མ་ཇུ་ཊི་ལའི་མིང་ཐོགས་ཚུལ།

རིག་པའི་གུར་ཁང་།

 
དེ་རིང་རྒྱ་གར་རྒྱལ་ས་དིལླིར་བསླེབས་སོང་། རྒྱུན་གཏན་བཞིན་བོད་པའི་གཞི་སྒར་དུ་མགྲོན་ཁང་ཞིག་གླས་ནས་བསྡད། དེ་རིང་ཞོགས་པ་ལས་རོགས་དང་ལྷན་དུ་གཞི་སྒར་ནས་མར་ཐོན་ནས་འགྲོ་སྐབས། ཧོབ་ཏེ་རོགས་པས་ས་ཁུལ་འདིའི་མིང་ཇི་ལྟར་ཐོག་ཡོད་པ་ཤེས་སམ་ཞེས་དྲིས་བྱུང་། མི་ཤེས་ཞེས་བརྗོད་ཡིན། ང་རང་ལ་ཆ་མཚོན་ན་ས་ཆ་འདི་ནི་ལོ་བཅུ་ཕྲག་གཅིག་དང་ཕྱེད་ལྷག་གོང་ཆེས་ཐོག་མར་བོད་མིའི་སྐྱབས་བཅོལ་གནས་ལེན་ཁང་དུ་ཞག་སྡོད་བྱས་པ་ནས་བཟུང། འདས་པའི་ལོ་ཟླའི་ནང་ས་ཆ་འདི་བརྒྱུད་ནས་ཡར་འགྲོ་མར་འགྲོ་ཐེངས་མང་བྱས་མྱུང་མོད་ཀྱང། ད་བར་ས་ཆ་འདིའི་མིང་གི་སྐོར་རྒྱུས་ལེན་གང་ཡང་མ་བྱས།

དེ་རིང་ལས་རོགས་ཁོང་གིས་འདི་ལྟར་གསུངས་བྱུང་། ད་ཡོད་ཀྱི་སེག་ཆོས་ལུགས་ཀྱི་མཆོད་ཁང་ཡོད་སར་སྔོན་ས་སྤོ་ཞིག་ཡོད་པ་དང་། དེར་མ་ཇ་ནུ་ཞེས་པའི་གྲུ་བ་ཞིག་གནས་སྡོད་བྱེད་ཅིང་། ཁོང་ནི་དཀོན་མཆོག་གི་ཞབས་ཞུ་བསྒྲུབས་སླད་དུས་རྟག་ཏུ་ཆུ་མོ་ཡ་མུ་ནར་མི་རྣམས་ཕར་ཚུར་སྒྲོལ་རོགས་བྱེད་མཁན་ཞིག་ཡིན་ཞིང། སྐབས་ཤིག་ཁུལ་འདིར་སེག་ཆོས་ལུགས་ཀྱི་བླ་མ་གནས་ངེས་མེད་བ་གུ་རུ་ནཱ་ནག་བྱོན་པས་གྲུ་བ་མ་ཇ་ནུས་གུ་རུ་ཆུ་ཕར་རོལ་ཏུ་ཕེབས་བསྒྲོལ་ཞུས་པས། གུ་རུས་གྲུ་བར་ཁྱེད་ཀྱི་མིང་རྟག་ཏུ་གྲགས་པར་འགྱུར་རོ་ཞེས་གསུངས་པ་རེད་ཅེས་དང་། ས་ཁུལ་འདིའི་མིང་ལ་མ་ཇ་ནུ་ཀ་ཊི་ལ་(Majnu ka Tila)སྟེ་མ་ཇ་ནུའི་ས་སྤོ་ཞེས་པའམ་མ་ཇ་ནུའི་ཁང་པ་ཞེས་པའི་བྱེ་བྲག་མིང་ས་ཁུལ་སྤྱི་ལ་ཐོག་པ་རེད་ཟེེར།

དེང་སང་བོད་པའི་ངག་བརྗོད་ལས་མ་ཇུ་ཊི་ལའམ་བསྡུས་མིང་ཨམ་ཊི་ཞེས་འབོད། ཁོང་གི་གསུངས་པ་དེ་དངོས་འབྱུང་ལ་གནས་མིན་རྩད་དཔྱོད་ཕྲ་བུ་བགྱིས་པས་ཝི་ཀི་རིག་མཛོད་དུ་འདི་ལྟར་གསལ། དེ་ཡང་མ་ཇ་ནུ་ཞེས་པ་ནི་དི་ལླི་ཁུལ་འདི་ཁ་ཆེའི་རྒྱལ་པོའི་དབང་བསྒྱུར་དུས་སྐབས་(1489–1517)སུ་ཨི་རན་རྒྱལ་ཁབ་ནས་ཡིན་པའི་སུ་ཕི་ཆོས་བྱེད་ཀྱི་རྣལ་འབྱོར་བ་ཞིག་ཡིན་འདུག་ཅིང། ཁོང་གི་མཚན་ལ་ཨབ་དུ་ལཱ་ཡིན་མོད་ཀྱང། མི་རྣམས་ཀྱིས་ཁོང་གི་མིང་འདོགས་ལ་མ་ཇ་ནུ་ཞེས་འབོད་པ་གྲགས། མིང་དེ་ནི་བརྩེ་དུང་གི་སྒྲུང་གཏམ་གྲགས་ཅན་ནང་དགའ་པོའི་མིང་དུ་བཀོལ་ཞིང་བརྩེ་དུང་གི་སྨྱོན་པ་ཞེས་པ་རེད་འདུག སེག་ཆོས་ལུགས་ཀྱི་བླ་མ་གུ་རུ་ནཱ་ནག་ཕྱི་ལོ་༡༥༠༥ ཟླ་༠༦ ཚེས་༢༠ ཉིན་ས་ཁུལ་འདིར་ཕེབས་པ་མ་ཟད། ཟླ་འདིའི་ཟླ་མཇུག་བར་བཞུགས། ཕྱིས་སུ་སེག་ཆོས་ཀྱི་རྗེས་འཇུག་པ་དམག་དཔོན་བྷ་ཧིལ་སིང་ཞེས་པས་བླ་མའི་བཞུགས་གནས་རྗེས་དྲན་སླད་མ་ཇ་ནུ་ཀ་ཊི་ལ་ཞེས་གྲུ་བའི་མིང་ཐོག་ནས་སེག་ཆོས་ལུགས་ཀྱི་མཆོད་ཁང་བཞེངས། དུས་རབས་བཅུ་དགུའི་ནང་སེག་རྒྱལ་པོ་རན་ཇིཏ་སིང་གི་ས་ཆ་རྒྱ་ཆེན་ཞལ་འདེབས་ཚུལ་དུ་ཕུལ་པ་གྲགས།

