གནས་ཚུལ་གཏོང་མཁན། བཀྲ་ཤིས།
དེ་ཡང་བོད་མི་གནས་སྡོད་བྱེད་སའི་རྒྱལ་ཁབ་མང་པོའི་ནང་དུ་བོད་པ་དང་བོད་དོན་རྒྱལ་སྐྱོར་བ་ཚོས་གསུམ་བཅུའི་དུས་དྲན་ཐེངས་༥༦པ་སྲུང་བརྩི་བྱས་ཡོད་ལ། འདིར་ཡོ་རོབ་རྒྱལ་ཁབ་ཧང་གི་རི་ལ་ཆ་མཚོན་ན། ལུང་པ་འདི་ཡི་ནང་དུ་གནས་སྡོད་བྱེད་མཁན་བོད་མི་བཅུ་གྲངས་ཤིག་ཀྱང་མེད་མོད། ཡིན་ཡང་དེ་རིང་རྒྱལ་ཁབ་འདིའི་་རྒྱལ་ས་བྷོ་ངྷ་ཕེ་སི་གྲོང་ཁྱེར་ནང་གི་དབུས་ཡོ་རོབ་ཆེས་མཐོའི་གཙུག་ལག་སློབ་གཉེར་ཁང་ནང་ཞིབ་འཇུག་སློབ་མ་འདོན་བཞིན་བའི་སློབ་མ་ཚོ་དང་ས་གནས་བོད་མི་བཅས་ཀྱིས་མཉམ་རུབ་ཐོག་རྒྱ་ནག་གཞུང་ཚབ་ཁང་གི་མདུན་དུ་ངོ་རྒོལ་སྐད་འབོད་བྱས་ཡོད་འདུག
དེ་རིང་གི་ལས་འགུལ་ནང་མཉམ་ཞུགས་བྱེད་མཁན་བུ་མོ་བསྟན་འཛིན་སྒྲོལ་མ་ལགས་ཀྱིས་བརྗོད་ན་དེ་རིང་ནི་བོད་ཀྱི་ལོ་རྒྱུས་ནང་གི་ཉིན་མོ་གལ་ཆེན་ཞིག་ཡིན་པས། མི་གྲངས་མང་ཉུང་ལ་མ་ལྟོས་བར། ང་ཚོས་སྐད་གསེང་མཐོན་པོའི་སྒོ་ནས་རྒྱ་མི་ཚོར་བོད་མིས་རེ་བ་ནམ་ཡང་བློས་གཏོང་བྱེད་མི་སྲིད་པ་གསལ་སྟོན་བྱེད་དགོས་ལ། དུས་མཚུངས་སུ། རྒྱལ་ཁབ་འདིའི་མི་མང་ཚོར་ཡང་བོད་ནི་བོད་དང་། རྒྱ་ནི་རྒྱ་ཡིན་པ་ཧ་གོ་རུ་འཇུག་རྒྱུ་དེ་གལ་ཆེན་པོ་རེད་ཅེས་བརྗོད་བྱུང་། ང་ཚོས་སྐད་འབོད་མ་བྱས་པར་ཁུ་སིམ་མེར་བསྡད་ན་རྒྱ་ནག་དང་རྒྱལ་སྤྱིའི་སྲིད་གཞུང་ཁག་གིས་བོད་ཀྱི་གནད་དོན་དེ་ག་ལེ་ག་ལེ་བྱས་ནས་ཁུ་སིམ་མེར་འཇོག་འགོ་ཚུགས་ཀྱི་རེད་ལ། དེ་ལྟར་བོད་དོན་དེ་རྒྱལ་སྤྱིའི་ཆབ་སྲིད་སྡིངས་ཆའི་སྒང་ནས་ཁུ་སིམ་མེར་བརླག་འགྲོ་བའི་ཉེན་ཁ་ཡང་ཡོད་རེད་ཅེས་མུ་མཐུད་ནས་བརྗོད་བྱུང་།