ངོམས་པ་ལྡོང་ཚང་།
སྤྱི་ལོ་༢༠༡༣ ཟླ་༡༡ ཚེས་༡༠ ཉིན་ང་རང་གཅིག་པུར་ལས་དོན་ཞིག་གི་ཆེད་དུ་དགོང་མོ་ཆུ་ཚོད་བཞི་པའི་ཐོག་ཏུ་མ་སུ་རིར་སྤྱི་སྤྱོད་རླངས་འཁོར་ནང་དུ་བསྡད་ནས་ཕྱིན་པ་དང་། ཞོགས་པ་ཆུ་ཚོད་དྲུག་པའི་ཐོག་ཏུ་རྒྱ་གར་བྱང་ཕྱོགས་ཨུཏཱར་ཁཱནཌ་མངའ་སྡེའི་ལྡེ་ར་ལྡུན་གྲོང་ཁྱེར་གྱི་མ་སུ་རིའི་སྤྱི་སྤྱོད་རླངས་འཁོར་འབབ་ཚུགས་འབྱོར་བ་དང་འབྲེལ་མ་སུ་རིར་འགྲོ་མཁན་སྤྱི་སྤྱོད་རླངས་འཁོར་ཞིག་འགྲོ་གྲབ་བྱས་ནས་བསྡད་འདུག་ཅིང་། ཆུ་ཚོད་བདུན་དང་ཕྱེད་ཀ་ཟིན་པ་དང་སྤྱི་སྤྱོད་རླངས་འཁོར་འགྲོ་མགོ་བཙུགས་སོང་། སྤྱི་སྤྱོད་རླངས་འཁོར་གྱི་འཁོར་གླ་ཧིན་སྒོར་ལྔ་བཅུ་ང་གཅིག་རེད་འདུག་ལ། གླ་འཁོར་ཆུང་བར་ཧིན་སྒོར་སུམ་བརྒྱ་ལྷག་ཙམ་རེད་འདུག་ཅིང་། ལམ་ཁ་ཀྱག་ཀྱོག་མང་ཞིང་། རི་ངོས་ས་གཙང་བ་དང་ཤིང་ནགས་སྟུག་པོའི་རི་བོ་སྟོད་སྨད་ཡོངས་སུ་གཡོག་ཅིང་། ལམ་ཁ་ཀྱག་ཀྱོག་མང་ནའང་གཞུང་ལམ་ཧ་ཅང་ཆེ་ཞིང་སྤུས་དག་པ་དང་། སྤྲོ་འཁྱམས་པ་གྲོ་ཚང་བརྡོལ་བ་ནང་བཞིན་ཚང་ཁ་ཤིག་ཤིག་གི་ཡར་མར་འགྲོ་མཁན་མང་བའི་སྤྱི་སྤྱོད་རླངས་འཁོར་དང་གླ་འཁོར་སོགས་མི་རགས་པའི་སེམས་ཁྲལ་རྩ་བ་ནས་མེད་པར་མངོན།
མ་སུ་རིའི་སྤྱི་སྤྱོད་རླངས་འཁོར་འབབ་ཚུགས་གཉིས་འདུག་ཅིང་། ང་ནི་དཔེ་མཛོད་ཁང་ཞེས་པའི་ས་དེར་འགྲོ་མཁན་སྤྱི་སྤྱོད་རླངས་འཁོར་ནང་དུ་ཡོང་། རིམ་གྱིས་མ་སུ་རིར་འབྱོར་བ་དང་སྤྱི་སྤྱོད་རླངས་འཁོར་ནས་འབབ་སྟེ་ཉེ་འབྲམ་ཟ་ཁང་ལ་ཕྱིན་ནས་བག་ནང་དུ་ཞོ་ཁོག་བཅུག་པ་བག་ལེབ་ཞིམ་པོ་ཞིག་དང་ཇ་མངར་མོ་དང་མཉམ་དུ་བཟས་ནས་བསྡད། ང་བསྡད་སའི་ཁ་ཐུག་སྒེ་ཁུང་ནས་ཕར་ཕྱོགས་ཀྱི་རི་བོ་རྩེ་མོའི་གངས་རི་རྣམས་མིག་མདུན་དུ་མཐོང་མ་ཐག་སྐྱིད་པའི་གངས་ལྗོངས་ཡིད་ལ་འཁོར་ཞིང་འདས་ཟིན་པའི་དགའ་སྡུག་གི་གནས་སྟངས་མང་པོ་ཞིག་བློས་ངོས་ལ་དབང་མེད་དུ་ཤར། ཞོགས་བཟས་ཚར་རྗེས་རིན་པ་རྩིས་བརྒྱབ་ནས་ཡར་ཙམ་ཕྱིན་པས་མ་སུ་རིའི་སློབ་གྲྭར་འགྲོ་མཁན་གླ་འཁོར་ཞིག་འདུག་པས། སློབ་གྲྭའི་འབྲམ་བར་ཕྱིན་ན་སྒོར་ལྔ་བཅུ་ཡིན་ཟེར་བས། བོད་མི་ཞིག་ཀྱང་འགྲོ་མཁན་འདུག་པས་ཁོ་རང་ལུང་པ་དེར་རྒྱུས་ཡོད་མཁན་ཞིག་ཡིན་པ་འདྲ་བས་འཁོར་གླ་དེ་རེད་ཟེར་ཞིང་། ངེད་གཉིས་ཀྱིས་སྒོར་ལྔ་བཅུ་རེ་རེ་སྤྲད་རྒྱུ་བྱས་ནས་ཡོང་།
