དོན་འགྲུབ་བཀྲ་ཤིས།
སེར་བྱེས་མཁས་སྙན་གྲྭ་ཚང་གི་མཁན་རབས་དོན་དྲུག་པ་ཏྲེ་ཧོར་དགེ་བཤེས་དགེ་འདུན་ཆོས་འཕེལ་མཆོག་ཁ་སང་རྒྱ་གར་ལྷོ་ཕྱོགས་མེ་སོར་གྲོང་ཁྱེར་གྱི་སྨན་ཁང་ཞིག་ཏུ་སྐུ་གཤེགས་ཡོད་པ་རེད།
༧གོང་ས་སྐྱབས་མགོན་ཆེན་པོ་མཆོག་གི་བཀའ་ཡིག་ཕེབས་པ་ལྟར། ཉེ་སྔོན་ཕྱི་ཟླ་༧ ཚེས་༡༨ ཉིན་སེར་བྱེས་མཁན་སྙན་གྲྭ་ཚང་གི་མཁན་རབས་དོན་དྲུག་པར་བསྐོ་བཞག་ཁྲི་འདོན་མཛད་པའི་ཏྲེ་ཧོར་དགེ་བཤེས་དགེ་འདུན་ཆོས་འཕེལ་མཆོག ཁ་སང་ཕྱི་ཚེས་༣༡ ཉིན་གྱི་ཞོགས་པའི་ཆུ་ཚོད་ ༩།༠༥ ཙམ་གྱི་ཐོག་རྒྱ་གར་ལྷོ་ཕྱོགས་མེ་སོར་གྲོང་ཁྱེར་ཝིག་རམ་སྨན་ཁང་(Vikram Hospital)དུ་སྐུ་གཤེགས་ཡོད་པ་དང་། ཉིན་དེར་སྦེལ་ཀོབ་ས་གནས་མི་མང་གིས་ཟ་ཁང་དང་ཚོང་ཁང་སོགས་སྒོ་བརྒྱབ་སྟེ་མྱ་ངན་ཞུས་ཡོད་འདུག
དེ་ཡང་྄དགེ་བའི་བཤེས་གཉེན་ཆེན་པོ་རྗེ་བཙུན་དགེ་འདུན་ཆོས་འཕེལ་དཔལ་བཟང་མཆོག་ནི། ཕྱི་ལོ་༡༩༤༡ལོར་ཏྲེ་ཧོར་དཀར་མཛེས་སུ་ངོ་གྲོང་དུ་སྐུ་འཁྲུངས་ཡོད་པ་དང། ཕྱི་ལོ་༡༩༤༨ལོར་དཀར་མཛེས་དགོན་དུ་ཆོས་བཞུགས་གནང་ཡོད་པ་རེད་འདུག་། དགུང་གྲངས་དགུ་པར་འཁྲུངས་གསར་སྐུ་ཕྲེང་ལྔ་པ་བློ་བཟང་དཔལ་ལྡན་ངག་གི་དབང་ཕྱུག་དཔལ་བཟང་པོའི་ཞལ་སྔ་ནས་ཚིགས་སྔ་མ་དགེ་ཚུལ་གྱི་བསླབ་སྡོམ་བླང་ཡོད་པ་རེད་འདུག
ཕྱི་ལོ་༡༩༥༥ལོར་སེར་བྱེས་མཁས་སྙན་གྲྭ་ཚང་དུ་སྒྲིགས་ཞུགས་ཀྱིས་མཁྱེན་རབ་ཀྱི་གཏེར་ཆེན་སེར་བྱེས་མཁན་རབས་རེ་དྲུག་པ་མཁས་བཙུན་བཟང་པོའི་དཔལ་མངའ་རྗེ་བཙུན་བློ་བཟང་དབང་ཕྱུག་དཔལ་བཟང་པོ་མཆོག་གི་ཞལ་སྔ་ནས་དང། མི་མངོན་སྦས་པའི་རྣམ་འབྱོར་བ་ཡོངས་ཀྱི་དགེ་བའི་བཤེས་གཉེན་ཆེན་པོ་རྗེ་བཙུན་བྱམས་པ་བསྟན་བཟང་དཔལ་བཟང་པོ་རྣམ་གཉིས་ཕྱག་དཔེ་དགེ་རྒན་དུ་བསྟེན་ཏེ་མཉེས་པ་གསུམ་གྱིས་མཉེས་པར་ཞུས་། གཞུང་རྙིང་འཛིན་གྲའི་སྐབས་སྦྱོར་ལམ་སྔ་རྒོལ་གྱི་རིགས་ཆུང་ཚོགས་ལང་གནང། ལོ་དེ་ནས་འཇང་དགུན་ཆོས་སུ་ཕེབས། ཕྱི་ལོ་༡༩༥༩དུས་འགྱུར་སྐབས་ཁག་ཤག་རྒན་དགེ་བཤེས་བསྟན་པ་ཉི་མ་མཆོག་གིས་དབུས་དགེ་སློབ་བཅུ་ཕྲག་ཟུང་ལྷག་དང་ལྷན་དུ་སེར་བྱེས་མཁན་ཟུར་རིན་པོ་ཆེ་རྗེ་བཙུན་བློ་བཟང་དབང་ཕྱུག་དཔལ་བཟང་པོ་མཆོག་གི་ཞབས་ཕྱི་ལ་བཅར་ནས་རྒྱ་གར་འཕགས་པའི་ཡུལ་དུ་ཞབས་སོར་བཀོད་ཡོད་པ་རེད། ༧གོང་ས་མཆོག་གིས་མ་འོངས་ལམ་སྟོན་ལྟར་རྒྱལ་བསྟན་སླར་གསོའི་ཆེད་སྦག་སར་ཆོས་སྒར་ཐོས་བསམ་ཐར་འདོད་གླིང་དུ་བཞུགས་ཡོད་པ་རེད་འདུག
ཕྱི་ལོ་༡༩༦༠ལོར་སྐྱབས་རྗེ་ཁྲི་བྱང་རྡོ་རྗེ་འཆང་ཆེན་པོའི་ཞལ་སྔ་ནས་བསླབ་གཞི་ཡོངས་སུ་རྫོགས་པའི་དགེ་སློང་གི་དངོས་པོ་ཡང་དག་པར་མནོས། མཁན་ཟུར་རིན་པོ་ཆེའི་རྗེ་བཙུན་བློ་བཟང་དབང་ཕྱུག་དཔལ་བཟང་པོ་མཆོག་གི་བཀའ་དགོངས་བཞིན་ཟླ་བ་གསུམ་གྱི་རིང་ཁམས་གསུམ་ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་ལེགས་བཤད་ཀུན་གྱི་ཉིང་བཅུད་དྲང་ངེས་ལེགས་བཤད་པའི་སྙིང་པོ་ཐུགས་འཛིན་གནང་སྟེ་ཚར་ཉིས་བརྒྱར་བརྒལ་བ་སྐྱོར་སྦྱོང་གནང། གཞན་ཡང་རྣམ་དཔྱོད་ཀྱི་གཤོག་རྩལ་ཕུལ་དུ་བྱུང་བའི་མཁས་པའི་ཁྱུ་མཆོག་བཤེས་གཉེན་ཆེན་མོ་རྒན་རྟ་དབྱངས་རྒྱལ་མཚན་མཆོག་གི་ཞལ་སྔ་ནས་ཕར་ཕྱིན་སྤྱི་དོན་ཀླུ་དབང་དགའ་བའི་རོལ་མཚོ་སོགས་ཀྱི་དཔེ་ཁྲིད་དང་སེར་བྱེས་མཁན་ཟུར་རིན་པོ་ཆེ་རྗེ་བཙུན་བྱམས་པ་ཐེག་མཆོག་དཔལ་བཟང་པོ་མཆོག་ལས་སུམ་རྟགས་བསླབ།
ཕྱི་ལོ་༡༩༦༩ལོར་གདན་ས་ཁག་ལྷོ་ཕྱོགས་སུ་སྤོས་རྗེས་རྒྱ་གར་མཁས་པའི་གཞུང་དང་རྗེ་ཡབ་སྲས་གསུམ། བླ་མ་རྗེ་བཙུན་པ་ཆོས་ཀྱི་རྒྱལ་མཚན་མཆོག་གི་དབུས་རྒྱ་བོད་མཁས་པ་དག་གི་གསུང་རབ་དགོངས་འགྲེལ་དང་བཅས་པར་གུས་རྟག་སྦྱོར་བས་བརྩོན་པར་བསྐྱེད་དེ་ཉིན་མཚན་ཁོར་མོར་ཡུག་ཏུ་ཚོགས་ཆོས་སློབ་གཉེར། འཛིན་སྐྱོར་སྦྱོང། དཔེ་ཁྲིད་བཅས་ལ་ཐུགས་ཡིད་གཅིག་ཏུ་བསྒྲིམ་ཏེ་དུས་ཀྱི་སྐར་ཆ་ཕྲ་མོ་ཙམ་ཡང་ཆུད་ཟོས་སུ་མ་བཏང་བར་གསན་བསམ་སྒོམ་པ་ཉིད་ལ་འབད། དེ་ནས་༧སྐྱབས་རྗེ་མཁན་ཟུར་རིན་པོ་ཆེའི་རྗེ་བཙུན་བློ་བཟང་དབང་ཕྱུག་དཔལ་བཟང་པོ་མཆོག་གི་ཞལ་སྔ་ནས་སྔགས་ཀྱི་ས་ལམ་དང། རིམ་ལྔ་གསལ་སྒྲོན། དྲང་ངེས་ལེགས་བཤད་སྙིང་པོ་སོགས་ཀྱི་བཀའ་ཁྲིད་དང། རྟ་མགྲིན་ཡང་གསང་གི་བཀའ་དབང་ཐེངས་གཉིས་ཐོབ། ལྷོ་ཕྱོགས་ཧུར་སར་བཞུགས་དུས་༧སྐྱབས་རྗེ་མཁན་ཟུར་རིན་པོ་ཆེ་མཆོག་གི་བཀའ་བཞིན། ཡི་དམ་གྱི་ཆོ་ག་ཕྱག་ལེན། གཏོར་མ་བཞེས་སྟངས་སོགས་སྦྱངས་ནས་རྟ་མགྲིན་བསྐང་གསོ་བའི་ཐུགས་འགན་བཀའ་དྲིན་ཡང་བསྐྱངས་ཡོད་པ་རེད་འདུག།
དེ་ནས་ཕྱི་ལོ་༡༩༧༨ནས་སྐྱབས་མཆོག་མཁན་ཟུར་རིན་པོ་ཆེ་རྗེ་བཙུན་བློ་བཟང་དབང་ཕྱུག་དཔལ་བཟང་པོ་མཆོག་གི་བཀའ་དགོངས་བཞིན་གསར་བུ་རྣམས་ལ་རིགས་ལམ་སྒོ་བརྒྱ་འབྱེད་པའི་བསྡུས་གྲྭ་ནས་བཟུང་སྟེ་རིམ་གྱིས་ཕར་ཚད་དང་དབུ་མ། འདུལ་མཛོད་བཅས་པོད་ལྔའི་དཔེ་ཁྲིད་གནང། དཔེ་ཁྲིད་གནང་སྐབས་ཀྱང་གཞུང་ཆེན་སྦོམ་བཤད་དང། མཆོད་གནས་རྒན་པོས་མདོ་རྒྱུད་ཀློག་པ་ལྟ་བུ་མིན་པ་དཀའ་གནད་རེ་ལ་རྒྱབ་རྟེན་གྱི་ལུང། སྒྲུབ་བྱེད་ཀྱི་རིག་པ། བླ་མ་གོང་མའི་གསུང་སྒྲོས། རྗེ་བླ་མ་མཆོག་གི་གོ་སྟོབས་སོགས་བསྒྲིལ་ཐོག། གཞུང་དོན་རེ་ལ་དཔེ་ཁྲིད་ཐེངས་གཉིས་གསུམ་ལ་འགོག་ཀྱང་ཇི་མི་སྙམ་པ་གཞུང་དོན་ས་འོག་གི་གཏེར་བཞིན་འདོན་གནང་མཛད།
དེ་ནས་ཕྱི་ལོ་༡༩༨༢ལོར་གྲྭ་ཚང་རིན་པོ་ཆེ་ནས་ལྷ་རམས་དགེ་བཤེས་ཀྱི་མཚན་རྟགས་འབུལ་གནང་མཛད་ཡོད་པ་རེད། ལོ་དེ་ནས་དགེ་ལྡན་གཙུག་ལག་སློབ་གཉེར་ཁང་ཆེན་པོའི་རྒྱུགས་སྤྲོད་རྣམས་རིམ་གྱིས་ཕེབས་ཏེ་བཀའ་རམས་དང། སློབ་དཔོན་གྱི་ཨང་རིམ་དང་པོའི་ཕྱག་འཁྱེར་དགྱེས་བཞེས་གནང་ཡོད་པ་རེད། ༡༩༩༠་ལོར་འཕགས་བོད་ཀྱི་གཞུང་ལུགས་རྒྱ་མཚོར་གསན་བསམ་མཐར་སོན་པའི་འབྲས་རྟགས་སུ་སེར་བྱེས་མཁས་སྙན་གྲ་ཚང་གི་མཁས་མང་བྱེ་བའི་དབུས་སུ་རབ་འབྱམས་པའི་གྲ་སྐོར་དམ་འཇོག་ཆེན་མོ་མཛད། གཞན་ཡང་གནས་ལྔ་རིག་པའི་དབང་ཕྱུག་༧སྐྱབས་མཆོག་ཆོས་ལྡན་རིན་པོ་ཆེ་གི་ཞལ་སྔ་ནས་སྔགས་རིམ་ཆེན་མོ་དང་རིམ་ལྔ་གསལ་སྒྲོན། སྙན་ངག་མེ་ལོང་མ་སོགས་ཀྱི་དཔེ་ཁྲིད་ཀྱང་ཞུས་ཡོད་པ་རེད་འདུག་། ཕྱི་ལོ་༡༩༩༠ལོར་མཆོག་སྤྲུལ་བསྟན་འཛིན་འོད་གསལ་རིན་པོ་ཆེའི་ཡོངས་འཛིན་དུ་གྲྭ་ཚང་རིན་པོ་ཆེ་ནས་ཕྱག་རྟགས་བསྩལ་དོན་བཞིན་གྲྭ་ཚང་རིན་པོ་ཆེ་སྙིང་བཅངས་ཀྱིས་ཐུགས་འགན་ལྷོད་མེད་གནང་ཡོད་པ་རེད།
