།བྱང་ཨ་རིའི་ས་གནས་བྷོསེ་ཊོན་དུ་ས་གནས་བོད་མིའི་སྤྱི་མཐུན་ཚོགས་པའི་གོ་སྒྲིག་འོག་བྱང་ཨ་རིའི་བོད་མི་མང་སྤྱི་འཐུས་སྐབས་བཅོ་ལྔ་པའི་འོས་མི་རྣམ་པའི་བགྲོ་གླེང་ཐེང་དང་པོ་དེ་འཆར་ལོའི་ཟླ་བ་ ༡ ཚེས་ ༡༥ རེ་གཟའ་སྤེན་པའི་ཉིན་གནང་གཏན་འཁེལ་འདུག བགྲོ་གླེང་ནང་ཕེབས་གཏན་འཁེལ་བའི་སྤྱི་འཐུས་འོས་མི་ལྔ་དང་འོས་མི་གཅིག་ད་ལྟ་ཏན་ཏན་མེད་པར་ཕེབས་གཏན་འཁེལ་བའི་འོས་མི་་རྣམས་བྱང་ཨ་རིའི་ས་གནས་སིཡ་ཊལ་ནས་སྐུ་ངོ་བཀྲ་ཤིས་རྣམ་རྒྱལ་ལགས་འོས་གྲངས་ ༡༠༤༦ ཁེ་ན་ཌ་ཊོ་རོན་ཊོ་ནས་སྐུ་ཞབས་ནོར་བུ་ཚེ་རིང་ལགས་འོས་གྲངས་ ༨༢༦ ས་གནས་ནིའུ་ཡོག་ནས་སྐུ་ཞབས་ཀུན་དགའ་འཕྲིན་ལས་ལགས་འོས་གྲངས་ ༣༨༤ ཁེ་ན་ཌ་ཁེལ་གྷ་རི་ནས་སྐུ་ཞབས་བཀྲ་ཤིས་ཕུན་ཚོགས་ལགས་འོས་གྲངས་ ༣༤༣ ཡང་ཁེ་ན་ཌ་མོན་ཁྲེ་རེལ་ནས་བུ་མོ་བདེ་སྐྱིད་ཆོས་དབྱངས་ལགས་འོས་གྲངས་༣༡༤ བཅས་ཁོང་རྣམ་པ་ལྔ་བགྲོ་གླེང་ནང་ཕེབས་བཞུགས་གནང་ཏན་འཁེལ་བ་དང་། བྱང་ཨ་རི་ས་གནས་མི་ན་སོ་ཊ་ནས་ཨེམ་རྗེ་ཚེ་དབང་དངོས་གྲུབ་ལགས་འོས་གྲངས་ ༢༠༥ ད་ལྟའི་ཆར་ངེས་གཏན་མེད་ཀྱང་ཕེབས་ཐུབ་པའི་རེ་བ་ཞུ་གི་ཡོད། བགྲོ་གླེང་གི་གཙོ་སྐྱོང་གནང་མཁན་སྐུ་ཞབས་པདྨ་ཚེ་དབང་ཤཱསྟྲི་མཆོག་དང་སྤྱི་ཟུར་ནོར་བུ་དར་རྒྱས་ལགས་གཞན་ཡང་དུས་ཚོད་བཏང་འཛིན་གནང་མཁན་ས་གནས་འགན་འཛིན་ལྷན་ཚོགས་ཀྱི་ཚོགས་གཙོ་སྐུ་ཞབས་བློ་ལྡན་དབང་ཕྱུག་ལགས་བཅས་ནས་གནང་རྒྱུ་ཡིན་འདུག
གཞན་ཡང་བགྲོ་གླེང་འདི་བཞིན་ས་གནས་བོད་མིའི་སྤྱི་མཐུན་ཚོགས་པའི་དྲྭ་རྒྱ་ www.bostontibet.org རྒྱུད་ཐད་ཀར་རྒྱང་བསྲིང་གནང་འཆར་འདུག
ཨ་རི་ཁུལ་གྱི་སྤྱི་འཐུས་རྣམ་པ་ཚོ་གོང་ཆེ་ཤོས་རེད་དེ་ལ་དཔགས་པའི་ཕྱག་ལས་གནང་གལ་ཆེ། དེ་ཡང་ཆོ་ཁ་དང་ཆོས་ལུགས་ཀྱི་ཕྱོགས་ལྷུང་གདོན་གྱིས་མ་སྨྱོས་ཤིང་། མཚན་དོན་རྗེས་འབྲེལ་སྤྱི་བའི་མི་ཞིག་རང་ཡོང་བ་བྱ་དགོས། ངས་མ་འོང་བའི་སྤྱི་འཐུས་དེ་ནང་ཁུལ་ཁྱི་འཛིངས་མི་རྒྱབ་པར་རྣམ་དཔྱོད་དང་།་བཟོད་སྲན་གོ་ཡངས་དཀྱེལ་ཆེ་བ་དགོས་གལ་མཐོང་། མདོར་ན་༧གོང་ས་མཆོག་གི་བཀའ་དགོངས་འགྲུབ་མཁན་ཞིག་དགོས་པ་ལས་ད་ལྟའི་སྤྱི་འཐུས་ལས་ཐོག་རྣམ་པ་བཞིན་ནང་ཁུལ་དཔུང་འགྲིལ་ནས་སྤང་འཛིངས་རྒྱག་མཁན་ཞིག་མི་ཡོང་བའི་སྨོན་ལམ་འདེབས་བཞིན་ཡོད།