རྔ་བཟའ་བདེ་པོ་འཚོ།
དབྱར་ཟླ་ཚེས་བྱུང
ཆར་བ་བབས་བྱུང
མཛེས་སྡུག་བཀྲ་བའི་མེ་ཏོག་གི་གི་མགོ་བོ
གར་མཁན་མས་གར་འཁྲབ་པ་བཞིན
ལྡེམ་ལྡེམ་དུ་གཡོ
ཤིང་སྡོང་གི་ལོ་འདབ་དག་ལྷབ་ལྷུབ་ཏུ་མགུལ་ལ
རྩྭ་འཇག་མའི་ཟིར་སྒྲ་ཡང་ཧུར་ཧུར་དུ་སྒྲོག
དེ་དུས འདབ་ལག་མ་རྒྱས་པའི་བྱེའུ་ཆུང་ཁྱེད
ཆགས་ས་བརྟེན་ས་མེད་པའི་བྱེའུ་ཆུང་ཁྱེད
ཨ་མའི་དྲོད་ཁོལ་བྲལ་བའི་བྱེའུ་ཆུང་ཁྱེད
གཞན་གྱིས་རྡོ་འབེན་སའི་བྱེའུ་ཆུང་ཁྱེད
སྡོང་སྐམ་གྱི་འདབས་ན ཁུ་སིམ་མེར
ཞེད་སྣང་དང་དངངས་སྐྲག་གི་ཀློང་ནས
འདར་སིག་སིག་བྱེད
ཆར་བ་དངས་སོང
ཉི་མ་ཤར་བྱུང
ཆར་བས་བསྐྱངས་པའི་རྩྭ་ཉག་རེ་རེར
གསོན་ཤུགས་རྒྱས་ཏེ
མགོ་འཕང་ཡར་ལ་བཏེགས
ཚང་ལ་གྱེས་པའི་བྱ་བྱེའུ་ཚོ་ཡང
རིམ་གྱིས་རྩེ་འཇོ་དང་དགའ་སྤྲོ
རང་དབང་གིས་གནམ་འཕང་བསྐྱོད
སྐབས་དེར
ཁེར་རྐྱང་གིས་མནར་བའི་བྱེའུ་ཆུང་ཁྱེད
སྤོབས་པས་ཞ་བའི་བྱེའུ་ཆུང་ཁྱེད
མགུལ་སྐྱོད་དབེན་པའི་བྱེའུ་ཆུང་ཁྱེད
རང་དབང་བྲལ་བའི་བྱེའུ་ཆུང་ཁྱེད
མིག་ཆུ་ཐར་ར་ར
རང་གི་བྲང་ཁར་རྡུང་ནས
གཤོག་པས་བྲག་ལ་གཞུས་ཏེ
གཤོག་རྩ་ཁྲག་གིས་བརྫིས
ཉི་མ་རི་རྩེ་ནས་ཡལ་སོང
ཟླ་བ་ཚེས་བྱུང
བསིལ་འཇལ་གྱི་རླུང་བུའི་ཁྲོད་ནས
སྲོག་ལྡན་གྱི་སེམས་ཅན་ཚང་མ
དྲོད་ཁོལ་རྒྱས་པའི་རང་རང་གི་གནས་སར་ཕྱིན
དུས་དེར
མགོན་མེད་ཀྱི་བྱེའུ་ཆུང་ཆེད
དབུགས་རྒྱུན་ཆད་ལ་ཉེ་བའི་བྱེའུ་ཆུང་ཁྱེད
སྡེར་ཁ་ཚེར་མས་ཁེངས་བའི་བྱེའུ་ཆུང་ཁྱེད
སྐྱ་རེངས་སྒུག་པའི་བྱེའུ་ཆུང་ཁྱེད ཨ་ཐང་ཆད་པས
འཁུན་སྒྲ་དང་ཨག་རིང
ངུ་འབོད
དབུགས་རིང་ཞིག་དང་ལྷན
ཚེ་སྲོག་ཆུང་ཆུང་གིས་མི་ཐེག་པའི་སྡུག་བསྔལ་གྱི་ཀློང་ལ་ཐིམ
ལུས་ཕུང་ཉམས་ཆུང་གིས་མི་བཟོད་པའི་ན་ཟུག་གི་གཏིང་ལ་ལྷུང
ཡ་ང་བའི་བྱེའུ་ཆུང་ཁྱེད་ལ
འཚོ་བ་ནི་མཐའ་མེད་ཀྱི་བཙོན་ར་དང་འདྲ་བྱུང་
འཇིག་རྟེན་ནི་བརྩེ་མེད་ཀྱི་བཙོན་ཁང་དང་འདྲ་བྱུང་
ཁྱེད་ཀྱི་བར་སྣང་ནི་རང་དབང་གི་གཤོག་པ་རྐྱོངས་མི་ཐུབ་སའི་ལྕགས་དྲ་ཡིན
ཁྱེད་ཀྱི་ས་གཞི་ནི་སྤྲོ་སྣང་གི་རྒུན་འབུ་འཐུ་མི་ཐུབ་སའི་བྱེ་ཐང་ཡིན
2015/3/4