གནས་ཚུལ་མཁོ་འདོན་པཿ བསམ་གླིང་ཚེ་རིང་ལྷ་མོ།
དེ་རིང་ནི་༡༩༥༩ལོར་བོད་ནང་གི་སེར་སྐྱ་རྒན་དར་གཞོན་གསུམ་གྱིས་ནུས་ཤུགས་གཅིག་ཏུ་སྒྲིལ་ནས། དགྲ་བོ་རྒྱ་དམར་གྱིས་བོད་ནང་ཤེད་ངོམ་ཁོ་ནས་བཙན་གནོན་བྱས་པར་ངོ་རྒོལ་གནམ་ས་འགུལ་བ་ཞིག་བྱས་པའི་དྲན་གསོའི་ཉིན་མོ་ཞིག་ཡིན་པ་རེད། ཉིན་མོ་དེ་རིང་འཛམ་གླིང་ས་ཕྱོགས་གང་སར་གནས་པའི་བོད་པ་བཙན་བྱོལ་བ་ཚོས་ཆེ་ཆུང་ལ་མ་ལྟོས་པའི་ལས་འགུལ་སྣེ་མང་ཞིག་སྤེལ་གྱི་ཡོད་པ་ནི་གདོན་མི་ཟ་བ་ཞིག་རེད། འདི་ག་རྒྱ་གར་བྱང་ཕྱོགས་ས་གནས་མ་སུ་རིར་ཡང་། ཞོགས་པའི་ཆུ་ཚོད་བདུན་དང་ཕྱེད་ཀ་ནས་བོད་མི་རྒན་དར་གཞོན་གསུམ་གྱིས་རི་བོ་ལྷ་གསོལ་རི་མགོར་རྒྱལ་བ་སྲས་དང་བཅས་པར་འཕྲིན་སྐུལ་རྒྱ་ཆེར་ཞུས་ཤིང་། བོད་བསྟན་སྲིད་ཀྱི་བྱ་བ་ཆེ་ཕྲ་ཆུང་གསུམ་ལ་འགལ་རྐྱེན་མེད་པར་མཐུན་པའི་རྐྱེན་རྣམས་ཡིད་བཞིན་དུ་འགྲུབ་པའི་གསོལ་འདེབས་རྒྱ་ཆེར་ཞུས། དེ་རྗེས་མ་སུ་རི་གཏན་སློབ་འདོད་དགུ་ཐང་དུ་མཛད་རིམ་དབུ་འཛུགས་བསྐྱངས་ཤིང་། མི་མང་ལངས་གླུ་དང་། རྒྱ་གར་དང་་བོད་ཀྱི་རྒྱལ་གླུ་གཏོང་བ་སོགས་ཀྱིས་མཛད་སྒོའི་མདུན་བསུས་ཤིང་། རྒྱལ་གཅེས་དཔའ་བོ་དཔའ་མོ་རྣམས་པར་མྱ་ངན་གུས་འདུད། རྒྱལ་བའི་བཞུགས་ཁྲི་རིན་པོ་ཆེར་མཇལ་དར་བསྒྲོན་པ་དང་། རྒྱལ་བའི་ཞབས་བསྟན་འུར་འདོན་ལ་སོགས་པའི་མཛད་རིམ་བསྐྱངས་ཏེ་རིམ་བཞིན་གསུང་འཕྲིན་ཁག་སྒྲོག་སྦྱང་གནང་། དེ་རྗེས་གཏན་སློབ་དང་བོད་ཁྱིམ་གྱི་ལས་བྱེད་ཁག་དང་། མི་མང་བཅས་ནས་མ་སུ་རི་ཁྲོམ་གཞུང་དུ་སྐད་འབོད་བྱས། མཛད་རིམ་གྱི་མཇུག་ཏུ་ས་གནས་ཀྱི་དཔོན་རིགས་གདན་ཞུས་ཀྱིས་མར་མེ་སྦར་བ་དང་། ས་གནས་དཔོན་རིགས་ནས་གཏམ་བཤད་གནང་བ། ལྷག་པར་དུ་བརྙན་འཕྲིན་སོགས་གསར་འགོད་པ་མི་ཉུང་བ་ཞིག་ཕེབས་ནས་སྐད་འབོད་དང་གཏམ་བཤད་ཁག་ནས་གཙོས་བོད་ཀྱི་གནད་དོན་ཁག་གི་གསར་འགྱུར་བསྡུ་ལེན་གནང་། ད་ལོའི་དམིགས་གསལ་ཞིག་ནི། མ་སུ་རི་བོད་ཁྱིམ་གྱི་སློབ་མ་རྣམས་ཁྲོམ་སྐོར་སྐད་འབོད་ལོ་གཉིས་གོང་ནས་བཀག་གནང་ཡོད་ཐོག། ད་ལོར་གཏན་སློབ་ཀྱི་སློབ་ཕྲུག་ཁག་ཀྱང་ཁྲོམ་སྐོར་སྐད་འབོད་ལ་ཞུགས་སུ་འཇུག་མེད། དེའི་ཐོག་འབྲེལ་ཡོད་ལ་བཀའ་མོལ་ཞུས་པར། གཅིག་ནས་ཕྲུ་གུ་རྒན་པ་ཁག་ཡིག་རྒྱུགས་ཀྱི་སྐབས་འཁེལ་བ་དང་། འབྲིང་བ་དང་ཆུང་བ་ཁག་ཕྱིར་བསྐྱོད་སྐབས་གནས་ཚུལ་ལྷག་པ་འདྲ་བྱུང་ཚེ་འབྲེལ་ཡོད་འཛིན་སྐྱོང་ལ་དཀའ་ངལ་ཡོད་སྐོར་གསུང་གནང་སོང་།
༼འབྲིང་བ་དང་ཆུང་བ་ཁག་ཕྱིར་བསྐྱོད་སྐབས་གནས་ཚུལ་ལྷག་པ་འདྲ་བྱུང་ཚེ་འབྲེལ་ཡོད་འཛིན་སྐྱོང་ལ་དཀའ་ངལ་ཡོད་སྐོར་གསུང་གནང་སོང་།༽ གནས་ཚུལ་སྤེལ་མཁན་གྱིས་དྲང་པོ་བྲིས་གནང་འདུག རྒྱུན་དུ་ནས་དེ་ཕྱོགས་སུ་འཛིན་སྐྱོང་ལ་དཀའ་ངལ་རྩ་བ་ནས་ཡོང་མི་དགོས་པ་དང་། གལ་ཏེ་དཀའ་ངལ་བྱུང་ན་ལམ་སེང་འཛིན་སྐྱོང་གནང་མཁན་མི་སྣ་ཚོས་རྡོག་རྩ་ཆིག་སྒྲིལ་གྱིས་གཤམ་འོག་ཏུ་གཡུག་པ་ཡིན། ད་ལྟའི་བར་འཛིན་སྐྱོང་གནང་མཁན་ཚོའི་ལག་ནས་བརླག་དོར་གང་བྱུང་ཡང་སྐྱིན་ཚབ་སྤྲོད་དགོས་བྱུང་མེད་ཅིང་། གཞན་གཤམ་འོག་གི་ལས་བྱེད་ཅིག་ཡིག་ཚང་གྲོལ་ནས་མཚན་མོར་ཁོང་གི་ཡིག་ཚང་ནང་གི་སྡོད་ས་ནས་ཅ་དངོས་ཤིག་བརླག་པ་དང་། དེ་ཡིག་ཚང་ནང་གི་ལས་རོགས་ཚང་མས་གསལ་པོ་ཤེས་ཀྱི་ཡོད་ཀྱང་། ལས་བྱེད་པ་དེས་སྐྱིན་ཚབ་སྒྲུབ་ཏུ་བཅུག་ཡོད། ཡང་འཛིན་སྐྱོང་བའི་ཁོངས་སུ་ཡིན་པའི་དངུལ་གཉེར་པའི་ཡིག་ཚང་ནས་དངུལ་ག་ཚོད་བརླག་དོར་བྱུང་ཡོད་རུང་། དེ་དངུལ་གཉེར་བས་སྐྱིན་ཚབ་སྒྲུབ་ཏུ་འཇུག་གི་མེད། མདོར་ན། འཛིན་སྐྱོང་གནང་མཁན་ལ་དཀའ་ངལ་མི་ཡོང་བ་ཞིག་བྱུང་ན། འཛིན་སྐྱོང་ལ་དཀའ་ངལ་མེད་པ་ནི་དོན་མི་ཟའོ། མ་འོངས་པར་བོད་རང་བཙན་བྱུང་ན་ང་ཚོས་བོད་རྒྱལ་ཁབ་ནང་འཛིན་སྐྱོང་གནང་སྟངས་འདི་མིག་དཔེ་བཟང་པོ་ཞིག་ལ་བརྩི་ནས་ལག་བསྟར་ཞུ་རྒྱུ་ནི་ཧ་ཅང་གལ་ཆེ་བ་ཞིག་ཏུ་མཐོང་། བཀྲིས་བདེ་ལེགས།