ཀོ་ལི་གྷལ་གཞུང་པ་ཚེ་དབང་བསོད་ནམས།
བཙན་བྱོལ་བོད་མིའི་སྲིད་སྐྱོང་དང་སྤྱི་འཐུས་ཀྱི་སྔོན་འགྲོའི་འོས་བསྡུ་དེ་སླེབས་ལ་ཉེ་བས། མང་གཙོའི་ཐོབ་ཐང་རང་གི་འོས་ཤོག་དེ་མི་གཞན་གྱི་ལྐོག་ཇུས་འོག་ནམ་ཡང་ཤོར་མི་ཉན་ལ། མང་གཙོ་དང་རང་དབང་འདྲ་མཉམ་ཁྲིམས་ཀྱི་དབང་བསྒྱུར་ལ་འགན་འཁུར་ནས་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་སྒྲུབ་ནས་འོས་བསྡུའི་ཆ་ཤས་ལེན་དགོས། ཆོལ་ཁ་དང་ལུང་ཚན་ཤོག་བསྒྲིལ་ཅན་གྱི་ཚོགས་སྐྱིད་ཁག་གིས་ཕྱོགས་གཏོགས་ཆབ་སྲིད་ལ་འགན་འཁུར་ནས་སྲིད་སྐྱོང་དང་སྤྱི་འཐུས་ཀྱི་སྔོན་འགྲོའི་འོས་བསྡུ་མ་གནང་སྔོན་དུ་སྲིད་སྤྱིའི་འོས་མི་བཏོན་ནས་ཞི་བའི་མི་མང་མདུན་དུ་བཀྲམས་བཞིན་པ་དང་། སྲིད་སྤྱི་ལ་ལང་མཁན་ཚོས་བཅའ་ཁྲིམས་ནང་མ་གསལ་བའི་ཚིག་རང་བཙན་དང་དབུ་མ་ཁ་དང་ལྕེ་ལ་སྦྱར་ནས་ཆོལ་ཁ་དང་ལུང་ཚན་རྒྱབ་ལ་ཁྱེར་ནས་མི་མང་གི་མདུན་དུ་འོས་སློང་བཞིན་པར་ཞིབ་ཏུ་དཔྱད་སྐབས། ཁྲིམས་འགལ་ནས་སྒྲིག་འགལ་ལ་ཁ་ཕྱོགས་ནས་ང་ཚོའི་མང་གཙོ་(Democracy)དེ་གྲལ་རིམ་དམངས་གཙོ་(Proletarain)ལ་ཁ་ཕྱོགས་འདོད་པ་མ་རེད་དམ།
དེང་སང་འོས་བསྡུ་སླེབས་ལ་ཉེ་བས་དྲ་ལམ་དང་ངོ་དེབ་སོགས་ཀྱི་ནང་དགྲ་དགའ་གཉེན་སྡུག་ཏུ་འགྲོ་བའི་རང་ཕྱོགས་ཀྱི་འོས་ཐོབ་ཐབས་སུ་འོས་མི་གཞན་ལ་སྐྱོན་བརྗོད་མང་དག་སྤེལ་བཞིན་པ་སོགས་ལ་དཔྱད་སྐབས། རང་རྒྱལ་གཞན་ཕམ་གྱི་ཆབ་སྲིད་ཙམ་ལས་སྤྱི་ཚོགས་དང་སྒྲིག་འཛུགས་ལ་འགན་འཁུར་སྤུ་ཙམ་ཡང་ལེན་མི་ཐུབ་པ་ཤ་སྟག་ཆབ་སྲིད་སྡིངས་ཆའི་སྟེང་བསྐྱེལ་ཐབས་ཁོ་ནར་སོང་། བཙན་བྱོལ་བོད་མིའི་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་སྒྲུབ་ནས་གང་ཟག་སྒེར་གྱི་བསམ་ཚུལ་གླེང་པ་འདིས་ཀྱང་མ་འོངས་བོད་ཀྱི་མང་གཙོའི་འཕེལ་རིམ་ནང་ཕྱོགས་གཏོགས་དང་འགོ་འདྲེན་གྱི་དྲི་མ་ཙམ་ཡང་མི་ལྷག་པའི་བསྔོ་བ་མང་ཙམ་བགྱིས་ཆོག
ངའི་འོས་ཤོག་སྟེ་་་་གོང་བླ་མའི་ཆེད་དུ་མིན། བར་གྱི་དབུ་མའི་ཆེད་དུ་མིན། འོག་གི་ཁ་བདེ་ལྕེ་བདེ་ཚོའི་ཆེད་དུ་མིན། བོད་མི་རིགས་ཀྱི་ཆེད་དུ་ཨ་ཚོགས་ཀླུ་མཁར་བྱམས་ལ་དབང་ངེས་ཡིན།