དེ་ཉིན་མ་སུ་རིའི་བོད་ཁྱིམ་རྩེད་མོའི་དུས་ཆེན་གྱི་ཉིན་མོ་རེད་འདུག་ཅིང་། གཏན་ཉིད་སློབ་གྲྭའི་རྩེད་ཐང་ཆུང་ཆུང་ཞིག་འདུག་པས་དེར་བོད་ཕྲུག་ཁྱིམ་སྡེ་སློབ་ཕྲུག་རྣམས་རྩེད་མོའི་རུ་སྒྲིག་གིས་སློབ་སྤྱིས་གཙོས་དགེ་ལས་རྣམ་པ་དང་། སྐུ་མགྲོན་གཙོ་བོ་སོགས་ཟུར་གྱི་ཞབས་སྟེགས་ལ་འཁོད་གྲུབ་རྗེས་མཛད་སྒོའི་གཙོ་སྐྱོང་བས་དངོས་སུ་རྩེད་མོའི་དུས་ཆེན་གྱི་དབུ་ཚུགས་སོང་ལ། དེ་ཉིན་སྐུ་མགྲོན་གཙོ་བོ་རང་གཞུང་གི་ས་གནས་གཞིས་འགོ་དང་ས་གནས་གནད་ཡོད་མི་སྣ་ཁག་གཅིག་གདན་འདྲེན་ཞུས་འདུག་པ་དང་། རིམ་གྱིས་སྡེ་ཚན་སོ་སོའི་རུ་ཤོག་བསྒྲིགས་ནས་རུ་དར་དང་རོལ་ཆ་བཀྲོལ་བཞིན་རྩེད་མོ་འགྲན་བསྡུ་མགོ་བཙུགས་སོང་ལ། གཡས་གཡོན་ལ་གཟིགས་མོ་གཟིགས་མཁན་ཡང་སློབ་ཕྲུག་ལས་མི་མང་དེ་ཙམ་ཞིག་མ་མཐོང་ཞིང་། དེ་ཉིན་གྱི་སྐུ་མགྲོན་ནི་སློབ་གྲྭ་དེ་ནས་སློབ་མཐར་ཕྱིན་པས་གཞུང་ཞབས་ལས་བྱེད་ཅིག་རེད་འདུག་ཅིང་། དེ་རིང་དགེ་སློབ་ཡོངས་ལ་ཁ་མ་བསྐོར་ནས་གཏམ་བཤད་གནང་དུས་ང་རང་ལ་མཚོན་ན་དེ་ནི་ཤེས་ཡོན་ཐོག་ལ་འགྲུབ་འབྲས་གང་ལེགས་གསོན་པའི་དམིགས་དཔེ་ཡག་ཤོས་གཅིག་རེད་སྙམ་པའི་ཚོར་སྣང་ཞིག་ཀྱང་སྐྱེས་བྱུང་ལ། སོ་སོའི་སེམས་ནང་དགའ་ཚོར་ཞིག་ཀྱང་དབང་མེད་དུ་སྐྱེས་བྱུང་།
དེ་ནས་སྐུ་མགྲོན་མཆོག་ནས་རྩེད་མོའི་རྒྱལ་ཁ་ཐོབ་མཁན་རྣམས་ལ་རིམ་པས་བྱ་དགའ་གནང་སོང་ལ། དེ་ཚར་བ་དང་མཛད་སྒོ་གྲོལ་སོང་ཞིང་། ཕྱི་ཚེས་༡༢ ཞོགས་པ་སྔ་པོ་ལངས་ཏེ་ཞོགས་བཟས་ཚར་བ་བྱས་ཏེ་ཚོང་ཁང་ལ་ཅ་ལག་ཉོ་རུ་ཕྱིན་པ་དང་། སློབ་ཕྲུག་ཁ་ཤས་ཤིག་མདུན་ཅོག་དང་ཞབས་སྟེགས་སོགས་འཁུར་ནས་གྲ་སྒྲིག་བྱེད་བཞིན་པའི་སྒང་རེད་འདུག་ཅིང་། ངས་སློབ་ཕྲུག་ཁ་ཤས་ལ་དེ་རིང་ཞབས་སྟེགས་གང་བྱེད་ནས་འཁུར་གྱི་ཡོད་དམ་ཞེས་སྐད་ཆ་དྲིས་པ་དང་། སློབ་ཕྲུག་གཅིག་གིས