སྙན་བཟང་གཡུང་དྲུང་ཚེ་རིང་།
སྡུག་བསྔལ་རྒྱ་མཚོར་བྱིང་བའི་ལུས་ཅན་འགྲོ།།བདེ་ཆེན་ལམ་དུ་འགོད་པའི་འདྲེན་པ་རྗེ།།ཤར་གདོང་བློ་བཟང་བཤད་སྒྲུབ་རྒྱ་མཚོ་ལ།།མི་ཕྱེད་དད་པའི་ལན་མང་གསོལ་བ་འདེབས།།མདོ་ཁམས་གཡར་མོ་ཐང་གི་འགྲོ་རྣམས་ཀྱིས།།བསོད་ནམས་ཡོལ་གོར་བསྐྱིལ་བའི་ལྷ་ཡི་མཚོ།།རྟེན་འབྱུང་རླུང་ཤུགས་དཀར་པོའི་ཉེར་བསྲུབས་པས།།གང་སྐུ་ཟླ་གཞོན་ལྗོངས་འདིའི་རྒྱན་དུ་བཞད།།ཟླ་བཞིན་དཀྱིལ་འཁོར་རྫོགས་པའི་བཞིན་རས་ལ།།སྔོན་སྨོན་སྟོང་གི་ཆབ་ཀྱིས་ཁྲུས་བྱས་པའི།།སྙིང་རྗེའི་འཛུམ་དཀར་གཡོ་བའི་རྣམ་འཕྲུལ་གྱིས།།ས་གསུམ་སྐྱེ་དགུའི་སྙིང་ལ་བདེ་དགའ་བསྐྲུན།།ཁ་གྱ་འཇམ་དབྱངས་དཔལ་གྱི་བཞུགས་ཁྲི་ལ།།བྱས་བསགས་གནམ་གྱི་རྒྱལ་མོའི་རྒྱས་བཏབ་པས།།གང་སྐུ་མཛེས་པའི་རྒྱན་དུ་མངོན་བཞུགས་ཏེ།།རྒྱལ་བསྟན་གདུགས་ཆེན་དཀར་པོ་མཁའ་ལ་བསྒྲེངས།།འདྲེན་མཆོག་བློ་བཟང་བསྟན་པའི་ཞབས་སྐྱེས་རྡུལ།།ཆོས་ཀྱི་འཁོར་ལོའི་ཟོལ་གྱིས་རབ་བཅིངས་ཏེ།།ཐུགས་སྟོབས་ལྷ་ཆེན་རལ་བའི་ལང་ཚོ་ཡིས།།གཙུག་ལག་གངྒའི་མཛེས་མ་གྲོགས་སུ་བསུས།།མདོ་སྔགས་ཆོས་ཀྱིས་བརླན་པའི་བསྟན་པའི་མགོན།།འཇིགས་མེད་གཉེན་དུ་བཀུར་ཏེ་ཐུགས་སྟོབས་ཀྱིས།།རམ་འབྱམས་གཞུང་ལུགས་བརྒྱ་ཡི་གདུགས་དཀར་མོ།།བསྒྲེངས་པའི་གྲགས་དཀར་སྐྱེ་དགུའི་ཁ་ལ་འགྱུ།།ཕས་རྒོལ་རལ་བ་རྩ་ནས་གཅོད་པའི་བཤེས།།བླ་ཁོ་ཤེས་རབ་རྒྱ་མཚོའི་ཞབས་གཏུགས་ནས།།དབང་ལུང་མན་ངག་བདུད་རྩིའི་དྭངས་མའི་མཚོ།།རོ་མངར་མྱངས་པས་གཟི་བྱིན་བླ་ན་འབར།།རྒྱལ་བའི་ལམ་རིམ་ཆེན་མོའི་ཤིང་པར་ལ།།ཞུ་ཆེན་ཞིབ་གསལ་མཛད་པའི་ལེགས་བྱས་ཀྱིས།།དྲེགས་ལྡན་སྐྱེས་བུའི་སྙིང་ལ་སྐྱེངས་སྟེར་བ།།ཁྱེད་གཅིག་ཁོ་ན་མེད