རྫ་ཚེ་རིང་བཀྲ་ཤིས་ཀྱིས་འོས་སྦྱོར་བྱས།
༼འདི་ནི་བྱེས་ཀྱི་དཔལ་སྤུང་ཤེས་རབ་གླིང་གི་བཤད་གྲྭའི་མཁན་ཆེན་ལས་ཐོག་པ་དང་། རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་འགན་འཛིན་ཏེ། ཕྲན་གྱི་བཀུར་འོས་ལས་རོགས་མཁན་པོ་ཚུལ་རྣམ་མཆོག་གིས་དངོས་ཡོད་ཅི་བཞིན་ཡི་གེར་ཕབ་པའི་རྩོམ་བྲིས་ཤིག་ལགས་ཤིང་། ཁོང་ཉིད་ཀྱིས་ཕྲན་ལ་གློག་ཕྲིན་བརྒྱུད་ཉིད་ཀྱི་ཕྱག་བྲིས་ཉིན་ཐོ་འདི་བཞིན་བཏང་གནང་བ་ཞིབ་ཏུ་བཀླགས་རྗེས་ཁོང་ལ་དྲ་ལམ་ཁག་ཏུ་བརྒྱུད་འགོད་ཆོག་མིན་གྱི་བཀའ་གནང་ཞུས་རྗེས་འདྲེན་བཀོད་བྱས་པ་ཡིན༽
དེ་རིང་ནི་ཇི་འདྲའི་དུས་བཟང་ཞིག་སྟེ་ངས་སྐད་ཆ་དེ་ཐོས་མ་ཐག་ང་ལ་སེམས་གཏིང་ནས་སྤྲོ་བ་འཕེལ་ཞིང་བརྗོད་དཀའ་བའི་སེམས་ཚོར་ཞིག་བྱུང་། དེ་དང་མཉམ་དུ་དགོད་བྲོ་བའི་གཏམ་འགའ་ཡང་ཐོས་པས་དགོད་བཞིན་དགོད་བཞིན་མུ་མཐུད་ཉན། དེ་ནི་ངས་གློག་འཕྲིན་ཁ་པར་བརྒྱུད་གོ་བའི་སྐད་ཆ་ཞིག་རེད། དེ་ཡང་ང་ཡི་ཕ་ཡུལ་བོད་གངས་ཅན་ཞེས་དྭངས་ཤིང་བསིལ་ལ་རང་བྱུང་གི་མཁའ་རླུང་དྲི་བཟང་འཐུལ་འཐུལ་དང་འགྲོགས་ནས་ཕྱོགས་ཀུན་དུ་རྒྱུ། ཡངས་པའི་རྩྭ་ཐང་སྟེང་སྦྲ་གུར་དང་ནོར་ལུག་གིས་གང་ཞིང་གནམ་སྔོན་ས་ལ་ལྷུང་པ་དང་འདྲ་བའི་སྤང་ལྗོངས་དང་ཁྲ་ཆེམ་ཆེམ་ཀྱི་མེ་ཏོག་སྣ་ཚོགས་པ་བཟོ་བོ་མཁས་པས་རི་མོ་བྲིས་པ་བཞིན་མཛེས། མི་རྣམས་ཡ་རབས་དང་དྲང་བདེན་ལ་གཙིགས་སུ་འཛིན། མི་ཆེ་ཆུང་ཀུན་ཀྱང་ཆོས་ལ་དད་ཅིང་དགེ་བའི་ཕྱོགས་ལ་སྤྲོ་བ་ཆེ་ཤིང་དཔའ་ཤིང་བརྟུལ་ཕོད་པ་ཆོས་ལྡན་བོད་ཅེས་གྲགས་པའི་གནས་དེར་ལོ་བཅུ་ཙམ་སྔོན་རང་ཡུལ་ལ་ཞེན་པའི་འཛིན་པ་སྤོངས་མ་ནུས་པར་འབྱུང་འདུས་ཀྱི་ཕུང་པོ་སེམས་ཀྱི་རྟ་ཕོ་ལ་ཞོན་ནས་གོམས་སྟབས་བོད་ཤར་ཕྱོགས་ལ་དལ་གྱིས་སྤོས། སྔོན་ནས་ཡང་ནས་ཡང་དུ་སེམས་ལ་འཁོར་མྱོང་བའི་འབྲོག་ཕྲུག་སྣབ་ལུག་མི་ཚེ་ཕྱུགས་ཟོག་གི་ཁོལ་པོར་གྱུར་པ་འདི་རྣམས་ནི་ཤེས་ཡོན་དང་དཔལ་འབྱོར་སོགས་ལུགས་གཉིས་གང་ཐད་ནས་ཇི་འདྲའི་རྗེས་ལུས་དང་། ཇི་འདྲའི་དཀའ་ངལ་ཞིག་གི་འོག་ཏུ་ལྷག དེ་ལས་ཀྱང་མ་འོངས་པའི་མི་ཚེའི་མདུན་ལམ་ཞེས་པ་ནི་རི་བོང་གི་རྭ་ཡི་དཔེ་བཞིན་གྱུར། མི་ཚེ་ཟོག་ལུག་དང་མཉམ་དུ་སྐྱེས། མཉམ་དུ་འཚར། མཉམ་དུ་རྒས། མཉམ་དུ་ཤི། འདི་འདྲ་བའི་སྐྱོ་སྡུག་ལ་སེམས་པ་ཡང་ཡང་འཁྲེངས་པ་དང་། རང་ནི་ཀུན་ཏུ་རྒྱུ་ལྟར་ཕྱོགས་ངེས་མེད་དུ་འཁྱམ་ཡུན་རིང་བས་ཐོས་པ་དང་མཐོང་བ་མང་བས། དེང་དུས་ཀྱི་འཛམ་གླིང་ཤར་ནུབ་ཀྱི་མི་རིགས་མི་འདྲ་བ་རྣམས་དང་། ལུང་པ་མི་འདྲ་བ་རྣམས་ཀྱི་ཡར་རྒྱས་དང་ཤེས་ཡོན་