ཐེ་འོད་ཟེར།
ལོ་རྒྱུས་རིང་བའི་རང་རིགས་སྐད་ཡིག་འདི་གཉིས་རང་ཅག་བོད་མི་རིགས་འདི་ཉིད་འཚོ་གནས་ཐུབ་མིན་གྱི་བླ་སྲོག་ཉག་ཅིག་ཡིན་པར་མཐོང་ནས། དེ་སྔར་ནས་རྒྱ་གཞུང་གིས་འཆར་གཞི་ལྡན་པའི་ཐོག་ནས་ཉམས་ཆག་ཏུ་བཏང་དང་གཏོང་བཞིན་འདི་ལྟར་ཡང་། སྤྱི་ནོར་༧གོང་ས་མཆོག་གི་ཐུགས་རྗེའི་བཀའ་དྲིན་ཉག་ཅིག་ལས། ཤར་ནུབ་ཡུལ་གྲུ་ཕལ་མོ་ཆེར་བོད་སྐད་ཡིག་ལ་སློབ་སྦྱོང་གནང་མཁན་ཉིན་རེར་ཇེ་མང་དུ་འགྲོ་བཞིན་ཡོད་པ་འདི་ནི་དགའ་འོས་སུ་མཆིས་མོད། འོན་ཏེ་རང་རིགས་བཙན་བྱོལ་བའི་ཁྲོད་དུ་མཚར་ལོངས་བྱུང་བའི་གཞོན་སྐྱེས་མི་ཉུང་བ་ཞིག་གིས། རང་རིགས་སྐད་ཡིག་འདི་ཉིད་ཉམས་ཆག་ཏུ་འགྲོ་བཞིན་ཡོད་པ་མ་ཤེས་པའམ་ཡང་ན་ཤེས་བཞིན་ཅི་མི་སྙམ་པར་ལྟ་བུས། གཞན་གྱི་སྐད་ཡིག་ལ་མཐོང་ཆེན་དང་དགའ་མོས་བྱེད་ཀྱིན་པར་ཞིབ་མོར་བལྟས་ན་དགའ་འོས་སུ་ཆེར་མ་མཐོང་། གང་ཡིན་ཞེ་ན། རང་རིགས་ཁ་བ་གངས་ཅན་ཟེར་བའི་མི་རིགས་འདི་ཉིད་ད་བར་དུ་འཚོ་གནས་ཐུབ་པ་འདི་ཡང་རང་གི་སྐད་ཡིག་འདི་གཉིས་ཀྱི་བཀའ་དྲིན་ཉིད་ལས་སྐད་ཡིག་གཞན་ལ་བརྟེན་ནས་མ་ཡིན་པ་ཤེས་དགོས་པ་རེད། འུ་ཚོའི་བཙན་པོ་རིམ་བྱུང་ནས་ཀྱང་རང་གི་སྐད་ཡིག་འདི་གཉིས་ལ་བརྟེན་ནས་ཆོས་སྲིད་གཉིས་ཀྱི་དབུ་འཕང་རྒྱ་བསྐྱེད་གནང་མྱོང་བ་ལས། སྐད་ཡིག་གཞན་ལ་བརྟེན་ནས་རྒྱལ་ཁབ་དང་མི་རིགས་སྲུང་སྐྱོར་བྱས་མྱོང་བའི་ལོ་རྒྱུས་ཤིག་ད་སྔར་བྱུང་མྱོང་མེད་ལ་ཕྱིས་སུ་ཡང་འབྱུང་མི་སྲིད་པ་ལྟར་བུ་རེད། ལར་སྤྱི་ནོར་༧གོང་ས་མཆོག་གི་མཛད་པ་འཕྲིན་ལས་ནམ་མཁའི་མཐའ་དང་མཉམ་པ་འདི་ཡང་རང་རིགས་སྐད་ཡིག་འདི་གཉིས་ལ་བརྟེན་ནས་བྱུང་བ་ཡིན་ཞིང་། རྒྱ་དམར་དབུས་གཞུང་གིས་དམིགས་ཡུལ་ངེས་ཅན་ཞིག་གིས་ཐོག་ནས་བོད་ཁུལ་ཡོངས་ཀྱི་སློབ་གྲྭ་ཕར་ཆེར་བར་བཙན་དབང་གིས་རྒྱ་སྐད་དང་རྒྱ་ཡིག་སློབ་འཇུག་དོན་འདི་ཡང་མདོར་དེད་ན། བོད་མི་རིགས་འདི་ཉིད་ས་སྒང་རིལ་རིལ་འདིའི་སྟེང་ནས་རྩ་མེད་དུ་བཟོ་ཆེད་ཡིན་པ་རེད། རྒྱུ་མཚན་དེས་ན་བྱེས་སྡོད་སྤུན་ཟླ་ཡོངས་ཀྱིས་རྒྱ་དམར་གྱི་དམིགས་ཡུལ་གང་ཡིན་པ་དེ་ནི་དངོས་འཛིན་མ་ནོར་མ་འཆུག་པ་གསལ་བོར་མཁྱེན་པའི་ཐོག་ནས་རང་རིགས་སྐད་ཡིག་འདི་གཉིས་ཉམས་པ་སླར་གསོ་དང་མ་ཉམས་གོང་འཕེལ་དུ་གཏོང་མ་ཐུབ་རུང་། རྒྱ་དམར་གྱི་གདུག་རྩུབ་ཆེ་བའི་དམིགས་ཡུལ་ངན་པ་དེར་དཔུང་རོགས་ལྟ་བུར་མ་སོང་བར་ཅིས་ཀྱང་འབད་དགོས་པ་