་ཅེས་ལྷ་ཡིས་གླེང་།།ཁྱད་པར་གང་ཐུགས་ཡོན་ཏན་རྒྱ་མཚོའི་ནོར།།ཇི་ལྟར་ལེན་པའི་སྤོབས་པ་ཞུམ་གྱུར་པས།།བུ་སློབ་བློ་དང་འཚམས་པའི་དཀའ་གནད་རྒྱ།།གྲོལ་བའི་བཀའ་དྲིན་ཚེ་འདིར་གཞལ་ནུས་མིན།།ལྗོངས་འདིར་ཁྲག་གི་དར་ཁ་ཆགས་པའི་དུས།།གང་སྐུ་ལྕགས་ཀྱི་སོ་ཁར་གཏད་ནའང་།།མ་ཉམས་དམ་པའི་རང་རྟགས་ངོ་མཚརགླུ།།གཟུགས་ཅན་ཟོལ་གྱིས་སྐྱེ་དགུའི་སྙིང་ལ་བབས།།འགྲོ་བ་ས་ཡི་སྙིང་གི་བསིལ་འཇམ་ཟླ།།སླར་ཡར་མུན་པའི་ཕུག་མདོར་ཤར་གྱུར་པས།།ཟབ་རྒྱས་ཆོས་དང་སྲོལ་རྒྱུན་རིག་པའི་གནས།།བསྐལ་བར་གནས་པའི་འོད་དཀར་རྒྱན་དུ་བཀོད།།སྡེ་བཞིའི་འདུལ་ཁྲིམས་མཛེས་པའི་བསྟན་འཛིན་ལ།།རྒྱལ་བ་བློ་བཟང་གྲགས་པའི་བྱང་ཆུབ་ལམ།།དམར་ཁྲིད་གནང་བའི་ཐུགས་རྗེ་བརྩེ་བའི་ཁྱོན།།ཇི་ལྟར་གཞལ་བའི་སྤོབས་པ་བག་ལ་ཞ།།དཔལ་ལྡན་བྱ་ཁྱུང་ཐེག་ཆེན་དར་གླིང་ནས།།ཁྱིམ་དང་ཁྱིམ་གྱི་རོ་ལ་ཐུགས་ཕྱུངས་ཏེ།།རྒྱལ་བསྟན་བདག་གིར་བཞེས་པའི་བསྟན་འཛིན་སྡེ།།བསྙེན་རྫོགས་སྡོམ་རྒྱུན་གནང་བ་གྲངས་མི་ལངས།།སྲིད་འདིའི་རིན་ཆེན་བརྡལ་བའི་དཀོར་མཛོད་ཀྱིས།།མཚོན་ནུས་མིན་པ་ལེགས་བཤད་ལྷུན་པོའི་ཚད།།ཨེ་མ་གླེགས་བམ་ཟོལ་གྱིས་བབས་པའི་ནོར།།མ་ཐེག་དབྱིག་འཛིན་བུ་མོའི་འཁུན་སྒྲ་འབྱིན།།མཉམ་མེད་རྒྱལ་བའི་རང་ལུགས་མདོ་སྔགས་ཆོས།།ཇི་ལྟར་གསུངས་པའི་གདམས་ངག་ཆར་རྒྱུན་གྱིས།།སྙིང་ཁམས་བརླན་པར་བྱས་པའི་འགྲོ་རྣམས་ཀྱི།།དད་པའི་ངང་ཚུལ་དུད་པའི་སྙེ་མ་བཞིན།།འགྲོ་འདིར་འདུས་བྱས་མི་རྟག་སྟོན་པའི་ཕྱིར།།ཤཱཀྱའི་སྲས་བཞིན་མཛད་པ་བསྟན་ཟིན་ཀྱང་།།དུས་སྙིགས་མུན་པ་ནག་པོ་སེལ་བྱེད་དུ།།སླར་ཡང་གང་སྐུ་ཟླ་གཞོན་འཛུམ་པར་ཤོག།
