མངོན་བསྟོད་གླེགས་བམ་ཞིག་ཐོན་པ།

ཟླ་སྔོན་མའི་ཚེས་ཉེར་གསུམ་ཉིན་ཨ་མྱེས་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གིས་མངོན་བསྟོད་གླེགས་བམ་ཞིག་དབུ་འབྱེད་གནང་ཡོད། གླེགས་བམ་དེ་ནི་གུས་པར་ཡུན་རིང་འགྲོགས་འདྲིས་ཟབ་པའི་བོད་རིག་པའི་མཁས་དབང་ཨེ་ལིའེ་ཊི་ སྤེར་ལིང་(Elliot Sperling)ལགས་ལ་མངོན་བསྟོད་ཆེད་ཕྱོགས་བསྒྲིགས་བྱས་པའི་རྩོམ་ཡིག་སྣ་འཛོམས་ཀྱི་གླེགས་བམ་ཞིག་རེད། དེབ་འདི་རྩོམ་སྒྲིག་བྱེད་པོ་ནི་བོད་རིག་པའི་མཁས་པ་རྒན་པ་རོ་བྷི་(Roberto Vitali)ལགས་རེད། དེབ་འདིའི་མཚན་བྱང་ལ་ “Trails of the Tibetan Tradition: Papers for Elliot Sperling”[བོད་ཀྱི་གནའ་སྲོལ་རྗེས་ཤུལ་ཏེ། སྤེར་ལིང་གི་ཆེད་དུ་(བྲིས་པའི་)དཔྱད་རྩོམ་ཁག]་ཅེས་པ་ལྟ་བུ་ཞིག་འཁོད་འདུག འདིར་རྩོམ་ཡིག་གང་འཁོད་པ་རྣམས་ཀྱི་དཀར་ཆག་དང་རྩོམ་ཡིག་འདི་དྲ་ཐོག་ནས་ཕབ་བཤུ་བྱེད་སའི་སྦྲེལ་ཐག་བཅས་གཤམ་དུ་བཀོད་ཡོད།
ངས་ཆེད་ལས་མཁས་པ་ལ་མངོན་བསྟོད་བྱེད་པའི་ལམ་སྲོལ་ཞིག་ཡོད་པ་གོ་མྱོང་མོད། འདི་ལྟ་བུ་ཞིག་ཡིན་པ་ཐེངས་འདིར་མ་གཏོགས་རྒྱུས་མ་བྱུང་། མངོན་བསྟོད་གླེགས་བམ་ཞེས་པ་འདི་ལ་ ཧྥེ་སེ་ ཞི་རིབ་ཊི་ (Festschrift) ཞེས་བརྗོད་ཅིང་། ཚིག་འདི་ནི་འཇར་མཱན་གྱི་སྐད་ཅིག་ཡིན་ལ། དེའི་སྒྲ་བཤད་ནི་ “དགའ་སྟོན་ཡི་གེ་” ལྟ་བུ་ཞིག་ཡིན་འདུག དེ་ཡང་ཆེད་ལས་མཁས་པ་གང་ཞིག་ལས་འཁྱུར་ངལ་གསོ་བྱེད་པའི་སྐབས་སམ་ཡང་ན་དགུང་ན་དྲུག་ཅུ་རེ་ལྔ་ལ་ཕེབས་པ་སོགས་དུས་ཁྱད་པར་ཅན་ལ་དམིགས་ནས་རང་གི་བློ་ཉེའི་ལས་གྲོགས་རྣམ་པ་དང་སློབ་མ་འབུམ་རམས་པ་ཐོན་ཟིན་པ་སོགས་ཀྱིས་རྩོམ་ཡིག་བྲིས་པ་རྣམས་ཕྱོགས་སྒྲིག་གིས་དེབ་ཆུང་ནས་པོད་མང་པོའི་བར་གྱི་མངོན་བསྟོད་གླེགས་བམ་འདོན་སྤེལ་བྱེད་སྲོལ་ཡོད་འདུག བརྗོད་གཞི་ཡང་མངོན་བསྟོད་བྱེད་སའི་མཁས་པ་ཁོང་གི་ཞིབ་འཇུག་བརྗོད་གཞིའམ་ཁོང་དགའ་སའི་བརྗོད་གཞི་ལ་འབྲེལ་ནས་དཔྱད་རྩོམ་སྤེལ་གྱིན་ཡོད་འདུག་ལ། དེ་ཡང་མངོན་བསྟོད་བྱེད་སའི་མཁས་པ་ཁོང་ལ་མ་བཤད་པར་གསང་བ་བྱས་ཏེ་དེབ་ཐོན་པའི་སྐབས་སུ་གཞི་ནས་མཁྱེན་དུ་འཇུག་པ་དང་། མངོན་བསྟོད་གླེགས་བམ་གྱིས་བསྔགས་ཡུལ་གྱི་མཁས་པ་དེ་ལ་གདེང་འཇོག་ཆེན་པོ་བྱས་པའི་ངོས་འཛིན་བྱས་པ་མ་ཟད། མཆེད་གྲོགས་རྣམས་ཀྱིས་དེ་ལྟར་མངོན་བསྟོད་བྱས་པའང་ཡ་རབས་བཟང་སྤྱོད་ཅིག་ཏུ་བརྩི་སྲོལ་ཡོད་འདུག མཁས་པ་རེ་ཟུང་ལ་སློབ་གླིང་མི་འདྲ་བ་རྣམས་ཀྱིས་མངོན་བསྟོད་གླེགས་བམ་མི་འདྲ་བ་རེ་སྤེལ་ཡོད་པ་མ་ཟད། ད་དུང་བརྗོད་གཞིའང་མཁས་པ་གང་དེའི་ཆེད་ལས་ལ་དཔགས་ཏེ་སྣ་ཚོགས་པ་ཅན་ཡོད་འདུག
ཐེངས་འདིའི་མངོན་བསྟོད་གླེགས་བམ་འབུལ་ཡུལ་མཁས་པ་སྤེར་ལིང་ལགས་ནི་རྣམ་དཔྱོད་ཅན་དང་གྲགས་ཆེ་བའི་བོད་རིག་པ་བ་ཞིག་ཡིན་པ་མ་ཟད། བོད་མི་རྣམས་ལ་ཧ་ཅང་ཤ་ཚ་དང་གདུང་སེམས་མཉམ་སྐྱེད། གུས་ཞབས་བྱེད་མཁན་གྱི་བོད་ཀྱི་གྲོགས་པོ་རྣལ་མ་ཞིག་ཀྱང་རེད། ཁོང་གིས་བོད་མིར་བཟུང་བའི་བརྩེ་དུངས་དེ་ནི་འབུར་དུ་ཐོན་པ་དང་ཧ་ཅང་གཏིང་ཟབ་པ་ཞིག་རེད། ཁོང་ལ་འདི་ལྟར་མངོན་བསྟོད་ཀྱི་གླེགས་བམ་ཞིག་འབུལ་རྒྱུ་བྱུང་བ་ནི་སྐལ་བ་བཟང་པོ་ཞིག་རེད་ལ། ཕྲན་བུས་ཀྱང་རྒྱ་མཚོ་ལ་ཆུ་ཐིགས་ཀྱི་ཚུལ་དུ་འདིར་ཞལ་འདེབས་ཙམ་འབུལ་རྒྱུ་བྱུང་བ་ནི་ཧ་ཅང་ཡིད་ཚིམས་པའི་གནས་ཤིག་ཡིན། དེར་བརྟེན་མངོན་བསྟོད་གླེགས་བམ་འདི་ལྟར་ཐོན་པའི་རྩོམ་སྒྲིག་པ་དང་དཔར་སྐྲུན་སོགས་ཚང་མ་ལ་དགའ་མགུ་གུས་ཞབས་དང་བཅས་ཐུགས་རྗེ་ཆེ་ཞུ་བ་ཡིན། དེབ་འདིའི་སྐོར་མཁྱེན་འདོད་ཡོད་པ་དང་དེབ་འདིར་འཁོད་པའི་རྩོམ་ཡིག་བཀླག་འདོད་ཡོད་པ་རྣམས་ཀྱི་མཁྱེན་རྟོགས་ཆེད་གླེགས་བམ་འདིའི་དཀར་ཆག་གཤམ་གསལ་ལྟར།

གོང་གསལ་རྩོམ་ཡིག་རྣམས་དྲ་ཐོག་ནས་ཕབ་ལེན་ཞུ་སའི་འབྲེལ་ཐག་ འདི་ཡིན། http://digitalhimalaya.com

ཡང་དེབ་འདི་ཨ་མ་ཛོན་ནས་ཉོ་ན་དྲ་ཐག་འདི་ཡིན།  http://www.amazon.com