བདེ་སྐྱིད་སོགས་ཀྱི་གནས་ཚུལ་རྣམས་མཐོང་ཐོས་ཀྱི་སྐབས་ཡིད་བློང་བློང་པོར་གྱུར་ནས་ས་ཆེན་གཅིག་ལ་གནས་པའི་འགྲོ་བ་ལ་ཅི་འདྲའི་ཆ་མ་སྙོམས་པའི་འཇིག་རྟེན་ཨང་སྙམ་ནས་ལས་ལ་ཡང་འཁང་ར་ཤོར། དེ་འདྲའི་སྐྱོ་གདུང་གི་ཚོར་བའི་ཁྲོད། ངས་རང་ལ་ཡོད་ཚད་ཀྱི་ནུས་དགུ་དཀྲུགས་ནས་ཁམས་ནང་ཆེན་སྟོད་ཀྱི་ཆར་གཙང་གསུམ་ཞེས་ཡོངས་སུ་གྲགས་པའི་བྱེ་བྲག་ཟླ་ཀླུང་སྔོན་མོ་དལ་གྱིས་གཞོལ་བའི་ཉེ་འགྲམ་དུ་ཤེས་རབ་འོད་སྣང་ཞེས་པའི་སློབ་གྲྭ་ཞིག་གསར་འཛུགས་བྱས། དེ་ལ་ཕྱིས་སུ་ཤེས་རབ་སྙིང་རྗེའི་སློབ་གྲྭ་ཞེས་ཀྱང་འབོད།
སློབ་གྲྭ་འདི་ནི་གཏན་སྡོད་སློབ་ཆུང་ཡིན་ལ་འཛིན་རིམ་དྲུག་པའི་བར་ཡོད། སློབ་གྲྭ་འདི་ལས་ཕྲུག་གུ་བརྒྱ་ལ་ཉེ་བ་སློབ་ཐོན་བྱུང་། དེ་ལས་བརྒྱད་ཅུ་ཙམ་སློབ་འབྲིང་དང་ལག་ཤེས་སློབ་གྲྭར་ཞུགས། ཡང་འགའ་ནི་སྲིད་པའི་འདོད་ཡོན་ལ་རྒྱབ་ཀྱིས་ཕྱོགས་ནས་ཐར་པ་དོན་དུ་གཉེར་བའི་གྲྭ་བཙུན་ཡང་འགའ་ཤས་བྱུང་། སེམས་འཕངས་པ་ལ་འགའ་ནི་དེ་རིང་མ་གཏོགས་བསམ་ཤེས་མེད་པའི་འབྲོག་རྒན་འགས་དུད་འགྲོའི་གཡོག་པོར་སླར་ཡང་བཀོལ་ནས་སོ་སོའི་མི་ཚེ་དང་མི་རིགས་ཀྱི་མདུན་ལམ་ལ་བསམ་གཞིག་མེད་པར་ཕྲུག་གུ་རྣམས་ཟོག་ལུག་དང་མཉམ་དུ་སླར་ཡང་མི་ཚེ་སྐྱེལ་བའི་འགོ་བཙུགས། ད་ཆར་ཤེས་རབ་དང་ལང་ཚོ་གསར་དུ་ཁ་འབུས་པའི་མེ་ཏོག་ཆུང་ཆུང་དང་འདྲ་བའི་བྱིས་པ་ཉིས་བརྒྱ་ལྷག་ཡོད། ན་ནིང་ནང་ཆེན་རྫོང་ནས་ལོ་མཇུག་རྒྱུགས་སྤྲོད་ཆེན་མོའི་སྐབས་རྫོང་གི་སློབ་འབྲིང་འཛུལ་ཞུགས་ཀྱིས་རྒྱུགས་ཆེན་སྐབས་རྫོང་ཡོངས་ཀྱི་སློབ་གྲྭ་ནས་ཨང་དང་པོ་རྩེར་ཐོན་ཕྲུ་གུ་བཅོ་ལྔ་གདམས་པ་ལས་དྲུག་ང་ཡི་སློབ་གྲྭ་ནས་ཐོན། དེ་བཞིན་ད་ལོར་ཡང་རྫོང་ཡོངས་ནས་ཨང་དང་པོའི་གཟེངས་རྟགས་ཐོབ། དེ་དག་ནི་ཐག་རིང་གི་བགྲོད་ལམ་ཀྱག་ཀྱོག་དང་གྲོང་དང་གྲོང་ཁྱེར་གྱི་ཆ་རྐྱེན་མེད་པའི་གྲོང་གསེབ་འབྲོག་པའི་ས་ཁུལ་ཀྱི་འཚོ་བའི་ངལ་བ་ལ་བཟོད་ནུས་པའི་སྙིང་སྟོབས་ཅན་གྱི་དགེ་རྒན་དང་ལས་བྱེད་རྣམས་ཀྱིས་འབད་རྩོལ་གྱི་འབྲས་བུ་དང་། དེ་དང་འབྲེལ་ཡོད་ཀྱི་གཞུང་དང་འགོ་ཁྲིད་དང་སྦྱིན་བདག་རྣམས་ཀྱི་བཀའ་དྲིན་འབའ་ཞིག་ལས་བྱུང་བ་ཡིན། དེའི་ཕྱིར་ཁོང་རྣམས་ཀྱི་བཀའ་དྲིན་ནི་ངས་སྙིང་ཁོང་ནས་ནམ་ཡང་བརྗེད་ག་ལ་རུང་།
