——–ཀླུ་སྨྱོན།
དྲག་ཆར་དེ་འབབ་མཚམས་ཆད་མ་ཐག བྱིས་པ་ཚོ་འུར་འུར་ཟིང་ཟིང་ངང་རི་གྲོང་འདིའི་རྡོ་ལས་གྲུབ་པའི་ཁང་པ་དག་གི་སྟེང་དུ་འགོས་ནས་ཤོག་བྱ་ནམ་མཁར་སྤུར་བཞིན་ཡོད། ཤོག་བྱ་དེ་ཚོའི་ཚོན་མདོག་མི་འདྲ་ལ་སྤུས་ཀ་ཡང་མི་འདྲ། ཤོག་བྱ་འགའ་ཤས་སྐད་ཅིག་མར་རླུང་བུ་ཕྲན་ཙམ་ལྡང་རྗེས་ནམ་མཁའ་མཐོན་པོར་འཕུར་འགྲོ་ལ་ཅང་མ་འགོར་བར་བྱེའུར་རྡོ་ཕོག་པ་བཞིན་ས་སྟེང་གང་རུང་ཞིག་ཏུ་ཟགས་ཡོང་། ཐ་ན་གད་སྙིགས་དང་གཅིན་སྐྱག་གི་ཁྲོད་དུ་ཡང་ལྷུང་ཡོང་། ཤོག་བྱ་ལ་ལ་རླུང་ཤུགས་ཆེན་པོས་མ་གཏོགས་མཁའ་དབྱིངས་སུ་འདེག་མི་ནུས་ཤིང་། གལ་སྲིད་ནམ་མཁར་འཕུར་ཚར་རྗེས་དུས་ཡུན་རིང་པོ་ཞིག་ལ་མར་མི་ལྷུང་བར་ཇེ་མཐོ་ནས་ཇེ་མཐོར་གྱུར་ཏེ། ཐ་ན་རང་ཉིད་ཀྱི་ལུས་པོར་དམ་དུ་སྦྲེལ་བའི་སྐུད་པ་མཁྲེགས་པོ་དེ་ཚོ་ཡང་དུམ་བུར་བཅད་ནས་རྡོ་ལ་རྡར་རི་རྒྱུད་དུ་འཕུར་འགྲོ་ཞིང་། ཤོག་བྱ་དེ་གྲས་ཀྱི་འགའ་རེ་ཧི་མ་ལ་ཡའི་རི་རྒྱུད་བརྒལ་ནས་བོད་དུ་ཡང་ལྷུང་འདུག་ཟེར།
རྡ་སའི་རི་མགོ་རུ་གྲོང་གསེབ་ཆུང་ཆུང་ཞིག་ཡོད་པའི་མིང་ལ་གངས་སྐྱིད་ཟེར། གྲོང་གསེབ་དེའི་ལོ་རྒྱུས་ཅུང་ཟད་རིང་བ་མ་ཟད་ཀྱག་ཀྱོག་ཀྱང་ལྡན། གྲོང་གསེབ་དེའི་མི་མང་ཆེ་བ་ཆོས་དད་ཆེ་ཞིང་མ་མཐའ་ཡང་དཀོན་མཆོག་གི་སྐུ་བརྙན་རིགས་ལ་མགོ་བོ་སྒུར་ཙམ་རེ་བྱེད་པར་གོམས་ཡོད། དེ་ནི་རང་ཉིད་ཀྱི་ལ་རྒྱ་དང་གཟི་བརྗིད་མི་ཉམས་པའི་ཆེད་དུ་ཡང་ཡིན་སྲིད།
