ཤེས་རབ་ནོར་བུ།
མཁན་རིན་པོ་ཆེ་དིས་ཆུང་བློ་ཆོས་ཀྱི་མཛད་རྣམ་དད་གསུམ་སྒེག་པའི་འཛུམ་རིས་ཞེས་བྱ་བ།
ཁོང་ནི་བོད་རབ་བྱུང་བཅོ་ལྔ་པའི་གཞུག་ཙམ་ན་བྱང་སེམས་བཀྲ་ཤིས་འོད་ཟེར་དང་། བླ་མ་བཀྲ་ཤིས་ཚེ་རིང་གི་གདུང་བརྒྱུད་ཡབ་གཞིས་གཅིག་པའི་ཨ་ལོ་དིས་ཆུང་ཚང་སར་སྐུ་འཁྲུངས་པ་སྟེ། ཡུམ་གནས་བསྐོར་དུ་ཕྱིན་ནས་འོག་མིན་མཚུར་ཕུར་སྐྱེས་ཤིང་། ༧རྒྱལ་དབང་མཁའ་ཁྱབ་རྡོ་རྗེས་ཕྱག་སྲུང་མགུལ་མདུད་དང་སྨན་སྒྲུབ་རིལ་ནག་ཆེན་མོའི་ཕྱག་རྟེན་ཁར་ཀརྨ་བློ་གྲོས་ཆོས་བཟང་ཞེས་པའི་མཚན་དང་མ་འོངས་པ་ན་བསྟན་འགྲོར་སྨན་པའི་ལུང་བསྟན།
ཆུང་དུས་ནས་ཨ་ལོ་དཔལ་འབྱོར་དགོན་དུ་འཚོགས་ཞུགས་ཐོག་ཚྭ་ཚ་མཁན་པོ་བདེ་ལུའི་མདུན་ནས་དབུ་མ་རྩ་འཇུག་བཞི་གསུམ་ལ་ཐོས་བསམ་གྱི་འགོ་ཚུགས། དཔལ་འབྱོར་མཁན་པོས་ཀྱང་གྲྭ་ཆུང་འདིའི་ཤེས་རབ་རྣོ་བ་ལ་ཞེས་འཚོགས་སུ་གཟེངས་བསྟོད་ཀྱང་གནང་སྐད་ཡོད།
མཚམས་ཤིག་ན་དཔལ་སྤུངས་དགོན་གྱིས་གྲྭ་སྡུད་བྱུང་བར་ཁོང་ཡང་དཔལ་སྤུངས་སུ་གྲྭ་ཁྲལ་དུ་བསྡུས། དེ་ནས་དཔལ་སྤུངས་པའི་ཆོ་ག་ཆོས་སྤྱོད་འཚོགས་འགྲོ་སྒྲིག་འདུག་སྤྱི་མཚུངས་སུ་གནང་མུས། ཞང་པོ་སྒྲུབ་དཔོན་བླ་མ་བཀྲ་ཤིས་ཚེ་རིང་གིས་བདག་ཉར་འོག ཙཱ་འདྲ་ཡང་ཁྲོད་དུ་སྒྲུབ་དཔོན་བླ་མ་ཇ་ཡོག་བསྟན་འཕེལ་མདུན་ནས་སུམ་རྟགས་དག་གསུམ་དང་སྡེབ་སྦྱོར་སྐོར་གསན་བསམ་དང་། རྐེ་སྲིབ་ཨ་སངས་ལས་ཀུན་མཁྱེན་ཆོས་འབྱུང་གི་ཕྱག་བཞེས་བསྡེབས་བྲིས་ཀྱི་ཡིག་གཟུགས་བྱང་བར་མཛད། གདན་ས་དཔལ་སྤུངས་པའི་རྩིས་རམས་པ་ཀ་འཕེལ་དཔལ་འབྱོར་ལས་མཚུར་ལུགས་སྐར་ནག་རྩིས་དང་གཟའ་ལྔ་དབྱངས་འཆར་སོགས་