དོལ་སྨྱོན།
དུས་ཚོད་ངེས་གཏན་ཞིག་མི་དྲན་མོད་ང་རང་ཐོག་མར་གྲོགས་པོ་ཞིག་གི་ངག་རྒྱུན་ནས་མཁས་དབང་གདོང་ཐོག་རིན་པོ་ཆེའི་སྐོར་ལ་དོ་སྣང་བྱུང་། དེ་རྗེས་རིན་པོ་ཆེས་བརྩམས་གནང་བའི་དཔེ་དེབ་གཅིག་ལག་སོན་བྱུང་། དེའི་མིང་ལ་མ་བཅོས་དངོས་འབྲེལ་བརྗོད་པ་དུས་ཀྱི་སྦྲང་ཆར་ཡིན་བསམས་སོང་། དཔེ་དེབ་དེ་ནང་ཐོག་མར་རིན་པོ་ཆེའི་སྐུ་ཚེ་སྟོད་ཀྱི་ལོ་རྒྱུས་སྟབས་བདེ་ཞིག དེ་ནས་ཁ་བོང་ཁ་བའི་སྐུ་ཚེ་སྨད་ཀྱི་ཕྱག་ལས་གནང་ཕྱོགས། དེ་ནས་དངོས་གཞི་ལ་མཛེ་སྨད་ཀྱིས་བརྩམས་པའི་ཕ་རྒོད་བླ་མའི་ཞལ་ལུང་ཞེས་པའི་དཔེ་དེབ་དེ་ལ་འགལ་བའི་ཁུར་ཆེན་བཅོ་བརྒྱད་ཀྱི་ཁུར་བསྐལ་ནས་མི་སྨྲ་བའི་ས་ལ་བཀོད་པ་བཅས་ལེ་ཚན་གསུམ་ལས་གྲུབ་པའི་དེབ་ཆུང་ཞིག་རེད།
སྤྱིར་སྟངས་ང་རང་དགག་བཞག་སྐོར་གྱི་དཔེ་དེབ་ཀློག་རྒྱུར་ཧ་ཅང་དགའ་བས་མི་ཚད། དེའི་སྟེང་རིན་པོ་ཆེའི་དཔེ་དེབ་ལ་ལྟ་བའི་གོ་སྐབས་ཐོག་མར་རག་པའི་རྐྱེན་གྱིས་ཨ་གསར་ལྟ་བུས་ཚར་ཁ་ཤས་ལ་བལྟས་ཤིང་། དེའི་ནང་གི་བར་སྐབས་ཀྱི་ཚིགས་བཅད་འགའ་ཞིག་ནི་ད་ལྟའང་བློ་ལ་འགྲོ་བཞིན་འདུག ད་དུང་རིན་པོ་ཆེ་ནས་ཆ་རྐྱེན་ཞན་པོ་དང་དུས་ཚོད་ཐུང་ངུའི་ནང་དུ་དབྱིན་ཧིན་གྱི་སྐད་ཡིག་ལ་སློབ་སྦྱོང་གནང་བས་མི་ཚད། དབྱིན་བོད་ཤན་སྦྱར་གྱི་ཚིག་མཛོད་སྣང་བ་གསར་པ་ཞེས་པ་ཞིག་གསར་རྩོམ་གནང་ནས། སྐབས་དེ་དུས་ཀྱི་བོད་རིགས་དབྱིན་སྐད་སྦྱོང་མཁན་དག་ལ་འཕྲད་བཞིན་པའི་དཀའ་ངལ་དེ་ལེགས་པར་སེལ་གནང་འདུག
གཞན་ཡང་བོད་གཞུང་གི་གུང་སེང་གཏོང་ཕྱོགས་དང་རྒྱལ་དར་གྱི་འབྲེལ་བཤད་དག་ལ་དོན་ལྡན་གྱི་དགོངས་ཚུལ་བཏོན་གནང་བར། རེ་ཞིག་ཁྱི་ཉལ་རྒྱུག་དཀྲོགས་དང་ཁུངས་མེད་འཆལ་གཏམ་སོགས་ཀྱི་མི་ཁས་གཙེས་རུང་། བདེན་པ་ནི་ནམ་ཡང་བདེན་པ་ཡིན་པའི་གནས་ལུགས་དེས་མཐའ་མཇུག་བདེན་དོན་ལ་རྒྱལ་ཁ་ཐོབ་ནས་དེང་སང་ང་ཚོས་མིག་མཐོང་ལག་ཟིན་འདི་དག་རེད།
དེ་རྗེས་རིན་པོ་ཆེའི་ཕྱག་དེབ་ཁ་ཤས་མུ་མཐུད་ཀློག་སྐལ་བྱུང་། དེ་དག་ནི་མདོ་སྨད་པ་ཡོན་ཏན་རྒྱ་མཚོར་དགག་ལན་དུ་བྲིས་པ་དག་སྟེ། དུས་ཀྱི་མེ་ལྕེ། མདོངས་མཐའ་སིམ་པའི་ཟློས་གར། དག་བྱེད་ཟེགས་མ་བཅས་རེད། ད་དུང་ལྷ་སྲུང་བསྟེན་ཕྱོགས་ཀྱི་སྐོར་ལ་བདེན་གཏམ་ས་གཞི་འདར་བའི་འབྲུག་སྒྲ་བཅས་ཆ་ཚང་ལ་ལྟ་ཀློག་བྱེད་པའི་གོ་སྐབས་བྱུང་། ཕྱི་མ་འདི་དབྱིན་སྐད་དུའང་བསྒྱུར་འདུག
