འབྲོང་མགོ་སྐམ་པོ། ཧྥ་རན་སི།
ཉེ་བའི་ལོ་འགའི་རིང་ནས་བོད་དོན་གྱི་གནས་བབ་ཛ་དྲག་ཏུ་གྱུར་དང་འགྱུར་བཞིན་པའི་སྒང་ཡིན་པ་ལྟར། མང་པོ་ཞིག་གིས་བོད་དོན་འཛམ་གླིང་རང་བཞིན་ཅན་དུ་གྱུར་དང་འགྱུར་མུས་ལ་བསམ་བློ་བཏང་ནས་རང་ཅག་ལ་རེ་བ་ཞིག་ཡོད་པར་སྙམ་གྱིན་ཡོད་མོད། སྤྱི་ཡོངས་ནས་བཤད་ན་ཛ་དྲག་ཏུ་གྱུར་དང་འགྱུར་བཞིན་པ་འདིར་ལྡོག་ཕྱོགས་ཀྱི་ནུས་པ་ཡང་ཐོན་གྱིན་ཡོད་དེ། དེ་ཡང་ལྷ་སའི་སེ་འབྲས་དགེ་གསུམ་ན་སློབ་གཉེར་བྱེད་བཞིན་པའི་ཕྱོགས་ཡོང་གྲྭ་བ་ཚང་མ་ཕྱིར་རང་གནས་སུ་ལོག་དགོས་པར་བྱུང་ཡོད་པས། བོད་ཀྱི་དགོན་སྡེའི་རིག་གནས་སློབ་གཉེར་གྱི་ནུས་པ་ཉམས་ཞན་དུ་གྱུར་ཡོད་ཅིང་། གྲོང་གསེབ་ས་ཁུལ་དུ་ཡང་རྒྱ་གཞུང་གིས་ཏང་ཡོན་བྱ་འགུལ་ཁང་ཞེས་པའི་ཁང་པ་བརྒྱབ་ནས་དེར་གཏན་སྡོད་ཀྱི་ལས་བྱེད་གོ་སྒྲིག་བྱས་ཏེ་གྲོང་པ་རེ་རེའི་བདེ་འཇགས་ལ་དོ་དམ་ནན་ཏན་བྱེད་ཀྱི་ཡོད།
ལྷག་པར་དུ་སྲིད་གཞུང་གི་སྡེ་ན་ལས་ཀ་གཉེར་བཞིན་པའི་བོད་མི་གནད་ཡོད་མང་པོ་ཞིག་གོ་ས་ལས་གཡུགས་པ་དང་། སློབ་གྲྭ་ཁག་ཏུ་ཡོད་པའི་སློབ་མའི་ཚོགས་སློབ་གྲྭའི་ཕྱི་ནང་དུ་གང་བྱུང་འགྲོ་མི་ཆོག་པ་བཟོས་ཁར་ཁྱིམ་བདག་རྣམས་ཀྱང་རང་གི་བྱིས་པར་ཐུག་འཕྲད་ཆེད་སློབ་གྲྭའི་ནང་འགྲོ་མི་ཆོག་པ་བཟོས། བདེ་འཇགས་སམ་ཁྲིམས་ཀྱི་སློབ་ཁྲིད་ཅིག་ཁ་སྣོན་བྱས་ཏེ་ཀླད་པ་བཀྲུ་བའི་སློབ་གསོ་ལ་སྔར་ལས་ཀྱང་ཤུགས་བསྣན་དེ་ལག་ལེན་དུ་བསྟར་གྱིན་ཡོད།
དེ་བས་ཀྱང་འཇིགས་སུ་རུང་བ་ནི་དེ་སྔ་ལྷ་སའི་ཕྱོགས་ནས་སྲིད་གཞུང་གི་ལས་ཀ་བྱས་མྱོང་བའི་མི་གདུག་རྩུབ་ཅན་རེ་འགའ་ཞིང་ཆེན་གཞན་དང་གཞན་དུ་ལས་བགོས་ཀྱིས་དེ་སྔ་ཅུང་གུ་ཡངས་ཡིན་པའི་ས་ཁུལ་མང་པོ་ཞིག་ཏུ་ཡ་ང་བའི་ཁྲིམས་ཇུས་ལག་བསྟར་བྱེད་ཀྱིན་ཡོད་པ་སོགས་ནི་བོད་དོན་ལས་འགུལ་བ་དག་གི་བསམ་ཡུལ་ལས་འདས་པའི་ལྡོག་ཕྱོགས་ཀྱི་ནུས་པ་རེད་མོད། ད་ལྟའི་བར་འདིའི་ཕྱོགས་སྨན་པའི་ལས་འགུལ་གང་ལྟར་རྩོམ་དགོས་པའང་ཤེས་ཀྱིན་མེད།
སྤྱི་ཡོངས་ནས་རྒྱ་ནག་སྲིད་གཞུང་གི་དམིགས་ཡུལ་ནི་༧གོང་ས་རིན་པོ་ཆེའི་སྐུ་ཚེའི་མཇུག་རྫོགས་ན་བོད་པ་ཚོའི་ནུས་པ་རང་ཤུགས་ཀྱིས་ཉམས་འགྲོ་བར་བསམ་ཡོད་པ་དང་། ༧གོང་ས་རེིན་པོ་ཆེས་སྲིད་ཕྱོགས་ནས་བགྲེས་ཡོལ་ཞུས་པ་བཙན་བྱོལ་བོད་གཞུང་གིས་མང་གཙོའི་ཁྱད་ཆོས་ཤིག་ཕྱིར་མངོན་པ་དང་། ༧གོང་ས་མཆོག་གི་བགྲེས་ཡོལ་ནི་དོན་གྱི་བགྲེས་ཡོལ་ཞིག་ཏུ་འགྱུར་ཐུབ་ཀྱིན་ཡོད་མེད་ནི་ད་དུང་ཡང་བཙན་བྱོལ་ཁྲོད་དང་ལྷག་པར་བོད་ནང་ནས་གསང་ལམ་བརྒྱུད་ནས་ཉན་ཐུབ་པའི་གསར་འགྱུར་རེ་འགའ་ལྟར་ན། ད་དུང་ཡང་བོད་མིའི་དབུ་ཁྲིད་༧གོང་ས་མཆོག་ཅེས་པ་འདི་བཀོལ་མཚམས་བཞག་མེད་པ་དང་། ༧གོང་ས་མཆོག་གིས་ཀྱང་སྤྱི་འཐུས་ཀརྨ་ཆོས་འཕེལ་གྱི་སྐོར་ལ་གསུངས་པའི་བཀའ་སློབ་ཀྱི་བབ་དང་བསྟུན་ཡོང་ན་དོན་གྱི་སྲིད་ཕྱོགས་ཀྱི་བགྲེས་ཡོལ་ཞིག་ཏུ་གྱུར་ཡོད་མེད་ཐེ་ཚོམ་ཟ་བའི་གཞི་རུ་གྱུར་ཡོད་པ་སོགས་བོད་ནང་གི་ཤེས་ཡོན་པ་མང་པོ་ཞིག་གི་བསམ་ཚུལ་ཤིན་ཏུ་མང་ན་ཡང་འདིར་རེ་རེ་བཞིན་འབྲི་བའི་དགོས་པ་མ་མཆིས་པས་བཞག བོད་དོན་བདེན་མཐའ་སེལ་བར་ཆེས་འཇིགས་སུ་རུང་བའི་གནད་དོན་ནི་ཕྱོགས་མང་པོ་ཞིག་དང་འབྲེལ་ཡོད་པ་ལས་བཙན་བྱོལ་བ་ཚོར་མཚོན་ན་འདི་དག་རེད་སྙམ་མོ།།