་དེ་རིང་འཛིན་རིམ་བཅུ་གཅིག་དང་བཅུ་གཉིས་སློབ་ཕྲུག་ཚོ་སློབ་མཐར་ཕྱིན་ནས་ཐུགས་སྤྲོའི་གྲ་སྒྲིག་བྱེད་ཀྱི་ཡོད་ཟེར། ཉིན་གུང་ཡོལ་ཙམ་ལ་སྐད་ཆ་ཞིག་གོ་བ་ནི་སྐད་ཆ་དེ་ནི་ང་ཚོའི་སྤྱི་ཚོགས་ནང་དུ་མི་དགོས་པའི་སྐད་ཆ་ཞིག་རེད། སློབ་ཕྲུག་གི་ཐུགས་སྤྲོ་གཏང་སར་སྒྲིག་འཛུགས་ཚོགས་ཆུང་སླེབས་ནས་སློབ་ཕྲུག་དང་རྩོད་གླེང་གཅིག་བྱུང་མཐར། སློབ་ཕྲུག་ ༢༥༠ ལྷག་གིས་སློབ་གྲྭའི་འཛིན་སྐྱོང་ལ་ངོ་རྒོལ་གྱིས་མ་སུ་རི་ནས་བདེ་སྐྱིད་གླིང་བར་ཞི་བའི་གོམ་བགྲོད་ཕྱིན་པ་རེད་ཟེར་བའི་གནས་ཚུལ་ཞིག་གོ་བ་དང་། དེ་མ་ཉིད་ལེགས་ཉེས་ཀྱི་བསམ་བློ་གང་ཡང་འཁོར་མ་བྱུང་།
དེ་ནས་རིམ་གྱིས་བསམ་བློ་བཏང་དུས་དེ་ནི་ཐབས་སྐྱོ་པོའི་གནས་སྟངས་ཤིག་བྱུང་འདུག་སྙམ་ནས་དབུགས་རིང་ཞིག་ཀྱང་དབང་མེད་ཤོར་སོང་ཞིང་། རྒྱུ་མཚན་ནི་གཞིས་ལུས་བོད་མིའི་སློབ་ཕྲུག་རྣམས་ཀྱིས་ཡོད་ཚད་བློས་བཏང་ནས་བོད་ཀྱི་སྐད་ཡིག་སྲུང་སྐྱོབས་དང་རྒྱུན་འཛིན་དགོས་པའི་རྒྱ་གཞུང་ལ་ངོ་རྒོལ་གནང་གི་ཡོད་ལ། འདི་ཕྱོགས་རང་དབང་ལུང་པ་ནས་ཐུགས་སྤྲོ་སྐབས་ནང་ཁུལ་རྙོག་གླེང་བྱུང་ནས་ངོ་རྒོལ་དེ་འདྲ་བྱེད་པ་ནི་ཨ་ཁ་སྙམ་པ་ཞིག་བྱུང་། དེ་དག་ནི་དགེ་རྒན་གྱི་སློབ་ཁྲིད་བྱེད་སྟངས་མ་འགྲིགས་པ་ཞིག་ཡིན་ནམ། ཡང་ན་ཁོར་ཡུག་གི་གནས་སྟངས་འོག་ནས་བྱུང་བ་ཡིན་ནམ་སྙམ་ནས་སེམས་ནང་དུ་སྐྱོ་སྣང་དབང་མེད་དུ་སྐྱེས་བྱུང་། སྐབས་ཅིག་གི་རིང་ཅི་དྲན་མེད་པར་གྱུར། དེ་ནས་ལོ་མང་རིང་མ་སུ་རིར་གནས་སྡོད་གནང་མཁན་ཞིག་གིས་ད་རེས་ཀྱི་ངོ་རྒོལ་དེ་དག་ནི་སློབ་ཕྲུག་ཁོག་པ་ནང་གཞན་ཞིག་འཛུལ་ནས་བྱུང་བ་ཡིན་པ་ཐག་གི་ཆོད་ཅེས་བརྗོད་དེ་མཐོ་རིམ་མི་སྣའི་ནང་ཁུལ་ལ་མི་མཐུན་པའི་གཏམ་བརྒྱུད་དེ་སྔོན་བྱུང་ཟིན་པ་རེད་ཅེས་བརྗོད་ཀྱི་འདུག་ཅིང་དེ་འདྲ་ཡིན་ན་སྙམ་པའི་ཚོར་སྣང་ཞིག་དབང་མེད་དུ་སྐྱེས་བྱུང་།