གཞན་ཡང་ས་སྐྱའི་ཆོས་འབྱུང་རབ་འབྱམས་ཞིང་དུ་སྙན་པའི་སྒྲ་དབྱངས། བོད་ཀྱི་རྒྱལ་རབས་ལོ་ཚིག་དང་དུས་འགྱུར་ཡོ་ལང་ལ་དཔྱད་པ་སྔོན་མེད་དེབ་ཐེར་གཟུར་གནས་དགྱེས་པའི་དབྱངས་སྙན། དབྱིན་བོད་ཀྱི་སྒྲ་གཞུང་རིག་ལམ་གསལ་བའི་སྒྲོན་མེ། རྩོམ་བྲིས་སྣ་ཚོགས་ཕྱོགས་བསྡུས་ཨུཏྤལ་གཞོན་ནུའི་ཆུན་པོ་བཅས་དེ་དག་ནི་ཕྱག་དེབ་མཇལ་བ་ཙམ་ལས་དངོས་སུ་ལྟ་ཀློག་བྱེད་རྒྱུའི་གོ་སྐབས་མ་བྱུང་། ད་དུང་གསལ་པོ་ཞིག་མི་དྲན་མོད་དབུ་མ་འཇུག་པ་ཡིན་ནམ་གང་ལྟར་དབུ་མའི་འབྲེལ་བ་ཞིག་ཀྱང་མཇལ་བའི་དྲན་པ་ཞིག་ནི་གཏན་གཏན་འདུག
ངས་དུས་ཀྱི་སྦྲང་ཆར་དང་དུས་ཀྱི་མེ་ལྕེ་དག་བཀླགས་རྗེས། ངའི་སེམས་སུ་རིན་པོ་ཆེ་མཆོག་ནི། འབྲས་ལྗོངས་ན་ངའི་ངོ་ཤེས་ཁྱིམ་ཚང་ཞིག་ལ་བུ་འཇིགས་དགའ་ཟེར་བའི་ཕོ་རྒོད་ཅིག་ཡོད་པ་ཁོང་གི་སྐྱེ་གཟུགས་དང་གཅིག་པ་གཅིག་རྐྱང་ལོས་ཡིན་སྙམ་གྱིན་ཡོད། ཁོང་ནི་དབྱིན་ཇིའི་གློག་བརྙན་ཁྲབ་སྟོན་པ་Steven Seagalདང་ཧ་ལམ་གཅིག་པ་གཅིག་རྐྱང་འདྲ་ཞིག་ཡོད་རེད།
ངས་རིན་པོ་ཆེས་བྲིས་པའི་ཚིག་འབྲུ་རེ་རེ་ལ་མྱོང་རོལ་བྱེད་ཀྱིན་བྱེད་ཀྱིན་རིན་པོ་ཆེའི་སྐྱེ་གཟུགས་དང་རྣམ་པའི་སྐོར་ལ་རྟོག་བཏགས་འདྲ་མིན་བྱེད་དགོས་བྱུང་། དེ་ནི་རིན་པོ་ཆེ་མཆོག་སྐུ་གཟུགས་རིང་ལ་སྐུ་ཤ་རྒྱགས་པས་ཆེ་ཉམས་དང་རྫིག་ཉམས་རང་བཞིན་གྱིས་ཐོན་པ། ཞལ་རས་ཆེ་ལ་སྣུམ་ཤ་དོད་པས་གཞན་ཟིལ་གྱིས་མནོན་པའི་གཟི་ཉམས་ལྡན་པ། གནག་སྣུམ་གྱི་སྐྲ་ལོ་སྟུག་པོ་རྒྱབ་ཏུ་བསྡམས་པས་མི་ཆེན་བླ་ཆེན་གྱི་ཆེ་བ་ངང་གིས་ཐོན་པ་བཅས་ཧ་ལམ་དབྱིན་ཇིའི་གློག་བརྙན་འཁྲབ་སྟོན་པ་Steven Seagal ཁོང་དང་གཅིག་མཚུངས་སུ་བསམས་ཡོད།
སྐབས་དེ་དུས་ངས་རིན་པོ་ཆེའི་སྐུ་པར་ཞིག་མཇལ་རྒྱུར་སྐོམ་པས་ཆུ་འདོད་ལྟར་སྒུག་པའི་ངང་ཡིན། དེ་དུས་ལྟ་ཀློག་བྱེད་བཞིན་པའི་དཔེ་དེབ་དག་གི་ཟུར་ན་རིན་པོ་ཆེའི་སྐུ་པར་སྦྱར་མི་འདུག དེར་བརྟེན་འབྲེལ་ཡོད་གྲོགས་པོ་སྐོར་ཞིག་ལའང་མངགས་བཅོལ་བྱས་པ་ཡིན། སྐབས་དེ་དུས་ངས་ལྟ་ཀློག་བྱེད་ཀྱིན་པའི་དཔེ་དེབ་དག་ནི་དཔེ་མཛོད་སོགས་ནས་བླུས་པ་མིན་པར། གྲོགས་པོ་ཞིག་གིས་འགྲེལ་ཡོད་ནས་གཡར་པོ་བྱས། དེ་ནས་པར་གློག་རྒྱབ་ཅིང་སླར་ཡང་སྟབས་བདེའི་དེབ་གཟུགས་སུ་བཟོས་པ་འབའ་ཞིག་རེད།
ཉིན་ཞིག་ང་རང་མཆོད་རྟེན་བྱ་རུང་ཁ་ཤོར་ལ་སྐོར་བ་བྱེད་སྐབས་དེར། ང་ལ་རིན་པོ་ཆེའི་དཔེ་དེབ་མཁོ་སྤྲོད་བྱེད་མཁན་གྱི་གྲོགས་པོ་ཁོང་དང་ཐུག་བྱུང་། སྐབས་དེར་ཁོང་ལ་རིན་པོ་ཆེའི་སྐུ་པར་ཞིག་འབྱོར་ལུགས་སྨྲས་བྱུང་བས། ང་རང་དགའ་ཐག་ཆོད་ནས་ངེད་གཉིས་ཁོང་གི་ནང་དུ་མགྱོགས་མྱུར་གྱིས་བསྐྱོད། ནང་དུ་འབྱོར་མ་ཐག་ཁོང་གིས་དཔེ་དེབ་འགའ་ཞིག་ཡར་དཀྲུགས་མར་དཀྲུགས་བྱས་པའི་དཀྱིལ་ནས་དཔེ་དེབ་གཅིག་གི་རྒྱབ་ཤོག་ང་ལ་བསྟན་བྱུང་།
དཔེ་དེབ་དེ་ནི་རིན་པོ་ཆེ་མཆོག་ནས་གསར་དུ་བརྩམས་པ་ཞིག་ཡིན་འདུག་ཅིང་། དེའི་རྒྱབ་ཤོག་ན་ཁོང་གི་ལོ་རྒྱུས་སྟབས་བདེ་ཞིག་དང་ལྷན་དུ་སྐུ་པར་ཞིག་ཀྱང་སྦྱར་འདུག འོན་ཀྱང་སྟབས་མ་ལེགས་པ་ཞིག་ལ་ངས་ཚིག་འབྲུ་རེ་རེའི་ནང་ནས་རྟོག་བཟོ་བྱས་པའི་ཁོང་དང་གཏན་ནས་མི་འདྲ་བས། ང་རང་སྐུ་པར་མཐོང་རྗེས་དམིགས་གསལ་གྱི་དགའ་ཚོར་གང་ཡང་མ་བྱུང་བའི་ཁར། དབུགས་རིང་འགའ་ཞིག་ཀྱང་ཤུགས་ཀྱིས་ཤོར་བྱུང་།
དེ་རྗེས་ཕ་ཡུལ་ནས་ས་སྐྱའི་མཁན་པོ་ངོ་ཤེས་ཤིག་དང་ལྷན་དུ་ས་སྐྱ་ལྷན་ཚོགས་ནས་༧གོང་ས་མཆོག་ལ་མཎྜལ་བརྟན་བཞུགས་ཤིག་ཕུལ་བའི་འོད་སྡེར་ལ་ལྟ་སྐབས། ཤེས་འཇོན་དང་ལྷག་བསམ་གང་ཡང་མེད་པའི་མི་ཆེན་མང་པོ་ཞིག་མིང་སྐམ་པོའི་གདོང་འབབ་རེ་གྱོན་ནས་བཞུགས་འཁྲིའི་སྟེང་ན་འཛུམ་དམུལ་ལེར་བསྡད་འདུག་ལ། དོན་དམ་པའི་མཁས་དབང་ཉམ་ཆུང་ཁོང་ནི་མི་མང་དཀྱུས་མའི་དཀྱིལ་དུ་འཚང་ག་ཤིག་ཤིག་གིས་བཞུགས་འདུག་པས། སྨྲ་མི་ཤེས་པའི་སེམས་འགུལ་ཚད་མེད་ཐེབ་ཅིང་མིང་སྐམ་པོ་ཞིག་དང་འདྲ་ཆགས་པོ་དག་ཁོ་ན་ལས། དོན་དམ་པའི་མཁས་དབང་ཁོང་ལྟ་བུ་ལ་མཐོང་དང་བརྩི་བཀུར་མེད་པ་ནི་ཅི་འདྲའི་ཕངས་པ་ཞིག་རེད་ཨང་སྙམ་བྱུང་།
གང་ལྟར་རིན་པོ་ཆེ་མཆོག་དངོས་སུ་ཞལ་མཇལ་གསུང་ཐོས་ཀྱི་སྐལ་བ་མ་བྱུང་རུང་། ཁོང་གི་ཕྱག་དེབ་འགའ་ཞིག་ལ་ལྟ་ཀློག་བྱེད་པའི་གོ་སྐབས་ཐོབ་ཅིང་། དེའི་རྐྱེན་གྱིས་རིན་པོ་ཆེ་ལ་དགའ་དད་དང་བརྩི་བཀུར་ཚད་མེད་ཞུ་མཁན་ཞིག་ཡིན་པའི་ཆ་ནས། ད་ལམ་རིན་པོ་མཆོག་སྐུ་ཚེ་མ་ཟིན་པའི་གནས་ཚུལ་ཐོས་རྗེས། སྐྱོ་གདུང་ཚད་མེད་ཅིག་དང་ལྷན་དུ་ཡ་རབས་བཟང་སྤྱོད་ཀྱི་རྗེས་སུ་འབྲངས་ཏེ་དེ་རིང་དམ་པ་གང་གི་སྐུ་ཕུང་ཞུགས་འབུལ་གྱི་ཉིན་མོར་རིན་པོ་ཆེ་མཆོག་རྗེས་དྲན་གྱི་ཚུལ་དུ་འདི་ཙམ་བྲིས་པའི་ཁུལ་ཡིན།།
འཇིགས་མེད་སྤོབས་པའི་ངོ་གདོང་དགུང་སྔོན་དུ་བཏེགས་ཏེ།།
ཟློག་མེད་ལུང་རིགས་ཐོག་མདའ་བར་མེད་དུ་འཕངས་ཚེ།།
སྔོན་མེད་ལེགས་བཤད་ཡོན་ཏན་རིན་ཆེན་གྱིས་ཕོངས་ཏེ།།
ཁྲེལ་མེད་རྫུན་གྱི་རྒྱ་མཚོར་ལྕེབས་པ་དེ་ཨ་ཁ།།
ཚིགས་བཅད་འདི་སྐབས་དེ་དུས་ཟིན་ཐོར་བཏབ་པ་ད་ལྟའང་དྲན་ཡུལ་ན་འདུག
༢༡། ༠༡། ༢༠༡༥།