ཡང་གྲོང་ཁྱེར་ལས་ལེ་བར་བརྒྱ་ཕྲག་མང་པོའི་ཕ་མཐའི་གྲོང་གསེབ་རི་ཆུ་བརྒྱ་སྟོང་གིས་བར་དུ་ཆོད་པའི་རྒྱང་རིང་འབྲོག་ཁུལ་ཞིག་ལ་ལོ་རྒྱུས་གྱི་རི་མོ་ཅན་ལས་གྲུབ་པའི་ལས་གཞི་འདི་འདྲ་འགོ་འཛུགས་པ་ལ་དཀའ་ངལ་དང་གདོང་ལེན་མང་པོ་ཞིག་བགྲོད་དགོས་པ་ནི་སྨོས་མེད་དུ་གྲུབ། དེ་ལས་ངས་འདས་པ་ལ་བསམ་གཞིག་རེ་བྱེད་དུས་ཆེས་དུབ་པ་དང་སྐྱོ་བ་ཞིག་ལ་ཕ་མ་དང་ཡུལ་མི་རྣམས་ཀྱིས་སོ་སོའི་ལྟོ་གོས་འཕྱ་མ་འཕྱིད་དང་ནོར་ལུག་གི་འཚོ་རྫི་ཙམ་གྱིས་མི་ཚེ་བསྐྱིལ་ཐབས་མ་གཏོགས་བྱིས་པའི་མདུན་ལམ་དང་། གནས་དུས་ཀྱི་འགྱུར་བ། ཕ་མེས་ཀྱི་རིག་གཞུང་གི་ཉམས་རྒུད་སོགས་གང་ལའང་མི་དཔྱོད་པས། ཤེས་ཡོན་ལ་མཐོང་ཆེན་དང་། སློབ་སྦྱོང་ལ་མོས་སྤྲོ་ཞན་པས་སློབ་མ་བསྡུ་རུག་སྐབས་བྱིས་པ་སློབ་གྲྭ་ལ་མི་མངགས་པའི་དཀའ་ངལ་འཕྲད། ང་རེ་འགའ་འགྱོགས་འགྲོའི་རྟ་ཕོར་ཞོན་ནས་བྱིས་པ་རེའི་ཆེད་འབྲོག་སྡེ་ཉུལ། རེས་འགའ་དབང་བསྐུར་ཆོས་བཤད་འདྲ་བྱས་ནས་འབོད་བསྐུལ་བྱས། སྐབས་རེར་འཐེ་བོང་གྱེན་དུ་བསླངས་ནས་ངོ་ཆེན་ཡང་ཞུ་མྱོང་། བྱིས་པ་རེ་སློབ་གྲྭ་གཏོང་དུས་ཕྲུག་གུ་དེ་ང་ཡི་ཆེད་དུ་མངགས་པ་འདྲ་བའི་ཡུས་གཏམ་རིང་མོ་རེ་ཡང་མི་འདོད་བཞིན་ཉན། སྟབས་ལེགས་པ་ཞིག་ལ་ང་ལ་སྟོན་པ་སངས་རྒྱས་བཅོམ་ལྡན་འདས་ཀྱི་ན་བཟའ་ལུས་ལ་གྱོན་པ་ལ་བརྟེན་ནས་ཡུལ་མི་རྣམས་ཀྱིས་དད་གུས་རེ་བྱེད་གིན་འདུག་པ་དང་ཆ་རྐྱེན་ཡང་མི་ཞན་པ་འཛོམས་པས་མཐར་བྱིས་པ་མི་ཉུང་བ་འདུས། གནས་ཚུལ་གཞན་ཞིག་ནི་སྤྱི་ཚོགས་ཀྱི་འཁོར་ཡུག་ལ་བལྟོས་པས་དགེ་རྒན་དང་ཕ་མ་འགོ་ཁྲིད་དང་འབྲེལ་ཡོད་མང་པོ་ཞིག་ནས་བོད་ཡིག་ནི་ཁ་ཏོན་འདོན་བྱེད་ཙམ་མམ། ཡང་ན་ཕན་ཐོགས་མེད་པ་དང་མདུན་ལམ་མེད་པའི་ཟུར་གྱི་ཤེས་བྱ་ཙམ་མ་གཏོགས་བེད་སྤྱོད་ཡོད་པའི་ཤེས་ཡོན་དང་། རྩ་ཆེའི་རིག་གཞུང་ཕུན་སུམ་འཚོགས་པ་དང་འབྲེལ་བ་ཡོད་པ་དང་། བོད་ཡིག་འདི་དང་འབྲེལ་བའི་བོད་ཀྱི་རིག་གཞུང་འདི་ནི་རང་རིགས་ཙམ་མ་ཟད་མཚོ་ལྔ་གླིང་བདུན་གྱིས་བརྒྱན་པའི་འཛམ་བུ་གླིང་འདི་ལ་ཕན་ཐོགས་ཡོད་པ་མ་ཤེས་པ་དང་། ཡང་སོ་སོའི་ཕ་མེས་དང་ཡང་མེས་ཀྱི་མི་རིགས་འདི་ལོ་ངོ་སྟོང་ཕྲག་དུ་མར་སྲོག་སྦྱིན་པའི་རིག་གཞུང་ཞིག་དང་། མ་འོངས་པར་མི་རིགས་འདི་གནས་མིན་སྐད་ཡིག་གཉིས་གཙོར་བྱས་པའི་རིག་གཞུང་འདི་ལ་རག་ལས་པ་དང་། དེ་ཡང་ཤི་གསོན་གྱི་ས་མཚམས་སུ་སླེབས་པའི་ཉེན་ཁ་ཅན་དུ་ཤེས་པ་དང་ངོས་འཛིན་མཁན་ཉུང་བས་བོད་ཡིག་སློབ་པ་ལ་ཁོར་ཡུག་དང་རྒྱབ་སྐྱོར་བྱེད་མཁན་དེ་ལས་ཀྱང་ཉུང་བས་དེའི་དཀའ་ངལ་དང་གནས་ཚོད་ནི་མ་བཤད་ན་ཡང་གསལ་ངེས་ཅན་གྱི་བྱ་བ་ཞིག་ཏུ་གྱུར།