དེ་ཡང་མ་སུ་རིའི་བྱུང་རབས་ཤིག་བརྗོད་ན་གོང་ཞུས་ལྟར་ཕྱི་ལོ་༡༩༥༩ ལོར་བོད་ཆོས་ལྡན་གྱི་ཞིང་ལ་དུས་འགྱུར་གྱིས་རྐྱེན་དབང་གི་༸རྒྱལ་བ་རིན་པོ་ཆེ་མཆོག་གཙོས་པའི་སྐུ་འཁོར་ཧྲག་བསྡུས་ཤིག་བོད་རྒྱལ་ཁབ་དང་མི་རིགས་ཀྱི་བདེན་དོན་ཆེད་དུ་ལེ་བར་བརྒྱ་ཕྲག་བརྒལ་ཏེ་རྒྱ་གར་འཕགས་པའི་ཡུལ་དུ་བཙན་བྱོལ་ལ་ཕེབས་དགོས་གྱུར་བ་དང་། དང་ཐོག་རྒྱ་གར་བྱང་ཕྱོགས་ཨུཏཱར་ཁཱནཌ་མངའ་སྡེའི་ལྡེ་ར་སྡུན་གྲོང་ཁྱེར་མ་སུ་རིའི་རི་གྲོང་ལ་བཞུགས་གནང་མཛད་ཅིང་། སྐབས་དེར་བོད་མི་རིགས་ཀྱི་ཆོས་དང་། རིག་གཞུང་། སྐད་ཡིག །གོམས་གཤིས་སོགས་ཐུན་མོང་མ་ཡིན་པའི་རིག་གཞུང་སོགས་ཆག་འཇིགས་ཀྱི་སོ་མཚམས་དེར་༸རྒྱལ་བ་རིན་པོ་ཆེའི་ཐུགས་དགོངས་བླ་མེད་དུ་བཞེས་གནང་མཛད་ནས་དང་ཐོག་ཤེས་ཡོན་གྱི་ཤོག་ལ་ཤུགས་སྣོན་རྒྱབ་རྒྱུ་གལ་ཆེ་ཞིག་ལ་ངོས་འཛིན་གནང་ནས། ཕྱི་ལོ་༡༩༦༣ ཟླ་༦ ཚེས་ ཉིན་མོར་མ་སུ་རིའི་སློབ་གྲྭ་ཐོག་མ་གསར་འཛུགས་མཛད་པ་དང་། དེ་ནས་རིམ་གྱིས་འཛམ་གླིང་གི་དྲང་བདེན་ལ་དགའ་བའི་རྒྱལ་ཁབ་དང་གཞུང་སྒེར་དུ་མ་ཞིག་གི་རྒྱབ་སྐྱོར་ཤུགས་ཆེར་གནང་བ་དང་། མ་ཟད་བཀའ་དྲིན་གྱི་རྒྱ་གར་གཞུང་མང་གཉིས་ཀྱི་རྒྱབ་སྐྱོར་བླ་མེད་ལ་བརྟེན་བོད་མིའི་སྒྲིག་འཛུགས་སྲ་བརྟན་དང་གོང་བུར་གཅིག་གྱུར་དུ་གནས་ཐབས་སུ་གཞིས་ཆགས་གསར་འཛུགས་དང་། བོད་མི་རིགས་ཀྱི་ཆོས་དང་རིག་གཞུང་སྲུང་སྐྱོབ་ཆེད་རྡོ་རྗེ་གླིང་། ཌལ་ཧོར། སྤན་ཆེ་མཱ་རི་བཅས་བོད་སློབ་ཆེད་འཛུགས་རིམ་པར་གནང་བ་མཛད་ཅིང་།
ཡིག་ཆ་ཁག་གི་ནང་འཁོད་དོན་ལས། སྤྱི་ལོ་༡༩༦༢ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཕྲེང་རིང་ལྕམ་སྐུ་རིན་ཆེན་སྒྲོན་མ་དམ་པ་དེ་ཉིད་དྷ་སར་ཆེད་འབོད་ཀྱི་བོད་ཕྲུག་ཚོའི་ཆེད་ཁྱིམ་ཚང་འཛུགས་རྒྱུའི་འགན་བཞེས་དགོས་པའི་ཕྱག་རྟགས་ཕེབས་སྟབས་ཞེས་པ་ལྟར་ལྕམ་སྐུ་རིན་ཆེན་སྒྲོམ་མ་དམ་པ་དེ་ཉིད་ཀྱི་ས་གནས་ཞིབ་འཇུག་ཆེད་ཌལ་ཧོར་དང་། སྤན་ཆེ་མཱ་རི། མ་སུ་རི་བཅས་ལ་ས་བབ་གཟིགས་ཞིབ་གནང་བ་དང་འབྲེལ་མ་སུ་རིར་ཁང་སྟོང་མང་པོ་ཡོད་པ་དང་། དེ་བཞིན་ས་བབ་ཚ་དྲོད་བོད་དང་མཐུན་ཞིང་། སློབ་སྦྱོང་བྱེད་སའི་ཁོར་ཡུག་བཟང་བ་སོགས་ཀྱི་འོས་གཟིགས་ཀྱི་སྙན་འབུལ་མཛད་པ་ལྟར་རིམ་གྱིས་མ་སུ་རིར་བོད་ཁྱིམ་སློབ་གྲྭ་གསར་འཛུགས་བྱ་རྒྱུ་གཏན་འཁེལ་མཛད་ཅིང་། ༸རྒྱལ་བ་རིན་པོ་ཆེ་མཆོག་ནས་ཐུགས་བརྩེ་བ་ཆེན་པོའི་ཐོག་ནས་འགྲོ་གྲོན་ཧིན་སྒོར་ ༦༨༧༣༦ གསོལ་རས་བསྩལ་གནང་མཛད་པའི་ཐུགས་རྗེ་བཀའ་དྲིན་བླ་མེད་ཉག་གཅིག་ལ་བརྟེན་ནས་སློབ་གྲྭ་དེ་དབྱར་གྱི་ཤ་མོང་བརྡོལ་ལྟར་ཡར་རྒྱས་ཆེན་པོ་ཕྱིན་ཡོད་ཅིང་།
དེ་ནས་ཕྲེང་རིང་རིན་ཆེན་སྒྲོམ་མ་དམ་པ་དེ་ཉིད་ཀྱིས་ལྷག་བསམ་གཡོ་མེད་ཀྱི་ནུས་ཤུགས་ཡོད་ཚད་གཅིག་ཏུ་སྤུངས་གནང་མཛད་ནས་སློབ་གྲྭ་རིམ་པ་ཡར་རྒྱས་བཏང་བ་མཛད་འདུག་ཅིང་། ཤེས་ཡོན་ཐོག་ལ་བྱས་རྗེས་རླབས་ཆེན་འཇོག་གནང་མཛད་པ་སོགས་ཕྱི་ལོ་༡༩༧༡ ནས་ཕྱི་ལོ་༢༠༠༨ བར་སློབ་གྲྭ་དེ་ཉིད་ནས་གསོ་སྐྱོང་གནང་ནས་སློབ་མཐར་ཕྱིན་ནས་རྒྱལ་ཡོངས་མཐོ་སློབ་ཁག་ཏུ་འཛུལ་ཞུགས་ཐུབ་པ་སློབ་ཕྲུག་ ༡༨༧༨ ལྷག་བྱུང་ཡོད་ལ། དེ་དག་བོད་མི་རིགས་ཀྱི་ཤེས་ཡོན་ཐོག་ལ་བྱས་རྗེས་བླ་མེད་འཇོག་ཡོད་ཅིང་། སློབ་གྲྭ་དེ་དག་ནང་ལོ་མང་རིང་ལ་སྐུ་ལས་སྐྱོན་མཁན་གོང་འོག་ཚང་མས་སེམས་ཤུགས་དང་ལྷག་བསམ་བཅས་ལ་བརྟེན་ནས་བྱུང་བ་ཞིག་ཀྱང་ལོས་ཡིན།
དེར་བརྟེན་ནས་འདས་གསོན་ཡོངས་ལ་རྗེས་དྲན་ཞུ་འོས་པའི་ཞིག་ཀྱང་ཡིན། མི་རབས་གོང་མ་ཚོས་ཐུགས་དགོངས་གཞི་རྩར་བཟུང་སྟེ་ལས་དོན་གནང་དགོས་རྒྱུ་དེ་ནི་མི་རབས་གསར་པ་ཚོས་ལས་འགན་ཡིན་ལ། མི་རབས་རྒན་པ་ཚོས་དཀའ་ཚེགས་ཆེ་བའི་ལོ་ཟླ་དེ་དག་ནང་དུ་དཀའ་སྤྱད་འབད་བརྩོན་གནང་བའི་གཞི་རྩ་མེད་སར་གཞི་རྩ་གསར་འཛུགས་གནང་བ་སོགས་ཀྱི་ད་སྐབས་ཡར་རྒྱས་ཧ་ལས་པ་ཕྱིན་ཡོད། འོན་ཀྱང་ད་དུང་ཡར་རྒྱས་ལ་མཐའ་མེད་དུས་ང་ཚོའི་སྙིགས་འདོར་བཅུད་ལེན་གྱི་ལས་དོན་བྱེད་དགོས་རྒྱུ་ནི་ཧ་ཅང་གལ་ཆེའི་རང་བཞིན་གནད་དོན་ཞིག་ཀྱང་ཡིན། ད་སྐབས་ཕྱི་ནང་མི་སྣ་སུ་ཞིག་བལྟས་ནའང་ཡིད་སྨོན་ཤོར་བའི་ཕྱག་ལས་གཟེངས་སུ་ཐོན་པ་གྲུབ་འབྲས་སོན་ཡོད།