གདོང་ཐོག་བླ་མ་དང། འཛེ་སྨན་རིན་པོ་གཉིས་ནས་ཆོས་ལུགས་དབར་ལ་འགཀ་ཟླ་ཤུགས་ཆེན་པོ་བཟོས་ཡོད། ལྷག་པར་གདོང་ཐོག་བླ་མ་འདི་ དགེ་ལུགས་པ་ལ་འགྲན་སེམས་ཆེན་པོ་དང་སྡིག་པ་མིག་བཙུམ་བྱེད་མཁས་ཞིག་རེད་དང་ དགའ་ལྡན་ལྔ་མཆོད་ལ་ཡང་མ་དགའ་བ་ཞིག་ཡིན་དུས་སྡིག་རྒན་ཞིག་ལོས་ཡིན་བསམ་མཁན་ཡང་མང། གང་ལྟར་བོད་པའི་མི་ཞིག་ཤི་བ་ཡིན་ཙང་མྱང་ངན་གུས་འདུན་ཞུ་་བ་དང། དར་རྟེན་རིམ་རྒྱུད་སངས་རྒྱས་པའི་གོང་འཕངས་མགྱོག་པོར་ཐོབ་པར་ཤོག།
དགེ་ལྡན་ལྔ་མཆོད་ལ་སྡང་ཟེར་བ་བདེན་པ་མ་རེད། ལྔ་མཆོད་འདི་དགེ་ལུགས་པའི་མཁས་པ་ཞིག་གི་འདས་མཆོད་རེད། དགེ་ལུགས་པ་ཞིག་ཡིན་ན་དུས་འདི་གལ་ཆེན་ཡིན་པ་དང་། བསྲུང་རྩི་ཅི་ཙམ་ཟབ་རྒྱས་བྱེད་ཀྱང་ཆོས་བརྒྱུད་གཞན་པ་ཚོས་མ་དགའ་བྱེད་ན་སྡུག་གྱོང་དང་། ཁེ་ཕན་མེད། ཡིན་ནའང་དགེ་ལུགས་པའི་འདས་མཆོད་བཙན་བྱོལ་བོད་གཞུང་ཁྱབ་ཁོངས་ཡོངས་གུང་སེང་བཞག་པ་ལ་ཁོང་གིས་དེ་ལྟར་ན་ཆོས་བརྒྱུད་གཞན་པ་ཚོ་སོ་སོའི་མཁས་པ་རེའི་འདས་མཆོད་རེ་གུང་སེང་དགོས་ཟེར་བ་རེད། དེ་འདྲ་བཤད་མི་ཆོག་ཟེར་ན་ཟེར་མཁན་དེ་རང་ཡག་པོ་མེད་རྟགས་རེད།
གང་ལྟར་ཀྱང་། མྱི་ལྡིང་འདི་ངར་བ་ཞིག་རེད། རྗེས་དྲན་ཞུ་འོས་པ་ཞིག་རེད་བསམ་སོང་། དེ་མིན་དེ་རིང་མ་གཏོགས་གོ་མྱོང་མེད་ཡ་་་ ཁྱོད་རྣམ་པ་གཉིས་ཀྱིས་ཉེ་རིང་ཆགས་སྡང་བཤད་ན་ངར་གི
ས་སྐྱ་ཡིན་ཁུལ་བྱས་ནས་དགེ་ལུགས་པ་ལ་དགག་པ་བརྒྱབ་པ་ཁུངས་མ་འཁྱོལ་བ་གང་ཡིན་ཟེར་ན་ས་སྐྱ་བའི་ཁུངས་ནས་མ་རངས་པ་བྱེད་མཁན་གྱི་གནད་ཡོད་ཁ་ཤས་ཐོན་པ་རེད་ཟེར། དེ་ནས་རྙིང་མ་ཡིན་མདོག་གིས་རྙིང་མ་བའི་བླ་ཆེན་མང་པོ་ཞིག་གི་མཚན་བགྲང་ནས་དགག་པ་ཟེར་ན་མི་འདུག་ཚིག་ངན་བཙོ་ཞགས་འཕེན་འཕེན་བྱས་ནི་རེད། བཙན་བྱོལ་སྤྱི་ཚོགས་ནང་ཛེ་སྨད་དང་གདོང་ཐོག་གཉིས་དཀྲུགས་འདྲེ་གཉིས་རེད་བསམ་ཡོད།
དུག་རྩ་དེ་ཕ་རྒོད་བླ་མའི་ཞལ་ལུང་རེད།
གཞོན་ནུ་ལགས་བདེན་པ་རེད། སྲུང་མ་ཁ་ལ་འཁྱེར་ནས་ཆོས་རྒྱུད་ནང་ཁུལ་དཀྲུགས་ནས་ད་ལྟའང་རྙོག་ཁྲ་རྒྱུན་མ་ཆད་པར་ཡོད་འདུག རི་བོ་དགེ་ལུགས་པ་སྤྱང་ཟེ་ཡོད་བསམ་སོང་སྟེ་མཐར་དགེ་ལུགས་པ་གཉིས་སུ་ཆགས་སོང། ཆོས་རྒྱུད་ནང་ཁུལ་གྱི་མཐུན་ལམ་ལ་གནོད་པའི་ཚིག་ཡོད་པ་ཙམ་གྱིས་དེར་དགག་དགོས་ན་་་་་་ཆོས་རྒྱུད་གཅིག་གིས་གཅིག་ལ་ཟུར་ཟ་སྨ་འབེབས་ག་ཚོད་མེད་དམ། ཕ་རྒོད་བླ་མའི་ཞལ་ལུང་གཅིག་པོ་ཡིན་གྱི་མ་རེད་དྲན།
