ཆེ་བར་བསམ་ན་སྲང་ལམ་དོག་མོ་ཞིག།
ཆུང་གི་འདོད་ན་མྱི་ཚོགས་འདུ་ས་ཞིག།
ལྡི་ལིའི་གྲོང་མཐའི་བོད་པའི་གཞིས་སྒར་ན།།
ཁ་སང་དེ་རིང་བདག་ཀྱང་འདུར་གྱིན་ཡོད།།
རྒྱ་བོད་སོག་གསུམ་མ་འདུས་འདི་ན་མེད།།
དམིགས་ཡུལ་ཡོད་མེད་ཚང་མ་འདི་ན་ཡོད།།
ཕོ་རྐྱང་མོ་རྐྱང་འཁྲབ་ས་འདི་རེད་ཟེར།།
གནས་མཆོག་འདི་ན་ལྟད་མོ་སྣ་ཚོགས་འདུག།
སྒོར་མོ་ཡོད་ན་བུ་མོ་ཉོ་རྒྱུ་འདུག།།
འཇོན་ཐང་ཡོད་ན་བུ་རྟགས་འཇོག་རྒྱུ་འདུག།
ཅི་ཡང་མེད་ཀྱང་ཇ་རེ་བཏུང་བསྡད་ན།།
མིག་གི་ལྟད་མོར་གཡེང་ས་ཧ་ཅང་མང་།།
བུ་མོ་སྒེག་ཉམས་ཅན་པོའི་འགྲོ་སྟངས་དེས།།
མི་རྐྱང་མང་པོའི་མིག་ཟུང་འཐེན་ནས་འགྲོ།
སྤྲང་པོ་མཐེ་བོང་བསྒྲེངས་མཁན་ཉམ་ཐག་ཚོར།།
ཚང་མའི་སྡང་མིག་བགྲད་དེ་སྡིག་ཅིང་དམོད།།
ཚོང་བ་དེ་ཚེ་ཧམ་སེམས་ཆེ་བར་འདུག།
ཟ་མ་དེ་ཚོ་གོང་ཚད་ཆེ་བར་འདུག།
ཕྱུག་པོའི་འགྱིང་ས་སྤྲང་པོ་ནུར་ས་འདི།།
རྒྱ་གར་བོད་པ་གཉིས་ལ་རྨི་ལམ་རེད།།
ཕྱི་ལ་གཡོག་ཏུ་འགྲོ་ན་འདི་ནས་སྒུག།
ཕ་ཡུལ་གྲོང་ལ་ལོག་ན་འདི་རུ་བརྒྱུད།།
གང་ལ་འགྲོ་ན་འདི་ལ་ཕེབས་ཤོག་དང་།།
རྒྱུ་དང་འབྱོར་བ་ཡོད་ན་ལམ་ཁ་མང་།།
སྐྲ་ལོའི་ཁ་དོག་བསྒྱུར་བའི་ཕོ་གསར་མང་།།
ལང་ཚོ་སྒོར་ལ་བརྗེ་བའི་བུ་མོ་མང་།།
ས་སྲོད་སྲང་ལ་ཉུལ་ན་རིག་རྒྱུ་མང་།།
མང་པོ་མིག་གིས་རོལ་ས་བསམ་ཡས་གླིང་།།
དེ་ལ་ད་ལོར་ཉིན་འགའ་སྡོད་རྒྱུ་བྱུང་།
ཇོ་ནང་ཚང་གི་མར་ཕྱོགས་ན།
བཀྲ་ཤེས་བདེ་ལེགས་གསོལ་མགྲོན་ཡོད།
ཆུ་བཞི་སྒང་དྲུག་ཁང་ཆེན་ནང་།
རྒྱ་ནག་སི་ཁྲོན་ཟས་སྣ་ཡོད།
སྲང་ལམ་དོམ་མོ་དེའི་ནང་ནས།
ཡར་འགྲོ་མར་འགྲོ་གང་ཙམ་བྱས།
མོ་སྐྱེས་ཉོ་རྒྱུ་ཡོད་པ་མཐོང་མ་སོང་།
ཕོ་སྐྱེས་སྐྲ་མདོག་བསྒྱུར་བ་མཐོང་མ་སོང་།
སྟོད་ལ་སེར་བོ་བསྐྱོན་པའི་མི་རྐྱང་འགས།
དགེ་བཤིས་ཡིན་ཟེར་ཕྱིར་བསྐྱོད་བྱེད་པ་མཐོང་།
སྙན་རྩོམ་འདི་སྙན་པ་ལ།
མ་ཅང་ཀྲེ་ལའི་དཀྱིལ་འི་ཇ་ཁང་ནང་།
བུ་མོ་སྤུན་གཉིས་སེམས་པ་ཤོར་ས་གཉིས།།
ཕ་མར་ཚེ་གཡོག་བྱེད་པའི་བཟང་མ་གཉིས།།
ཇ་རེ་འཐུང་དུས་ལྟ་རེ་ཤོར་གི་འདུག།
མ་ཅང་ཀྲེ་ལའི་སྲང་ལམ་དོག་མོ་ན།
ཁ་ནས་བཤད་ན་གནམ་ས་ལག་ལ་ལེན།
ལག་ལ་བཞག་ན་མགོ་སྐོར་མགོ་གཡོག་རེད།
ནོར་གྱིས་བཅོམ་པའི་མྱི་གཤིས་འདི་ན་ཡོད།
རྡ་ས་ལྡི་ལས་བར་ན་གཞི་བདག་མང་།།
ཡར་ལ་སོང་ན་ཡར་ནས་ཐུག་རྒྱུ་མང་།།
མར་ལ་ཡོང་ན་མར་ནས་མཇལ་རྒྱུ་མང་།།
ནོམ་པ་རིག་ན་སྨྱོན་པ་འདི་ན་མང་།།
རེབ་མདའ་གཞི་བདག་གཞན་ལ་འགྲོ་འདོད་འདྲ།
རང་དོན་མ་འགྲུབ་ཡང་ཡང་ཡོང་དགོས་འདྲ།
གྲོགས་ཡེད་སྲུང་མ་འདི་ན་མང་པོ་མེད།
ཁེར་རྒྱུག་འདུར་རྒྱུག་བར་ནས་ཤི་རེ་བྱོས།།
ཕྱི་སྐྱོད་ལག་འཁྱེར་རྫུན་མ་བཟོ་ས་རེད། །
རྒྱ་ནག་ཉུལ་མ་སྣ་མང་འདུར་ས་རེད། །
མྰ་ཅང་ཤོག་པེ་བརྒྱན་འཇོག་བྱེད་ས་རེད།།
མན་ཇི་ཀྲི་ལིར་ཇག་པའི་བསྟི་གནས་རེད། །