ལྷག་པར་དེ་ཉིན་མ་སུ་རི་བོད་ཁྱིམ་གྱི་ལྟད་མོ་གཟིགས་མཁན་གཏན་ཉིན་སློབ་གྲྭ་ཁག་ཀྱང་འདུག་ཅིང་། གཏན་ཉིན་སློབ་ཕྲུག་དེ་དག་གདོང་གཤིས་སྣུམ་པ་དང་གྲུང་ཤ་དོད་པ་ཞིག་མཐོང་བྱུང་ལ། མ་སུ་རིའི་བོད་ཁྱིམ་གྱི་སློབ་ཕྲུག་ནི་གདོང་གཤིས་སྐྱོ་ཉམས་ཤིག་ཀྱང་མཐོང་བྱུང་བ་དང་འབྲེལ། དེ་དག་ག་རེ་བྱས་ནས་གདོང་གཤིས་སྐྱོ་པོ་ཡོང་དགོས་དོན་གང་ཞིག་ཡིན་ན་སྙམ་ནས་སྐབས་གཅིག་གི་རིང་དུ་བསམ་གཞིག་གི་གནས་སུ་ལྷུང་། བསམ་གཞིག་བྱས་པའི་བརྒྱུད་རིམ་ནང་དུ་གཏན་ཉིད་སློབ་ཕྲུག་རྣམས་ལ་རྟོག་ཙམ་གུ་ཡངས་ཆེ་བ་དང་། བོད་ཁྱིམ་གྱི་སློབ་ཕྲུག་ནང་བཞིན་ཁྱིམ་ལས་བསྐུལ་མཁན་མེད་པ་སོགས་ཀྱི་ཡིན་པ་འདྲ་ཞིང་། ཁྱིམ་ཚང་གི་ཕ་ཚབ་མ་ཚབ་ཀྱིས་སློབ་ཕྲུག་ཆུང་ཆུང་ལ་ཐབས་ལས་བསྐུལ་གྱི་ཡོད་རབས་འདུག་ཅིང་། དེ་ཡིན་པ་འདྲ་ཞིང་སློབ་ཕྲུག་ཆུང་ཆུང་དེ་འདྲའི་ཐབ་ལས་བྱེད་པ་གོ་དུས་དང་ཐོག་དགའ་འོས་པ་རེད་སྙམ་པའི་ཚོར་སྣང་སྐྱེས་བྱུང་ནའང་རིམ་པའི་བསམ་ཞིག་བྱེད་དུས་དེ་ནི་ཡག་པོ་ཞིག་ཁྱོན་ནས་མ་མཐོང་། སློབ་ཕྲུག་ལ་ཁྱིམ་ཚང་གི་ཕྱི་ནང་གད་ཕྱིས་དང་གཙང་མ་བཟོ་བཅུག་པ་དང་། སློབ་སྦྱོང་བྱེད་རྒྱུ་ཚབ་ལ་ལས་ཀ་བསྐུལ་བ་ནི་ཡག་པོ་ཞིག་མ་རེད་སྙམ་པ་བྱུང་ལ། ཕ་ཚབ་མ་ཚབ་ཀྱི་སློབ་ཕྲུག་རྣམས་སོ་སོའི་ཤ་ལས་ཆད་པའི་བུ་ཕྲུག་ལྟར་གསོ་སྐྱོང་བྱེད་དགོས་པ་ཞིག་ལས་འཇིགས་སྐུལ་གྱིས་ཐབ་ལས་དང་། ཕྱི་ནང་གི་གད་ཕྱིས། ཕོར་པ་འཁྲུ་རྒྱུ་སོགས་ལས་ཀ་བསྐུལ་བསྡད་ཚེ་སློབ་ཕྲུག་གི་འཚར་ལོངས་ལ་གནོད་སྐྱོན་འཐེབ་ཀྱི་མེད་དམ་སྙམ་པའི་ཚོར་སྣང་ཞིག་སྐྱེས་བྱུང་ལ། སློབ་སྦྱོང་གི་དུས་སྐབས་ལ་ལས་ཀ་བསྐུལ་བསྡད་ཚེ། མ་འོངས་པའི་བོད་མི་རིགས་ཀྱི་སོན་རྩ་ཡིན་ཞེས་རེ་བ་དང་ཡིད་ཆེས་བྱེད་ས་དེ་དག་ལ་མ་འོངས་པ་སློབ་སྦྱོང་གང་འདྲ་ཞིག་ཆགས་ཀྱི་རེད་དམ།
ཕ་ཚབ་མ་ཚབ་བཞག་དགོས་པའི་རྒྱུ་མཚན་ནི་སློབ་ཕྲུག་དེ་དག་ལ་སྔ་དགོང་ཉིན་གསུམ་ལ་ལྟ་སྐྱོང་བྱེད་མཁན་བསྐོ་བཞག་བྱས་པ་ཞིག་ལས། ཕྲུ་གུར་ལས་ཀ་བསྐུལ་མཁན་ཞིག་གཏན་ནས་བསྐོ་བཞག་བྱས་པ་མ་རེད། དེ་བཞིན་ཕ་ཚབ་མ་ཚབ་ཀྱིས་དུས་ཐོག་ལ་ཁ་ལག་བཟོ་སྟེ་སློབ་ཕྲུག་ལ་སྤྲོད་དགོས་པ་དང་། ཁ་ལག་དང་ནང་གཙང་མ་བཟོ་རྒྱུ་དེ་དག་ནི་ཕ་ཚབ་མ་ཚབ་ཀྱི་ལས་འགན་རེད་ལ། ཞོར་ལ་ཕྲུ་གུར་ཁ་ལག་བཟོ་སྟངས་དང་གད་ཕྱག་སྟངས་སློབ་ན་མ་གཏོགས་ཁ་ལག་དང་གད་ཕྱིས་ཀྱི་འགན་འཁུར་གཙོ་བོ་ཕ་ཚབ་མ་ཚབ་འཁུར་ནས་བྱེད་དགོས་པ་ཞིག་རེད།