ས་སྐྱ་ཡིན་ཁུལ་བྱས་ནས་དགེ་ལུགས་པ་ལ་དགག་པ་བརྒྱབ་པ་ཁུངས་མ་འཁྱོལ་བ་གང་ཡིན་ཟེར་ན་ས་སྐྱ་བའི་ཁུངས་ནས་མ་རངས་པ་བྱེད་མཁན་གྱི་གནད་ཡོད་ཁ་ཤས་ཐོན་པ་རེད་ཟེར། དེ་ནས་རྙིང་མ་ཡིན་མདོག་གིས་རྙིང་མ་བའི་བླ་ཆེན་མང་པོ་ཞིག་གི་མཚན་བགྲང་ནས་དགག་པ་ཟེར་ན་མི་འདུག་ཚིག་ངན་བཙོ་ཞགས་འཕེན་འཕེན་བྱས་ནི་རེད། བཙན་བྱོལ་སྤྱི་ཚོགས་ནང་ཛེ་སྨད་དང་གདོང་ཐོག་གཉིས་དཀྲུགས་འདྲེ་གཉིས་རེད་བསམ་ཡོད།
གཞོན་ནུ་ཟླ་མེད་ཀྱིས་ཞུས་པ་དངོས་གནས་རེད། བོད་ཀྱི་མི་རྒན་པ་དེ་ཚོ་གྲོངས་ན་ཚང་མ་མཁས་པ་ཆགས་འགྲོ་བ་ཞིག་འདུག དེབ་ཡོད་རེད་ཅེས་པ་ཙམ་གྱིས་མཁས་པ་ག་ལ་ཆགས། དེབ་ལ་རིན་ཐང་ག་ཙམ་འདུག འོ་དེ་ལ་ལྟ་དགོས་པ་རེད།
རབ་བྱུང་ན་གཟུར་གནས་ཀྱི་བློས་དོན་ལྡན་གྱི་གཏམ་གྱི་ལམ་ནས་རྗེས་དྲན་རེ་བྱོས། དེ་མ་བྱུང་ནའང་བོད་རིགས་ཤིག་ཡིན་པའི་ཆ་ནས་མ་ཎི་རེ་ཐོན། ཨ་ལས་ངན་པ་འདི་ཚོ།
མཁས་དབང་གདོང་ཐོག་འདས་པ་ལ། །
༜
གདོང་ཐོག་བླ་སྤྲུལ་ཁྲི་བཏོན་མཛད། །
གདོང་ཐོག་བླ་མ་སྐྱ་ལ་བབས། །
གདོང་ཐོག་བརྩོན་པས་སྐད་མང་སྦྱངས། །
གདོང་ཐོག་འཆི་དུས་མཁས་གྲལ་ཐོབ། །
༜
ཀརྡོ་ང་ཡིས་གུས་དུད་ཞུ། །
ཚིག་མཛོད་ཀྱི་སྔོན་དུ་གླེང་བའི་གཏམ་ལས།
ཉི་ཤུ་རྩ་ལྔ་སྲིད་པ་བཟུང་བའི་ཚེ། །
མི་ནས་མིར་འཁྲུངས་འཇམ་དཔལ་དཔའ་བོ་ཡིས། །
རྗེས་སུ་འཛམ་གླིང་ཁྱོན་ལ་པཎཌིཏའི། །
མཚན་སྙན་རབ་གྲགས་ཀུན་དགའ་རྒྱལ་མཚན་མཆོད། །
མཁྱེན་བརྩེ་ནུས་པའི་གཏེར་གྱུར་འགྲོ་བའི་སྐྱབས། །
འཇམ་དབྱངས་ངུར་སྨྲིག་འཆང་བ་ཆོས་ཀྱི་རྗེ། །
ཁྱེད་ཞབས་ཚེ་རབས་ཀུན་ཏུ་སྤྱི་བོས་བསྟེན། །
གཟུངས་སྤོབས་ཡོན་ཏན་དངོས་གྲུབ་བདག་ལ་སྩོལ།།
གདོང་ཐོག་གིས།
མཁས་དབང་གདོང་ཐོག་རིན་པོ་ཆེས།
ང་བོད་པ་ཞིག་ཡིན་པས། བོད་མི་རིགས་ཀྱི་ལར་ཞེན་འདོར་ཐུབ་པ་མི་འདུག དེར་བརྟེན་ངས་འདིར་བོད་མིའི་ཆིག་སྒྲིལ་བརྟན་པོ་ཡོང་བའི་ཆེད་དུ། ཆིག་སྒྲིལ་གྱི་འགལ་ཟླ་ཆོས་ལུགས་ཕྱོགས་འཁྱེར་གྱི་ལྟ་བ་ལ་ངོ་རྒོལ་བྱེད་པ་ཡིན།
གདོང་ཐོག་རིན་པོ་ཆེའི་དག་ཆའི་སྐོར་གྱི་དགོངས་འཆར།
བར་ལམ་ནས་བོད་མདོ་དབུས་ཁམས་གསུམ་དུ་བོད་པ་བརྒྱ་ལྷག་གིས་ཀྲུང་གོ་ལ་ངོ་རྒོལ་ལས་འགུལ་རང་ལུས་ཕངས་མེད་མེར་བསྲེག་བྱས་པའི་གནས་ཚུལ་ཐོས། དེ་ནི་བོད་དོན་ལ་ཕན་མེད་ཀྱི་ནོར་འཁྲུལ་ཞིག་རེད་སྙམ། གང་གིས་ཟེར་ན། རང་ལུས་མེར་བསྲེག་བྱས་མཁན་དེ་རྣམས་བོད་རང་དབང་གི་དོན་དུ་སེམས་ཤུགས་ཆེན་པོ་ཤ་སྟག་རེད།
