སྤྲུལ་སྐུ།
ཀ་ཡེ་སྙིང་སྡུག་གླིང་ཚའི་ཕོ་རྒོད་ལགས།།
ཁ་བའི་ལྷ་སྲས་ཞི་མོ་ཐར་མོ་མཚོ།།
ག་ཆད་ངང་ནས་ཨ་ཕར་འབོད་ཐེངས་རེས།།
ང་ཡི་གློ་སྙིང་སྟེང་འོག་བརྗེས་ཙམ་བྱུང་།།
ཅ་དག་དུང་སོ་བཅུ་ཡིས་ཞལ་བརྒྱན་ཏེ།།
ཆ་མེད་བཙོན་དུ་བཞུགས་པའི་ཕ་ལོར་ཅེར།།
ཇ་འོ་མངར་མོ་བཏུང་ནས་འགྲེ་ལྡོག་དང་།།
ཉྭ་བགྲོད་གོམ་གསུམ་མདུན་བསྐྱོད་བྱེད་འགོ་ཚུགས།།
ཏ་ལེར་འཚར་ལོངས་ངག་སྐྱོར་ཚིག་འཛིན་ངར།།
ཐ་ན་ར་ལུག་འབའ་སྒྲའི་སྐད་ཀྱང་ཤེས།།
ད་ལོར་འཛིན་རིམ་འགྲིམ་པས་སྤྲོ་སྣང་བལྟས།།
ན་ཚ་མེད་ཀྱང་གཤིས་ཀར་འགྱུར་ལྡོག་ཆེ།།
པ་འགོ་བལ་གཞུང་ཁྲིམས་ལུགས་མེད་དང་གཅིག །
ཕ་རྒན་གླིང་ཚར་ཁྲེལ་གཞུང་མེད་དང་གཉིས།།
བ་གླང་ལྟ་བུའི་བོད་རིགས་ཀླད་མེད་གསུམ།།
མ་རྒན་ང་ལ་ལན་ཆགས་གང་ནས་བྱུང་།།
ཙ་དར་མགོ་ལ་དཀྲིས་ནས་ཕྱིར་ཐོན་ཚེ།།
ཚ་མེད་ཟས་བཞིན་འཚོ་བའི་བྲོ་བ་ཡལ།།
ཛ་དྲག་བོད་མིའི་གནས་ཚུལ་མིག་མཐོང་ཚེ།།
ཝ་མོ་བརྒྱལ་བཞིན་ཡིད་སེམས་ལྐུགས་ནས་འགྲོ །
ཞྭ་གོས་ལྷམ་སོགས་གྲལ་འགྲིག་འཇིའུ་རིགས་ཚོར།།
ཟ་འཆག་དུས་བཞིར་བཟའ་ཚང་འབྲལ་བ་མེད།།
འ་ཅག་བྱེའུ་ཕྲུག་ཚང་ནས་ལུས་འདྲ་བས།།
ཡ་མཚན་གནས་སྟངས་འདི་ལ་སྐྱུག་རེ་བྲོ།།
ར་ལུག་རྫི་བོར་གོམས་པའི་འབྲོག་ཕྲུག་ཅིག །
ལ་གོར་ཚོང་འདུས་ཆེ་བའི་ཡུལ་ལྗོངས་ནས།།
ཤ་ཁྲག་རུས་གསུམ་སྨྱུག་མིང་རྒྱབ་ཁུར་ཏེ།།
ས་ལམ་རྐང་བགྲོད་བྱས་པར་སུས་གཟིགས་སམ།།
ཧ་ཅང་སྐྱིད་པའི་བཟའ་ཚང་མཐུན་པོ་ཞིག །
ཨ་ཁ་གློ་བུར་རྨི་ལམ་བཞིན་དུ་བོར།།
ཧ་དགོད་ཉི་མ་ཐུང་བའི་ལོ་ཟླའི་ཕྲེང་།།
ཨ་གསར་མིན་ཀྱང་ཡལ་བའི་ཚུལ་འདིས་སྐྱོ།།
ཞེས་༢༠༡༢/༡༡/༢༤ཉིན་ཨ་རི་ནས་བྲིས།
ཀ་ཡེ་ཀ་ཕྲེང་གླིང་ཚར་སྤྲིངས་པའི་ནང་། །
ཁ་བའི་ལྷ་སྲས་ཞི་བའི་ངོ་རྒོལ་པ། །
ག་ནས་བལྟས་ཀྱང་བཙན་བྱོལ་བོད་རིགས་ནང་། །
ང་ཡིས་བརྩི་འཇོག་དང་པོ་ཁྱོད་ཉིད་ལགས། །
ཀ་ཡེ་ཕ་རྒན་ཚེ་བརྟན་རྡོ་རྗེ་ལགས། །
ཁ་བའི་འཐབ་རྩོད་གནང་བ་ལེགས་མོད་ཀྱང་། །
ག་ལེར་ཞིབ་མོར་འདང་ཞིག་བརྒྱབ་བྱས་ཏེ། །
ང་ཚོ་མ་བུ་གསུམ་པོ་མ་བརྗེད་ཨང་། །
མ་བུ་མ་བརྗེད་གླིང་ཚ་ལགས། །
བ་དན་རྟག་ཏུ་ལག་བཟུང་བཞིན། །
ཕ་ཡུལ་རང་དབང་ཐོབ་ཕྱིར་འབད། །
པ་ཕ་གླིང་ཚར་འབེལ་གཏམ་ལགས། །
ཀ་ལྟར་འཁྱོག་མེད་བདེན་པའི་རྒྱབ་ཏུ་སྐྱོར།།
ཁ་བ་གདོང་དམར་བདེ་སྡུག་ཆེད་དུ་བརྩོན།།
ག་ཚོད་འཕྲང་ཀྱང་མི་ཞུམ་སྙིང་སྟོབས་ཅན།།
ང་ཡིས་དུང་བའི་དཔའ་བོ་གླིང་ཚ་ཁྱོད།།
ཨེ་ཇེབ་ཡུལ་ལ་འགྲོ་བའི་དུས།
ཨེ་ཟེལ་མ་བུའི་སྐྱིད་སྡུག་ཀློག
ཨེ་མ་གངས་ལྗོངས་ལྷ་སྲོང་རྣམས།
ཨེ་ཟིལ་མ་བུའི་ལས་ལ་ལྟོས།
ཞེས་ཨེ་ཇེབ་ལ་ཐོན་ལ་ཡོད་ཁར་ཝེ་ཡ་ནའི་གནམ་ཐང་ནས་བྲིས་བའོ་།