བློ་བཟང་སེང་དང་སྤེན་པ་ཚེ་རིང་། བཀྲ་ཤིས་དབང་འདུས་དང་ཀླུ་མཁར་བྱམས། མི་འདི་བཞི་ལ་གངས་སྐྱིད་རི་གྲོང་དུ་མཐུན་པ་སྤུན་བཞིར་འབོད་ལ་མི་བཞི་ཚོགས་ཁག་ཀྱང་ཟེར། དེ་ནི་ཁོང་ཚོའི་རླུང་རྟ་དར་རྒུད་དང་འབྲེལ་བའི་མིང་འབོད་སྟངས་ཤིག་རེད། རྩོམ་པ་པོར་མཚོན་ན་ཁོ་ཚོ་བེད་སྤྱད་ནས་སྒྲུང་ཐུང་ཞིག་འབྲི་འདོད་པ་ལས་ཁོ་ཚོའི་མི་ཚེའི་བརྒྱུད་རིམ་ཛ་ཛོར་དེ་ཚོར་རྒྱུས་ལེན་འདོད་གང་ཡང་མེད། དེ་ནི་རྩོམ་པ་པོ་ཚོའི་མ་མཐའི་འགྲོ་ལུགས་ཤིག་རེད། དེ་ཅི་ལ་མི་རུང་།
བློ་བཟང་སེང་གེ་ཉེ་ཆར་རྡེ་ར་རྡུན་ནས་ཚོང་ཙག་ཙིག་ཅིག་བརྒྱབ་ཚར་ཏེ་ཧིན་སྒོར་བཞི་སྟོང་ཙམ་གྱི་ཁེ་བཟང་ཁྱེར་ནས་གངས་སྐྱིད་དུ་འབྱོར་ཡོད། ཁོས་ཆེད་མངགས་མིག་ཤེལ་ནག་པོ་ཞིག་བརྒྱབ་ཅིང་མི་ཐུག་ཚད་ལ་རྡེ་ར་རྡུན་དང་འབྲེལ་བའི་སྐད་ཆ་རེ་ཟུང་བཤད་ཅི་ཐུབ་བྱེད། དེ་ནི་ཁོའི་སྤོས་ཤེལ་དང་རྡོར་དྲིལ་གྱི་ཚོང་ལམ་འགྲོ་ཐེངས་གཅིག་བརྒྱུགས་པ་དེ་གཞན་ལ་ངོམ་འདོད་ཀྱིས་ཡིན། སྤྱིར་ན་ཁོའི་ལུས་སྟེང་ན་ཚོང་པ་ཞིག་ལ་ཚང་དགོས་པའི་ཆ་རྐྱེན་འགའ་རེ་ཡོད། ཁོས་གངས་སྐྱིད་གྲོང་གསེབ་ཀྱི་གཡས་ཕྱོགས་དེར་ཡོད་པའི་རྒྱ་གར་ཇ་ཁང་ནང་མངར་ཇ་ཕོར་བ་གང་འཐུང་བཞིན་བསྡད། སེམས་ནང་སྟོང་ལྷང་ལྷང་ཞིག་ཀྱང་ཡིན་པ་འདྲ། དེ་ནི་ལྡི་ལི་ནས་ཉོས་མ་ཐག་པའི་བསིལ་ལྷམ་རྒྱ་གར་སྒོར་མོ་བརྒྱ་ཅན་དེ་མདང་ནུབ་སྤྱི་སྤྱོད་རླངས་འཁོར་ནང་རྐུན་མ་ཧམ་ཆེན་ཞིག་གིས་ཁོ་གཉིད་དུ་ཡུར་བ་དང་བསྟུན་ནས་བརྐུས་སོང་བ་དེའི་གྱོང་མ་ཐེགས་པའི་མཚོན་རྟགས་ཤིག་ཡིན།
ཨ་རོ་ཁྱོད་བདེ་མོ། གློ་བུར་དུ་སྤེན་པ་ཚེ་རིང་རྒྱ་གར་ཇ་ཁང་གི་སྦུག་ནས་ཕྱིར་ཐོན་ཡོང་། ཁོའི་གདོང་པ་རྔུལ་ནག་གིས་འཚོས་ཡོད་པར་བལྟས་ན་སྦུག་དེར་ལས་ཀ་དཀའ་ལས་ཁག་པོ་ཞིག་བྱེད་བཞིན་ཡོད་པ་འདྲ། བློ་བཟང་སེང་གེས་སྤེན་པ་ཚེ་རིང་མཐོང་མ་ཐག་ལག་གི་ཇ་ཕོར་ཕྱིར་སྦྲང་ནག་མང་པོས་ཁེངས་པའི་ཅོག་ཙེ་ཟད་པོ་དེའི་སྟེང་དུ་འཇོག་ཞོར། ཁོ་རེ། འཛམ་པ་བརྒྱ། ད་ཐེངས་ཚོང་དགའ་རབ་ཕོག་སོང་། ཁྱོད་ད་བར་གང་དུ་གབ་བསྡད་པ་ཡིན། ང་ལ་ཁྱོད་ཀྱི་རོགས་པ་ཞིག་དགོས་སོང་། ཞེས་བརྗོད་རྗེས་ཁ་ཚག་ཚག་གད་མོ་ཆུང་ཆུང་ཞིག་བགད། སྤེན་པ་ཚེ་རིང་གིས་ལག་གི་ལག་རས་ཟད་པོ་དེས་གདོང་གི་རྔུལ་ཆུ་འབྱིད་ཙམ་བྱས་རྗེས་སྟོད་ཐུང་རྙིང་པ་ལྷན་པ་དྲུག་ཅན་དེའི་ཁུག་མའི་ནང་ནས་རྒྱ་གར་རྩྭ་དུད་ཤོག་ཆག་ཅིག་ཕྱིར་བླངས། དེའི་ནང་དུ་ཐ་མག་རྐང་གསུམ་དང་ཕྱེད་ཀ་ལས་མེད་པར་བརྟགས་ན་ཁོར་དངུལ་ཆད་བྱུང་ནས་གང་འཚམ་འགོར་བ་རྟོགས་ཐུབ། སྤེན་པ་ཚེ་རིང་གིས་ནམ་རྒྱུན་གྲོགས་པོ་ཚོའི་མདུན་ནས་ཆང་ཡིན་ན་དམ་བི་གང་ཏག་ཏག་དང་ཐ་མག་ཡིན་ན་ཤོག་ཆག་ཅིག་ཏག་ཏག་མ་གཏོགས་ཕྱིར་ངོམ་སྲོལ་མེད།
གང་ལྟར་དེ་རིང་ཁོས་བློ་བཟང་སེང་གེ་ལ་སྔོན་ཆད་སྟོན་མ་མྱོང་བའི་འཛུམ་མདངས་ཤིག་སྟོན་བཞིན། མྱི་ལྡང་། དེ་རིང་ད་ཁྱོད་ལ་ངའི་རོགས་པ་ཞིག་གཞི་ནས་དགོས་སོང་ངམ། ངས་ནི་ཇ་སྐོལ་རྒྱུ་དང་མེ་གཏོང་རྒྱུ་མ་གཏོགས་ཅི་གང་མི་ཤེས་པས་ཁྱོད་ལ་རོགས་པ་ཞིག་གང་ནས་བྱེད་ཐུབ་ཅེས་རྗོད་བཞིན་ནག་ལ་སྣུམ་པའི་ངོ་གདོང་ལས་ཟུར་ཟ་དང་ཁྲེལ་དགོད་ཀྱི་གཉེར་མ་འགའ་མངོན་ཡོང་། རང་དོན་ལ་ཐུག་དུས་བློ་བཟང་སེང་གེས་གཞན་ལ་ཞུ་བ་འཐེན་པ་དང་སློང་མོ་རྒྱག་པ། ཁ་ཡག་དང་རྫུན་བཤད་སོགས་གང་ཞིག་བྱེད་དགོས་ཀྱང་འཇོན་ཐག་ཆོད་ཡོད་པ་ཞིག་ཡིན་པས། ཁོས་སྤེན་པ་ཚེ་རིང་ལ་གྲོགས་པོ་རྙིང་པ་ཞིག་གི་ཚུལ་དུ་ཇ་ཕོར་བ་གཉིས་ཨུ་ཚུགས་ཀྱིས་ཉོས་རྗེས། ཡ་ད་ངས་ཁྱོད་ལ་དོན་དག་གསལ་བོ་བྱས་ནས་བཤད་ཆོག
