ་ངུ་གི་འདུག འདི་སྐབས་བླ་མ་མང་པོས་ཡང་བསྐྱར་རིག་གནས་གསར་བརྗེ་གཉིས་པ་ལྟ་བུའི་སྡུག་བསྔལ་ཞིག་མྱང་འདུག་ཀྱང༌། ངས་དེ་ཙམ་མ་གཏོགས་ཞིབ་ཏུ་མ་གོ
ཡང་ཐེངས་ཤིག་ཆོས་ཚེ་ཟེར་བ་སོགས་ལས་བྱེད་མང་པོ་སླེབས་ནས་ངེད་ཚང་གི་སྦྲ་ཟུར་དུ་གུར་ཕུབ་ཏེ་ཉིན་བཅུ་གྲངས་ཤིག་ལ་བསྡད་སོང༌། ཆོས་ཚེ་ཟེར་བ་དེ་མི་ཐམས་དགའ་བོ་བྱེད་སའི་ལས་བྱེད་ཀླད་འཐུག་ཅིག་ཡིན་ཡང༌། ཁོང་གི་རོགས་པ་ཚོ་སྡུག་སེམས་སོལ་བ་ལས་ཀྱང་ནག་པ་ཤ་སྟག་རེད། ང་ཚོའི་རུ་བ་རྣམས་ཀྱིས་གོ་རེ་དང༌། མར་རྩམ་པ་སོགས་བསྐྱལ་དགོས་པར་མ་ཟད། ལུག་ཀྱང་ཁ་ཤས་བཤས་ནས་བསྐྱལ་གྱི་འདུག ཁོང་ཚོས་ཁྱིམ་ཚང་གཡས་གཡོན་གྱི་ཕྲུ་གུ་རྣམས་བསླུས་ནས་རྡོ་ཀ་ར་སོགས་སྤྲད་ཏེ་ཁྱིམ་ནང་དུ་ཡི་གེ་དང༌། ཐང་ཀ ཕྲེང་བ། འཁོར་ལོ། དམ་རྫས་སོགས་ལྐོག་ཉར་བྱས་ཡོད་མེད་ཀྱི་ཁ་བསྔོགས་ཐབས་གང་དྲག་བྱེད་རུང༌། ང་ཚོ་ཕྲུ་གུ་རྣམས་ལ་ཡང་སོ་སོའི་ནང་མི་རྒན་པ་ཚོས་སྦྱོང་བརྡར་གང་ལེགས་སྤྲད་ཡོད་པས་ལས་སླ་པོར་ཁ་བསྔོགས་མི་ཐུབ། ང་གཅིག་པོར་མཚོན་ན་ཡང་སྐབས་རེར་རྡོ་ཀ་ར་ཆུང་ངུ་རེ་སྤྲད་ནས་ཁ་བསྔོགས་པ་དང༌། སྐབས་རེར་ལས་བྱེད་རེས་ལྐོག་ཤིག་ཏུ་ཁྲིད་ནས། ཁྱེད་ཚང་གི་ཞང་པོ་དང་ངེད་གཉིས་གྲོགས་པོ་ཡིན། ཁོང་གི་ཕྲེང་བ་ལྐོག་ཏུ་བཟུང་ཡོད་པ་ལས་བྱེད་གཞན་ཚོས་མཐོང་ན་ཁྲིམས་ཁང་དུ་འགྲོ་དགོས་པས་ཡག་པོ་ཞིག་སྐུང་རོགས་ཀྱིས་ཞེས་ཤོད་ཨ། འུ་ཚང་གི་ཐང་ག་དང་ཡི་གེ་གཞན་པ་ཚོ་ཡག་པོ་ཞིག་སྐུང་ཡོད་དམ་སོགས་ཟེར་ནས་ནང་ཚགས་ཡིན་ཁུལ་གྱིས་མགོ་སྐོར་བྱེད།
ཐེངས་ཤིག་བོད་སྐད་ཕྲན་ཙམ་ཤེས་པའི་རྒྱ་མི་ཞིག་གིས། ང་མགོ་གཡོགས་པའི་ཐབས་འཕྲུལ་ཟབ་མོ་ཞིག་སྤྱད་པས། ངའི་ཁ་ནས་ཞང་པོ་ལ་ཕྲེང་བ་ཡོད་པའི་གཏམ་ཚིག་གཅིག་ཤོར་ཡང༌། འཕྲལ་དུ་ཕར་མགོ་གཡོགས་ནས་འཛིན་ས་ཅི་ཡང་མེད་པ་ཞིག་བྱེད་ཐུབ་སོང་བ་དཀོན་མཆོག་གི་ཐུགས་རྗེ་ཡིན་པ་འདྲ། དེ་ནི་ལས་བྱེད་དེ་གཅིག་པོར་གུར་ནང་དུ་སྡོད་སྐབས་ང་དེར་སོང་བས། ཁོས་དགའ་མདོག་ཆེན་པོས་ངེད་གཉིས་ཤོག་པེ་(ཏག་སེ་)རྒྱག་ཟེར་བ་བཞིན་ཤོག་པེ་རྒྱག་སྐབས། ཁོས་མདང་དགོང་ཁྱེད་ཚང་གི་ཞང་པོ་ལ་ཕྲེང་བ་ཡོད་པ་དངོས་སུ་མཐོང་སོང་ཟེར། ཕར་བཤད་ཚུར་བཤད་ཁ་ཤས་བྱས་རྗེས། མཐར་ཕྲེང་བ་དངོས་སུ་མཐོང་ཡོད་མེད་ལ་ངེད་གཉིས་རྒྱན་ཆེན་པོ་བཞག་རྒྱུའི་སྟེང་དུ་ལྷུང༌། རྒྱན་བཞག་རྗེས་ཁོས་ཁྱེད་ཚང་གི་ཞང་པོའི་ཕྲེང་བ་སྔོན་པོ་ཞིག་རེད་ཟེར། ངས་ཁྱོད་ཀྱིས་མཐོང་མི་འདུག ཁོང་གི་ཕྲེང་བ་ནག་པོ་ཞིག་ཡིན་ཞེས་ཁ་ནས་ཤོར་བས། ཁོས་ད་དུང་སྔོན་པོ་རེད་ཟེར་ནས་ཨུ་ཚུགས་བྱེད་ཁུལ་བྱེད་པ་དང་སྦྲགས། འོ་ན་ནག་པོ་ཡིན་ན་ཆེ་ཆུང་དང་རིང་ཐུང་ག་འདྲ་ཞིག་རེད། ནམ་རྒྱུན་གང་དུ་འཇོག་གི་རེད་ཁྱོད་ཀྱིས་ཤོད་དང༌། དེ་ནས་ངས་སྔོན་པོ་ཡིན་པའི་རྒྱུ་མཚན་དང༌། ཆེ་ཆུང་རིང་ཐུང༌། མདང་དགོང་གང་ནས་མཐོང་བ་རྣམས་ཁྱོད་ལ་བཤད་ཟེར། སྐབས་དེར་ང་ཁོས་མགོ་སྐོར་འོག་ཏུ་ཚུད་ཚར་བ་ཤེས་ནས་གཅིན་ཤོར་གྲབས་ཀྱི་སྐྲག་སྣང་ཆེན་པོ་ཞིག་བྱུང་ཡང༌། ངོ་མདོག་མ་ཤོར་བ་བྱས་ཏེ། ངེད་ཀྱི་ཞང་པོའི་ཕྲེང་བ་ནག་པོ་ཡིན་པ་དང༌། ཕྲེང་བའི་མགོ་ལ་ཨ་ལུང་ཆེན་པོ་གཅིག་ཡོད། ཐད་ཀར་བརྐྱང་ན་ཁྱིམ་ནས་མར་ཁྱི་འདོགས་ས་བར་དུ་སླེབས་ཐུབ། ངེད་ཚང་ལ་ཕྲེང་བ་མང་པོ་ཡོད་ཀྱང་ཆ་ཚང་སྒྲོ་ནང་དུ་བཞག་ནས་བརྩིགས་ཡོད་པས་ཁྱོད་ཀྱིས་མཐོང་མི་སྲིད། ཁྱོད་ཡིད་མི་ཆེས་ན་ངས་ད་ལྟ་རང་ཁྱེར་ཡོང་ཆོག་ཅེས་བཤད་པས། ཁོས་ང་རང་གཉིས་མཉམ་དུ་འགྲོ དངོས་གནས་ཁྱོད་བདེན་འདུག་ན་ངས་ཁྱོད་ལ་རྒྱན་ཤོར་བ་ལོས་སྟེར་ཟེར། ངེད་གཉིས་ཁྱིམ་ལ་མཉམ་དུ་ཕྱིན་ཏེ་ངས་ཡ་དོ་(ཁྱིམ་སྟོད་དུ་སྒམ་དང་ཅ་ལག་བརྩིགས་སྲོལ་ཡོད་པའི་མིང༌)བསྔོགས་པས། མ་ཡར་གྱིས་ད་ཁྱོད་ཀྱིས་ཅི་བྱེད་པ་ཡིན་ཟེར། ངས་ལས་བྱེད་འདིས་འུ་ཚང་གི་ཕྲེང་བ་རྣམས་སྔོན་པོ་རེད་ཟེར། ངེད་གཉིས་རྒྱན་བཞག་ཡོད་ཅེས་བཤད་ནས་སྒྲོ་ནང་དུ་ཅ་ལག་སྡོམ་བྱེད་ཀྱི་འབྲེང་བ་མང་པོ་ཡོད་པ་ཁོའི་སྔོན་དུ་ཕྱུངས་པས། ཁོས་ཕཻ་ཟེར་བ་དང༌། ངའི་མ་ཡར་ཡོད་སྟབས་ངོ་ཚ་ནས་སྟབས་སྟབས་པོར་ཕྱིན་སོང༌། འབྲང་བ་རྣམས་ལ་ཡང་སྣུམ་མང་པོ་བྱུགས་ཡོད་པས་དངོས་གནས་ནག་པོ་རེད་འདུག དེ་ནས་ངས་ད་རྒྱན་ཤོར་བ་སྤྲོད་དགོས་ཞེས་ཨུ་ཚུགས་བྱེད་ཁུལ་བྱས་པས། ཁོས་རྗེས་སུ་སྤྲད་ཡོང་ཟེར་བ་དང་ཉིན་དེར་ད་གིན་རྩེད་མོ་རྩེ་སྤྱད་ཀྱི་ཤོག་པེ་ཏག་སེ་རྙིང་པ་དེ་སྤྲད་བྱུང༌། དེ་དུས་ངས་ཀློག་སློབ་རྒྱུའི་མགོ་བཙུགས་མེད་པས་སྐབས་དེར་ང་ལོ་བདུན་ཡིན་པ་འདྲ། ཡང་ཐེངས་ཤིག་ཞོགས་པ་སྔ་བོ་ཞིག་ལ་ལས་བྱེད་སྐོར་ཞིག་བྱུང་སྟེ་ཁྱིམ་ནང་དུ་དག་ཐེར་བྱས་རྗེས༌། ངའི་སྐེ་ལ་སྲུང་འཁོར་བཏགས་ཡོད་མེད་བལྟ་ཆེད་ལས་བྱེད་ཅིག་གིས་ང་ཉལ་ནས་བསྡད་ཡོད་པའི་རུམ་ནང་དུ་སྦར་མྱུལ་བརྒྱབ། ངའི་སྐེ་ལ་ཡབ་དམ་པ་དེའི་དབུ་སྐྲ་དང་དུང་རྣ་སོགས་ཀྱི་སྲུང་འཁོར་བཏགས་ཡོད་ཀྱང་ཁོས་རྙེད་མ་སོང༌།
ང་ཚོའི་མི་ཚང་རེ་རེ་བཞིན་དུས་རྒྱུན་མ་བཤམས་ན་མི་ཆོག་པ་ནི་རྒྱ་ནག་གཞུང་གིས་རིན་མེད་དུ་བཀྲམས་པའི་མའོ་ཙེ་ཏུང་གི་པར་དང༌། མའོ་ཀྲུའུ་ཞིའི་གསུང་རྩོམ་གཅེས་བཏུས་ཟེར་བའི་དེབ་ལྔ་ཡོད་པ་དེ་རྣམས་ཡིན་ལ། དེབ་དང་པོ་ནས་བཞི་པའི་བར་འགྱིག་ཤོག་དམར་པོའི་རྒྱབ་ཤ་ཅན་ལ་ཡི་གེ་སེར་པོ་གསེར་ཡིག་གི་བཟོ་བྱས་ནས་བྲིས་པ་དང༌། དེབ་ལྔ་པ་སྤྱིར་བཏང་གི་ཤོག་བུ་དཀར་པོའི་རྒྱབ་ཤ་ཅན་ཡི་གེ་དམར་པོས་བྲིས་ཤིང་དེབ་སྔོན་མ་ཚོ་ལས་ཅུང་འཐུག་པ་ཞིག་རེད། ད་དུང་མའོ་ཀྲུའུ་ཞིའི་གསུང་རྩོམ་གཅེས་བསྒྲིགས་ཟེར་བའི་ལག་དེབ་ཆུང་ངུ་འགྱིག་ཤོག་དམར་པོས་རྒྱབ་ཤ་བྱས་པ་ཞིག་ཀྱང་ཡོད། ལོ་རེའི་གཡར་དགུན་གྱི་མཚེར་ས་སྤོར་སྐབས་ཞང་པོ་མཆོག་གིས༌། མྱི་རོ་བསྲེག་བྱད་འདི་ཆ་ག་ཁྱོག་གི་མི་འདུག་གསུངས་ཀྱི་འདུག་ཀྱང་མ་ཁྱེར་ན་ཆོག་གི་མེད་པ་རེད།