གཅིག ༡༩༩༠ ཡར་མར་དང་༢༠༠༠ ལོའི་ནང་བོད་ནས་སྐྱབས་བཅོལ་བའི་གྲངས་འབོར་མང་ཙམ་འབྱོར་སྐབས་སེམས་ཤུགས་ཧ་ཅང་ཆེ་བའི་གཞོན་སྐྱེས་མང་པོ་ཞིག་ལ་སྐྱབས་བཅོལ་ལག་འཁྱེར་སོགས་མེད་པར་བསྙད་ནས་གཞུང་གི་ལས་ཀ་གོ་སྒྲིག་མ་བྱས་པས། ཁོང་ཚོ་ཐབས་ཟད་འུ་ཐུག་གིས་ཕྱིར་ཕ་ཡུལ་དུ་ལོག་པ་དང་ཐབས་ལམ་འདྲ་མིན་ལ་བརྟེན་ནས་ཕྱི་རྒྱལ་ཡུལ་གྲུ་ཁག་ཏུ་ཁ་ཐོར་དུ་སོང་ཡོད།
གཉིས། རྒྱ་ནག་གིས་ས་མཚམས་བརྟན་སྲུང་གི་སྲིད་ཇུས་ཇེ་དམ་དུ་བཏང་ནས་སྐྱབས་བཅོལ་དུ་འགྲོ་ལམ་སྒོ་ཀུན་ནས་བཀག་པའི་གྲོགས་དན་ལྟ་བུར། ལངས་ཕྱོགས་མེད་པའི་རྒྱ་གར་དུ་གནས་སྡོད་སྐྱབས་བཅོལ་བོད་མི་མང་པོ་ཞིག་གིས་ལྡི་ལིའི་རྒྱ་ནག་གཞུང་ཚབ་ཁང་ནས་རྒྱ་ནག་གི་མི་སེར་གྱི་ངོ་བོའི་སྟེང་ནས་བོད་དུ་གཉེན་འཕྲད་དུ་ཡོང་བ་དང་མང་པོ་ཞིག་ཕྱིར་འགྲོར་མ་བཅུག་པའམ་འགྲོ་འདོད་མེད་པར་ལུས་ཡོད་པ།
གསུམ། བཙན་བྱོལ་བོད་གཞུང་གི་སྲིད་གཞུང་གསར་བས་རྔམ་རྔམ་རྫིག་རྫིག་གིས་འབེན་མེད་པར་མདའ་གང་སར་འཕེན་པ་ལས་བོད་དོན་བདེན་མཐའ་མ་གསལ་བར་དུ་བོད་རང་གི་རིག་གནས་དང་སྐད་ཡིག་ལ་གཅེས་སྐྱོང་༼ད་ལྟའི་སྲིད་གཞུང་གསར་བའི་བཀའ་ཁྲི་ནས་བཟུང་སྟེ་དབུ་ཁྲིད་མང་པོ་ཞིག་གི་བོད་ཡིག་གི་བྱང་ཚད་ཞན་པ་དེ་ནི་གཞིས་ལུས་རིགས་ཞེན་ཅན་དག་གི་སེམས་པ་སྐྱོ་གཞི་ཞིག་ཏུ་གྱུར་ཡོད། ལྷག་པར་དུ་སྤྱི་འཐུས་ལྷན་ཚོགས་སྐབས་མུ་མཐུད་བོད་ཡིག་སྦྱང་དགོས་མིན་སོགས་ལ་དགོས་པ་མེད་པའི་བགྲོ་གླེང་སོགས་བྱུང་བར་ཤིན་ཏུ་ནས་བློ་ཕམ་སྐྱེས་ཡོད་པ་རེད།༽དང་། བཙན་བྱོལ་བའི་ངོ་བོ་བརྟན་སྲུང་། བཙན་བྱོལ་བའི་འཚོ་གནས་ཐག་གཅོད། བཙན་བྱོལ་ཁྲོད་ཀྱི་ཤེས་ཡོན་པ་བདག་མེད་དུ་ལུས་པ། བཙན་བྱོལ་ཁྲོད་ཀྱི་སློབ་མར་སློབ་སྦྱོང་མཁོ་སྤྲོད་བྱེད་པ་སོགས་ལ་དོ་སྣང་གིས་འདང་གིན་མེད་པ།