བོད་ལ་དུས་འགྱུར་བྱུང་རྗེས་ཕྱི་ལོ་༡༩༥༩ དང་༡༩༦༠ རེ་གྲངས་ནང་བོད་མི་སྐྱབས་པ་ཚོས་ཐོག་མར་ཆུ་མོ་ཡ་མུ་ནའི་གཡས་གཡོན་ལམ་ཟུར་དུ་སྡོད་སྒར་བཙུགས་ནས་འཚོ་བ་རོལ་འགོ་བརྩམས་ཤིང། ཕྱི་ལོ་༡༩༩༠༦ལོར་རྒྱ་གར་དབུས་གཞུང་ནས་སྡོད་གནས་ཀྱི་ཆོག་མཆན་གནས་བབ་རག་ཀྱང། ཕྱི་ལོ་༢༠༠༦ལོར་གཞུང་ལམ་རྒྱ་སྐྱེད་དང་རྒྱུགས་ཆུ་གཙང་བཟོའི་ལས་འཆར་འོག་གཞི་སྒར་རྩ་གཏོར་བྱེད་རྒྱུ་ཡིན་པ་གྲགས། ཕྱི་ལོ་༢༠༡༢ལོར་དབུས་ཁྲིམས་ཁང་ནས་སྔོན་གྱི་གནས་བབ་བསྐྱར་བཟོ་བྱས། ཕྱི་ལོ་༢༠༡༣ལོར་གཞི་ནས་སྐྱབས་བཅོལ་གཞི་སྒར་གྱི་ཁོངས་ཐོ་ནང་བཅུག དེང་སྐབས་ས་ཁུལ་འདིའི་མིང་བོས་པ་ཙམ་གྱིས་བོད་པའི་གཞི་སྒར་ཡིན་པ་ཤེས་པ་མ་ཟད། གཞི་སྒར་འདི་ནི་སྐྱབས་བཅོལ་བོད་མིའི་གཞི་སྒར་གཞན་དང་མི་འདྲ་བར། བོད་པའི་ཡུལ་གྱར་བ་ཕྱོགས་ཀུན་ནས་འདུ་འཛོམས་བྱེད་སའི་བབ་ཚུགས་ལྟ་བུ་ཞིག་ཡིན།

མ་ཇུ་ཊི་ལར་མི་རེ་ལ་གཏམ་རྒྱུད་རེ་ཡོད་ཅིང། གཏམ་རྒྱུད་རེའི་རྒྱབ་ན་དགའ་སྐྱོ་རེ་ཡོད། ད་ཆ་ས་ཆའི་མིང་བོད་པར་གོ་བའི་འགྱུར་གྲོས་ནང་མིང་དོན་ལའང་འགྱུར་བ་ཕྱིན་ཡོད། སྔོན་ཆད་སུ་ཕིའི་ཆོས་བྱེད་རྣལ་འབྱོར་བ་གྲུ་བ་ཞིག་གི་མིང་གྲགས་མོད་ཀྱང། དེང་གི་ཆར་གནས་འདི་ན་བརྩེ་དུང་གི་སྨྱོན་པ་ཙམ་མིན་པར། དངུལ་གྱི་སྨྱོན་པ་དང། ཆགས་པའི་སྨྱོན་པ་དང། ཚུལ་ཆོས་ཀྱི་སྨྱོན་པ་དང། དགའ་སྐྱོ་ཆགས་སྡང་གི་སྨྱོན་པ་སྣ་ཚོགས་པ་ཞིག་གཅིག་ལས་གཅིག་བྲེལ་གྱི་སྲང་ལམ་སེང་སེང་ཡོད་ཚད་ནས་ཡར་ཐོན་ཞིང། མར་འཛུལ་འགྲོ་བའི་ལྟད་མོ་བལྟ་བས་མི་ངོམས་སོ།། །།

ཕྱི་ལོ་༢༠༡༥ཟླ་༠༥ཚེས་༢༢ཉིན་ཨ་མ་མགྲོན་ཁང་དུ་བྲིས།