དེ་ལྟར་ཕྱིའི་ཁོར་ཡུག་ལ་རྒྱ་ནག་གཞུང་གི་སྲིད་བྱུས་སྤྱི་དང༌། ཁྱད་པར་ལམ་ཕྱོགས་སློབ་གསོ་སོགས་ཀྱི་གནོན་ཤུགས་ཀྱིས། དཀོན་མཆོག་གསུམ་གྱི་སྒྲ་ཙམ་ཡང་མི་གྲགས་རུང༌། ནང་དུ་ཆོས་པའི་ཁྱིམ་ཚང་ཞིག་ཡིན་སྟབས་ངེད་ཚང་ལ་དགོང་ཚོགས་ཟེར་བ་དགོང་མོའི་ཞལ་འདོན་བསམ་ལྷུན་དང༌། སྒྲོལ་མ། བར་ཆད་ལམ་སེལ། ལྟུང་བཤགས་སོགས་མང་པོ་འདོན་རྒྱུ་ཡོད་ཅིང༌། ཞལ་འདོན་གྱི་མང་ཉུང་ཙམ་མ་གཏོགས་དགོང་ཚོགས་འདོན་རྒྱུ་ཡོད་པ་གཡས་གཡོན་གྱི་ཁྱིམ་ཚང་ཆ་ཚང་ཧ་ལམ་གཅིག་མཚུངས་ཡིན། ལོ་རེའི་ནང་མདའ་བའི་བཀྲ་ཆོས་དང༌། ངེད་ཀྱི་ཞང་པོ་མཆོག་སོགས་ཀྱིས་ཐག་ཉེའི་ཁྱིམ་ཚང་ཆ་ཚང་ལ་རེས་མོས་ཀྱིས་མནོལ་བསང་དང༌། མཎྜལ་བཞི་ཆོག་ཉིན་འདོན་རེ་བྱེད་ཅིང༌། དེ་ཡང་རུ་གོང་མ་རྣམས་ཀྱི་ཁྱིམ་དུ་འདོན་དུས་འོག་མ་རྣམས་ཀྱིས་ལས་བྱེད་ལ་སོ་ལྟ་བྱེད་པ་དང༌། འོག་མ་རྣམས་ཀྱི་ཁྱིམ་དུ་འདོན་སྐབས་གོང་མ་རྣམས་ཀྱིས་སོ་བལྟ་བྱེད་ཀྱི་འདུག་ཅིང༌། ང་ཚོའི་རུ་བ་རྣམས་ལ་དོན་དམ་གྱི་རྡོག་རྩ་གཅིག་སྒྲིལ་ཧ་ཅང་བརྟན་པོ་ཡོད།
ཐེངས་ཤིག་ངེད་ཀྱི་ཁྱིམ་དུ་མདའ་བའི་བཀྲ་ཆོས་དང༌། རྒྱལ་རོང་བླ་མ་ཀུན་རྒྱམ། ཞང་པོ་མཆོག་རྣམས་ཀྱིས་མཎྜལ་བཞི་ཆོག་འདོན་གྱི་ཡོད་སྐབས་གློ་བུར་དུ་ལས་བྱེད་སླེབས་སོང་བའི་གསང་བརྡ་འབྱོར་བས། སྒྲོལ་སྐུ་དང་མཎྜལ། ཆུ་མཆོད་སྟབས་བདེ་ཞིག་བཤམས་ཡོད་པ་སོགས་སྐད་ཅིག་ཉིད་ལ་བསྐུངས་ནས། ཞང་པོ་མཆོག་གིས་པགས་པ་མཉེད་ཁུལ་དང༌། གཞན་གཉིས་མགྲོན་པོ་ཡིན་ཁུལ་གྱིས་ཇ་འཐུང་བཞིན་བསྡད། ལས་བྱེད་ཚོ་ངེད་ཚང་ལ་སླེབས་ནས་ཇ་འཐུང་ཞིང་ཅུང་ཙམ་བསྡད་རྗེས་ཕྱིན་སོང༌། ངེད་ཀྱི་མཚེར་སའི་འོག་ཏུ་ས་དམར་གྱིས་གང་བའི་ན་ཐང་ཆུང་ངུ་ཞིག་ཡོད་ཅིང༌། དེའི་རྗེས་ལ་རི་སྣ་ཞིག་ཡོད། ལས་བྱེད་ཚོ་རི་སྣ་དེའི་མར་ནང་དུ་སོང་ཚར་རྗེས་ཞང་པོ་མཆོག་སོགས་ཀྱིས་གད་མོ་དགོད་ཞོར་དང༌། ལས་བྱེད་ཚོ་ལ་འཕྱ་ཞོར་མཆོད་པ་རྣམས་ཕྱིར་བཤམས་ནས་ཡང་འདོན་གྱི་འདུག
ཐེངས་ཤིག་ཨ་འཛིའི་ཚུལ་མཐའ་འམ་མཚན་ཆ་ཚང་ལ་ཚུལ་ཁྲིམས་མཐའ་ཡས་ཞུ་བ་ངེད་ཚང་ལ་ཡོང་ནས་ཉིན་གུང་གི་ཟ་མ་ཟོས་རྗེས། ཟན་གྱི་འཕྲོ་མས་ནར་མོ་ཁ་ཤས་བཟོས་ནས་ག་གེ་མོ་ཞིག་འདོན་བཞིན་བཞག་པ་དང༌། མ་ཡར་གྱིས་ང་ལ་འདི་ཚོ་ལས་བྱེད་མི་ཡོང་སའི་ས་གཙང་ས་ཞིག་ཏུ་སྐྱོལ་གསུངས་པ་བཞིན་བསྐྱལ་བ། དེང་སང་བསམས་ན་གུང་ཚིགས་མཛད་ཀྱི་ཡོད་པ་དང༌། འདུལ་བ་རིན་པོ་ཆེའི་ཕྱག་བཞེས་ལྟར་འཕྲོག་མ་ལ་ཆང་བུ་སྟེར་བ་ཡིན་འདུག མདའ་བའི་བཀྲ་ཆོས་དང་ངེད་ཀྱི་ཞང་པོ་མཆོག་གཉིས་དམིགས་བསལ་གྱི་གྲོགས་པོ་ཡིན། ནམ་རྒྱུན་ཁོང་ངེད་ཚང་ལ་ཡོང་ནས་དུས་ཚོད་འཕྱི་བོའི་བར་སྡོད་པ་དང་དེ་ནས་ཕྱིར་འགྲོ། སྐབས་རེར་ང་ངུས་ནས་ཨུ་ཚུགས་ཆེན་པོས་བཟུང་སྟེ་མ་བཏང་དུས། བདེན་པ་ཁུར། ང་ཕྱིར་ཐོན་ཡོང་གསུངས་ནས་ཁོང་གི་ཁྱིམ་དུ་ཕྱིན་ཏེ་ཅ་ལག་ཅིག་བཟུང་ནས་ཡོང་གི་འདུག