བཞི། ནུབ་ཕྱོགས་སུ་ཕྱིན་པའི་བོད་མི་དག་གིས་སྐབས་རེ་འམ་ལན་རེར་སྐད་འབོད་ཙམ་བྱེད་པ་ལས་བོད་རང་གི་ངོ་བོའི་སྟེང་ནས་ལས་ཀ་གང་ཡང་བྱེད་ཐུབ་ཀྱི་མེད་ལ། བོད་ཀྱི་ཆོས་དང་རིག་གཞུང་ཐད་སེམས་ཁུར་དང་ལས་ཀ་བྱེད་རྒྱུ་ཅམ་འཇོག་མི་བྱེད་རང་བྱེད་དུ་གྱུར་ཡོད།
མདོར་བསྡུས་ན་ཁོང་ཚོའི་ཁྲོད་ཀྱི་མི་མང་པོ་ཞིག་གིས་ཕྱིར་བོད་ནང་དུ་གཉེན་འཕྲད་སོགས་ལ་འགྲོ་སྐབས་རྒྱ་ནག་དོན་གཅོད་ཀྱིས་ཆོག་མཆན་མི་ཐོབ་པར་སྐྲག་ནས་ཆབ་སྲིད་ཀྱི་ལས་འགུལ་གང་གི་ཁྲོད་དུ་ཡང་ཞུགས་ཐུབ་ཀྱི་མེད་པས་རང་དབང་ལུང་པ་ནའང་ཁོང་ཚོའི་རང་དབང་རྒྱ་ནག་གིས་འཕྲོག་ནས་ཡོད་པ།
ལྔ། རྒྱ་ནག་སྲིད་གཞུང་ཆེས་སྐྲག་ཡུལ་དུ་གྱུར་པའི་བོད་ཀྱི་གཞོན་ནུ་ལྷན་ཚོགས་ཀྱིས་ཀྱང་ཞལ་འདེབས་བསྡུ་སློང་དང་འབྲེལ་བའི་ལྐོག་ཟ་རུལ་སུངས་དང་། ནང་ཁུལ་རྙོག་སློང་གིས་ཚོགས་པའི་ངོ་བོ་དང་ལངས་ཕྱོགས་བརྟན་སྲུང་བྱེད་ཐུབ་མེད་ཁར། ཁོང་ཚོའི་ནང་ཁུལ་གྱི་རྙོག་སློང་གིས་རྒྱ་ནག་སྲིད་གཞུང་གི་འདོད་དོན་སྒྲུབ་ཀྱིན་པ་དེ་རེད།
དྲུག མང་ཚོའི་ཀ་བའི་ཡ་གྱལ་སྟེ་བཙན་བྱོལ་ཁྲོད་ཀྱི་གསར་འགོད་པ་ཚོར་ཤེས་ཡོན་དང་བསམ་བློ། སྐད་གདངས་དང་འཇོན་ནུས་དེ་ཙམ་མེད་སྟབས་གསར་འགྱུར་གྱིས་གཞན་ཡིད་འགུག་པའི་ནུས་པ་དབེན་པ། ལྷག་པར་དུ་ནུབ་ཕྱོགས་སུ་གནས་སྡོད་གསར་འགོད་པ་དག་གི་ལས་ཀ་ནི་ཞོར་ལས་ཀྱི་ངོ་བོ་ལྟ་བུར་ཡོད་པའི་ཚོར་སྣང་རིམ་ཅན་དུ་ཡོང་གི་འདུག་པ་མ་ཟད། ཁོང་ཚོས་བོད་ནང་གི་གསར་འགྱུར་གང་ཞིག་རེག་མཚམས་མགོ་མཇུག་གང་ལ་ཡང་བསམ་བློ་མི་གཏོང་བར་བསྒྲགས་རྗེས། གསར་འགྱུར་མཁོ་སྤྲོད་པ་སོགས་བཙོན་དུ་ཚུད་པ་ཤིན་ཏུ་མང་ཞིང་། སླད་མར་ཕྱི་ཕྱོགས་སུ་གསར་འགྱུར་མཁོ་གཏོང་བྱེད་མཁན་ཡང་ཇེ་ཉུང་དུ་འགྲོ་ངེས་པ།