ཅེས་པ་འདི་ནི་མཁས་གྲུབ་གཉིས་ལྡན་གྱི་སྐྱབས་རྗེ་དམ་པ་༸ཤར་གདོང་བློ་བཟང་བཤད་སྒྲུབ་རྒྱ་མཚོ་དཔལ་བཟང་པོ་མཆོག་དགོངས་པ་ཆོས་དབྱིངས་སུ་ཐིམ་ནས་ལོ་ཡི་འཁོར་མོ་གཅིག་འཁོར་བ་དང་སྟབས་བསྟུན། སྐྱབས་རྗེ་དམ་པ་གང་གི་མཛད་པ་རྒྱ་མཚོ་ལས་ཆུ་ཐིགས་ཙམ་ཞིག་རྗེས་དྲན་མཚོན་བྱེད་དུ། ཧྥ་རན་སིའི་ནུབ་ཆེན་རྒྱ་མཚོ་འགྲམ་དུ་སྙན་བཟང་གཡུང་དྲུང་ཚེ་རིང་གིས་བྲིས་པ་དགེ་ལེགས་འཕེལ།
༼ཟུར་ཞུ། དེ་རིང་ཁོ་བོས་སྔོན་གྱི་རྩོམ་ཡིག་རྙིང་པ་ཁག་བསྔོགས་སྐབས། སྔོན་ཆད་དུས་དེབ་དང་ཚགས་པར་ཁག་ཏུ་སྤེལ་མ་མྱོང་བའི་རྩོམ་འགའ་རྙེད་བྱུང་། དེའི་ཁྲོད་ཀྱི་སྙན་ངག་འདི་ནི་ཁོ་བོས་ལོ་ངོ་བརྒྱད་དགུའི་སྔོན་ཙམ་ལ་བྲིས་པ་ཞིག་རེད། གཅིག་བྱས་ན་དྲ་ཐོག་འདིར་སྙན་ངག་ྐློག་མཁན་རེ་ཟུང་ཡོད་མི་སྲིད་པ་མིན་སྙམ་ནས་གློག་ྐླད་དུ་བཅུག་པ་ཡིན།༽
ཀློག་མཁན་ཡོད་ད་ཡོད། ངས་ཤར་མར་བཀླགས་ཐེངས་གཅིག་དང་ཡང་བསྐྱར་ཞིབ་ལྟ་ཞིག་བྱས་པ་ཡིན། དོན་བཟང་པོ་དང་ཚིག་བཟང་པོ་ངོ་མ་སྙན་ངག་ཟེར་བ་འདི་འདྲ་ཞིག་ལོས་ཡིན་སྙམ་བྱུང་། འདི་དང་མཉམ་དུ་ཤར་གདོང་ཚང་གི་ངོ་སྤྲོད་ཉུང་བསྡུས་ཤིག་ཀྱང་ཡོད་ན་ལེགས་ས་རེད།
ངག་རིག་སྨྲ་བའི་གཞོན་ནུ་གང་། །
གང་ན་འཚོ་ཡང་ཁྱད་མེད་དུ། །
དུ་མར་བྲིས་པའི་སྙན་རྩོམ་དག །
དག་མོར་བཀླགས་དང་ཀློག་བཞིན་ཡོད། །
ཡག་བྱུང་། སྙན་པོ་བྱུང་།
ལེགས་པར་བརྩམས་པར་ལེགས་གསོལ་ཞུ། ཁོ་བོ་གཞོན་པའི་དུས་ལས་ད་ལྟ་སྙན་ཚིག་འབྲི་བ་དང་ཀློག་པ་པོ་མང་དུ་མཐོང་བ་ནི། ཁ་བརྡའི་བློ་གསལ་སྐྱེས་བུ་རྣམས་ཀྱི་བོད་ཀྱི་རིག་གཞུང་ཉམས་པ་སུར་ཆུད་མི་ཉམས་གོང་སྤེལ་ལ་ཞབས་འདེགས་བླ་ན་མེད་པ་ལྟ་བུར་མཛད་པར་བཀའ་དྲིན་ཆེ། རང་རེས་རྩོམ་སོགས་འབྲི་བ་ན། བོད་རིགས་སྐྱེ་བོ་དག་སྐད་ཀྱི་