ཡིན་ན་ཡང་ཉེ་ཆར་རང་གི་ཉེ་གནས་གྲྭ་ཞིག་དང་འབྲེལ་ཡོད་ལས་བྱེད་ཁ་ཤས་ལ་བཅོལ་ནས་ད་ལོར་དགུན་དུས་མལ་གསོའི་དུས་ཚོད་དང་བསྟུན་ནས་དམིགས་གསལ་བོད་ཀྱི་སྐད་ཡིག་དང་ཐ་སྙད་གསར་པ་དང་། ཡ་རབས་དང་བཟང་སྤྱོད་བསྟན་པའི་ལུགས་ཀྱི་བསྟན་བཅོས་སོགས་དམིགས་གསལ་གྱི་ཆེད་སྦྱོང་གི་འཛིན་གྲྭ་ཞིག་བཙུགས། དེ་སྐབས་ཁྱིམ་བདག་རྣམས་འདུས་ནས་གྲོས་མོལ་བྱེད་སྐབས་ད་གདོད་སྔར་དང་མི་འདྲ་བར་གོ་རྟོགས་འཕེལ་ནས་ཕྲུག་གུ་རྣམས་སློབ་གྲྭ་སོང་ནས་ཕན་ཐོགས་ཆེན་པོ་བྱུང་ཞེས་བརྗོད་པ་དང་། ཤེས་ཡོན་མེད་ན་རྗེས་ལུས་སུ་འགྲོ་བ་དང་། བོད་པས་བོད་ཡིག་ཤེས་དགོས་འདུག་ཟེར་བ་ཐོས། སྔར་ངས་ཁོང་རྣམས་ལ་ཁྱེད་རྣམས་ཀྱི་ཕྲུ་གུ་སློབ་གྲྭར་གཏོང་བ་བཀའ་དྲིན་ཆེ་ཞེས་ཕར་བརྗོད་དགོས་ཀྱང་ད་རེས་ཁོང་རྣམས་ནས་ང་ལ་བཀའ་དྲིན་ཤིན་ཏུ་ཆེ་ཞེས་ཚུར་བཤད་འདུག་ཟེར། ངས་སྔར་ཕར་བཤད་པའི་སྐད་ཆ་གོ་དོན་འཕྲོད་དང་མ་འཕྲོད་གོ་འདོད་དང་མ་འདོད་པ་རྣམས་དེ་རིང་དངོས་སུ་ར་འཕྲོད་ནས་ཁོང་རྣམས་ནས་བཤད་བཞིན་འདུག མི་གཅིག་ནས་ཁོང་ལ་དམངས་གོར་ཁྲི་གཅིག་གནང་བ་ལས་མཁན་རིན་པོ་ཆེས་སློབ་གྲྭ་བཙུགས་པ་འདི་བཀའ་དྲིན་ཆེ་བྱུང་ཞེས་བཤད་འདུག་ཟེར། ཁོང་གི་ངོས་ནས་ཕན་ཐོགས་ཆེ་བའི་དཔེ་གཅིག་རེད། དེ་ནི་དགོད་ཤོར་བའི་གཏམ་ཞིག་ཀྱང་མ་རེད་དམ། ངས་སྒོར་ཁྲི་བརྒྱ་ཕྲག་གི་འགྲོ་སོང་བཏང་བ་ལ་ཁོང་ལ་དགའ་ཚོར་ཁྲི་གཅིག་གི་ཚོར་བ་བྱུང་བ་རེད། ཨ་ལ་དེ་ནི་རྩེད་མོ་ཡིན། དེ་འདྲ་ནི་ཁོང་ནས་དགའ་བའི་ཚད་ཆེ་ཤོས་ཀྱི་དཔེ་ཞིག་རེད།
ཡང་སྔོན་ལོར་ས་འགུལ་བྱུང་བའི་ཡུལ་ཤུལ་ཀྱཻ་སྐུ་མདོར་ཁ་བ་དང་གྲང་རླུང་ངར་བའི་དགུན་དུས་ཀྱི་སློབ་གྲྭའི་ངལ་གསོའི་དུས་ཚོད་དང་བསྟུན་ནས་ལྷག་བསམ་དང་ཤེས་ཡོན་ཅན་འགའ་དང་མཉམ་རུག་དང་ལྷན་དུ་བགྲོས། རང་ནས་མཐུན་རྐྱེན་ཕར་ཆེར་དང་སློབ་ཁང་གྲྭ་བསྒྲིགས་བྱས་། སློབ་ཁང་ནི་སྔོན་ལོར་ས་འགུལ་སྐབས་མ་ཞིག་པའི་ངས་གསར་དུ་བཟོས་པའི་སློབ་གྲྭ་དེ་རུ་འཚོགས། བླ་རུང་སྒར་ནས་མཁན་པོ་དང་སློབ་གཉེར་བ་འགའ་དང་། ས་ཆ་གཞན་ནས་ཕེབས་པའི་སྐྱ་སེར་འགའ་དགེ་རྒན་དུ་གདན་ཞུས་ཕུལ་འདུག་པས་ཁོང་རྣམས་ཀྱང་དང་བླངས་ཀྱིས་ཕེབས་ནས་བོད་ཡིག་གི་རིག་གནས་དང་། ཐ་སྙད་མིང་ཚིག་གི་བསྐོར་དང་། མི་ཆོས་བཟང་སྤྱོད་ཀྱི་བསླབ་བྱའི་བསྐོར་རྣམས་སློབ་ཁྲིད་གནང་ནས་འཛིན་གྲྭ་བཙུགས། དེ་རིང་ནམ་ཟླ་དགུན་དུས་ཀྱི་ཡུལ་ཤུལ་ཁུལ་ནི། ཁ་བ་དང་བུ་ཡུག་གི་ཁྲོད་དང་། འདམ་རྫབ་དང་ཉོབ་ལུད། གྲང་ངར་དང་རྡུལ་རླུང་གིས་གང་བའི་ཁོར་ཡུག་དེར་ཕེབས་པའི་དགེ་རྒན་དང་ལས་བྱེད་པ་རྣམས་ནི། ཇི་འདྲའི་སྙིང་རྗེས་ཕྱུག་པ་དང་། ཇི་འདྲའི་སྙིང་སྟོབས་དང་ལྡན་པ། ཁོང་རྣམས་ནི་དོན་དངོས་ཀྱི་གཟི་བརྗིད་དང་ལྡན་པའི་མི་ཞིག་ཅིའི་ཕྱིར་མིན། ཁོང་རྣམས་ནས་ང་ལ་སེམས་འགུལ་ཐེབས། སྙིང་སྟོབས་སྤར། ཡང་ཉུང་ཤས་འགའ་ལ་ཡིག་རྨོངས་སེལ་ཆེད་དང་། རྒྱ་ཡིག་དང་ཨང་རྩིས་ཞན་པའི་རིགས་ལ་རྒྱ་ཡིག་དང་ཨང་རྩིས་ཀྱི་ཟུར་སྦྱོང་འཛིན་གྲྭ་ཡང་འདུག