བདུན། ད་ལྟའི་བར་དུ་དབུ་མའི་ལམ་ཞེས་སྐད་བརྒྱབ་བརྒྱབ་ནས་ད་ལྟའི་བར་དུ་འགོར་ན་ཡང་། བོད་མི་ཡོངས་ཕར་ཟད། བཙན་བྱོལ་བོད་གཞུང་གི་ལས་ཀ་བྱེད་མཁན་དག་ཀྱང་དབུ་མའི་ལམ་ལ་ཤར་སྐྱོད་བྱེད་ཐུབ་ཀྱི་མེད་པ་བཅས་ནི་ད་ལྟ་གཞིས་བཞུགས་བོད་མི་ཡོངས་ཀྱི་རེ་ལྟོས་ཉག་གཅིག་སྟེ། སྐྱབས་བཅོལ་བོད་མིའི་གཞུང་གི་མ་འོངས་པའི་ཉེན་ཁ་དང་ད་ལྟའི་གནད་དོན་འབའ་ཞིག་རེད་བསམ་མོ།།
གསལ་བཤད། གུས་པ་ནི་ལོ་ངོ་གཅིག་རིང་བོད་ནང་ནས་ཡོ་རོབ་ཏུ་སློབ་སྦྱོང་ལ་ཡོང་བའི་བོད་རིགས་ཤིག་ཡིན་སྟབས། རང་དབང་གི་འཚོ་བ་རོལ་ནས་ཟླ་ཤས་ལས་སོང་མེད་ན་ཡང་། དེ་སྔ་ནས་བོད་པའི་སྐད་ཡིག་རིག་གནས་དང་བཅས་པའི་གནད་དོན་མང་པོ་ཞིག་གི་ཐད་དོ་སྣང་བྱེད་མཁན་ཞིག་ཡིན་པའི་ངོས་དང་། བཙལ་བྱོལ་སྤྱི་ཚོགས་ཀྱི་གནས་བབ་དང་འགྱུར་ལྡོག་ལ་ཉམས་ཞིབ་བྱེད་མཁན་ཞིག་ཡིན་པའི་ཆ་ནས་འདིར་གནས་ཚུལ་མདོར་བསྡུས་འདི་ཞུས་པ་འདི་ལྟར་ན་ཡང་། འདིའི་ཁྲོད་གོ་འཛོལ་དུ་སོང་བ་ཅི་རིགས་ཡོད་ན་དགོངས་འགལ་མེད་པར་ཞུ་རྒྱུ་ཡིན་ནོ།།
མགོ་སྐམ་གྱི་སྐད་ཆ་ཡང་སྐམ་པོ་རང་རེད་འདུག སྐད་ཆ་ཡག་པོ་གཅིག་ཀྱང་བཤད་ཡ་མི་འདུག
རེད་་ཡ།
ཁྱོད་ཀྱི་ཤེས་དགོས་པ་ཚང་མ་ཤེས་ཡོད་འདུག
ཚང་མ་ཐག་བཅད་ནས་བཤད་འདུག
ངས་བལྟས་ན་ཁྱོད་ཀྱིས་ཤེས་ཡ་མང་དྲག་སོང་།་ཧ་ཧ་
དཔེ་་ཡག་གསུང་འདུག་་་ཐུགས རྗེས་གནང་་་་་་་