རང་རྐང་ཟིན་པར་བསླབས་ཏེ་དཔལ་སྤུངས་པའི་རྩིས་དགེ་ཡང་ལོ་མང་བཞེས། སྐབས་དེ་དུས་རིག་འཛིན་གྱི་རྣལ་འབྱོར་བར་གྲགས་པ་ཡོད་པའི་ཆུང་འགུ་བླ་མ་བསོད་ནམས་ཚེ་ཏན་དབེན་པར་སྐུ་མཚམས་བཞུགས་པའི་དྲུང་ནས་སྙན་ངག་མེ་ལོང་མ་ཆ་ཚང་ཞུས་ཤིང་དཔེར་བརྗོད་རྒྱུགས་འབུལ་སོགས་བྱས། ཞོར་བྱུང་དུ་ཞང་པོ་དིས་ཆུང་ཚེ་དབང་དགེ་ལེགས་སོགས་ལས་བོད་སྨན་རྒྱུད་བཞི་ཟུར་ལུགས་ཆ་ལག་བཅས་པ་སྦྱངས་ཤིང་དུས་ཕྱིས་གསར་བརྗེའི་ལས་འགུལ་འོག་རང་ཕན་གཞན་ཕན་བྱུང་གསུངས།
དགུང་གྲངས་ཉེ་ཤུའི་སྐོར་ཞིག་ན་ཟུར་མང་རྡོ་རྡོ་དགོན་དུ་མཁན་ཆེན་ཐམས་ཅད་མཁྱེན་པ་མཁྱེན་རབ་བམ་སངས་རྒྱས་རྒྱ་མཚོ་ལས་གཞུང་ཆེན་བཀའ་པོད་ལྔའམ་གཞུང་ཆེན་བཅུ་གསུམ་ལ་ཐོས་བསམ་རྟག་འགྲུས་གནང་།
བཤད་གྲྭ་དེར་ཡུན་རིང་བཞུགས་རྩིས་གནང་ཡང་དཔལ་སྤུངས་པས་བཀའ་བསྩལ་ལྟར་རང་དགོན་དུ་ཕྱིར་ཕེབས་ནས་༧རྗེ་བྱམས་མགོན་དབང་མཆོག་རྒྱལ་པོའི་དྲུང་ཡིག་སོགས་ཁ་མཁོ་སྣ་མཁོ་རུ་བེད་སྤྱོད་ཀྱིས་བཞུགས་དགོས་བྱུང་ཡོད། ཁོང་གི་མི་ཚེའི་ནང་འགྱོད་པ་ཆེ་ཤོས་སུ་ཟུར་མང་དུ་མཁན་པོར་བསྟེན་ཏེ་འདུག་མ་ཐུབ་པ་དེ་ཡིན་གསུངས།
རྗེ་གོང་མའི་ཕྱག་སྲོལ་ལྟར་དཔལ་སྤུངས་ཀྱི་སྒྲུབ་སྡེ་འོག་མར་བླ་མ་ཡེ་ཤེས་འབྱུང་གནས་ལ་བསྟེན་ཏེ་ལོ་གསུམ་ཟླ་གསུམ་གྱི་སྐུ་མཚམས་བཅད་རྒྱའི་མུར་ནཱ་རོ་ཆོས་དྲུག་དང་ཀཾ་ཚང་ལུགས་ཀྱི་བསྙེན་སྒྲུབ་གནང་། ཁོང་གི་གསུང་སྒྲོས་སུ་བླ་མ་ཡེ་འབྱུང་ལ་བསྟེན་ཏེ་སྒྲུབ་ཁང་ལས་གྲོལ་ནས་དགེ་སྒྲུབ་སྡིག་སྤོང་གི་ལག་ལེན་ཕྲན་བུ་ཡོད་པ་འདི་བླ་མ་ཁོང་གི་བཀའ་དྲིན་དང་བྱིན་རློབས་ཉག་གཅིག་ཡིན་ཞེས་ཕྱག་ཐལ་མོ་སྦྱོར་བཞིན་སྤྱན་ཆབ་གསིལ་བ་ལན་མང་མཐོང་ཐོས་ཡོད།