ཐོག་མར་སློབ་ཕྲུག་ལྔ་བརྒྱ་ཙམ་འཚོགས་རྒྱུའི་གྲ་བསྒྲིགས་བྱས་ཀྱང་རེ་ཞུ་བྱེད་མཁན་ཇེ་མང་ནས་ཇེ་མང་དུ་སོང་བས་ད་ལྟ་ཕྲུ་གུ་དགུ་བརྒྱ་ལྷག་འདུས་འདུག ཚང་མས་བོད་ཡིག་ལ་མཐོང་ཆེན་དང་ཤེས་འདོད་ཧ་ཅང་ཆེ་བ་འདུག་པ་ཐོས། གོང་གི་གནས་ཚུལ་རྣམས་ཐོས་པས་ངས་བློ་ཡུལ་ལ་ཤོང་དཀའ་བའི་དགའ་ཚོར་དང་བསམ་གཞིག་གི་འགོ་ཚུགས།
ལོ་བཅུ་ཡར་མར་ནས་ད་ལྟའི་བར་ཇི་འདྲའི་སྤྱིར་ཤེས་ཡོན་དང་སྒོས་བོད་ཀྱི་རིག་གཞུང་ལ་དོན་གཉེར་དང་བརྩོན་པ་ཆེ་རུ་བྱུང་འདུག དེ་ནི་གཏམ་བཟང་ཞིག་དང་། བལྟས་བཟང་ཞིག་ལོས་ཡིན། མ་ཚད་ཤིན་ཏུ་དགའ་འོས་པ་དང་སྤོབས་པ་སྐྱེ་ཆོག་པ་ཞིག་ཀྱང་ཡིན། ངས་གོ་སྐབས་འདི་བརྒྱུད་རྣམ་དཔྱོད་དང་ལྷག་བསམ་གྱིས་ཕྱུག་པའི་དགེ་རྒན་དང་ལས་བྱེད་རྣམས་ལ་ཐུགས་རྗེ་ཆེ་ཞུ་བ་དང་། ཁྱེད་རྣམས་ཁ་དགེ་ལམ་འགྲོ་དང་ལུས་སེམས་བདེ་སྐྱིད་ཀྱི་འཚོ་བ་དང་། བྱ་བ་རྣམས་བར་ཆད་མེད་པའི་སྨོན་ལམ་ཞིག་རྒྱང་རིང་ནས་འདེབས་འདོད་བྱུང་། འདི་ནི་སྙིང་ཉེ་བའི་གྲོགས་པོ་རྣམས་ལ་རང་གི་སེམས་ཚོར་གྱི་བགོ་བཤའ་དང་། འབྲེལ་ཡོད་དགེ་སློབ་རྣམས་ལ་ཐུགས་རྗེ་ཆེ་ཞེས་དྲི་མེད་སེམས་ཀྱི་ལྷ་རྫས་མཚོན་བྱེད་དང་། གངས་ཅན་པ་ལ་ལྷག་ཞེན་དཀར་ཞིང་ཆོས་རིག་ལ་མོས་སྤྲོ་ཆེ་བའི་ཆོས་དང་རིགས་ཀྱི་མཆེད་པོ་རྣམས་ལ་ཁ་བརྡ་རེ་བྱེད་སྙིང་འདོད་པས་ཉིན་ཐོའི་ཞོར་དུ་། ཡུལ་ཕྱོགས་མེད་དུ་རྒྱུ་བ་མི་རྣམས་ཀྱིས་མཁན་པོ་ཚུལ་རྣམ་དུ་འབོད་པ་སྙོམས་ལས་པ་དེས་བྲིས།།
་་་་་་་
སྐྱེས་བུ་དམ་པའི་ངང་ཚུལ་ཟེར་ན་འདིའདྲ་ལོས་ཡིན། གངས་ཅན་ལྗོངས་ལ་བྱས་རྗེས་ཆེན་པོ་བཞག་འདུག སྙིང་ནས་ཐུགས་རྗེ་ཆེ་ཞུ།
མང་པོ་ཞིག་བློ་ལ་བབས་སོང་། ཕྱུགས་རིགས་འཚོ་སྐྱོང་བྱས་ན་མི་རིགས་ཚར་སོང་བ་འདྲ་བོ་ཞིག་ལབ་འདུག་པ་ནི་མཐོང་རྒྱ་ཅུང་ཟད་ཆུང་བའི་གཏམ་དུ་མཐོང་། མི་རིགས་ཤིག་གིས་ཕྱུགས་ལས་གཉེར་ཏེ་མི་ཚེ་སྐྱེལ་བའི་ས་ཆར་ཕྱུགས་ལས་དེ་འཚོ་བའི་གྲུབ་ཆ་གལ་ཆེན་ཞིག་རེད། མི་རིགས་ཤིག་གིས་ཞིང་ལས་གཉེར་ཏེ་མི་ཚེ་སྐྱེལ་བཞིན་ཡོད་ན་ཞིང་ལས་དེ་འཚོ་བའི་གྲུབ་ཆ་གལ་ཆེན་ཞིག་རེད། མི་རིགས་ཤིག་གིས་ལག་ཤེས་གཉེར་ཏེ་འཚོ་བ་སྐྱེལ་བཞིན་ཡོད་ན་ལག་ཤེས་དེ་གལ་ཆེན་རེད། མི་རིགས་ཤིག་གིས་སློབ་སྦྱོང་བྱས་ཏེ་དཔེ་ཆའི་ནང་གི་རིག་གནས་གཅིག་པོས་འཚོ་བ་སྐྱེལ་བཞིན་དེ་ཡང་གལ་ཆེན་རེད། ཨ་རི་ལྟ་བུར་མཚོན་ན་སློབ་གྲྭར་