ཨ་འདུས་པས།
སང་ཉིན་ཁྱོད་རང་ཇི་ལྟར་བྲེལ་ནའང་།
འཁྲུངས་སྟོན་བསུ་རྒྱུ་མ་བརྗེད། བོད་པ་ཚོ།
རང་ལ་ནོར་བུ་ཡོད་པ་ཤེས་བཞིན་དུ།
གང་སར་གཡམ་རྒྱུག་མ་བྱེད། བོད་པ་ཚོ།
བླ་མེད་དབུ་ཁྲིད་ཡིན་པ་ཤེས་བྱས་ཏེ།
ཁ་ལེན་ཚིག་རྩི་མ་བརྗེད། བོད་པ་ཚོ།
གངས་སེང་དཀར་མོ་སྐུ་ན་ཇེ་བགྲེས་རེད།
གངས་རིའི་ལོ་རྒྱུས་མ་བརྗེད། བོད་པ་ཚོ།
དབུ་སྐྲའི་རང་མདངས་ཉིན་རེར་ཇེ་དཀར་རེད།
ཐུགས་ཀྱི་རེ་བ་མ་བརྗེད། བོད་པ་ཚོ།
དྲིན་ཅན་བླ་མའི་བྱམས་བརྩེ་ཀུན་ལ་ཁྱབ།
སྙིང་རྗེ་ཕྱོགས་སུ་མ་ལྷུང་། བོད་པ་ཚོ།
གཡག་དང་གངས་རིར་རྒྱང་དུ་བཀྱེད་ནའང་།
རིགས་ཀྱི་འདུ་ཤེས་མ་བརྗེད། བོད་པ་ཚོ།
མི་ཡུལ་ལུང་པར་རང་དབང་ཆེ་ནའང་།
ས་མཐའི་མགྲོན་པོ་ཡིན་ནོ། ། བོད་པ་ཚོ།
གཞན་གྱི་སྐད་ཡིག་ཤེས་པ་བཟང་ནའང་།
བོད་ཡིག་བརྗེད་ཀི་མ་འཇུག བོད་པ་ཚོ།
སྡོད་སའི་གནས་ལ་ཁྱད་པར་མེད་ནའང་།
ཀུན་ལ་ཕྱི་ཐག་རིང་དགོས། བོད་པ་ཚོ།
འགྲོགས་པའི་མི་ལ་ཤར་ནུབ་ཁྱད་མེད་ཀྱང་།
ཕུ་ནུའི་དུང་བ་མ་བརྗེད། བོད་པ་ཚོ།
བླ་མ་བཟང་པོའི་སྐྱབས་འོག་ཚུད་པ་ལ།
དད་དམ་གཙང་མ་དགོས་སོ། བོད་པ་ཚོ།
གྱེས་དུས་འགྱོད་ཀྱང་འཕྱི་བས་མི་ཕན་པས།
ཕྲད་ཚེ་རིན་ཐང་ལོངས་ཤིག བོད་པ་ཚོ།
སྤྱན་རས་གཟིགས་ཀྱི་བཀའ་དྲིན་དྲན་བཞིན་དུ།
ནམ་ཁོམ་མ་ཎི་ཐོན་ཅིག བོད་པ་ཚོ།
ཅེས་པའང་བླ་མ་བདག་ཉིད་ཆེན་པོ་གང་གི་སྐུའི་འཁྲུངས་སྟོན་བསུ་སླད་རང་དང་སྐལ་བ་མཉམ་པའི་གངས་ཅན་གྱི་གཞོན་ནུ་ཕོ་མོ་དག་ལ་ཨ་འདུས་པས་དྲན་སྐུལ་ཏུ་བྲིས་སོ། །