དོན་ཅི་ཞིག་དང་ཐུག་ཀྱང་ཅ་ལག་དེ་མེད་པར་ཞག་སྡོད་གཏན་ནས་མི་བྱེད་པ་ནི་ཆོས་གོས་རྣམ་གསུམ་གྱི་འབྲལ་སྤངས་ལས་གཞན་གང་ཡང་མིན། ཁོང་རྣམས་ཀྱིས་ཕྱིའི་ན་བཟའ་སྐྱ་ཆས་མི་བཞེས་ཐབས་མེད་ཡིན་ཡང༌། ནང་གི་ཉམས་ལེན་ལ་འཐིང་ལྷོད་མེད་པར་དུས་ཟིང་འདི་འདྲའི་སྐབས་སུ་ཡང༌། ཚུལ་ཁྲིམས་ཀྱི་རྒྱལ་མཚན་བརྟན་པོར་བཟུང་ནས་བཞུགས་ཡོད་པ་རེད།
ང་ལོ་ངོ་བརྒྱད་ལ་སླེབས་དུས་གཟའ་སྐར་འཕྲོད་སྦྱོར་ཕུན་སུམ་ཚོགས་པའི་ཉིན་ཞིག་སྟོང་གཟའ་མཁན་ཆེན་གྱི་སྐུ་མདུན་དུ་ཡི་གེ་སློབ་པའི་མགོ་བཙུགས་ཤིང༌། ཁོང་གིས། ཀ་ཟེར་ན་ཁྱོད་ཀྱིས་ནམ་རྒྱུན་ཀ་ར་དགོས་ཟེར་གྱི་འདུག་པ་དེའི་ནང་གི་ཀ་དེ་རེད། ཁ་ཟེར་ན་ཁ་གདངས། ཁ་རོག་སྡོད་ཟེར་གྱི་འདུག་པ་དེའི་ཁ་དེ་རེད། ཅེས་སོགས་ཀ་མད་སུམ་ཅུ་པོ་དཔེ་ལེན་དཔེ་འཇོག་གིས་ཐེངས་གཅིག་དང༌། སྒྲ་གདངས་དང་མཉམ་དུ་ཐེངས་ཁ་ཤས་བསླབས་རྗེས་གཟན་ཤམ་ཆ་གཅིག་དང༌། དྲི་མེད་ཞིང་སྐྱོང་མགོན་པོས་ཕྱག་བསྣམས་མཛད་མྱོང་བའི་དྲིལ་བུ་གཅིག་བཅས་རྟེན་འབྲེལ་ཡིན་གསུངས་ནས་གནང༌། ཉིན་དེའི་དགོང་མོ་ཚུར་རང་ཁྱིམ་དུ་སླེབས་རྗེས་ངས་ཀ་མད་སུམ་ཅུ་པོ་བློ་ཐོག་ནས་འབྲི་ཐུབ་འདུག་པས། ས་དེར་ང་ཚོ་དུད་ཁྱིམ་བཅུ་གྲངས་ཤིག་ཡོད་པ་དེའི་ནང་སྙན་གྲགས་ཆུང་ཆུང་ཞིག་གིས་ཁྱབ་པ་བྱུང་ཞིང་མཁན་པོ་ཚང་གིས་ཀྱང་གསན་ནས་དགྱེས་ཚོར་ཆེན་པོ་གནང་ཡོད་འདུག དེ་རྗེས་མུ་མཐུད་དུ་ཞང་པོ་མཆོག་གི་སྐུ་དྲུང་ནས་ཀློག་བསླབས་པ་ཡིན།
ངས་ཀློག་དང་པོར་བསླབས་པའི་ཉིན་དེའི་དགོང་མོར་ཞང་པོ་མཆོག་གིས་རྨི་ལམ་བརྟགས་པར། ང་སྟེགས་བུ་མཐོན་པོ་ཞིག་གི་སྟེང་དུ་བུད་དེ་དུང་དཀར་འབུད་བཞིན་པ་ལ། ཕྱོགས་སོ་སོ་ནས་དགེ་འདུན་པ་ཧ་ཅང་མང་པོ་ཞིག་གིས། སྔ་འགྱུར་བསྟན་པ་རྒྱས་པའི་སྨོན་ལམ་ཆོས་རྒྱལ་དགྱེས་པའི་ཞལ་ལུང་སྐྱོར་བཞིན་སྟེགས་བུ་དེའི་དྲུང་དུ་ཚོགས་པར་ཕེབས་པ་དང༌། ཡང་ས་ཕྱོགས་ཐམས་ཅད་མེ་ཏོག་སེར་བོས་ཁྱབ་པའི་ས་ཆ་ཞིག་ཏུ། ངས་མེ་ཏོག་རེ་རེའི་དྲུང་དུ་སྒྲོན་མེ་རེ་རེ་སྦར་ནས་སོང་བས་མེ་ཏོག་དེ་དག་སྔར་ལས་ཀྱང་བཀྲག་མདང་ཆེ་བར་སོང་བ་ཞིག་རྨིས་འདུག རྗེས་སུ་ང་རང་གིས་དེ་དོན་བརྟགས་ཞིབ་བྱས་པར། མ་འོངས་པར་གསང་སྔགས་སྔ་འགྱུར་བའི་བཤད་གྲྭ་གང་རུང་ཞིག་གི་མཁན་ཁྲིར་བསྡད་ནས། དགེ་འདུན་པ་ཚོར་སྔ་འགྱུར་རང་ལུགས་ཀྱི་ཡིག་ཆའི་དགོངས་དོན་གཙོར་བཟུང་གིས། མདོ་རྒྱུད་རིག་གནས་དང་བཅས་པའི་སློབ་ཁྲིད་ཡག་པོ་ཞིག་བྱེད་ཐུབ་རྒྱུའི་རེ་བ་བྱས་མོད། ད་ཆ་དེ་དོན་སྟོང་ཟད་དུ་གྱུར་ནས་ལོ་མང་པོ་འགྲོ་ཚར་ན་ཡང༌། སྐྱོ་ཞིང་དུབ་པའི་ས་མཐའ་འདི་ནས་རང་གི་བཟའ་ཟླ་དང་བུ་ཕྲུག་གསོ་བའི་འཚོ་ཚིས་ཚུན་ཆད་བཏང་སྙོམས་སུ་བསྐྱུར་ཏེ། སྔ་འགྱུར་ཆོས་འབྱུང་ཆེན་མོ་སོགས་འབྲི་རྩོམ་གྱི་ལས་ཀ་བྱེད་བཞིན་པ་འདིས། མ་འོངས་པར་བདེ་བར་གཤེགས་པའི་བསྟན་པ་སྤྱི་དང༌། བྱེ་བྲག་གསང་སྔགས་སྔ་འགྱུར་བའི་བསྟན་པ་རིན་པོ་ཆེ་ལ་ཕན་པའི་ལས་དོན་ཕྲན་བུ་ཞིག་འགྲུབ་ཐུབ་པའི་རེ་བ་བྱེད་གྱི་ཡོད།