ཁོང་ལྟ་བུའི་སྐད་ཆ་དོན་གནད་ཡོད་པ་ཞིག་གསུང་མཁན་ནི་ཕྱི་སྡོད་བོད་མི་ནང་ལ་ཉིན་མོའི་སྐར་མ་ཙམ་དུ་འོ། ཁོང་ལྟ་བུའི་ཕྱི་སྡོད་བོད་རིགས་དེ་ཚོས་བོད་ནང་གི་བོད་མི་དཀའ་སྡུག་འཕྲད་མཁན་དེ་ཚོ་ལ་་ཁ་ཞེ་གཉིས་མེད་ཀྱིས་ལྷག་བསམས་རྣམ་དག་གིས་ལང་ཕྱོགས་ཞིག་འཛིན་པར་ཤིན་ཏུ་ནས་གལ་ཆེ་འོ།
ཕྱོགས་གཉིས་ཀ་ལ་གསལ་ཆ་ཅུང་འདུག་པས་ཡག་པོ་རེད། གང་ལྟར་ཕྱི་ནང་གཉིས་ནས་གླེང་སློང་བྱེད་དགོས་ཀྱི་འདུག
རི་བོང་གནས་རྡིབ་ཀྱི་སྔུག་བསྔལ་ཟེར་བ་འདི་འདྲ་ཞིག་ལ་གོ་དགོས་པ་རེད།
དོན་ལ་འདིས་བཙན་བྱོལ་པར་ཁ་གཏོང་བ་དང་སེམས་ཤུགས་ཆགས་ཐབས་བྱེད་ཀྱི་འདུག
ངའི་མཐོང་ཚུལ་ལ། འབྲོང་མགོའི་སྐད་ཆ་བརྒྱ་ཆ་བརྒྱ་ནས་དགུ་བཅུ་བདེན་པ་རེད།
སྐད་ཆ་དེ་ཚོར་དཔྱད་གཞིའི་ས་བོན་མང་པོ་འདུག། བོད་ཕྱི་ནང་གཉིས་ཕྱོགས་ཀྱི་བསམ་ཚུལ་དང་གླེང་ཚུལ་བཅས་ཀྱིས་རྒྱན་འདུག། མིག་གཙུམས་ནས་རྒྱའི་འོག་ཏུ་བཙན་གྱིས་དེད་མཁན་ཚོའི་རྣ་ལ་སྐད་ཆ་འདི་འགྲོ་མི་སྲིད།
སྐད་ཆ་་གནད་ལ་ཕིགས་པོ་རང་རེད་ཞག
ངའི་ལྟར་ན་འབྲོང་མགོ་སྐམ་པོ་རྫུན་བཤད་མཁན་ཅིག་རེད། ལྟ་གྲུབ་མི་གཙང་གི་བསམ་ནག་ཅིག་མིན་པ་འདྲ། མགོ་མོའུ་ཡི་ལག་པར་ཤོར་སོང་བ་འདྲ། བོད་ནང་གི་དཀའ་ངལ་མ་སེལ་ན་བཙན་བྱོལ་བ་ཡ་རབས་ཚོས་ཆོས་ཡོན་རེ་བླངས་ཏེ་འགུལ་བསྐྱོད་ལོས་བྱེད། བོད་ནང་གི་དཀའ་ངལ་སེལ་སོང་ན་གསར་འགྱུར་སྒྱུ་རྩལ་དང་གཏམ་བཤད་སྒྱུ་རྩལ་གྱི་ཁ་གསོ་དགོས་ན་བཙན་བྱོལ་བ་བཙན་བྱོལ་བ་མ་རེད། སྐྱིད་བྱོལ་བ་རེད།
འབྲོང་མགོ་སྐམ་པོའི་སྐད་ཆ་རྒྱ་ཆ་དགུ་བཅུ་བདེན་པ་རེད
དྲང་མོ་བཤད་ན་མྱི་མི་དགའ གཡུག་ཕྱེར་ན་ཁྱི་ལ་དགའ
སྤྱིར་འདྲ་ཆག་ཆག་ཅིག་བཤད་འདུག་ཀྱང་། འདིས་ནང་ལ་ཡང་ཆབ་སྲིད་ཀྱི་དྲི་མ་ངན་པ་ཞིག་ཁ་ཡོང་གི་འདུག དེས་ན་མཇུག་གི་གསལ་བཤད་དེ་ལ་དེ་ཙམ་ཡིད་ཆེས་མ་སོང་།