དེ་ནས་དུས་འགྱུར་སྐབས་ཁོང་ཨ་ལོ་མཉམ་ལས་ཀྱི་སྨན་པ་གནང་ནས་སྔོ་སྨན་འཐུ་སྒྲུག་དང་སྨན་སློབ་གསོ་སྐྱོང་གིས་ཉམ་ཐག་གི་ནད་པ་མང་པོ་ལ་མགོན་སྐྱོབ་མཛད། ཆོས་དད་རང་མོས་ཀྱི་སྲིད་ཇུས་གུ་ཡངས་དང་བསྟུན་རྫོགས་ཆེན་དུ་སི་ཁྲོན་བོད་ཡིག་སློབ་གྲྭ་ཞེས་གསར་འཛུགས་བྱུང་བར་དགེ་རྒན་ཆེད་འདྲེན་དུ་ཕེབས་ནས་བོད་བརྒྱུད་ཀྱི་རིག་གཞུང་མང་པོ་ཞིག་འཆད་ཁྲིད་ཉམས་གསོའི་འོག་ནས་སློབ་མ་མང་པོ་འཚར་ལོངས་བྱུང་ཞིང་རྒྱལ་ཕྱི་ནང་གང་སར་སློབ་དང་ཡང་སློབ་ཀྱིས་ཁྱབ་ནས་ཡོད།
བྱམས་མགོན་སི་ཏུ་པདྨ་དོན་ཡོད་མཆོག་བོད་དུ་ཐོག་མར་ཕེབས་སྐབས་ཞིང་ཆེན་རིམ་པ་ཁག་ནས་དགོངས་ཞུས་བྱས་ཏེ་དཔལ་སྤུངས་དགོན་དུ་བཤད་གྲྭའི་ཐོག་མའི་མཁན་པོར་ཁོང་བསྐོས། དེ་ནས་ཁོང་གིས་ཀཱ་རི་ཀཱ་ཆེ་ཆུང་དང་། སྤྱོད་འཇུག སྙིང་ཐིག་སྔོན་འགྲོ། སུམ་སྙན་དག་གསུམ། ཡིག་གཟུགས་ཚུན་གྱི་རྨང་བཏིང་ནས་རིམ་བཞིན་དཔལ་སྤུངས་ལྔ་རིག་སློབ་གླིང་གྲགས་པ་འདི་རིམ་མཆེད་བྱུང་ཡོད།
མདོར་ན་ཁོང་ནི་རྙེད་གྲགས་བསྙེན་བཀུར་ལ་ཐུགས་བློ་ཨ་འཐས་མེད་པ་ཞིག་དང་། རྟག་ཏུ་གཞན་ཕན་སེམས་བཟང་ལ་ལྷུར་ལེན་ཐོག ཉིན་ལྟར་ཕྱག་ཚོད་གསུམ་བཞིར་བཅད་རྒྱའི་སྒོམ་སྒྲུབ་ལ་ཀྲོང་ངེར་བཞུགས་མཁན་ཞིག་ཡིན།
མཐར་དགུང་གྲངས་བརྒྱད་ཅུའི་སྐོར་ཞིག་ན་ངོ་མཚར་བའི་འདས་རྟགས་བཅས་དགོངས་པ་ཆོས་དབྱིངས་སུ་བསྡུས་སོ། །
སྒྲོ་སྐུར་བྲལ་བའི་རྣམ་ཐར་མདོར་བསྡུས་སུ་ཞལ་སློབ་ཐ་ཤལ་བ་ཤེས་རབ་ནོར་བུས་བླ་མ་རྗེས་དྲན་གྱི་ཚུལ་དུ་འཕགས་ཡུལ་བྱང་ཕྱོགས་དཔལ་ཛ་ལནྡ་རའི་གནས་ནས།