ཉེ་ཆར་ང་དང་ངའི་གྲོགས་པོ་ཞིག་གིས་མཉམ་དུ་ཟ་ཁང་ཞིག་འཛིན་རྒྱུའི་འདོད་པ་བྱུང་སོང་། ཡིན་ཡང་མ་རྩ་ཉུང་དྲགས་པས་གྲོགས་པོ་ཚོར་དངུལ་ཏོག་ཙམ་རེ་མ་གཡར་ན་འ་འུབ་འདུས་སྟངས་མི་འདུག་པས། ད་རེས་ང་ཆེད་མངགས་གྲོགས་པོ་བཟང་པོ་ཁྱེད་ཀྱི་སར་བཅར་ནས་སྒོར་མོ་བཞི་བརྒྱ་ལྔ་བརྒྱ་ཞིག་གི་སྐྱབས་འཇུག་ཞུ་དགོས་ཐུག་སོང་། ཞེས་བརྗོད་རྗེས་གདོང་གི་མིག་ཤེལ་ནག་པོ་ཡུ་བ་གཅིག་གི་ཚབ་ཏུ་ཤིང་ཐུར་ཕྲ་མོ་ཞིག་བསྒར་བ་དེ་མར་བླངས་ནས་སྤེན་པ་ཚེ་རིང་གི་མིག་ནང་དུ་ཐད་ཀར་བལྟས་ནས་བསྡད། སྤེན་པ་ཚེ་རིང་གིས་བློ་བཟང་སེང་གེས་མངགས་པའི་ཇ་དེ་ཚུར་བླངས་ནས་ཧུབ་ཐེངས་གཅིག་གིས་འཐུང་རྗེས་རྫ་མས་བཟོས་པའི་ཇ་ཕོར་དེ་འཁྲིས་ཀྱི་རྒྱུགས་ཆུ་བཞུར་སའི་ཡུར་བུ་ཆུང་ཆུང་དེའི་ནང་དུ་གཡུགས་རྗེས། གྲོགས་པོ་ཐུགས་རྒྱལ་མ་བཞེངས། སྤྱིར་ན་ང་ལ་ངས་ཟླ་བ་དྲུག་གི་རིང་བསགས་པའི་སྒོར་མོ་ལྔ་བརྒྱ་ཡོད་མོད། ཁེ་ཉིན་ཕྱི་དྲོར་ངའི་བཟའ་ཟླའི་རྐང་པ་སྐུ་ཞོགས་རྒྱགས་པ་ཞིག་བསྡད་ཡོད་པའི་རྒྱ་གར་རྐང་གསུམ་འཁོར་ལོ་ཞིག་གིས་རྨས་སྐྱོན་བཏང་བར་སྨན་བཅོས་བྱས་པའི་རིན་འབབ་ཏུ་སྤྲད་ཚར། ཞེས་བརྗོད་རྗེས་ཕྱིར་ཇ་ཁང་གི་སྦུག་ཏུ་ལས་ཀ་བྱེད་པར་བསྐྱོད་སོང་།
བློ་བཟང་སེང་གེའི་མིག་ལམ་དུ་མུན་ནག་ཅིག་འཐིབས་ཤིང་རྣ་བའི་ནང་དུ་སིང་སྒྲ་ཞིག་གྲག་བཞིན་འདུག ཁོས་རང་ཉིད་ཇི་ལྟར་བྱས་ཏེ་གངས་སྐྱིད་གྲོང་གསེབ་ཀྱི་སྤོ་བོ་བཀྲ་ཤིས་དབང་འདུས་ཀྱི་ལྕགས་ཁང་ཐེབས་ཆག་དེའི་སྒོ་རྩར་བསླེབས་པ་ཡང་མ་ཤེས། སྤོ་བོ་བཀྲ་ཤིས་དབང་འདུས་ནི་མངའ་རིས་པ་ཞིག་ཡིན་ཞིང་ནམ་རྒྱུན་མོ་འདེབ་རྒྱུར་དགའ་ཞིང་འབྲས་ཆང་འཐུང་རྒྱུར་ཡང་མཉེས་པོ་ཡོད། ཁོང་ལ་མོ་ཡོན་ཟེར་ན་རེད་རྔན་པ་ལབ་ན་གང་ལྟར་འབྲས་ཆང་ཕོར་བ་གཅིག་སྤྲོད་མཁན་བྱུང་ན་མོ་འདེབ་རྒྱུར་དཀའ་ཚེགས་ལ་མི་འཛེམ་མཁན་ཞིག་ཡིན།
བློ་བཟང་སེང་གེའི་རིག་པ་ཏོག་ཙམ་གྲུང་པོ་ཆགས་པ་འདྲ། ལམ་སེང་ཁུག་མའི་ནང་ནས་རྒྱ་གར་སྒོར་མོ་བཅུ་ལོར་གཅིག་བླངས་ཏེ་སྤོ་བོ་བཀྲ་ཤིས་དབང་འདུས་ཀྱི་ཁང་པའི་ནང་དུ་འཛུལ། ལྕགས་ཁང་འདི་ནི་སྤྱི་ལོ་༡༩༦༧ ལོར་ཕུབས་པ་ཞིག་ཡིན་པས་རྙིང་ཞིང་རལ་བ་ལ་ནི་བལྟ་མི་བཟོད་པ་ཙམ་དུ་སྣང་མོད། སྤོ་བོ་བཀྲ་ཤིས་དབང་འདུས་ཀྱིས་ཁོང་གི་མི་ཚེ་ཕྱེད་ཀ་ཁང་པ་འདིའི་ནང་དུ་བསྐྱལ་བ་ཡིན་ཟེར་ནས་གཞན་ལ་ངོམ་ཅི་ཐུབ་བྱེད། མདང་དགོང་ཁོང་ལ་རྨི་ལམ་ཡག་པོ་ཞིག་རྨིས་པས་ད་ནངས་ཞོགས་པར་ཕོ་བྲང་ཕྱི་སྐོར་ལ་ཡང་མ་ཕྱིན་པར་མི་ག་མོས་ཁྱེར་ཡོང་བའི་གཏམ་བཟང་ངམ་རྔན་པ་སྤྲོད་རྒྱུར་བསྒུགས་ནས་བསྡད།
བློ་བཟང་སེང་གེ་ཁོང་གི་ཁང་པའི་ནང་དུ་འཛུལ་ཡོང་བ་དེ་ཁོང་གིས་སྒེའུ་ཁུང་བརྒྱུད་ནས་མཐོང་བས་ལམ་སེང་ལག་ནང་གི་མ་ཎི་འཁོར་ལོ་དེ་དྲག་ཏུ་སྐོར་བཞིན་རེ་ཞིག་ཅི་ཡང་མ་མཐོང་བའི་ཚུལ་དུ་གདོང་མཆོད་བཤམས་ཀྱི་ཕྱོགས་སུ་འཁོར་ནས་བསྡད། བློ་བཟང་སེང་གེས་ཨུ་ཧུ་ཞེས་གློ་ལུ་ཕྲན་བུ་བརྒྱབ་པར་གཞི་ནས་སྤོ་བོ་བཀྲ་ཤིས་དབང་འདུས་ཀྱིས་མགོ་བོ་ཕྱིར་འཁོར། བློ་བཟང་སེང་གེས་སྤོ་བོ་ཁོང་ཐེངས་མང་པོར་རྡ་སའི་སྲང་ལམ་དང་ཕོ་བྲང་ཕྱི་སྐོར་ནས་མཐོང་མྱོང་མོད། དེ་རིང་སྤོ་བོའི་ངོ་གདོང་དང་སྐྲ་ལོ། གཉེར་མ་དང་མ་ཎི་འཁོར་ལོ་སོགས་ཚང་མ་ཤམ་བྷ་ལ་ནས་བསླེབས་པ་དང་འདྲ་པར་གཟི་བྱིན་འབར་བ་དང་དད་པ་སྐྱེ་དགོས་པ་ཞིག་ཏུ་སྣང་།