རྒྱུན་པར་ཞང་པོ་མཆོག་ཕྱུགས་འཚོ་རུ་སོང་རྗེས། ངས་ཡི་གེ་མི་སློབ་པར་ཉིན་གང་བོར་རྩེད་མོ་རྩེས་ནས་སྡོད་ཀྱི་ཡོད་ཀྱང༌། མ་ཡར་གྱིས་གཤེ་གཤེ་མི་གཏོང་བར་མ་ཟད། དགོང་མོ་ཞང་པོ་མཆོག་ཕྱིར་སླེབས་དུས། ཉིན་གང་བོར་ཡི་གེ་བསླབས་སོང་ཞེས་རྫུན་བཤད་རོགས་བྱེད་ཀྱི་ཡོད་པ་དང༌། ངས་ཀྱང་ཉིན་གང་བོར་སྦྱངས་པ་ལྟ་བུའི་རྒྱུགས་འཕྲོད་ཀྱི་ཡོད། སྤྱིར་ངའི་མ་ཡར་འདི་ནི་ངན་སློང་ལ་བྱམས་བརྩེ་ཆེ་བ་དང༌། རྒྱུ་དངོས་གང་ལ་ཡང་སེར་སྣ་མེད་ཅིང་ཅུང་ཟད་ཙམ་གྱིས་ཆོག་ཤེས་པ། དག་སྣང་ཆེ་བས་གྲྭ་བའི་མིང་བཏགས་པ་ཞིག་གིས་སྤྱོད་ངན་ཅི་འདྲ་བྱས་པ་མཐོང་ཡང༌། དགོས་དབང་ཡིན་སྲིད་པས་དད་ལོག་བྱེད་མི་རུང་ཞེས་ཁ་ཞེ་གཉིས་མེད་ཀྱིས་མོས་གུས་བྱེད་པ། རང་བཞིན་དྲང་ཞིང་ཀུན་ལ་ཕན་སེམས་ཆེ་བའི་ཐོག ལྷན་སྐྱེས་ཀྱི་གཤིས་ཀ་བཟང་བས། གྲོང་མི་ཁྱིམ་མཚེས་ཀུན་དང་འགྲོགས་བདེ་བའི་བུད་མེད་དམ་པ་འདི་ལྟ་བུ་ཞིག་ང་ལ་མཚོན་ན་ད་ལྟའི་བར་རྒྱ་དཀར་ནག་དང༌། བོད་མདོ་དབུས། ནུབ་མེ་གླིང་ཚུན་ཆད་གང་དུ་ཡང་མཐོང་མ་མྱོང༌།
རྒན་རྒོན་འདི་གཉིས་ཀྱིས་ང་ལ་བྱམས་སྐྱོང་གནང་ཚུལ་ནི་ཆེས་ཡ་མཚན་པ་ཞིག་སྟེ། ཆུང་ངུའི་དུས་ནས་བཟུང་ངེད་ཅག་ཁ་མ་བྲལ་གྱི་བར་དུ། ང་རང་ལ་འདོད་པ་ཡོད་ན་མ་གཏོགས་བཙན་ཤེད་ཀྱིས་ཆུ་ཚོད་གཅིག་ལ་ཕྱུགས་འཚོ་རུ་བཏང་བ་དང༌། ཆུ་སྐྱོགས་གང་ལེན་དུ་བཏང་བ་ཙམ་ཡང་དྲན་རྒྱུ་མེད། ད་དུང་ཁོང་གཉིས་ཀྱིས་བྱམས་སྐྱོང་གནང་ཚུལ་ལ་ཞིབ་ཏུ་བསམ་བློ་བཏང་ན། ང་ནར་སོན་པའི་སྐབས་སུ་སློབ་གཉེར་ལ་མགོ་འཁོར་ནས་ཞབས་ཏོག་ཡག་པོ་ཞིག་ཞུ་ཐུབ་མ་སོང་སྙམ་སེམས་ཧ་ཅང་ཕམ་པོ་བྱུང་གི་འདུག ང་རྒྱ་གར་ལྷོ་ཕྱོགས་སུ་སྡོད་པའི་སྐབས་ཤིག བོད་པ་གཞིས་ཆགས་ཀྱི་བུ་མོ་ཁ་ཤས་ཤ་མདོག་ནག་པོ་ཆགས་དོག་གིས་ཁྱིམ་ནང་དུ་སྐྱིད་ཉལ་བྱས་ནས་སྡོད་ཅིང༌། རྒས་འཁོག་རྣམས་ཀྱིས་རྔུལ་ནག་དོན་བཞིན་རྩ་ཤིང་ཁུར་བ་མཐོང་བས། ངས་ཀྱང་འདི་ལྟ་བུའི་ཉེས་པ་གང་མང་བསགས་ཡོད་སྙམ་མིག་མཐར་མཆི་མ་འཁོར་བ་བྱུང༌། ད་སྐབས་བཀའ་དྲིན་འཁོར་མེད་ཀྱི་རྒན་རྒོན་གཉིས་ཀ་ཞི་བར་གཤེགས་ཟིན་པས། ངས་ཞབས་ཏོག་ཞུ་བསམས་རུང་ཞུ་ས་ཞིག་ལྷག་མེད་མོད། ཁོང་གཉིས་ཀྱི་དྲིན་ལན་དུ་བྱིས་པའི་དུས་ནས་ད་བར་ཁ་བ་ཅན་གྱི་རིག་གཞུང་སྤྱི་དང༌། ཁྱད་པར་ཐེག་པ་ཆེན་པོའི་གཞུང་མན་ངག་དང་བཅས་པ་རྣམས་ལ་ཐོས་བསམ་ཕྲན་བུ་བྱས་པ་ལས་བྱུང་བའི་བསམ་པ་བཟང་པོ་ཞིག་གི་རྒྱུན་ཚེ་རབས་ཐམས་ཅད་དུ་མཐུད་ཅིང༌། གོང་ནས་གོང་དུ་འཕེལ་ཐུབ་པའི་རེ་བ་བྱེད་ཀྱི་ཡོད།