སྒོ་ནས་གཅིག་སྒྲིལ་འབྱུང་བ་ལ་འབད་དགོས། བཀའ་བསྟན་གསུང་འབུམ་སོགས་བརྗོད་བྱ་ཙམ་མ་ཡིན་པར་རྗོད་བྱེད་ཚིག་གི་སྒོ་ནས་ཀྱང་རང་རེ་ལ་རིན་ཐང་ཆེ། དེས་ན་བོད་སྐད་སྙན་རྩོམ་སོགས་འབྲི་མཁན་དག་གིས་བཀའ་བསྟན་སོགས་ཀྱི་གཞུང་རང་བློ་དང་འཚམས་པ་རེ་སྦྱང་དགོས་པ་གལ་ཆེ་་སྟེ།
མཁས་པས་ཡང་དག་རབ་སྦྱར་བའི།
ངག་ནི་འདོད་འཇོའི་བ་རུ་བཤད།
དེ་ཉིག་ཉེས་པར་སྦྱར་ན་སླར།
སྦྱོར་པོ་བ་ལང་ཉིད་བརྗོད་བྱེད།།
དེའི་ཕྱིར་སྙན་དངགས་དག་ལ་སྐྱོན།
ཆུང་བར་གྱུར་ཀྱང་ཅི་ཞིག་ལྟར།
བཏང་སྙོམས་མི་བྱ་ལུས་མཛེས་ཀྱང་།
སྐྱོན་གཅིག་གིས་ནི་སྐལ་ངན་འགྱུར།། མེ་ལོང་མ། ལེ་༡ ཚི་ ༦དང་༧
དེས་ན་གཤམ་གསལ་ཚིག་དག་ལ་བཀའ་བསྟན་ལྟར་བདག་གིས་འདི་ལྟར་འདོན་ཅིང་འབྲི་སྟེ།
ཕས་རྒོལ་རལ་བ་རྩ་ནས་གཅོད་པའི་བཤེས། ཞེས་པར། ཕས་རྒོལ་རལ་པ་རྩ་ནས་གཅོད་པའི་བཤེས།
རྒྱལ་བའི་ལམ་རིམ་ཆེན་མོའི་ཤིང་པར་ལ།། ཞེས་པར། རྒྱལ་བའི་ལམ་རིམ་ཆེན་མོའི་ཤིང་སྤར་ལ།།
བསྐལ་བར་གནས་པའི་འོད་དཀར་རྒྱན་དུ་བཀོད། ཞེས་པར། །བསྐལ་པར་གནས་པའི་འོད་དཀར་རྒྱན་དུ་བཀོད།
བསྙེན་རྫོགས་སྡོམ་རྒྱུན་གནང་བ་གྲངས་མི་ལངས།། ཞེས་པར། བསྙེན་རྫོགས་སྡོམ་རྒྱུན་སྩལ་པ་་གྲངས་མི་ལངས།།
དེ་ཡང་གནང་ཞེས་པ་དབུས་གཙང་ན་སྩོལ་དང་མཛད་པའི་དོན་ལ་བཀོལ་ཀྱང་ལ་དྭགས་པ་ལྟ་བུ་ཞིག་གིས་གནང་ཞེ་པའི་ཚིག་དེ་ཉིད་དེ་དག་གི་དོན་ལ་གཏན་ནས་མི་བཀོལ་བར་མ་ཟད་དེ་ལ་གོ་བ་ཐེབས་པའང་དཀའོ།།