སྤྱིར་ན་བློ་བཟང་སེང་གེ་ནི་ཚོང་པ་ཉི་ཚེ་བ་ཞིག་ཡིན་པ་མ་གཏོགས་ཆོས་པ་ཞིག་གང་ཡང་མིན་པས་དཀོན་མཆོག་གསུམ་ཟེར་བ་དང་བདེན་པ་བཞི་ཟེར་བ་འདྲ་བོ་ཆོས་ཚིག་དེ་ཚོ་གོ་མ་ཐག་གཉིད་ལ་ཤོར་འགྲོ་མཁན་ཞིག་ཡིན་མོད། དེ་རིང་ལུས་པོ་རྙིང་པར་རྣམ་ཤེས་གསར་བ་ཞུགས་པ་བཞིན་སྤོ་བོ་བཀྲ་ཤིས་དབང་འདུས་ཀྱི་མཆོད་བཤམ་གཡོན་ཕྱོགས་སུ་ཡོད་པའི་ཞལ་འདོན་ཕྱོགས་བསྒྲིགས་ཀྱི་དེབ་རྙིང་གོག་ཟད་ནས་གོར་གོར་ཆགས་པ་དེའི་ཤོག་ལྷེ་རེ་རེ་བཞིན་ཨུ་ཚུགས་དང་དད་གདུང་འདྲེས་མས་ཕར་སློག་ཚུར་སློག་བྱེད་བཞིན་ཁ་ནས་མ་ཎི་དང་བཛྲ་གུ་རུ་དྲག་ཏུ་བགྲང་བཞིན་འདུག མོ་ཡག་པོ་འདུག ལྷ་གསོལ་ལོ། ཀླུ་གསོལ་ལོ། སྤོ་བོའི་གདོང་ལ་འཛུམ་མདངས་འབར་བཞིན་རྒས་ཤིང་འཁོགས་པའི་ལུས་པོ་འདར་སིག་སིག་བྱེད་པར་བལྟས་ན་ལྷ་ག་གེ་མོ་འབབ་གྲབ་ཡོད་པ་དང་ཡང་འདྲ། བློ་བཟང་སེང་གེས་མཚམས་མེད་པར་སྤོ་བོའི་རྐང་པ་གཉིས་རང་གི་སྤྱི་གཙུག་ཏུ་གཏུག་བཞིན། ཟ་ཁང་ལམ་འགྲོ་ཡོང་ས་རེད་པས། ཟ་ཁང་ལམ་འགྲོ་ཡོང་ས་རེད་པས། ཞེས་བར་མེད་དུ་ཟློ།
དུས་ཚོད་ཅི་ཙམ་འགོར་བ་རྩོམ་པ་པོ་ང་ལ་ཡང་བཤད་རྒྱུ་མེད། གངས་སྐྱིད་གྲོང་གསེབ་ཡོངས་རྫོགས་མུན་པས་གཡོགས་འདུག ཁྱི་ལྡོམ་རེ་ཟུང་རྡོ་ལ་རྡར་གྱི་རི་རྩེ་ནས་དལ་བུར་ནུབ་ཕྱོགས་སུ་བཞུད་ཀྱིན་རྒྱང་རིང་གི་སྐར་མ་དེ་ཚོའི་སྟེང་དུ་ཟུག་བཞིན་འདུག བློ་བཟང་སེང་གེ་ཐང་ཆད་དྲགས་ནས་རྐང་པ་གཉིས་ཀྱང་ཡོངས་སུ་སྦྲིད་འདུག ཡིན་ཡང་ཁོས་མགྲིན་པ་གཟེངས་སུ་བསྟད་ནས་རྒྱ་གར་གཞས་ཆུང་ཞིག་ལེན་བཞིན་མུན་ཁྲོད་དུ་སྐྱོད་བཞིན་འདུག
