ཀོ་ལི་གྷ་གཞིས་ཆགས་གཞུང་པ་ཚེ་དབང་བསོད་ནམས།
ཀ་དག་ཕྱག་རྒྱ་ཆེན་པོ་ཆོས་ཀྱི་སྐུ།།
ཁ་ཙམ་མིན་པའི་དམ་ཆོས་བསྒྲུབ་འདོད་ན།།
ག་དུས་ཡིན་ཡང་རང་གི་སེམས་ལ་བརྟག །
ང་རྒྱལ་ཁོང་ཁྲོ་འདོད་ཆགས་རྩ་ཟིལ་སྤོང་།
ཅ་ལག་དངོས་པོ་རྣམ་གཡེང་བསླུ་བའི་རྒྱུ།།
ཆ་མེད་ཡུལ་དུ་གྲོགས་མེད་རི་ཁྲོད་འགྲིམས།།
ཇ་རྐྱང་ཆུ་བསྐོལ་འཚོ་བ་ངན་ངོན་བརྟེན།།
ཉ་རྒྱས་ཟླ་བ་ཇི་བཞིན་སེམས་ངོ་འཕྲོད།།
ཏ་སྤྱོད་གཙང་མའི་བརྒྱུད་པ་གལ་ཆེ་བས།།
ཐ་་དད་མ་འཆོལ་ཉམས་ལེན་ཚུལ་བཞིན་སྲུངས།།
ད་ལྟའི་སྐབས་སུ་དམ་ཆོས་མ་བསྒྲུབ་ན།།
ན་སོ་རྒས་ནས་བསྒྲུབ་རྒྱུར་ནུས་པས་དཀའ།།
པ་ངར་འབྱོར་བས་ཕྱི་མར་མི་ཕན་ཅིང་།།
ཕ་མའི་དྲིན་ལན་འཇལ་ལ་དམ་ཆོས་ཟབ།།
བ་ཕྱུགས་དུད་འགྲོའི་ཤ་ལ་སྤྱང་ལྟར་རྔམས།།
མ་གྱུར་སེམས་ཅན་ཞལ་ནས་གསུང་མཁན་མང་།།
ཙ་བ་གཅོད་ན་སེམས་ཀྱི་གནས་ལུགས་འཚོལ།།
ཚ་གྲང་ཇི་བྱུང་རྒྱུ་དང་རྐྱེན་གྱིས་སྦྱིན།།
ཛ་དྲག་བྱས་ནས་དམ་ཆོས་མ་བསྒྲུབ་ན།།
ཝ་མོ་ཁྱི་སྤྱང་བཞིན་དུ་མི་ཚེ་རྫོགས།།
ཞྭ་སེར་ཞྭ་དམར་ནང་ཆོས་སྒྲུབ་པའི་ཞྭ།།
ཟ་རྒྱུའི་ཁ་ཟས་དཀོར་ལ་སྦགས་མི་ཉན།།
འ་ར་འུར་རེའི་འཇིག་རྟེན་ལས་འབྲེལ་སྤོང་།།
ཡ་རབས་དམ་ཆོས་སྒྲུབ་པའི་བར་ཆད་ཡིན།།
ར་བ་གངས་རིས་བསྐོར་བའི་ཆོས་ལྡན་ཞིང་།།
ལ་ལུང་ཚང་མར་ཞིང་འབྲོག་ཆོས་ལ་མོས།།
ཤ་ཚ་ཡོད་ན་དམ་པའི་ལྷ་ཆོས་སྒྲུབས།།
ས་ཆ་འདི་རུ་གཏན་དུ་སྡོད་དབང་མེད།།
ཧ་ལོའི་དུག་ལས་ཉོན་མོངས་དུག་ནི་ལྕི།།
ཨ་ཙ་མ་བྱུང་སྔོན་དུ་དམ་ཆོས་སྒྲུབས།།
ཀ་མད་སུམ་བཅུ་ནང་ཆོས་སྦྱོང་ཕྱིར་སྦྱོངས། །
ཁ་ནས་མ་ཎི་ཁ་འདོན་གང་ཐུབ་སྐྱོར། །
ག་དུས་ཡིན་ཡང་རང་གི་སེམས་ལ་ལྟོས། །
ང་དང་ང་ཡིའི་བདག་འཛིན་གཏན་ནས་ཆོམ། །