ངེད་ཚང་གི་རུ་ནང་ཤུལ་བར་མ་ཟེར་བར་བསྡད་ཡོད་པའི་དགུན་དུས་ཤིག་ལ། ལས་བྱེད་ཁ་ཤས་ཀྱིས་བཙན་སྐུལ་བྱས་པ་བཞིན། ང་ཚོའི་རུ་བ་རྣམས་ཀྱིས་ཞོགས་པ་སྔ་བོར་མའོ་ཀྲུའུ་ཞི་ཤི་བའི་མྱ་ངན་ཚོགས་འདུ་ཞིག་ཚོགས་སོང༌། རྒན་པ་ཚོས་ངུ་ཁུལ་བྱེད་ཅིང༌། ཕུ་དུང་གཉིས་ཀྱིས་ཀྱིས་གདོང་པ་བཀབ་པའི་རྗེས་ལ། གཅིག་གིས་གཅིག་ལ་གྲུ་ཚུགས་བྱེད་བཞིན་གད་མོ་དགོད་ཀྱི་འདུག་པ་དང༌། མིག་གི་མཐར་མཆིལ་མ་མང་པོ་བྱུགས་ཀྱི་འདུག ཉིན་དེའི་ཞོགས་པར་ཁ་བ་འབྲིང་ཙམ་བབས་ཡོད་པ་དམར་བོ་ཡིན་པས། མི་ཚོས་མའོ་ཀྲུའུ་ཞི་སྡིག་པ་ཆེ་བས་ད་འདི་འདྲ་རེད་སྙིང་རྗེ་ཟེར་ལྐོག་ནས་མ་ཎི་འདོན་འདུག་ཀྱང༌། ངས་ང་ཚོའི་ས་ཆར་ས་དམར་མང་པོ་ཡོད་པ་དང༌། དེའི་སྔ་ཉིན་རླུང་ཆེན་པོ་གཡུག་བྱུང་བས། ས་དམར་ནམ་མཁའ་ལ་འཕྱུར་བ་ཁ་བ་དང་བསྡོངས་ནས་མར་བབས་པས། ཁ་བ་དམར་བོར་གྱུར་བ་རེད་ཅེས་བཤད་པ་ཡིན། མདའ་བའི་བཀྲ་ཆོས་ཀྱིས་རིགས་དགུ་མ་རིགས་པ་གསལ་བོ་ཡོད་པའི་དོན་འདིས་ཅི་ཟེར། ཡང་གཅིག་ཤོད་དང་གསུངས། ཡང་བཤད་པས་ཁོང་གིས་ཐལ་མོ་བརྡབ་བཞིན་གད་མོ་མང་པོ་བགད་དེ། ཡང་ཤོད་དང་གསུངས་ནས་ཐེངས་ཁ་ཤས་ལ་འགྲེལ་བཤད་རྒྱག་ཏུ་བཅུག རྗེས་ནས་ཁོང་གིས་ཡིན་མིན་གང་ཡང་མ་གསུངས་ཀྱང་གད་མོ་དགོད་ཞོར་ང་ལ་ཁ་ཞིག་བསྐྱལ་སོང་བས་འགྲེལ་བཤད་དེ་ཁོང་གི་ཐུགས་ལ་བབས་ཡོད་པ་འདྲ།
ཆེས་མུན་ནག་དང་ཆེས་ཀླ་ཀློའི་དུས་ཚོད་དེ་འདྲའི་སྐབས་སུུ་ཡང༌། ང་ཁྱིམ་ཚང་ཡ་རབས་དང༌། ཚོ་བ་ཡ་རབས་ཀྱི་ནང་དུ་འཚར་ལོངས་བྱུང་སྟབས། ཆུང་ངུའི་དུས་ནས་ཀྱང་ལྷ་དང་སངས་རྒྱས་བྱང་སེམས་མང་པོའི་མཚན་དང༌། དེ་དག་གི་ཆ་ལུགས་དང་ཕྱག་མཚན་སོགས་ག་འདྲ་ཡིན་མིན་ཤེས་ཀྱི་ཡོད། ལྷ་དང་བླ་མ་ཐམས་ཅད་ཀྱི་ནང་ནས་དད་པ་ཆེ་ཤོས་ནི་གུ་རུ་རིན་པོ་ཆེ་ཡིན་ཞིང༌། ང་ལ་ཕྲེང་བ་མེད་རུང་རྩེད་རའི་སྟེང་ལུག་གི་རིལ་མ་མང་པོ་གྲངས་ཀ་བརྒྱབ་ནས་སྤུངས་ཡོད་པ་དང༌། ཉི་མ་རེ་རེ་བཞིན་གུ་རུ་རིན་པོ་ཆེ་མཁྱེན་ཞེས་རིལ་མ་ཚོའི་གྲངས་བཞིན་གསོག་གི་ཡོད། ངས་ཀློག་སློབ་རྒྱུའི་མགོ་འཛུག་ལ་ཉེ་བའི་དབྱར་དུས་ཤིག་ལ། ང་ཚོ་རྫ་རིང་དུ་དབྱར་ས་བྱས་ནས་སྡོད་སྐབས། ཨ་སྐྱོ་བ་འཁྱམས་པོ་ཞིག་བྱུང་སྟེ་ངེད་ཚང་ལ་ཉིན་ཤས་བསྡད་སོང་ཞིང༌། ངེད་ཚང་གི་ནང་མི་རྣམས་ཀྱིས་གུས་བཀུར་ཚད་མེད་བྱེད་ཀྱི་འདུག ཨ་སྐྱོ་བ་དེས་ངའི་ལག་པ་ཆུང་ཆུང་གཉིས་ཁོང་གི་དབུ་ཐོག་ཏུ་བཞག་ནས་སྤྱན་ཆབ་བསིལ་བ་དང༌། བུ་རིག་ཡག་འདི་འདྲ་ཞིག་ངས་མཐོང་མ་མྱོང༌། འདིའི་སྲུང་འཁོར་ནང་དུ་ཆུགས་གསུངས་ནས་སྐུ་པར་ནག་པོ་གཉིས་སྤྲད་བྱུང་བའི་གཅིག་ནི། འཕགས་པ་སྤྱན་རས་གཟིགས་མིའི་གཟུགས་སུ་བྱོན་པ། རྒྱ་གར་གྱི་རྒྱལ་བ་རིན་པོ་ཆེ་བསྟན་འཛིན་རྒྱ་མཚོ་དང༌། གཅིག་ནི་རྒྱལ་ཆེན་རྣམ་ཐོས་སྲས་རེད་གསུངས།