ལྷག་དོན་ཕྲུ་གུར་ལས་ཀ་བསྐུལ་བ་ནི་ཡུལ་ཁྲིམས་དང་མཐུན་གྱི་མེད་ཅིང་། ང་ཚོའི་རྟག་ཏུ་གོང་འོག་ཚང་མས་ཡུལ་ཁྲིམས་དང་མཐུན་པའི་ལས་དོན་བྱེད་དགོས་པའི་སློབ་གསོ་གནང་གི་ཡོད་ན་ཕྲུ་གུར་ལས་ཀ་བསྐུལ་བ་དེ་ཡུལ་ཁྲིམས་དང་མཐུན་གྱི་ཡོད་དམ། དེ་དག་ལ་གོང་རིམ་རྣམ་པ་ཚོས་དགོངས་པ་བཞེས་དགོས་པའི་དུས་སྐབས་ཤིག་ལ་སླེབས་འདུག་མ་གཏོགས་འདི་མུ་བཞིན་སློབ་ཕྲུག་ལ་བཞེས་ལག་བཟོ་སྟངས་དང་། གད་ཕྱིས་བྱེད་སྟངས་སློབ་ཀྱི་ཡོད་མདོག་གི་རྣམ་པས་ལས་ཀ་བསྐུལ་བསྡད་ན་ཉིན་གཅིག་སློབ་གྲྭའི་མཚན་སྙན་གནོད་པ་ཡོང་སྲིད་ན་ཆུ་མ་ཡོང་གོང་ནས་རགས་དང་། རྐྱེན་མ་ཡོང་གོང་ནས་ལྡོག་པ་ཞེས་དཔེ་ལྟར་ད་སྐབས་ནས་དེ་དག་བསྒྱུར་བཅོས་གཏོང་དགོས་པའི་དུས་ལ་འབབ་འདུག་སྙམ་ཞིང་། བསྒྱུར་བཅོས་མ་གཏོང་ནས་མུ་མཐུད་དེ་རྒྱུན་འབྱམས་ཕྱིན་བསྡད་ན་ཉིན་གཅིག་ཨ་ཁ་སྙམ་པའི་དུས་སྐབས་ཤིག་ཤར་མི་སྲིད་པ་གཏན་ནས་མ་རེད་སྙམ།
དེ་ལུགས་གོང་འོག་ཚང་མའི་དགོངས་པ་བཞེས་དགོས་པའི་དུས་སྐབས་ཤིག་ཤར་འདུག་ལ། དེ་དག་ནི་མ་སུ་རི་གཅིག་པུ་རེད་གཏན་ནས་ལབ་ཀྱི་མེད་ཅིང་། དེ་དང་འདྲ་བའི་སློབ་གྲྭ་ཁག་ཤས་ནང་སློབ་ཕྲུག་ལ་ལས་ཀ་བསྐུལ་གྱི་ཡོད་ཚོད་འདུག་ན་དེ་དག་ངེས་པར་འཚམས་འཇོག་ཡོང་བའི་རེ་སྐུལ་ཞུ་བཞིན་ཡོད། དེ་དག་སེམས་ཀྱིས་མ་བཟོད་ནས་བྲིས་པ་ཞིག་ལས་དགའ་མིན་དགའ་མདོག་གི་ཀུན་སློང་འཁྱེར་ནས་བྲིས་པ་ཞིག་གཏན་ནས་མིན་ན་དེ་ལུགས་འབྲེལ་ཡོད་པ་རྣམ་པ་ཚོས་དགོངས་བཞེས་གནང་བར་མཛོད།
ཞེས་ཚོར་ཤུགས་དྲག་པོའི་ངང་ཕྱི་ལོ་༢༠༡༣ ཟླ་༡༠ ཚེས་༢༧ ཉིན་མོར་མཇུག་རྫོགས་པར་བགྱིས་སོ།།
ངོམ་པ་ལགས་ཀྱིས་གསུངས་པ་དེས་ཁྱིམ་ཚང་ཕ་མ་ཚང་མར་གོ་འགྲོ་བའི་ཉེན་ཁ་འདུག དེ་ཙམ་རྒྱུག་པ་ལེབ་རྡུང་བྱས་ན་འགྲིག་ཨེ་ཡོང་བསམ། འོན་ཀྱང་ཁྱིམ་ཚང་མང་པོའི་ནང་གནས་ཚུལ་དེ་འདྲ་ཡོད་པ་ངས་རྒྱབ་སྐྱོར་གཙང་མ་ཞུ་ཐུབ། གང་ཡིན་ཟེར་ན་རང་ཉིད་སྤྱི་ཚོགས་དེའི་ནང་ལོ་མང་སྡོད་མྱོང་ཡོད་པ་ཞིག་ཡིན།