རེད། བོད་བསྟན་སྲིད་མི་རིགས་དང་བཅས་པ་རྒྱུན་གནས་ཐུབ་མིན་གྱི་གནད་འདི་ལ་དགོངས་ནས། གོང་ས་མཆོག་གིས་བོད་རང་གི་མཐུན་མོང་མ་ཡིན་པའི་སྐད་ཡིག་འདི་གཉིས་སློབ་དགོས་པའི་བཀའ་སློབ་ཡང་ཡང་ཕེབས་ཡོད་པ་རེད། ང་ཚོས་ཁ་ནས་སྐད་ཡིག་ཉམས་རྒུད་དུ་འགྲོ་དང་འགྲོ་བཞིན་པ་གླེང་ཤེས་ཙམ་གྱིས་ཅི་ཡང་ཕན་གྱིན་མེད་པས་ངེས་པར་དུ་རང་ཉིད་ནས་མགོ་བརྩམས་ཏེ་ལག་ལེན་དུ་བསྟར་དགོས་པ་རེད། གཞིས་ལུས་སྤུན་གྲོགས་མང་དག་ཅིག་གིས་སྐད་ཡིག་འདི་གཉིས་སྲུང་སྐྱོར་ཆེད་དུ་གཅེས་པའི་སྲོག་ལ་ཡང་མ་འཛེམས་པར་དགྲ་བོའི་མེ་མདའི་སོ་ཁ་ནས་ཡོད་ཚད་བློས་བཏང་བྱས་དང་བྱེད་བཞིན་ཡོད་པ་འདི་ལྟར་ཡང་། རང་རིགས་བཙན་བྱོལ་བའི་ཁྲོད་ཀྱི་ཀླད་མེད་ཁོག་སྟོང་མི་ཉུང་བ་ཞིག་གིས་རང་སྐད་ལ་སྣང་ཆུང་ལྟ་བུས་སྐད་རིགས་འདྲ་མིན་བསྲེས་ནས་ར་མ་ལུག་བཤད་པའི་ངན་གཤིས་ཤིག་རྒྱུན་ཆགས་སུ་འགྲོ་བར་མཐོང་ཆོས་སུ་གྲུབ་པ་འདི་ཉིད་ཆེས་ངོ་གནོངས་དགོས་པ་ཞིག་རེད་ལ། ལྷག་པར་དུའང་ནུབ་ཕྱོགས་སུ་མཚར་ལོངས་བྱུང་བ་ཕལ་ཚེར་བས་བོད་ཡིག་འབྲི་ཀློག་ལྟར་ཅི། ཐ་ན་བོད་སྐད་ཐོག་ནས་རང་གི་ཕ་མར་གོ་བརྡ་མི་འཕྲོད་པའི་གཞོན་སྐྱེས་ཧ་ཅང་མང་བོ་ཡོད་པ་རེད། དེ་ཡང་བུ་ཕྲུག་གཅིག་པུར་ལན་པ་། གཏན་ནས་མ་ཡིན་པར་ཕ་མ་སོ་སོའི་དངོས་ནས་ཀྱང་འགན་མ་བླངས་པ་ཡིན་ཏེ། དཔེར་ན་ཕ་མ་ཚོས་རང་ཁྱིམ་དུ་བོད་སྐད་མི་བཤད་པར་གཞན་སྐད་བཤད་མང་བ་དང་གཅིག རང་གི་སྐད་ཡིག་ཉམས་ཆག་ཏུ་འགྲོ་བཞིན་པར་སེམས་འཁུར་བོར་བ་དང་གཉིས། རང་གི་གནས་སྐབས་ཀྱི་དགོས་མཁོ་གཅིག་པུར་བལྟ་བ་ལས་བོད་སྤྱིའི་ཕམ་ཉེས་ལ་བསམ་བློ་མེད་པ་སོགས་ཀྱི་གནད་དོན་འདི་དག་གསུམ་གྱི་ཐོག་ནས་བྱུང་བ་ཡིན་པར་གསལ་བོ་ཡིན་ན། ཕ་མ་རང་རང་སོ་སོས་རང་ཁྱིམ་དུ་རྒྱུན་པར་བོད་སྐད་གང་ཐུབ་ཐུབ་བཤད་པའི་ཐོག་ནས་རང་གི་བུ་ཕྲུག་ཚོའི་ཁ་ནང་ལ་བོད་ཡིག་འཇོག་མ་ཐུབ་རུང་བོད་སྐད་གཙང་མ་ཞིག་ངེས་པར་དུ་འཇོག་ཨེ་ཐུབ་བལྟ་དགོས་པ་ནི་གཡོལ་ཐབས་མེད་པའི་འོས་འགན་ཞིག་ཡིན་པ་ཤེས་དགོས་པ་རེད་དྲན་ནོ། བོད་སྐད་ཡིག་རྒྱལ་ལོ།
གནད་དོན་འདི་ཚང་མས་ངོས་ལེན་ཐུབ་ཡོད། འོན་ཀྱང་ལག་ལེན་ཐུབ་ཀྱི་མེད། ད་ཅི་བྱ།
བཤད་མ་བཤད་ཅང་མེད་ཀི་ད་ཚར་སོང་ཟི་ཅང་ར་ལྷག་མེད་ཁུ་མ་ཟད་ནམ་ཞིག་༧གོང་ས་མཆོག་མེད་བ་ཡིན་ན་དེ་དེ་ནས་བཟུང་ཡོངས་སུ་རྫོགས་པ་ཚར་སོང་བ་རེད་དོོ།།
ཡིན་ན་ཡང་བོད་ནང་ལ་རེ་བ་ཡོད།