ངས་རྒྱ་གར་གྱི་རྒྱལ་བ་རིན་པོ་ཆེ་བསྟན་འཛིན་རྒྱ་མཚོ་ཟེར་བ་སུ་ཡིན་མི་ཤེས་ཀྱང༌། སྐུ་པར་དེ་མཐོང་བས་དད་པ་བསམ་གྱིས་མི་ཁྱབ་པ་ཞིག་བྱུང༌། རྗེས་སུ་སྐུ་པར་དེ་རང་གི་མགོ་ལ་བཞག་ནས། རྒྱ་གར་གྱི་རྒྱལ་བ་རིན་པོ་ཆེ་བསྟན་འཛིན་རྒྱ་མཚོ་མཁྱེན་ཞེས་གསོལ་བ་མང་པོ་བཏབ་དུས། བྱིས་པ་ཡིན་རུང་དད་པའི་ཤུགས་ཀྱིས་ཐེངས་ཁ་ཤས་ལ་མིག་ཆུ་འཐོར་བ་བྱུང༌། དེར་བརྟེན་༡༩༩༨ལོར་ངས་རྒྱ་གར་དུ་བྲིས་པའི་ཐམས་ཅད་མཁྱེན་པའི་རྟོགས་བརྗོད་དེའི་ནང༌། གང་ཚེ་ཁོ་བོ་བྱིས་པ་ཆུང་ངུ་ན།། སྨུག་སྤྲིན་སྔོན་པོས་གཡོག་པའི་རྫ་རི་དག། ཤིན་ཏུ་མཛེས་པས་ཡིད་འཕྲོག་དར་ཡུལ་སྟོད།། རྫ་རིང་ཞེས་པའི་གནས་སུ་ལོ་མང་བསྡད།། སྐབས་ཤིག་ངེས་མེད་འཁྱམས་པའི་ལྡོམ་བུ་བ།། ཆོས་མཐུན་སློང་མོས་འཚོ་བ་ཞིག་བྱུང་ནས།། ཕྲུ་གུ་འདི་ཡི་ལུས་ལ་འདི་ཆོངས་ཞེས།། འཇིག་རྟེན་བླ་མའི་སྐུ་ཡི་སྣང་བརྙན་བཏད།། མཚན་རྫོགས་སྐུ་ཡི་དཀྱིལ་འཁོར་མ་མཐོང་ཞིང༌།། གསང་བ་གསུམ་གྱི་ཡོན་ཏན་མི་ཤེས་ཀྱང༌།། དང་པོའི་རྟེན་འབྲེལ་ལེགས་པའི་ཕྱོགས་སོང་སྟེ།། མང་དུ་ངུ་བའི་མོས་གུས་བདག་གིས་རྙེད།། དེ་ནས་བཟུང་སྟེ་བསྟན་འཛིན་རྒྱ་མཚོ་ཞེས།། གདུང་བའི་ཡུས་དང་བཅས་པའི་སྙིང་དབུས་ན།། འདི་ཕྱིའི་སྐྱབས་སུ་ངེས་པར་སེམས་པ་ཡིས།། རེ་བའི་མིག་འབུར་ནམ་ཡང་ཟུམ་པ་མེད།། ཅེས་པ་འདི་བྲིས་པ་ཡིན།
དེང་སང་ཆུང་དུས་ཀྱི་ལོ་རྒྱུས་དེ་ཚོ་ལ་ཕྱིར་དྲན་བྱེད་སྐབས། གུ་རུ་རིན་པོ་ཆེས། བོད་ཀྱི་བླ་མའི་སྐལ་བ་གུ་རུ་ཉིད།། ཆོས་སྐལ་ཇོ་བོ་ཐུགས་རྗེ་ཆེན་པོ་ཡིན།། ཞེས་གསུངས་པ་དང་མཐུན་པའི་ལ་ཉེ་རྟེན་འབྲེལ་ཐམས་ཅད་ཆུང་ངུའི་དུས་ནས་རང་གི་ལུས་ཐོག་ཏུ་ཚང་འདུག་པས་ཧ་ཅང་དགའ་པོ་ཡོང་གི་འདུག་ཅིང༌། མཚམས་རེར་རང་ཉིད་དངོས་གནས་ལས་དང་སྐལ་བ་བཟང་བའི་རིགས་ཀྱི་བུ་ཞིག་རེད་འདུག་སྙམ་པའི་རང་མཐོང་ཡང་སྐྱེས་ཀྱི་འདུག
ད་དུང་ང་ལ་ཆུང་དུས་ནས་རྒྱ་གར་གྱི་བག་ཆགས་ཤིན་ཏུ་ཟབ་མོ་ཞིག་ཡོད་པས། ང་མིན་གཞན་ཞིག་ཡིན་ན་དག་སྣང་ལ་རྒྱ་གར་དུ་ཐེངས་མང་པོར་ཕེབས་པ་ཡིན་ཟེར་ངེས་མོད། ང་ལ་དེ་ཙམ་བརྗོད་པའི་སྙིང་སྟོབས་མེད་ཀྱང་ཧ་ལམ་ལོ་བཅུ་ཡར་མར་ཞིག་ནས་རྒྱ་གར་གྱི་གནས་དང༌། རི་གླིང་མང་པོ་མིག་ལམ་ལ་ཤར་བར་མ་ཟད་རྒྱ་གར་གྱི་ཡུལ་རེད་སྙམ་པ་དང༌། ལྷག་པར་བྱ་རྒོད་ཕུང་རི་དང༌། རྩྭ་མཆོག་གྲོང་གཉིས་ཐེངས་ཁ་ཤས་ལ་མིག་ལམ་དུ་ཤར་བ་བྱུང༌། རྗེས་སུ་རྒྱ་གར་ལ་དངོས་སུ་སླེབས་སྐབས་སྔར་མིག་ལམ་ལ་ཤར་བའི་ལྗོངས་བཀོད་ཇི་མ་ཇི་བཞིན་མི་འདུག་ཀྱང་སྤྱིའི་ཆ་ནས་ཤིན་ཏུ་འདྲ་བར་སྣང་བས། གཅིག་བྱས་ན་དུས་ཀྱི་དབང་གིས་འགྱུར་བ་ཅུང་ཟད་ཕྱིན་པ་ཡིན་སྲིད་སྙམ༌། ངས་ཀློག་སློབ་རྒྱུའི་མགོ་བཙུགས་པ་ནས་བཟུང༌། གོང་སྨྲོས་ལྟར་ཡུན་ཆེས་རིང་པོའི་བར་དུ། ལམ་ཕྱོགས་སློབ་གསོ་སོགས་དམར་ཕྱོགས་ཀྱིས་དག་ཐེར་རྒྱུན་མི་ཆད་པ་བྱུང་བས་དོགས་ཟོན་ཆེ་ཡང༌། གསང་ཐབས་ཀྱིས་ཀློག་ཕུལ་དུ་ཕྱིན་པ་ཞིག་བསླབས་ཤིང༌། བཟང་པོ་སྤྱོད་པའི་སྨོན་ལམ་སོགས་དགོས་མཁོ་ཆེ་བའི་རིགས་རྣམས་བློར་འཛིན་བྱས། སྐབས་འདི་ཤེད་ཅིག་ཏུ་སྟོང་ཟ་མཁན་པོ་སྐུ་གཤེགས།