གཞས་ཚིག་ནི་འདི་ལྟ་སྟེ། ཟ་ཁང་ཆུང་ཆུང་གངས་སྐྱིད་རི་གྲོང་བཙུགས། བཀྲ་ཤིས་བདེ་ལེགས་གཏམ་བཟང་སྒུག་ནས་སྡོད། གློ་བུར་དུ་ཁོའི་རྐང་པ་ལམ་ཟུར་དུ་ཆང་གིས་བཟི་ནས་ཉལ་བསྡད་ཡོད་པའི་འཁྱམ་པོ་ཞིག་ལ་ཐོགས་ཏེ་ས་རུ་འགྱེལ་སོང་། ཨ་བ་ཨ་མ། བློ་བཟང་སེང་གེས་ལམ་སེང་རང་ཉིད་ལ་བསྡིགས་མཁན་དེའི་སྐད་ངོ་ཆོད། ཡ་ཁོ་རེ་འཛམ་པ་བརྒྱ། ཁྱོད་པ་མགོ་ཀླུ་མཁར་བྱམས་རེད་འདུག་ག ཁྱོད་ཆི་ཛོ་ལེ་ཡིན། ཀི་ཧི་ཧི། ཨ་མདོའི་གསར་འབྱོར་ཚོའི་ནང་ནས་ཀླུ་མཁར་བྱམས་བློ་ཁོག་ཅུང་ཆེ་སེ་ཡོད་པར་གྲགས་ཀྱང་། དོ་དགོང་རྡོ་ལ་རྡར་རི་རྒྱུད་ཀྱི་བར་སྣང་ལ་བྲག་ཅ་འཁོར་བའི་བློ་བཟང་སེང་གེའི་དཔའ་སྐད་དེས་ཁོ་ཡང་མགོ་འཐོམས་པ་འདྲ་ཞིག་བྱུང་།
ཁོས་འཁྲིས་དེར་ཐོར་བསྡད་ཡོད་པའི་ཐ་མག་རྐང་འགའི་ཁྲོད་ནས་གཅིག་བླངས་ནས་མེ་སྒོ་ཞོར། རིག་པའི་གཞུང་ལུགས་གཞིར་བཞག་ནས་བཤད་ན། དོ་དགོང་གི་དོན་དག་འདི་ཡང་ཚད་ངེས་ཅན་ཞིག་གི་སྟེང་ནས་བརྗོད་ཆོག དཔེར་ན། བློ་བཟང་སེང་གེ་གློ་བུར་དུ་གློག་འཁྱུད་པ་བཞིན་ཧོར་འཐོར་ནས་བསྡད། ཁོའི་ལག་མགོར་གྱོན་ཡོད་པའི་འགྱིག་གི་ཆུ་ཚོད་རྙིང་པ་དེའི་ནང་ནས་ཐག་ཐག ཐག་ཐག ཐག་ཐག་ཅེས་པའི་སྒྲ་ཞིག་རྡེ་ར་རྡུན་གྱི་དམག་མིའི་མེ་འཁོར་གྱི་སྒྲ་བཞིན་གྲག་ཡོང་། མ་རེད། ངས་ཟ་ཁང་འཛིན་གྱི་མིན། ངས་ད་བར་དུ་ཚོང་བརྒྱབ་པ་ཡིན། ང་ངོ་མ་རྫུན་བཤད་པར་ཉོབ་སོང་། ད་ནས་བཟུང་ང་ཚོང་བ་བྱེད་ཀྱི་མིན། ངས་རྫུན་བཤད་ཀྱི་མིན། ངས་གངས་སྐྱིད་གྲོང་གསེབ་འདི་ནས་མཐུན་པ་སྤུན་བཞིའི་མཉམ་དུ་གཞས་བཏང་ཨ་རག་འཐུང་ནས་སྡོད་ཀྱི་ཡིན། ལྷ་ཆོས་སྐྱོང་སྲུང་མ་དཔང་དུ་བཙུགས་པ་ཡིན། གློ་བུར་དུ་གནམ་ས་གཉིས་རེས་མོས་སུ་འཁོར་བྱུང་།