མ་སོང་བའི་བྱིས་པ་ཧ་ལམ་མེད་ཀྱང་། མི་ཕྱེད་ཀས་དཔེ་ཐོག་རིག་གནས་ཀྱིས་ཁ་གསོ་གི་མེད་པར་ཚོང་ཁང་ཟ་ཁང་མགྲོན་ཁང་སོགས་དཔེ་ཐོག་རིག་གནས་དང་འབྲེལ་བ་དེ་ཙམ་མེད་པའི་ལས་གནས་སུ་འཚོ་བ་སྐྱེལ་གི་ཡོད་པ་རེད། དེའི་ཕྱིར་ཕྱུགས་འཚོས་ན་མི་རིགས་ཚར་སོང་བའི་ལྟ་བ་འདི་ནི་ཅུང་ཟད་ཆད་མཐར་ལྷུང་བའི་ལྟ་བ་ཞིག་ཏུ་མཐོང་། རྒྱ་གཞུང་གིས་ཀྱང་དེང་སང་ཕྱུག་རིགས་རྩ་མེད་བཟོས་ཏེ་བོད་པ་ཚོ་གྲོང་ཁྱིམ་གསར་པ་ཞེས་པ་ཕལ་མོ་ཆེ་ཞིག་མྱ་ངམ་ཐང་དུ་བཟོ་སྐྲུན་བྱས་ཡོད་པའི་ནང་དུ་དེད་དང་འདེད་བཞིན་འདུག་པས། ཁོང་གི་མཁན་པོ་དེའི་སྐད་ཆར་བརྟག་དཔྱད་ཞིབ་འཇུག་ཅིག་བྱས་ན་ངའི་འདོད་བློ་དང་མི་འཚམ་དེ་འདིའི་སྐོར་རེད་ལ། ཨ་ཁུ་འབྲོག་པ་རྒྱ་གཞུང་གི་གྲོང་སྡེ་གསར་པའི་སྲིད་བྱུས་ལ་འདོད་མོས་མེད་པ་ཚོའི་འདོད་པ་ཡང་ང་དང་གཅིག་པ་ཡིན་རྒྱུ་རེད། བོད་མི་རིགས་འདིའི་སེམས་རྒྱ་ཡངས་ཤིང་སེམས་ཁྲལ་ཆུང་བའི་འཚོ་བ་ཞིག་ལ་དེ་རིང་བར་དུ་ལོངས་སུ་སྤྱོད་རྒྱུ་བྱུང་བ་འདི་ཡང་མཐའ་ཡས་པའི་རྩྭ་ཐང་ཆེན་པོ་དང་དེའི་སྟེང་གི་རྟ་ནོར་ལུག་གསུམ་འཚོ་སྐྱོང་གི་ལས་ཀ་འདི། དེ་བཞིན་མགོ་ཐོག་གི་གནམ་སྔོན་པོ་དེ་དང་ཐག་ཉེ་སའི་རྫ་ཆུ་བསིལ་མ་དེའི་བཀའ་དྲིན་མིན་ནམ། ངའི་ལྟ་བ་ནི་བོད་པ་ཕྱེད་ཀས་རིག་གནས་སྦྱོང་དགོས་ཀི བོད་པ་ཕྱེད་ཀས་ཕ་མེས་ནས་གཉེར་བའི་ཕྱུགས་ལས་དང་ཞིང་ལས་གཉེར་ཏེ་རང་ས་རང་གིས་འཛིན་དགོས་ཀི དེ་མིན་མི་རིགས་ཀྱི་དཔལ་ཡོན་འཕེལ་རྒྱས་འདི་ལ་ཡང་མཐའ་གཅིག་ཏུ་ཞིང་འབྲོག་ལས་ཀ་རྐྱང་རྐྱང་གཉེར་འདོད་པའི་རྟག་མཐའ་དང་། ཞིང་འབྲོག་གི་ལས་ཀ་ཡོད་ཚད་བསྐྱུར་ཏེ་སློབ་གྲྭ་དང་གྲོང་ཁྱེར་འགྲིམས་ནས་དཔེ་ཐོག་རིག་གནས་རྐྱང་རྐྱང་སློབ་དགོས་པར་འདོད་པའི་ཆད་མཐའ་གཉིས་ལས་གྲོལ་བའི་དེང་རབས་ཤེས་ཡོན་དང་གནའ་རབས་འཚོ་སྟངས་གཉིས་ཀ་ཟུང་དུ་འབྲེལ་བའི་ལམ་བཟང་པོ་ཞིག་ཡོད་པར་མཐོང་ལ། བསམ་ཚུལ་འདིས་ཐོས་པ་རྒྱ་མཚོའི་ཕ་རོལ་ཏུ་སོན་པའི་མཁན་པོ་ཁྱེད་ཅག་ལ་ཞེ་སྡང་བ་དང་གཉིད་མི་ཁུག་པ་རེ་བཟོས་ཡོད་སྲིད་ཀྱང་། དེ་ནི་རང་གི་མི་རིགས་འདིའི་མདུན་ལམ་གླེང་བའི་གཏམ་གྱི་ཁུག་སོ་རེ་རེ་ནས་བྱུང་བའི་ཁབ་གཙག་འབུག་གཙག་གི་རྩེད་མོ་ཡིན་པས་བཟོད་པར་ཅི་གནང་།
ཀླུ་སྨྱོན་ལགས་ཁྱེད་རང་ལ་ནོར་ལུག་འཚོ་འདོད་ཡོད་ན་ཁྱེད་རང་ཕར་བོད་དུ་ཕེབས་ན་དེ་འདྲའི་ལས་ཀ་ནི་རག་ཐག་ཆོད་རེད། ཞིང་རྨོ་འདོད་ཡོད་ན་ཡང་དེ་མཚུངས་རེད། བསམ་ཚུལ་བཟང་པོ་རེད། སྐྱེས་བུ་ཆེན་པོ་གྷན་དེས་གསུངས་པའི་གྲོང་གསེབ་རང་སྐྱོང་གི་དགོངས་ཚུལ་ཡང་དོན་ཕར་གཏུག་ན་དེ་རེད། གྷན་དེ་རང་གིས་ཀྱང་ཡིག་ཆ་འབྲི་རྩོམ་དང་ཆབ་སྲིད་ཀྱི་ལས་འགུལ་སྤེལ་ཞོར་དུ་རང་ཁྱིམ་དུ་རས་ཆ་འཐག་ལས་ཀྱི་ལས་ཀ་བྱས་འདུག