ཀྲུང་གོ་ལ་ཁོ་ཚོ་མེད་ན་དགའ། ཁོ་ཚོས་བོད་རང་དབང་གི་དོན་དུ་རང་ཤི་རྒྱབ་པ་དེ་ཀྲུང་གོས་བོད་མི་བསད་པའི་མིང་མེད་པར་ཀྲུང་གོའི་བསམ་དོན་འགྲུབ་པ་རེད། གཞིས་སྡོད་བོད་པ་ཚོས་དེ་འདྲ་བྱས་པ་ལས་རྒྱལ་སྤྱིའི་འགྲོ་བ་མིའི་ཐོབ་ཐང་དང་ཆོས་དད་རང་མོས། བོད་ཀྱི་ཁོར་ཡུག་སྲུང་སྐྱོབ་སོགས་དོན་རྩར་བྱས་ཏེ་ཀྲུང་གོ་གཞུང་གི་དཔོན་རིགས་དག་དང་གདོང་དང་གདོང་ཐུག་སྟེ་སྐད་ཆ་བཤད་ཅིང། དེའི་རྒྱབ་རྩར་འཛམ་གླིང་རྒྱལ་ཁབ་ཁག་གི་དཔོན་རིགས་རྣམས་ལ་རྒྱབ་དཔང་གནང་བར་འབོད་སྐུལ་བྱས་ན་བོད་ཀྱི་སྣོད་བཅུད་གཉིས་ཀར་དེས་ཕན་ཐོགས་ཆེ་བ་ཡོང་སྙམ། དེས་ན་བཙན་བྱོལ་བོད་མི་དམངས་སྤྱི་འཐུས་ལྷན་ཁང་གིས་གཞིས་སྡོད་བོད་པ་ཚོར་སྲིད་དོན་ལས་རིགས་བྱེད་སྟངས་སློབ་སྟོན་གནང་གལ་ཆེ་ཞུ།
རྒྱ་གར་དང་བལ་ཡུལ་ནས་བཟོ་བསྐྲུན་སྤོས་ལ་མིང་གཟིམ་སྤོས་ཞེས་བྲིས་པ་ནོར། བདུག་སྤོས་ཡིན། མནྚལ་སོ་བདུན་མར་བདུག་སྤོས་མ་ཞེས་འདོན་པ་དང་། བོད་རྒྱ་ཚིག་མཛོད་ཆེན་མོར་ཡང་བདུག་སྤོས་ཞེས་གསལ། པོ་ཏ་ལ་གཟིམ་སྤོས་ཟེར་བའི་སྤོས་ཤུབ་ལ། མཆོད་སྦྱིན་གཉིས་ཀྱི་འགྱུར་གྱུར་ཅིག་བྲིས་པ་ནོར། རྒྱུར་གྱུར་ཅིག་ཡིན། བོད་ལྷ་ས་ནས་བཟོ་བསྐྲུན་བྱས་པའི་ལྷ་སའི་གནས་མཆོག་བདུག་སྤོས་ཞེས་པ་དང་། ལྷ་སའི་སྤོས་ཨང་དང་པོ་ཞེས་མིང་བྲིས་པ་དག དེས་ན་བཙན་བྱོལ་བོད་གཞུང་ཤེས་རིག་ལས་ཁུངས་ཀྱིས་ཡི་གེའི་དག་ཆ་མ་ནོར་བ་འདི་བཞིན་དགོས་པའི་སློབ་སྟོན་དགོས།
བཙན་བྱོལ་བོད་གཞུང་སྨན་རྩིས་ཁང་གིས་བཏོན་པའི་ལོ་ཐོར་བོད་ཟླ་ཞེས་བཀོད་པ་ནོར། ཧོར་ཟླ་སྟེ་རབ་བྱུང་བཞི་པའི་མེ་ཕག་ལོར་ཧོར་ཇི་གིར་རྒྱལ་པོས་མི་ཉག་གི་ལག་ནས་རྒྱལ་ས་ཐོབ་པའི་ཟླ་བར་བཀྲ་ཤིས་པའི་དགའ་སྟོན་བྱས་པ་མཆུ་ཟླ་ལོ་གསར་དུ་བཟུང་བ་དཀྱུས་སུ་ཤོར་བས་མཆུ་ཟླ་ལ་ཧོར་ཟླ་དང་པོ་གྲགས་ཞེས་རྒྱལ་དབང་ལྔ་པའི་རྩིས་དཀར་ནག་དྲིས་ལན་ལས་གསུངས་ཤིང། དུས་འཁོར་ལུགས་ལ་ནག་ཟླ་སོགས་ཉ་སྐར་བརྩི་བ་ལས་ཧོར་ཟླ་དང་པོ་དང་གཉིས་པ་སོགས་ཨང་གྲངས་ཀྱིས་བརྩི་སྲོལ་མེད། སྔོན་བོད་ལྷ་སའི་ལྕགས་པོ་རི་སྨན་རྩིས་ཁང་རིག་བྱེད་འགྲོར་ཕན་གླིང་ནས་བཏོན་པའི་ལོ་ཐོར་ཡང་ཧོར་ཟླ་ཞེས་བཀོད་ཡོད། ཡང་ཕྱི་ལོ་ཞེས་འཁོད་པ་དང་། ཡིག་ངག་གཉིས་ཀ་ཕྱི་ལོ་ཞེས་འབྲི་བརྗོད་བྱེད་པ་མ་དག་སྟེ། ཕྱི་ལོ་ཟེར་ན་ལོ་རྗེས་མ་ལ་གོ རྒྱ་གར་ཀང་ར་དཔལ་སྤུངས་ཤེས་རབ་གླིང་ནས་བཏོན་པའི་ལོ་ཐོར་ཡེ་ལོ་ཞེས་འཁོད། ལོ་འདི་ཡེ་ཤུ་མ་ཤི་ཀའི་འདས་ལོ་ཡིན། རིམ་པས་ཡེ་ཤུའི་ཆོས་ལུགས་ཡིན་མིན་ཁྱད་མེད་རྒྱལ་ཁམས་ཡོངས་སུ་འདས་ལོ་འདི་བརྩི་ནས་སྤྱིའི་འདས་ལོར་གྱུར་པས་སྤྱི་ལོ་ཞེས་འབྲི་བརྗོད་བྱེད་ན་འཐད་དོ། དེས་ན་བཙན་བྱོལ་བོད་གཞུང་ཤེས་རིག་ལས་ཁུངས་ཀྱིས་འདི་བཞིན་སློབ་སྟོན་གནང་དགོས།