འབྲོང་མགོ་སྐམ་པོའི་ནང་ན་ཀླད་པ་ཞིག་གང་ན་ཡོད། ད་དུང་ཁྱོས་ལོ་ངོ་མི་ཉུང་བ་ཞིག་ལ་ཞིབ་འཇུག་བྱེད་དགོས་རྒྱུ་རེད། གོ་ལོ་ཐེས་ལོ་ལ་ཞིབ་འཇུག་མི་ཟེར།
རྒྱ་གར་ནས་འཚོ་རྟེན་མ་རག་པར་བོད་དུ་ལོག་ཡོད་པ་བདེན་ཡང་། ཆབ་སྲིད་ཀྱི་ལྟ་གྲུབ་ལ་རེ་ལྟས་ཆད་ནས་བོད་ལ་ལོག་པ་ནི་གཅིག་ལ་མེད་ཟེར་ན་ཡང་བཤད་ཆོག་པ་ཞིག་ཡིན།
ཡོ་རོབ་དང་ཕྱི་གླིང་ཁག་གི་བོད་མིས་ཕ་ཡུལ་ལ་འགྲོ་འདོད་ཀྱིས་རྒྱ་དམར་ལ་ངོ་རྒོད་བྱེད་པར་སྐྲག་པ་ནི་བདེན་པ་མིན། མིག་ལ་ཤལ་ནག་དང་ཁ་ལ་ཁ་ཡོལ་བརྒྱབས་ནས་བློ་ཐབས་སྤྱང་པོའི་སྒོ་ནས་རྒྱ་ནག་གི་སྐྱོན་མཚང་ལ་ངོ་རྒོད་ཡང་ཡང་བྱེད་བཞིན་ཡོད་པ་རེད། སྐད་རྒྱག་རྒྱུ་དེ་གཙོ་ཡིན་པ་ལས་རྒྱ་ནག་གི་གསང་བའི་པར་མདུན་ནས་རྒྱ་ལ་ངོ་རྟགས་མི་སྤྲོད་པ་ནི་བློ་ཐབས་ཡིན་པ་དང་ཕ་ཡུལ་ལ་ཡང་སྐྱོད་ཐུབ་པའི་རང་སྲུང་ཙམ་རེད།
རྒྱ་ནག་ལྟ་བའི་དམར་པོའི་མེ་མདའ་ཅན་གྱི་འོག་ཙམ་ལས་གཞན་ཡུལ་ལུང་གང་ན་ཡང་ཆབ་སྲིད་ལྟ་བ་གཅིག་ལ་ཤར་སྐྱོད་བྱེད་པའི་མི་རིགས་ཞིག་ནམ་ཡང་ཡོད་མི་སྲིད།
བཙན་བྱོལ་ཁྲོད་ན་ཤེས་ཡོན་ཅན་ཡོད་རུང་མེད་རུང་། ཡོད་ཚོད་ཀྱིས་ལས་ཀ་ག་འདྲ་ཞིག་ཡིན་ཡང་། ལས་མཚམས་དང་ལས་སྒོ་བརྒྱབས་པའི་ཉིན་མ་གཅིག་ལ་ཡང་ཡོད་པ་མ་རེད། ཡོན་ཏན་གྱིས་མ་འདང་བ་དང་ཐུབ་པའི་བྱ་ཡོད་ཡང་། དེ་ནི་མི་རིགས་ཞིག་གི་ཀླད་པའི་ཤེས་རྩལ་ལ་རག་ཡོད་པ་ལས་གཞན་ཁག་འཇོག་ས་གང་ན་ཡོད་པ་རེད། སྤྱང་པོ་མེད་པ་ཡིན་ན། བཙན་གྱིས་སྤྱང་པོར་བཟོ་མི་ཐུབ།
སྐྱབས་བཅོལ་བ་མང་པོ་སླེབས་ཐུབ་དང་མི་ཐུབ་ཀྱིས་བོད་རྒྱའི་ས་མཚམས་ཆུ་མཚམས་ཀྱི་དབྱེ་བ་ལ་ཕན་འབྲས་དེ་ཙམ་ཡོད་མདོག་ཁ་བོ་མ་རེད། དེ་ནི་ཕྱོགས་གཉིས་ཀྱི་དགོས་མདུན་དང་ཆབ་སྲིད་ལང་ཕྱོགས་ཀྱིས་ཐག་གི་གཅོད་པ་ལས་གཞན་གང་ཡང་མིན།