༡༩༧༩ལོ་ནས་བཟུང་རྒྱལ་བསྟན་ཡང་དར་གྱི་དབུ་ཚུགས་པ་སོགས་རྒྱ་མིའི་སྲིད་ཇུས་ལ་ཡང་འགྱུར་བ་ཕྲན་བུ་ཕྱིན་པ་དང༌། དར་སྟོད་སོགས་སུ་ས་ཆུང་བས་ཕྱུགས་ཟོག་སྤྱི་དང་ཁྱད་པར་གཡག་ཐམས་ཅད་མུ་གེས་ཤི་ནས། འབྲི་ལ་ཁལ་འགེལ་དགོས་པའི་དུས་སུ་སླེབས་པས། བུ་རྒྱ་དོན་ཟེར་བས་དར་ལག་རྫོང་གི་རྫོང་དཔོན་བྱེད་སྐབས། ང་ཚོའི་འབྲོག་སྡེ་རྣམས་ཀྱང་བཙན་པོ་བྱས་ནས་རིམ་གྱིས་ཕྱིར་རང་ཡུལ་དུ་གནས་སྤོས། འབྲོག་པ་རྣམས་ཨུ་ཐུག་ནས་བཙན་པོ་བྱས་པས་སྨན་པ་གང་ནོར་ཟེར་བ་སོགས་མི་ཁ་ཤས་བཙོན་ཁང་དུ་ཡང་བཅུག་སོང་རུང༌། མཐར་རང་ས་རང་ལ་དབང་བ་བྱུང༌། འདི་སྐབས་ང་ལོ་བཅུ་གཅིག་ལ་སླེབས་པའི་དུས་ཡིན་ཞིང་ད་དུང་ངེད་ཚང་ལ་ཕྱུགས་ཟོག་ཉུང་ངུ་ཞིག་འཚོ་རྒྱུ་འདུག
ཁྲ་གླིང་དགོན་ཤུལ་དུ་ཐོག་མར་འབྱོར་སྐབས། གླིང་བླ་མ་ཆོས་ཀྱི་རྡོ་རྗེས་བཞེངས་པའི་འདུ་ཁང་མཐོང་གྲོལ་ཆེན་མོ་དང༌། གསེར་ཁང༌། རྒྱུད་སྡེའི་ལྷ་ཁང༌། སྒྲུབ་གྲྭ་སོགས་དང༌། གྲྭ་མང་སྒེར་གྱི་གྱང་ཆག་སྐྱི་གཡའ་ཞིང་ཡ་ང་བ་རྣམས་མཐོང་དུས། དེང་སང་གུ་གེའི་རྒྱལ་ཁབ་སྟོངས་ཤུལ་མཐོང་བ་དང་གཉིས་སུ་མེད་ཅིང༌། རྒན་པ་རྣམས་ཀྱིས་མིག་ཆུ་གཏོང་བཞིན། ༡༩༥༨ལོའི་ཁྲག་དྲི་བྲོ་བའི་བཙན་གནོན་གྱི་སྐབས། ཁང་པ་འདི་ལ་བླ་མ་འདི་བཞུགས་དང༌། བླ་མ་དེས་སྡུག་བསྔལ་འདི་མྱངས། མཐར་འདི་ལྟར་དམར་གསོད་བྱས་པ་སོགས་ཀྱི་ལོ་རྒྱུས་རེ་རེ་བཞིན་གླེང་བ་དེ་བས་ཀྱང་ཆེས་འཇིགས་སུ་རུང་བར་སྣང༌།
དགོན་པའི་གཡས་གཡོན་གྱི་ཉེ་འཁོར་རྣམས་སུ། ས་འདི་ལ་ཁྱིམ་ཚང་འདི་ཡོད་དང༌། ཁྱིམ་ཚང་དེས་སྡུག་བསྔལ་འདི་མྱངས། མཐར་སྡུག་འཐོར་དང་མུག་འཐོར་འདི་འདྲ་བྱས་ཚུལ། ཁྱིམ་ཚང་འདི་ནས་མི་གྲངས་འདི་ཙམ་མུ་གེས་ཤི་ཚུལ། མི་གྲངས་འདི་ཙམ་བཙོན་ཁང་ནས་ཕྱིར་ཡོང་མེད་ཚུལ་སོགས་བཤད་པ་ཕལ་ཆེར་ཞིག་ངའི་སེམས་ལ་ད་དུང་གསལ་བོར་དྲན་གྱི་འདུག གྱང་ཆག་ཚོས་སྐད་ཆ་བཤད་མི་ཤེས་པས། ཁོང་རྣམས་ཀྱིས་མྱངས་པའི་སྡུག་བསྔལ་ང་ཚོ་ལ་དངོས་སུ་ངོ་སྤྲོད་བྱེད་ཐབས་མེད་ཀྱང༌། ལོ་སུམ་ཅུར་ཉེ་བ་ཙམ་ལ་བདག་མེད་དུ་བསྡད་པའི་རིང༌། ཁྲ་དང་འུག་ཆུང་ནེའུ་ལེ་རྣམས་གནས་སྡོད་བྱས་པ་ལས་བྱུང་བའི་བྱེའུ་དང༌། ཨ་བྲའི་ནང་ཁྲོལ་གསར་རྙིང༌། བྱ་སྒྲོ། ཨབ་སྤུ། བྱ་སྐྱག་སོགས་ཀྱི་མྱང་གོས་འཐུག་པོ་གྱོན་ཞིང༌། བྱེའུ་ཏི་ཏིས་ཕུག་པའི་ཨུ་ཁུང་གི་རྨ་ཁ་རྣམས་ང་ཚོ་ལ་རྒྱུན་དུ་སྟོན་པས། གྱང་ཆག་ཚོའི་རྣམ་འགྱུར་གྱི་ནང་ན་གོ་རྒྱུ་ཆེན་པོ་ཞིག་ཡོད་པ་འདྲ་མོད། གྱང་ཆག་ཚོ་དང་དམིགས་བསལ་གྱིས་འདྲིས་ཆེ་ཞིང༌། གྱང་ཆག་ཚོ་གྱང་ཆག་ཏུ་མ་གྱུར་གོང་གི་བདག་པོ་སྟེ། གནའ་སྔ་མོའི་གྲྭ་ལོག་རྙིང་བ་རྣམས་དེང་སང་ཆ་ཚང་སྨྱོས་འདུག་ཟེར་བ་ཞིག་གོ་བྱུང་བ་བདེན་ན། གྱང་ཆག་ཚོའི་རྣམ་འགྱུར་གྱི་ནང་ལ་གོ་རྒྱུ་ཅི་ཡང་མེད་ན་འང་ཐང༌།