བཙན་བྱོལ་བོད་གཞུང་ཟློས་གར་ཁང་གི་གླུ་གཞས་ཀྱི་གྲས་སུ་རྒྱལ་བ་ཚངས་དབྱངས་རྒྱ་མཚོའི་མགུར་གླུ་མེད་པ་ནོར། བོད་མདོ་སྨད་ཁུལ་དུ་ལོ་གསར་རིག་རྩལ་སྤྲོ་ཚོགས་དང་། དགོང་ཚོགས་ཞེས་པ་དག་ཏུ་རྒྱལ་བ་ཚངས་དབྱངས་རྒྱ་མཚོའི་མགུར་གླུ་འདུག བྱང་ཨ་མེ་རི་ཀའི་ནང་བོད་རིགས་སྤྱི་མཐུན་ཚོགས་པའི་དུས་སྟོན་ལ་ཚོགས་ཁང་གི་འཕྲད་དར་ལ་ཨིན་ཡིག་མ་གཏོགས་བོད་ཡིག་བྲིས་མེད་པ་དང་། ལས་རིམ་ཤོག་ལྷེར་ཡང་ཨིན་ཡིག་ལས་བོད་ཡིག་བྲིས་མེད་པ་ནོར། ཕྱི་རྒྱལ་མི་མང་པོ་འཛོམས་ཡོད་པས་ཁོ་ཚོས་བོད་ཡིག་གིས་འདང་གི་མེད་པ་ཡིན་ནམ། བོད་པ་འདི་ཚོས་བོད་ཡིག་ཤེས་ཀྱི་མེད་པ་ཡིན་སྙམ་དོགས་པ་སྐྱེ་སྲིད། འདི་ཐད་བྱང་ཨ་རིའི་ནང་ཡོད་བཙན་བྱོལ་བོད་གཞུང་སྐུ་ཚབ་དག་གི་སློབ་སྟོན་གནང་རྒྱུ་གལ་ཆེ་སྙམ།
བོད་མདོ་དབུས་ཁམས་གསུམ་ནང་ལོ་གསར་སྤྲོ་ཚོགས་དང་རིག་རྩལ་དགོང་ཚོགས་ཞེས་པ་འཚོགས་ནས་འཁྲབ་སྟོན་ནང་། ང་ཚོ་གདོང་དམར་བོད་པ་ཡིན། ཕ་མ་གཅིག་གི་སྤུན་མཆེད་ཡིན། རྡོག་རྩ་གཅིག་སྒྲིལ་གྱིས། བོད་དུས་རབས་གསར་པའི་ཡར་རྒྱས་གཏོང་དགོས་ཟེར་བ་སོགས་སྐད་འབོད་བྱེད་ཀྱི་འདུག ཁོ་ཚོ་ཀྲུང་གོའི་འོག་ཏུ་གནས་ཀྱང་དེ་འདྲ་བྱེད་ན་ང་ཚོ་བྱེས་སྡོད་བོད་པ་ཚོས་དེ་འདྲ་མི་བྱེད་པ་ཅི་ཡིན་ནམ། འདིའི་ཐད་ང་ཚོ་བྱེས་སྡོད་བོད་པ་ཚོས་ཁོ་ཚོས་བྱེད་སྟངས་ལ་དཔེ་བླངས་ནས་བོད་ཀྱི་སྲིད་དཔལ་རིག་གསུམ་ལ་ཕན་པའི་ལས་འགུལ་བྱ་རིགས་སོ།
ངས་ཇུས་མེད་ཇུས་གཏོགས་བྱས་པ་རེད་འདུག་ན་དགོངས་དག་ཞུ། བྱང་ཨ་མེ་རི་ཀར་སྡོད་པ་བོད་མདོ་སྟོད་ཧྲེ་ཧོར་གདོང་སྤྲུལ་བསྟན་པའི་རྒྱལ་མཚན་ནས་རབ་གནས་ཆུ་སྦྲུལ་ཧོར་ཟླ་༥ པའི་ཚེས་༢༨ སྤྱི་ལོ་༢༠༡༣་ཟླ་༥ པའི་ཚེས་༧ ལ།
གདོང་ཐོག་རིན་པོ་ཆེའི་དག་ཆའི་སྐོར་གྱི་དགོངས་འཆར།
གཟིམ་སྤོས་མ་རེད། བདུག་སྤོས་རེད།
འགྱུར་གྱུར་ཅིག་མ་རེད། རྒྱུར་གྱུར་ཅིག་རེད།
བོད་ཟླ་མ་རེད། ཧོར་ཟླ་རེད།
ཕྱི་ལོ་མ་རེད། སྤྱི་ལོ་རེད།
ཡེ་ལོ་མ་རེད། སྤྱི་ལོ་རེད།
ངས་ཇུས་མེད་ཇུས་གཏོགས་བྱས་པ་རེད་འདུག་ན་དགོངས་དག་ཞུ། བྱང་ཨ་མེ་རི་ཀར་སྡོད་པ་བོད་མདོ་སྟོད་ཧྲེ་ཧོར་གདོང་སྤྲུལ་བསྟན་པའི་རྒྱལ་མཚན་ནས་རབ་གནས་ཆུ་སྦྲུལ་ཧོར་ཟླ་༥ པའི་ཚེས་༢༨ སྤྱི་ལོ་༢༠༡༣་ཟླ་༥ པའི་ཚེས་༧ ལ།
གཟིམ་སྤོས་དེ། བདུག་སྤོས་ཀྱི་ཞེ་ས་ཡིན་ཁུལ་རེད།
གདོང་ཐོག་རིན་པོ་ཆེའི།
བཞི་པའི་ཡང་སྲིད་ལྔ་པ་འདས། །
ལྔ་པའི་ཡང་སྲིད་དྲུག་པ་དེ། །
སྤྲུལ་སྐུ་ཚད་དང་ལྡན་པ་དང་། །