སྤོབས་པ་ལགས། ང་གྲྭ་པ་མ་བྱས་བར་དུ་ནོར་ལུག་གི་རྫི་བོ་བྱས་པ་ཡིན། དེང་སང་རྒྱ་གཞུང་གིས་ནོར་ལུག་ཁུ་བསྡུ་བྱེད་བཞིན་འདུག་པས་ད་ནི་ནོར་ལུག་གི་རྫི་བོ་བྱེད་ས་ཡང་དཀོན་སེ་འདུག
སྐུ་ཞབས་གླུ་སྨྱོན་ལགས། རང་རེ་བོད་པ་རྣམས་སློབ་སྦྱོང་ཅན་དང་རྣམ་དཔྱོད་ཅན་དུ་གྱུར་ནས་ལུགས་གཉིས་ཀྱི་བྱ་བ་གང་ལའང་མ་རྨོངས་པར་འཛམ་གླིང་གི་མི་གྲལ་དུ་དཔུང་པ་མཉམ་གཤིབ་ཏུ་བྱས་ནས་དེང་དུས་ཀྱི་དཔལ་ཡོན་ལ་ལོངས་སྤྱོད་ཐུབ་ན་ཧ་ཅང་མི་ལེགས་སམ། ༧གོང་ས་མཆོག་ནས་་རང་རེ་བོད་ཚང་མས་སློབ་སྦྱངས་བྱས་ནས་མི་གོ་ཆོད་པ་ཞིག་བྱེད་རྒྱུ་གལ་ཆེ་བ་ཡང་ཡང་དུ་བཀའ་ཕེབས་ཡོད། བོད་དོན་འཐབ་རྩོད་གི་ཐབས་ཡང་རང་རེས་སྐད་དང་རིག་གཞུང་གཞི་བཟུང་བྱས་ནས་ཤེས་རིག་སློབ་སྦྱོང་བྱེད་རྒྱུ་ནི་རྨང་གཞི་གི་ལམ་གཅིག་པུ་ཡིན་པ་གསུངས་ཡོད། ད་ལྟ་རང་རེ་ལུང་པ་ཤོར་ནས་རྗེས་ལུས་སུ་ལྷག་པ་ནི་སྤྱིར་སློབ་སྦྱོང་དང་ཁྱད་པར་དེང་དུས་ཀྱི་ཤེས་ཡོན་མེད་པ་ལ་བརྟེན་ནས་བྱུང་བ་ཡོངས་གྲགས་བཞིན་ནོ། །ལྷག་པར་ད་ལྟ་བོད་ནང་གི་གནས་སྟངས་ལ་གཞིགས་ན་ངེས་པར་དུ་བོད་པ་རྣམས་ནས་སློབ་སྦྱོང་ལ་ཤུགས་རྒྱགས་དགོས། གལ་སྲིད་བོད་པ་རྣམས་འབྲོག་ལས་དང་ཞིང་ལས་ཀྱིས་རི་བོའི་བསྲེབ་དང་། ཞིང་གི་མུ་ལ་ལྷག་ནས་གྲོང་དང་གྲོང་ཁྱེར་དང་གནད་ཡོད་ས་དམིགས་་རྣམས་མི་རིགས་གཞན་གྱིས་བཟུང་ཚར་ན་རང་རིགས་རྣམས་ནི་རྟག་ཏུ་མི་ཡི་བྲན་གཡོག་ཏུ་འགྱུར་པའི་ཉན་ཁ་ཡོད། སྤྱིར་ཞིང་ལས་དང་འབྲོག་ལས་ཀྱིབོད་པ་རྣམས་ཡང་ཡིག་རྨོངས་སེལ་ནས་སློབ་སྦྱོང་ཅན་དང་དེང་རབས་ཅན་གྱི་ཞིང་འབྲོག་ཏུ་འགྱུར་ན་དགེ་མཚན་ཆེ་བར་སེམས།
བོད་ཀྱི་རིག་གཞུང་ཞེས་པའི་རླབས་པོ་ཆེ་དེའི་ཕྱེད་ཀ་ཞིང་འབྲོག་རིག་གནས་དང་དེས་བསྐྱེད་པའི་བག་ཆགས་རེད། བོད་ཀྱི་ཞིང་འབྲོག་རིག་གནས་འདི་དོར་ནས་སྔོན་ཐོན་མི་རིགས་ཀྱི་གྲས་སུ་བསྙེག་འདོད་མཁན་ཚོ་ནི་དེང་རབས་རིག་གནས་ཀྱི་ཆད་མཐར་ལྷུང་བའི་མི་སྐོར་ཞིག་རེད། འཚོ་བ་རོལ་སྟངས་ཤེས་ན་བོད་ལ་ས་ཆའི་ཐོན་ཁུངས་དང་མི་རིགས་ཀྱི་བག་ཕེབས་བསམ་བློ་གང་གི་ཆ་ནས་ཀྱང་ཞིང་འབྲོག་རིག་གནས་འདིས་མི་ཆོག་པ་ཅི་ཡང་མེད། དེ་མ་གཏོགས་གསར་ཞེན་གྱི་མིག་ཤེལ་གཅིག་པོའི་ནང་ནས་བལྟས་ན་བོད་ལ་འདོར་འོས་པ་རྐྱང་རྐྱང་མ་གཏོགས་ཀླད་རྙིང་མཁྲེགས་བཟུང་བྱས་ནས་ཉར་འོས་པ་ཅི་ཡང་མེད་པས། ཞོགས་དུང་སོགས་ཀྱང་མིག་ཤེལ་དེས་བསླུས་ཏེ་བག་ཆགས་དོང་སྤྲུགས་སོགས་བརྩམས་པ་རེད།
