……..རྩེ་སྐར།
གནག་སྣུམ་སྐྲ་ལོ་གླས་མའི་ལན་བུ་འགྲམ་པའི་མཁུར་ཚོས་ཐུར་དུ་དཔྱངས།།
བཅུ་དྲུག་ལང་ཚོའི་ནུ་འབུར་ཟུང་དེ་སྟོད་གོས་ཐུ་ལ་བཙན་གྱིས་བཙུར།།
གཞོན་ཤ་ཆགས་པའི་རྐེད་པའི་ལྡེམ་སྒེག་གོམ་པའི་འདེགས་འཇོག་བར་ན་གསལ།།
ཕོ་སྐྱེས་རིག་ན་ངོ་ཚའི་ཟོལ་ཞིག་ཟུར་མིག་གཡོ་བའི་ཞོར་ནས་མངོན།།
ད་ནི་མགོ་དཀྲིས་དམར་པོའི་འོག་ན་སེམས་ཀྱི་འདོད་པ་ཅི་ཞིག་ཡོད།
ཞོགས་པའི་གཟན་རྩྭ་ཆར་གྱིས་བཀྲུས་ཏེ་རི་དང་ལུང་ཁ་ནེམ་ཞིང་སྣུམ།།
གཡང་དཀར་ལུག་ཁྱུ་ལྷས་ལས་བུད་དེ་རྩི་མགོའི་ཟིལ་བས་སུག་བཞི་བརླན།།
ཤར་གྱི་སྐྱ་རེངས་དཀར་གསལ་གྱུ་ལེར་ས་གཞིའི་སྒལ་བ་ཉི་མས་དྲོས།།
རྫ་ཁའི་སྨུག་སྤྲིན་མིག་གིས་འཚོས་ཏེ་འཁྲེང་བའི་ལ་གཞས་ལེན་ཞོར་དུ།།
མདང་ནུབ་མགོ་དཀྲིས་དམར་པོ་འཁྱེར་ཏེ་བརྩེ་བ་བཞག་པའི་མྱི་དེ་བཙལ།།
ནུབ་ཁའི་མཚམས་སྤྲིན་རེ་ལྡེར་འཁྱིལ་བའི་མགོ་སྦྲ་སྨུག་པོའི་སྒོ་འགྲམ་ན།།
གཡང་ཟོག་འབྲི་མོ་རྡང་ལ་བསྟར་བའི་ཕྱུགས་ཀྱི་ལྷས་ར་གྲུ་བཞིའི་ནང༌།།
བསིལ་རླུང་ཡན་པོས་བསྐྱལ་ཏེ་འོང་བའི་ལྕི་བའི་དྲི་མ་སྣོམ་བཞིན་དུ།།
རྐེད་ན་བཟེད་པའི་བཞོ་ཟེའུ་ཁ་རུ་རེ་བའི་མིག་ཟུང་རྒྱང་ལ་ཕྱོགས།།
དོ་ནུབ་མགོ་དཀྲིས་དམར་པོའི་ཁུད་ནས་དངུལ་གྱི་མཛུབ་དཀྲིས་གོན་རྒྱུར་བྲེལ།།
ཁྱིམ་གྱི་ཕ་རྒན་རྒྱུ་ལ་སྲེད་དམ་འབྱོར་བདག་མྱི་ཞིག་གཉེན་དུ་བཟུང༌།།
བྱམས་ལྡན་ཨ་མས་ལས་འཕྲོ་ཡིན་ཟེར་གནས་ལ་འགྲོ་སའི་ཁྱིམ་ཞིག་བཙལ།།
ཅི་སྟེ་ཆ་རྒྱུས་མེད་པའི་མྱི་ཞིག་ཚེ་གཅིག་གཏན་གྱི་གྲོགས་སུ་བསྡེབས།
སང་ཞོགས་ཝ་ཞྭ་གྲ་དམར་དེ་ནི་མགོ་དཀྲིས་དམར་པོའི་ཚབ་ཏུ་གྱོན།།
རྟ་ཕོའི་གོང་ནས་མིག་ཆུ་རུམ་གང་བཞུར་བའི་སྐྱོ་བ་སུ་ཡིས་སངས།།
ཉི་མའི་འོད་ཐིག་ཟེར་ལམ་ལམ་མེར་རླབས་ཀྱིས་སྒུལ་བའི་ཆུ་བོའི་གཞུང༌།།
ཡ་གིའི་རི་བོའི་སྤོ་ནས་ལྷུང་སྟེ་རླུང་གིས་རྒུམ་པའི་རྩ་ལྡུམ་དག།
དབུ་བ་དཀར་པོའི་ཐོད་དུ་བབས་ཏེ་ཆུ་ཁར་གཡེང་བའི་བར་སྐབས་ན།།
ཤུག་དམར་ཟོ་བ་ལག་པས་བསྐྱོར་བའི་ན་ཆུང་མ་ཞིག་ཡུན་རིང་ལྷག།
མགོ་དཀྲིས་དམར་པོའི་འོག་གི་སྐྱོ་བ་ཆུ་མོར་གླེང་བ་ཅིས་མ་ཡིན།།
ད་ནས་སྙིང་གི་དཀྱིལ་ལ་བཅངས་པའི་ཆུང་འདྲིས་བྱམས་པ་རྒྱང་ནས་བསྐྱུར།།
དོགས་ལ་འཚེར་བའི་གནས་ཁྱིམ་ཞིག་ནས་ཆ་མེད་ངོ་སོ་འཚོ་བཞིན་དུ།།
བརྩེ་བའི་མཛུབ་གོར་ལུས་ནས་རྙིང་ཏེ་སེམས་གཏམ་ཡོད་ཚད་ཁོག་ཏུ་བཅུག།
དང་ཐོག་སེམས་པ་གཅིག་ལ་གཏད་དེ་སྙིང་གཏམ་གླེང་སའི་མྱི་དེ་ལ།།
འཕྲད་པའི་ལས་སྐལ་ཡོད་ན་བསམ་སྟེ་མགོ་དཀྲིས་དམར་པོར་ཡང་ཡང་བལྟས།།
དྲ་གྲོགས་འཇིགས་བྱེད་ཚེ་རིང་ལགས་ཀྱིས་<<མགོ་དཀྲིས་དམར་པོ་>>ཞེས་པའི་བརྩེ་དུང་གི་ཚགས་པར་ཞིག་པར་བསྐྲུན་བྱ་འཆར་གྱི་གསལ་བརྡ་དེས་རྒྱུ་དང་རྐྱེན་ལྟ་བུ་བྱས་ཏེ། ཁོ་བོའི་སེམས་སུ་གློ་བུར་ཐོལ་བྱུང་གི་ཚུལ་དུ་<མགོ་དཀྲིས་དམར་པོའི་འོག་གི་གསང་བ་>ཞེས་པའི་བཅད་རྩོམ་འདི་འདྲ་ཞིག་འབྲི་རྒྱུ་བྱུང༌།
སྙན་པ་ཟེར་ན་འདི་ལྟ་བུ་ཞིག་དགོས་ཚོད་རེད་དེ། ཅང་མི་འདུག་སྙམ།
སྙན་ངག་པ་ཟེར་ན་འདི་ལྟ་བུ་ཞིག་དགོས་ཚོད་རེད་དེ། ཅང་མི་འདུག་སྙམ། དགོངས་འདག། གོང་དུ་ངག་ཆད་སོང།