སྐབས་ཤིག་ལ་རྒན་ལགས་ཤིག་གིས་རང་གི་འཛིན་གྲྭའི་ནང་ཁྱིམ་ཚང་ ༢༣ གྱི་བོད་ནས་བསླེབས་པའི་ཕྲུ་གུ་གཅིག་ལུས་ལ་དྲག་པས་ཁེངས་ཡོད་པར་གཟིགས་ནས་ཁྱིམ་ཚང་ལ་གཟུགས་པོ་འཁྲུ་རུ་གཏོང་སྐབས། ཕྲུ་གུ་དེ་ཧ་ཅང་འཇིག་ནས་ཁྱིམ་ཚང་ལོག་མ་ནུས་པར་ངུས་ཀྱང་བཙན་དབང་གིས་ཁྱིམ་ཚང་དུ་བསྐྱེལ་རྗེས། ཁྱིམ་ཚང་ཕྲུ་གུ་གཞན་ནས་ཤེས་གསལ་ལ། ཨ་མ་ལགས་ཀྱི་ཕྲུ་གུ་དེར་ཉེས་བརྡུང་གཏོང་གིན་ལུས་པོ་ཐེབས་ཆག་ཅིག་བཀྲུས་ནས་སློབ་གྲྭར་བཏང་འདུག རྒྱུ་མཚན་ནི་ཕྲུ་གུ་དེས་རྐྱེན་གྱི་མོ་རང་ལ་མིང་ཆད་བཟོས་སོང་ཟེར་བས་ཡིན། དེ་ཙམ་དུ་མ་ཟད་ཁྱིམ་ཚང་ ༡༨ ལ་ཁྱིམ་ཚང་ནང་ཁྱི་མང་པོ་འཚོང་རྒྱུ་ཡོད་ཙང་ཕྲུ་གུ་ཚོར་ཁྱི་ལ་ཁ་ལགས་སྤྲོད་རྒྱུ་དང་། གཅིན་པོ་སྒུག་རྒྱུ། ཁྱི་ཕོ་གཏུག་ཏུ་འགྲོ་རྒྱུ་སོགས་ལ་ལས་བགོས་རྒྱག་ཡོད། གཟིམ་ཆུང་ནང་གཙང་མ་བཟོ་རྒྱུ་དང་། ཞལ་ལག་འདྲོན་རྒྱུ་ནི་སྤྱི་བཏང་ཞིག་ཡིན། དང་པོ་ཁྱིམ་ཚང་ནང་ཕ་ཚབ་མ་ཚབ་ལ་པ་ལགས་དང་ཨ་མ་ལགས་ཞེས་བརྗོད་རྒྱུ་ནི་ཡ་རབས་ཤིག་ཡིན་ཀྱང་། དེའི་ཕྲུ་གུ་ལ་ཨོ་ལགས། ཁོ་ཚོའི་སྡོད་ཁང་ལ་གཟིམ་ཆུང་། དེ་བཞིན་ཁྱིམ་ཚང་གི་ཕྲུ་གུ་གཞན་རྣམས་གུང་གསེང་ནས་ལོག་ཡོང་སྐབས་པ་ལགས་དང་ཨ་མ་ལགས་ལ་ཐུགས་གཉེས་པོ་ཡོང་ཕྱིར་རྔན་པ་འབུལ་དགོས། དེ་ལྟར་བྱུང་ན་ཕྲུ་གུ་དེ་ལ་དམིགས་བསལ་མང་པོ་ཡོད་པ་དང་། དེ་མིན་གཞན་རྣམས་ཁྱིམ་ཚང་དུ་ཕ་ཚབ་མ་ཚབ་ཀྱིས་སྡང་དྲག་པའི་རྐྱེན་གྱིས་ཉིན་འཁྱོལ་ཡང་མཚན་མི་འཁྱོལ་བའི་དཀའ་ངལ་ཡོད། དངོས་གནས་དེ་ཚོ་མཐོང་སྐབས་སེམས་ལ་རང་བཞིན་གྱི་བཟོད་དཀའ་བའི་གནས་ཚུལ་ཡོང་བ་ཡིན། ཡིན་ནའང་༸གོང་ས་མཆོག་གི་ཐུགས་རྗེ་ལ་བརྟེན་ནས་ཕྲུ་གུ་དེ་ཚོ་རང་མགོ་གང་འཚམས་ཤིག་ཐོན་འགྲོ་གི་འདུག་པས་དེ་ནི་དངོས་གནས་ལེགས་པའི་ཡ་མཚན་དངོས་འབྱུང་ཞིག་ཏུ་རྩིས་རྒྱུ་ལས་ལྷག་མི་འདུག མ་འོངས་པར་གང་ལེགས་ཡོང་བའི་སྨོན་འདུན་ཞུ། བཀྲིས་བདེ་ལེགས།
༢༠༡༣ ཟླ་ ༡༡ ཚེས་ ༡༠ ད་ལྟ་སླེབས་རྒྱུ་རེད་ལགས།