ཀླུ་སྨྱོན་ལགས་ཀྱིས།
་་་་། ངའི་ལྟ་བ་ནི་བོད་པ་ཕྱེད་ཀས་རིག་གནས་སྦྱོང་དགོས་ཀི བོད་པ་ཕྱེད་ཀས་ཕ་མེས་ནས་གཉེར་བའི་ཕྱུགས་ལས་དང་ཞིང་ལས་གཉེར་ཏེ་རང་ས་རང་གིས་འཛིན་དགོས་ཀི དེ་མིན་མི་རིགས་ཀྱི་དཔལ་ཡོན་འཕེལ་རྒྱས་འདི་ལ་ཡང་མཐའ་གཅིག་ཏུ་ཞིང་འབྲོག་ལས་ཀ་རྐྱང་རྐྱང་གཉེར་འདོད་པའི་རྟག་མཐའ་དང་། ཞིང་འབྲོག་གི་ལས་ཀ་ཡོད་ཚད་བསྐྱུར་ཏེ་སློབ་གྲྭ་དང་གྲོང་ཁྱེར་འགྲིམས་ནས་དཔེ་ཐོག་རིག་གནས་རྐྱང་རྐྱང་སློབ་དགོས་པར་འདོད་པའི་ཆད་མཐའ་གཉིས་ལས་གྲོལ་བའི་དེང་རབས་ཤེས་ཡོན་དང་གནའ་རབས་འཚོ་སྟངས་གཉིས་ཀ་ཟུང་དུ་འབྲེལ་བའི་ལམ་བཟང་པོ་ཞིག་ཡོད་པར་མཐོང་ལ། ་་་་། ཟེར།
བ་འདི་རྨད་དུ་འབྱུང་བའི་མ་འོངས་བོད་ཀྱི་ལམ་ཆེན་ཞིག་བསྟན་པ་དང་མཚུངས་འདུག་ལགས།
མཁན་པོའི་མཛད་པར་ཡི་རང་ཡོད། ཀླུ་སྨྱོན་གྱི་གཏམ་ལ་གོ་རྒྱུ་འདུག
མཁྱེན་ཡངས་དྲ་གྲོགས་རྣམས་ལ་འདྲི་རྒྱུ། སྐྱབས་རྗེ་ཕ་བོང་ཁ་པའི་དྲུང་ཡིག་ལྡན་མ་བློ་བཟང་རྡོ་རྗེ་ལགས་དང་། ཆོས་མགོན་སྐུ་ཕྲེང་བདུན་པ་ཆོས་ཀྱི་ཉིན་བྱེད་མཆོག་རྣམ་གཉིས་ཀྱི་འཁྲུངས་འདས་ལོ་ཚིགས་དང་ལོ་རྒྱུས་མདོར་བསྡུས་རེ་དང་། ཡོངས་འཛིན་བློ་བཟང་བསྟན་འཛིན་རྒྱལ་མཚན་གྱི་འཁྲུངས་འདས་ལོ་ཚིགས་ཁ་གསལ་རེ་གསུངས་རྒྱུ་ཡོད་ན་གང་མྱུར་བདག་གི་དྲ་ཚིགས་སུ་མཆན་དུ་སྤེལ་རོགས། དགོས་མཁོ་ཞིག་གིས་དེད་ནས་ཡོང་གི་ཡོད།
ངོ་མ་བཟང་ཁི།
ཡིན་ན་ཡང་འབྲོག་ལས་དང་ཞིང་ལས་སོགས་བྱས་ནས་ཚར་སོང་བ་འདྲ་བོ་ཞིག་བྲིས་འདུག འོན་ཀྱང་ངའི་བསམ་ན་གལ་ལྟེ་ཁྱེད་མི་ལོ་བརྒྱའི་ནང་དུ་གསར་སྐྱེས་ཚང་མར་རིག་གསར་གྱི་སློབ་སྦྱོང་ཞིག་སྤྲད་དེ། ཁོང་ཚོ་ཚང་མ་ཤེལ་སྒོ་ཅན་གྱི་ཁང་མིག་ནང་དུ་རྐུབ་སྟེགས་འཁོར་ལོ་ཅན་གྱི་སྟེང་དུ་ཉམས་དོད་པོས་ལག་རྩིས་འཕྲུལ་བེད་སྤྱོད་བྱ་ཐུབ་པའི་དབང་དུ་གཏང་ན་ཡང་། འགྲོ་བ་མིའི་རིགས་ནི་འབྲུ་རིགས་དང་ཤ་མར་སོགས་ལ་མ་བསྟེན་པར་འཚོ་ཐབས་བྲལ་བ་ནི་དངོས་ཡོད་རེད། དེར་བརྟེན་ང་ཚོས་ཀྱང་ངས་པར་དུ་ཞིང་ལས་དང་ཕྱུགས་ལས་ནི་བྱེད་དགོས་པ་ལས་བྱ་ཐབས་གཞན་རྩ་བ་ནས་མེད། ཆོས་དང་རིག་གཞུང་གོམ་གཤིས་སོགས་ཀྱང་སྔོན་མ་ནས་བརྒྱུད་པའི་བསམ་གནོའི་ཁྱེར་སོ་དང་ལུས་ངག་གི་རྣམ་འགྱུར་ཞིག་ཡིན་པས། དེ་རྣམས་ཀྱང་མི་གསལ་བའི་ཚུལ་དུ་ཞིང་འབྲོག་གི་འཚོ་བ་དང་འབྲེལ་ཡོད། དགོས་ངོ་མ་ནི་བོད་རིགས་སུ་འདྲ་ཞིག་ཡིན་ཀྱང་ཡོན་ཏན་ཡོད་མེད་ལ་མ་ལྟོས་པར་རང་ས་རང་གི་བཟུང་ནས་སྡོད་རྒྱུ་དང་ཕྱི་མི་ནང་སྡོད་ལ་འགོག་རྐྱེན་ཅུང་ཙམ་བཟོ་ཐུབ་ན་ཕན་ངེས་ཅན་རེད།།