བློ་བཟང་སེང་གེ་ལ་རང་ཉིད་མུན་ནག་གི་དོང་རིང་ཞིག་གི་ནང་དུ་ཟག་བཞིན་པའི་ཚོར་སྣང་ཞིག་སྐྱེས། ལོ་ངོ་ཁྲི་ཕྲག་གི་རྗེས་སུ་ཡང་དོང་རིང་དེའི་མཐིལ་དུ་བསླེབས་ཐབས་བྲལ་བའི་སྣང་བ་ཞིག་ཀྱང་འཁོར། ཤོག་སྙིགས་དང་ལོ་མ་སྐམ་པོ་འགའ་རླུང་བུས་དེད་པའི་སྒྲ་ལས་ཅི་ཡང་ཐོས་རྒྱུ་མི་འདུག རྡ་སའི་རི་རྒྱུད་མུན་ཁྲོད་དུ་ཧ་ཅང་ཟབ་པའི་གཏམ་རྒྱུད་རིང་མོ་ཞིག་ཏུ་གྱུར། དེས་ང་ཚོ་ཚང་མ་པང་དུ་བསྡམས་པ་དང་འདྲ། དེས་ཁ་སང་དེ་རིང་གི་ཆབ་སྲིད་པ་ཚོའི་འུར་འུར་ཟིང་ཟིང་འཁྲབ་སྟོན་སྣ་ཚོགས་ཀྱང་མཚོན་ཐུབ་པ་འདྲ།
གོ་བརྡ་འཕྲོད་དཀའ་བའི་རྩོམ་ཡིག་གཅིག་རེད་འདུག་ཧ་ཧ་ཧ་
ལས་མེད་ཚོ་ལ་སྒྲུང་གཏམ་ཟློས།
ཀླུ་སྨྱོན་ཧེ་རུ་ཀ་འདི་གངས་ལྗོངས་སྙན་ངག་གི་རྒྱལ་པོ་རེད། ངོ་མ་སྙན་ཐལ།
དེང་དུང་མཚན་མོའི་སྐར་མ་ལ་ངུ་ཟུག་སྤྲོ་བའི་རྡ་སའི་སྒེར་སྤྱོད་གཡོ་འཕྲུལ་དག་ཏག་ཏག་གསལ་གསལ་ལྷང་ལྷང་བཤད་པའི་སྒྲུང་གཏམ་ཞིག་ཏུ་གོར་མ་ཆགས་སོ།།
ཨ་རོགས་ཁྱོད་ཀྱི་བྱ་དགའི་གཟེངས་རྟགས་ཀྱི་རྔ་མ་ཆད་སོང་ནི་མ་རེད་དམ།
གོ་བརྡ་འཕྲོད་དཀའ་བའི་་ལམ་དབུ་མ་ལྟར་རོ
སྒྲུང་གཏམ་འབྲི་བ་ནི་ལས་སླ་བོ་ཞིག་མིན་ན་ཡང་ཀློག་པ་ནི་དེ་འདྲ་ཁག་པོ་ཅང་མ་རེད།
སྒྲུང་གཏམ་ཡང་མི་གོ་ན་མི་དེ་ཚར་ཚར་བ་རེད།
ཧཧཧཧཧ
སྒྲུང་མཇུག་བསྡུས་སྟངས་དེ་དཔེར་ན་རྒྱུགས་བཞིན་པའི་རླང་འཁོར་ཞིག་གློ་བུར་གཡང་ལ་མཆོངས་བ་འདྲ་པོ་ཞིག་པས་སྣང་བར་འགྲོ་མ་སོང་།
ལོ་ལྔའི་སྔོན་བྲིས་འདུག ད་ཕྱིར་མིག་ལྟ་དུས་མ་འོངས་ལུང་བསྟན་འདྲ་བོ་ཞིག་ཆགས་ཡོད་ས་རེད། གཅིན་གནམ་ལ་བཏང་བ་རྡོ་ཐོག་ཡིན་པ་འདྲ།