ཕྱི་ལོ་༡༩༩༣ལོར་སེར་བྱེས་གཙུག་ལག་སློབ་གཉེར་ཁང་ཆེན་པོའི་སློབ་གཉེར་རྒན་དུ་ཕེབས་ཡོང་པ་དང། གྲྭ་ཚང་དགེ་བསྐོས་སུ་འདུས་མང་ཡོངས་ཀྱིས་ཐུགས་རེ་ཆེ་ཡང་མཆོག་སྤྲུལ་བསྟན་འཛིན་འོད་གསལ་རིན་པོ་ཆེ་གྲ་ཚང་ལ་གནད་ཆེ་ཞིང། ཁོང་གི་གསན་བསམ་ལ་དགོངས་ནས་བླ་བྲང་གིས་གྲ་ཚང་ལ་དགེ་བསྐོས་དགོངས་ཞུ་ཕུལ་དོན་བཞིན་དགེ་བསྐོས་བཞེངས་མི་དགོས་པའི་དགོངས་འཁྲོལ་ཐོབ་ཡོད་པ་རེད། ཕྱི་ལོ་༡༩༩༦ལོར་ཁམས་ཚན་དགེ་རྒན་གནང་ཡོད་པ་དང། ཕྱི་ལོ་༢༠༠༣ལོ་ནས་ཁམས་ཚན་གྱི་བརྩི་གཞག་དགེ་རྒན་གྱི་ཐུགས་འགན་བཞེས་ཡོད་པ་རེད། ཉེ་སྔོན་ཕྱི་ཟླ་ ༧ ཚེས་ ༡༨ ཉིན་༧གོང་ས་མཆོག་གི་བཀའ་དགོངས་ལྟར། སེར་བྱེས་མཁས་སྙན་གྲྭ་ཚང་གི་མཁན་རབས་དོན་ལྔ་པ་ཏྲེ་ཧོར་དགེ་བཤེས་བློ་བཟང་བདེ་ལེགས་མཆོག་གི་མཁན་པོའི་ལས་ཡུན་ཁྱུར་བའི་ཚབ་ཏུ་ཁོང་བསྐོ་བཞག་གནང་སྟེ་ཁྲི་འདོན་མཛད་ཡོད་པ་རེད།
རྒྱ་གར་ལྷོ་ཕྱོགས་ས་གནས་གསར་འགོད་པ་དོན་འགྲུབ་བཀྲ་ཤིས།
མཁན་ཆེན་དམ་པ་སྐུ་གཤེགས་པར་མྱ་ངན་ཞུ། རྟགས་དང་མཚན་མ་འདྲ་བཞག་འདུག་གམ། །
་་་་་་་་ཟླ་བ་གསུམ་གྱི་རིང་ཁམས་གསུམ་ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་ལེགས་བཤད་ཀུན་གྱི་ཉིང་བཅུད་དྲང་ངེས་ལེགས་བཤད་པའི་སྙིང་པོ་ཐུགས་འཛིན་གནང་སྟེ་ཚར་ཉིས་བརྒྱར་བརྒལ་བ་སྐྱོར་སྦྱོང་གནང། ་་་་
༅༅། ཡ་་་་་་ཚེ་ནི་མི་རྟག་ནམ་མཁའི་གློག་དང་འདྲ། འདུས་བྱས་ཐམས་ཅན་མི་རྟག་པ།
ཆོས་ཐམས་ཅན་སྟོང་ཞིང་བདག་མེད་པ། སྐད་ཅིག་སྐད་ཅིག་གི་འགྱུར་ནས་འགྲོ།
རྗེ་བརྩུན་མི་ལ་རིན་པོ་ཆེས་གསུང་ལས།
ང་ད་ལྟ་ཡོད་ལ་ད་ལྟ་མེད།
ང་ད་རིང་ཡོད་ལ་ངས་ཉིན་མེད།
ཡོང་ཡང་གཅིག་པུར་ཡོང་བ་ཡིན། འགྲོ་ཡང་གཅིག་པུར་འགྲོ་རྒྱུ་ཡིན།
གསུངས་པ་བཞིན་ནོ།། མི་རྟག་པ་སྒོམས།