སྨྱུག་མདའ།
རྐང་རྗེན་མགྲིན་པ་དེ་རུལ་བ་ཤེས།།
སུག་ལག་སྒུར་མོ་ཚོ་ཆེ་ཚོད་འདུག།
ཁ་སང་ཉི་མ་ལ་དེ་ལྟར་གླེང་།།
ཡིག་ཐུམ་སེར་པོ་ཚང་འདི་ལྟ་འོ།།
འགྲམ་གྱི་མི་སྐད་ལ་སྒྲ་ནི་ཆེ།།
གློག་གི་བར་གསེང་ལ་རླུང་ཞིག་ཁྱབ།།
སྟོན་པ་གཉིད་ཤོར་གྱིས་མགོ་བོ་གཡུགས།།
ན་བཟའ་དམར་པོ་འདི་དམག་ཅིག་རེད།།
རྐང་འཇབ་ལག་རྩུབ་ཀྱི་འཇའ་གཟུགས་ལ།།
འགད་རྫས་ཇི་བཞིན་དུ་འུར་འུར་འབར།།
སྨོན་ལམ་ཐེད་པོ་ཞིག་ཟློས་ཀྱིན་མོད།།
དྲོ་འཁྱག་མི་རན་པའི་ཁ་ངོ་གསིག།
ངས་ནི་རང་ཉིད་ཀྱི་རྣ་བ་བཀབ།།
བཅོས་མའི་གཏམ་ཟོལ་གྱི་ནད་ཚ་བཀག།
མིག་ཙམ་འབྱེད་འདོད་ཀྱི་ཡི་ག་ཆད།།
ཇི་ལྟར་འཚང་ཁ་ཡི་གྲིབ་མ་ཉོབ།།
མི་ཚོགས་ཡ་ཡོ་ཞིག་འགུལ་བ་འང་།།
ཆར་བའི་རླན་ཆ་རུ་སྣུམ་ཞག་ཐིགས།།
ཨ་ཧོ་མང་མང་གི་ཆོ་འཕྲུལ་ལ།།
སྨྲེང་གླུ་ཚན་པ་ཞིག་གདངས་སུ་གྱེར།།
རྨི་ལམ་ལྐུགས་པ་ཡི་མཚན་གཞུང་ལ།།
ངག་གི་སྡེབ་སྦྱོར་ལ་གོ་བརྡ་འཁྱག།
རྦབ་ཆུ་གནག་པོ་ཞིག་སྐེ་ལྟག་བཞུར།།
བདག་གི་རྩིས་འཁོར་དུ་ས་རྡུལ་སྤྲུག།
སྲང་ལམ་ཉུལ་མཁན་གྱི་ཤ་སྦྲང་ལ།།
མཆན་གྱི་མཛུབ་མོ་རུ་ལག་རྩལ་འདུག།
ཚིག་གིས་རྡེག་ཤུལ་ཏུ་ཚིག་མཛོད་ཕབ།།
ལས་ཀས་ཟ་འཕྲུག་ཅིག་བྱིན་པ་ཚོར།།
རྣམ་ཤེས་སྣ་ཚོགས་ཤིག་མུན་པས་བཏུམས།།
སྨུག་སྤྲིན་ལང་ལོང་ལ་དལ་གྱིས་སྙིལ།།
གང་མིན་འདི་མེད་ཀྱི་བར་དོ་ཚོས།།
ཁ་བའི་རི་སྡེ་འདི་རབ་ཅིག་དཀྲུགས།།
ཁྲག་དམར་བསྔོ་ཡིག་ཀྱང་མཐོ་ལ་བརྩེགས།།
ཉི་མ་ལྷ་ས་རུ་དྲན་ཤིང་བཞག།
དོ་དགོང་ཡར་ཀླུང་གི་བཞུར་རྒྱུན་འཁྱོར།།
ལོ་རྒྱུས་ནག་པོ་ཞིག་ལྡད་ཀྱིན་འཁྱོར།།
ངྷ་སའི་ཟང་ཟིང་གི་ཉིན་ཞག་འདྲོགས།།
མྱི་ཁའི་གྲོང་གསེབ་ཏུ་སྤྲིན་པ་འཁྲིགས།།
བཙན་པོའི་ལོ་རྒྱུས་ཤིག་རྒྱང་དེད་བྱས།།
ཁ་ཆུའི་སྟེང་འོག་ཏུ་ཞུམ་ཞུམ་གཉིད།།
མདུན་གྱི་རི་ངོས་ནི་གྲིབ་ཡོར་གོན།།
ཉི་འོད་འབབ་ས་ཞིག་གང་དུ་མཆི།།
སེམས་རྩ་དྲག་ཁོལ་གྱི་ག་རེ་བྱེད།།
མི་ཆོས་ལམ་ལུགས་ཀྱང་ཧི་ཧི།།
2015/༩/༡༣ མཚན་མོར།