བོད་ནང་ན་སྡུག་པོ་ཅི་ཙམ་ཡོད་པ་དེ་ཙམ་ཀྱིས་བོད་མིས་རང་ངོ་ཤེས་བ་དང་། རང་དགྲ་སུ་ཡིན་གྱི་ངོ་སྤྲོད་དང་། རང་བོད་རིགས་ཡིན་པའི་ལྟ་བ་དང་འདུ་ཤེས་གོང་མཐོར་ཕྱིན་ནས་ཉིན་ཞིག། རྒྱ་བོད་གཉིས་མཉམ་གནས་མི་ཡོང་པའི་དཔའ་རྟགས་འཇོག་པ་ལ་ཕན།
གཞོན་ནི་ཚོགས་པ་མྱི་རྡོག་ཁ་ཤས་ཞིག་གི་ཡིན་ནི་མ་རེད། རུལ་སུངས་བ་ནི་མྱི་འགའ་རེད། དེ་ལ་དག་ཐར་བྱས་ཆོག་པ་ཞིག་རེད།
བཙན་བྱོལ་བ་ཚོ་དམུར་བ་ལས། རྒྱ་འདྲེ་ཚང་ལ་ཁ་གཏད་ཀྱི་མཆུ་ཁ་སྐོར་ན་གང་འདྲ་ཡོང་། ཨ་མའི་བུ། རྒྱ་ངོ་ཤེས་ནི་ཞིག་དང་། སློབ་སྦྱོང་ཡོད་ནི་ཞིག་ཡིན་མདོག་རེད། བོད་ཀྱི་བདེ་སྡུག་ནི་མ་བགོས་མཐུན་མོང་རེད། ངར་བ་ཡོད་ན་ཐོན་ཤོག།
མ་ཐུབ་པའི་བྱ་བ་ཡོད་ཀྱང་ལ་བཅོས།
ངོ་མ་རེད། ཕྱོགས་ཡོངས་ནས་བསམ་གཞིགས་བྱེད་དགོས་པ་གལ་ཆེན་པོ་རེད། བཙན་བྱོལ་བོད་པ་ཚོའི་མ་འོངས་པའི་གནས་སྟངས་ཐད་བློ་འཚབ་འབྱུང་རྐྱེན་མང་པོ་ཞིག་བསླེབས་འོང་བ་ཁག་མི་འདུག །གསར་དུ་འཚར་ལོངས་འབྱུང་བཞིན་པའི་གཞོན་སྐྱེས་ཚོའི་སེམས་ནང་ལ་ཕྱི་རྒྱལ་གྱི་རིག་གཞུང་གི་བག་ཆགས་མཐུག་པ་དང་བོད་པའི་རིག་གཞུང་གི་བག་ཆགས་ཞན་པ་དང་། སྒེར་དོན་གཙོ་བོ་འཛིན་པ་དང་སྤྱི་དོན་ཞར་བྱུང་དང་། དོན་དུ་མི་རིགས་ཀྱི་འདུ་ཤེས་བརྟན་པོ་ཞིག་ཡོད་དང་མེད། རང་གི་སྐད་ཡིག་དང་རིག་གཞུང་ལ་དོ་སྣང་ཡོད་མེད་ཅེས་མ་དྲིས་ཀྱང་རང་ཤུགས་་ཀྱིས་ཤེས་འོང་བ་འདུག །འདི་དག་ནི་འབྱུང་འགྱུར་ལ་སེམས་འཚབ་བྱེད་དགོས་པའི་གནད་དོན་གཙོ་བོ་ཞིག་རེད་བསམ་གི་འདུག །