ཡེ་ཤེས་དཔལ།
ཨ་ཧོ་ཁ་བརྡ་ཚང་གི་དྲ་རྒྱ་ཉུལ་སྐབས།།
ཧ་ཅང་སེམས་པ་སྐྱོ་པའི་གཏམ་འདི་ཐོས་བྱུང་།།
ཨ་ཁུ་ཀླུ་སྨྱོན་ཆབ་བྲག་ཕོ་ཉ་གཉི་ཀས།།
ཧ་ལམ་མཚུངས་པའི་སྙན་ངག་ལྷུག་པོར་བྲིས་འདུག །
ཨ་རིག་ཡུལ་ནས་སྐྱེས་པའི་བླུན་པོ་ངས་ཀྱང་།།
ཧ་བོ་ཟེར་བ་ཕ་ཡུལ་གཅིག་པས་སྟབས་ཡིན།།
ས་ཆེན་དབང་དུ་བསྡུས་པའི་བོད་ཀྱི་ལྷ་ཚོགས།།
ཤ་ཁྲག་ཧུབ་ཀྱིས་མིད་པའི་གཤིན་རྗེ་རྒྱལ་པོ།།
ལས་འབྲས་གཙུག་ཏུ་བཀུར་བའི་ཉམ་ཆུང་མི་ཡི།།
རང་སྲོག་གློ་བུར་འཕྲོག་པའི་ཚུལ་འདིས་ཅི་ཉེས།།
ཡར་མར་ཡུལ་ཕྱོགས་ཀུན་གྱི་ཕུ་ནུ་དཀྲུགས་ཤིང་།།
འ་ཅག་བོད་ཀྱི་དོན་ཆེན་དགྲ་ལ་བཙོང་བའི།།
ཟ་འདྲེ་རྒྱ་དམར་་གཤེད་མའི་རང་གཟུགས་ཅན་ཚོ།།
ཞག་གཅིག་ན་རྒྱུ་མེད་པའི་ཚུལ་འདི་མཚར་རོ།།
ཝ་མོའི་གཡོ་ཐབས་འཕྲུལ་ལ་མི་ཚེ་གཟད་ཅིང་།།
ཛ་ཡི་བསྟན་དོན་ཡང་དག་ལྡོག་སྒྲུབ་མཁན་ཚོར།།
ཚར་གཅོད་ལས་ཀྱི་དམ་ཚིག་ཐོད་དུ་བཅིངས་པའི།།
ཙཱམུཊི་སོགས་ད་ལྟ་གང་ན་ཡོད་དམ།།
མ་དང་མཁའ་འགྲོའི་ཚོགས་ལ་ནུས་མཐུ་ཡོད་ན།།
བར་དོའི་མུན་ནག་ཁམས་སུ་ཁ་སང་སླེབས་ཤིང་།།
ཕར་ཕྱོགས་གཤིན་རྗེའི་ཡུལ་ལ་རྒྱུས་མངའ་མེད་པའི།།
པ་པོར་ཞེན་ཆགས་ཅན་དེར་མགོན་སྐྱབས་མཛོད་ཅིག །
ནད་བདག་བཙན་པོས་འཕྲུལ་ཞགས་སྐེ་ལ་བསྐོན་ཀྱང་།།
ད་ལྟའི་བར་དུ་མི་ཚེ་སྙུ་གུར་བསྟིམས་ཏེ།།
ཐ་མའི་ཁ་ཆེམས་ཁ་སང་འཇོག་པའི་སྐབས་ལ།།
ཏ་ཐ་གཱཏའི་སྒོམ་སྒྲུབ་གནང་སྐད་འདུག་གོ།།
ཉམ་ཆུང་ཕ་ལོས་གསོས་པའི་བུ་ཕྲུག་གཉིས་དང་།།
ཇ་ཆང་རྩེད་འཇོས་འཚར་བའི་ཚེ་གཅིག་ཆུང་མ།།
ཆགས་ཞེན་གཞན་ལས་ལྷག་པའི་ནང་མི་སྤུན་ཟླར།།
ཅང་མེད་རྒན་པོ་ངས་ཀྱང་མྱ་ངན་ཞུ་འོ།།
ང་གཉིས་མི་ཚེར་མཇལ་འཕྲད་གཏམ་གླེང་མེད་ཅིང་།།
ག་ཤེད་ཅིག་ན་ཡོད་རབས་ཐོས་པས་མ་ཚད།།
ཁ་བ་གངས་རིའི་ལར་ཞེན་ཆེ་བའི་སྟེང་ལ།།
ཀ་མད་སུམ་ཅུར་དུང་བ་ཟབ་ཚུལ་གོ་མྱོང་།།
ཀ་རྩོམ་ལུགས་ལྡོག་ཡིན་པའི་ཟོལ་གྱི་གླུ་འདི།།
ཁ་སང་ཁ་བ་ཅན་དང་གཏན་དུ་གྱེས་པའི།།
གངས་དཀར་ཆབ་བྲག་མགོན་པོ་ཕྱག་གཉིས་པ་ལ།།
ང་ཡིས་མར་མེ་རྐང་མཆོད་གཅིག་གི་ཚབ་ཡིན།།
འདི་ནི་ངོ་མི་ཤེས་ཀྱང་ཁོ་བོའི་ཕ་ཡུལ་གཅིག་པ་མགོན་པོ་ཚེ་རིང་འདས་རྗེས་ཀྱི་མཆོད་འབུལ་ཚབ་ཆབ་བྲག་ཕོ་ཉར་ལད་ཟློས་བྱས་ནས་ཤར་མར་བྲིས།