རྗེ་ཤར་གདོང་བློ་བཟང་བཤད་སྒྲུབ་རྒྱ་མཚོ་མཆོག་ནི་དུས་རབས་ཉི་ཤུ་བའི་ནང་གི་བོད་ཀྱི་རིག་གཞུང་ལ་མཛད་རྗེས་ཆེ་བའི་མཁས་དབང་དམ་པ་ཞིག་རེད། ཁོང་གིས་མཚོ་སྔོན་མི་རིགས་སློན་ཆེན་གྱིས་མཚོན་པའི་སློབ་གྲྭ་ཁག་དང་དགོན་སྡེ་ཁག་མང་པོར་བོད་ཀྱི་ཆོས་དང་རིག་གནས་སློབ་ཁྲིད་དང་ཁྲིད་རྒྱུན་སྤེལ་བ་སོགས་མཛད་རྗེས་བླ་ན་མེད་པ་བཞག་གནང་བ་དང་༡༩༩༤་ལོར་མཚོ་སྔོན་མི་རིགས་སློབ་གྲྭ་ཆེན་མོའི་དགེ་སློབ་ཡོངས་ལ་ནང་པའི་ཆོས་ཀྱི་ལས་འབྲས་ཀྱི་རྣམ་བཞག་སོགས་དམ་པའི་ཆོས་ཀྱི་བསླབ་བྱ་མང་པོ་གནང་ཡོད། མཁས་པའི་དབང་པོ་འཇིགས་མེད་དམ་ཆོས་རྒྱ་མཚོ་དང་མཁས་དབང་དགེ་བཤེས་ཤེར་རྒྱམ་དང་ཚེ་ཏན་ཞབས་དྲུང་སོགས་བོད་ཀྱི་མཁས་པ་དུ་མའི་ཞབས་ལ་གཏུགས་ནས་མདོ་སྔགས་ཀྱི་བཀའ་ཁྲིད་མང་པོ་གསན་མྱོང་བར་མ་ཟད། གཡུང་དྲུང་བོན་དང་བཅས་བའི་བོད་ཀྱི་ཆོས་ལུགས་ཁག་གི་ལོ་རྒྱུས་དང་ལྟ་གྲུབ་ཀུན་ལ་བྱང་ཆུབ་པའི་ཉེ་རབས་ཀྱི་ལོ་རྒྱུས་སྨྲ་བ་ཞིག་ཀྱང་རེད།
དུས་ཀྱི་སྨག་ཆེན་ཞྭ་ལྟར་གྱོན་ན་ཡང་།།
མཛད་རྗེས་རི་མོ་གངས་རིའི་ལྗོངས་ན་འཚེར།།
བྷོ་ཊའི་རིག་གཞུང་ཉམས་པ་མེད་པར་སྤེལ།།
ཐུ་མིའི་གདུང་འཚོབ་ཁྱེད་ལ་དད་པས་མཆོད།།
མཁས་པའི་བྱ་བ་གསུམ་གྱི་འཁོར་ལོའི་འགྲོས།།
སྐུ་ཚེའི་མཛད་པ་འཆད་ཁྲིད་དོན་དུ་བྲེལ།།
སློབ་བུ་སྟོང་ཕྲག་མང་པོས་སྙན་ངག་གླུ།།
ཁྱེད་ལ་སྐྱོར་བའི་བཀའ་དྲིན་རྗེས་དྲན་ཞུས།།
རྔམས་ནག་དུས་ཀྱིས་མནར་པའི་མུན་ཀློང་ལས།།
རྒྱལ་བའི་བསྟན་དང་བོད་ཀྱི་རིག་གཞུང་ལ།།
མཁྱེན་དཔྱོད་གཟི་འོད་འབར་བའི་བླ་སྲོག་བསྐྲུན།།
ངེས་དོན་ཐོན་མི་གཉིས་པ་ཁྱེད་ལ་བསྔགས།།
རྒན་བློ་བཟང་འཇལ་དཔལ་མཆོག་གིས་ལམ་སྟོན་གནང་བར་ཐུགས་རྗེ་ཆེ་ཞུ། པར་ལ་སྤར་བཅོས་གནང་བ་དེ་ལྟར་རེད། ཡིན་ནའང་བདག་སྒྲའི་སྐོར་འདི་རྩོད་གཞི་ཅན་ཞིག་ནའང་། བཀའ་བསྟན་སོགས་དང་རྗེས་མཐུན་བྱེད་པ་འདི་ཡང་གནད་འགག་ཅིག་རེད། ཞོར་དུ་རྩམ་དགའ་ལགས་ལའང་བཀའ་དྲིན་ཆེ་ཞུ་འདོད་དོ།