བླ་མའི་མཛད་འཕྲིན་སྐྱོང་ནུས་ཤོག །
དགེ་ལུགས་པའི་བླ་རྒན་འགའ་རེས་ཡང་ཕྱོགས་རིས་ཀྱི་སྐད་ཆ་བཤད་ཡོང་གི་འདུག་མོད། གདོང་ཐོག་རིན་པོ་ཆེས་གང་དགག་པ་དེ་ཤུགས་ལྡན་ཡིན་པ་ལས་དགེ་ལུགས་པ་མིན་པ་ཤེས་པར་གྱིས། ཤུགས་ལྡན་ལ་དགའ་མཁན་ཞིག་ཡིན་ན་ནི་གང་ཡང་བཤད་འདོད་མེད།
# 3 པདྨ་ལགས་ཀྱིས་མཆན་བཏབ་པ།:
January 22nd, 2015 at 3:56 PM
ཨེ་མ་ཧོས་གདོང་ཐོག་རིན་པོ་ཆེ་སྐུ་འདས་པར་དགོངས་རྫོགས་སུ་སྨོན་ལམ་ཡག་པོ་གསུངས་འདུག་བཀའ་དྲིན་ཆེ་ཞུ། མཁས་པ་མཁས་པའི་གྲལ་ན་མཛེས་གསུངས་པ་ཅི་མ་བདེན། བོན་པོ་དང་ཁྱུང་སེ་ཟེར་བ་དང་ཅོ་རི་འདི་ཚོས་ཁྱི་ལྟོག་གནམ་ལ་ཟུག་པ་ལས་སྙིང་པོ་ཅན་ཞིག་ནམ་ཡང་བཤད་མ་མྱོང་བ་རེད། ཨེ་མ་ཧོས་སྨོན་ལམ་ཞིག་བདཏབས་པ་རེད་འདུག་པས། གདོང་ཐོག་དབུ་མ་ཆེན་པོའི་བསྟན་བཅོས་ལ་གཟིགས་དང་རང་ལུགས་བཞག དགེ་ལུགས་དགག། རྩོད་པ་སྤོང་བ་གོ་བོ་རབ་འབྱམས་དང་གཉིས་སུ་མེད་པ་རེད། ཁུ་ནུ་རིན་པོ་ཆེ་ལས་བྱང་ཆུབ་སེམས་སྐོར་དང་ཕྱག་ཆེན་ཐོབ་ཚུལ་དང་། དིལ་མགོ་མཁྱེན་བརྩེ་ལས་རང་བཞིན་རྫོགས་པ་ཆེན་པོ་ཞུས་ནས་ཐུགས་དམ་དུ་བཞེས་ཚུལ་དང་འཇམ་དཔལ་གཤིན་རྗེ་གཤེད་ཁོ་ན་ཐུགས་དམ་དུ་བཞེས་ཚུལ་རྣམ་ཐར་དུ་འདུག་པས་ཁྱུང་སེ་དམུས་ལོང་ལྟ་བུས་ལོང་གཏམ་གྱིས་སྨད་པ་ལས་བསྟོད་པ་སོང་མི་འདུག་གམ།
# 4 ཀརྡོ་གཉེར་ཕྱག་པ་་ལགས་ཀྱིས་མཆན་བཏབ་པ།:
January 22nd, 2015 at 11:32 PM
་་་་་་་་་་་་་ གདོང་ཐོག་དབུ་མ་ཆེན་པོའི་བསྟན་བཅོས་ལ་གཟིགས་དང་རང་ལུགས་བཞག དགེ་ལུགས་དགག། རྩོད་པ་སྤོང་བ་གོ་བོ་རབ་འབྱམས་དང་གཉིས་སུ་མེད་པ་རེད། ཁུ་ནུ་རིན་པོ་ཆེ་ལས་བྱང་ཆུབ་སེམས་སྐོར་དང་ཕྱག་ཆེན་ཐོབ་ཚུལ་དང་། དིལ་མགོ་མཁྱེན་བརྩེ་ལས་རང་བཞིན་རྫོགས་པ་ཆེན་པོ་ཞུས་ནས་ཐུགས་དམ་དུ་བཞེས་ཚུལ་དང་འཇམ་དཔལ་གཤིན་རྗེ་གཤེད་ཁོ་ན་ཐུགས་དམ་དུ་བཞེས་ཚུལ་རྣམ་ཐར་དུ་འདུག ་་་་་་་་་་་་་
# 5 ཀརྡོ་གཉེར་ཕྱག་པ་་ལགས་ཀྱིས་མཆན་བཏབ་པ།:
January 22nd, 2015 at 11:37 PM
པདྨའི་གཞིར་བཅས།
དབུ་མའི་བསྟན་བཅོས་བརྩམས་ཙམ་གྱིས། །
དགེ་ལུགས་དགག་ཅེས་བགད་མོའི་གནས། །
བྱང་སེམས་ཕྱག་ཆེན་ཐོབ་ཚུལ་དང་། །
རང་བཞིན་རྫོགས་ཆེན་ཐོབ་པ་བཟང་། །
ཀརྡོས་འདི་ཐལ།
# 6 ཀརྡོ་གཉེར་ཕྱག་པ་་ལགས་ཀྱིས་མཆན་བཏབ་པ།:
January 23rd, 2015 at 12:05 AM
གང་གང་རྐྱེན་ལས་རག་ལས་པ།།
དེ་དེའི་རང་བཞིན་གྱིས་སྟོང་ཞེས།།
གསུངས་པ་དེ་ལས་ཡ་མཚན་དུ།།
མེད་པར་གཟིགས་ལ་སུས་དགག་ནུས།།