ལྷ་རྒོད།
ཁྱེད་ནི་དེང་དུས་ཀྱི་སྟོན་པའམ་ཡང་ན་འཇིག་རྟེན་གྱི་མིག ཞི་བདེའི་དེད་དཔོན། ཁྱེད་ནི་མ་རིག་མུན་པ་སེལ་བའི་སྒྲོན་མེ་དང་འགྲོ་རྣམས་ཐར་ལམ་འདྲེན་པའི་དེད་དཔོན། ཁྱེད་ནི་གཟུར་གནས་དྲན་དབང་ཀུན་གྱི་གཙུག་ནོར་དང་སྐལ་ལྡན་སྐྱེ་བོ་ཀུན་གྱི་མགོན་སྐྱབས་དང་དཔུང་གཉེན།
མདོར་ན། ཁྱེད་ནི་སེམས་ཀྱི་ལྷ་ཡིན་ལ། ཁྱེད་ནི་བརྩེ་བའི་ཕ་དང་བྱམས་པའི་མ་ཡང་ཡིན། ཁྱེད་ཀྱི་ཞལ་གསུང་རེ་རེའི་ནང་དུ་དྲང་སྲོང་བསླུ་བ་མེད་པའི་བདེན་ཚིག་གི་གད་རྒྱང་རེ་རེ་དང་། ཁྱེད་ཀྱི་ཞབས་རྗེས་རེ་རེའི་ནང་དུ་གསེར་མདོག་གི་གཟི་དཔལ་ལྡན་པའི་ཞི་བདེ་ཡི་འོད་སྣང་རེ་རེ།
གང་ལྟར་བརྗོད་མི་ནུས་པ་ནི་ཁྱེད་ཀྱི་རྣམ་པཪ་ཐར་པ་ཡིན་ལ། བསམ་མི་ནུས་པ་ནི་ཁྱེད་ཀྱི་བྱམས་བརྩེའི་བཀའ་དྲིན་དང་བླང་དོར་གྱི་ལམ་སྟོན་དག་ཡིན། འོ་རེད། ད་དུང་སྐྱེ་འགྲོ་སྤྱི་དང་གདོང་དམར་གངས་ཅན་པའི་ལས་དབང་ལ་ལོ་དང་ཟླ་བ། ཉིན་དང་མཚན་མོ། ཆུ་ཚོད་དང་སྐར་ཆ་ཙམ་ཡང་བློས་བཏང་མ་མྱོང་བའི་ཁྱེད་ཀྱི་ངང་ཚུལ་དག་ལ་ཡང་ཡང་བསམ་དུས་མིག་ཆུ་མི་ཤོར་བའི་རང་དབང་ཅི།
ད་དུང་དགུང་ལོ་བརྒྱད་ཅུ་གྱ་གཅིག་སོན་ཀྱང་འཛམ་གླིང་འདིའི་ཆེ་རྒུ་དག་གི་མདུན་དུ་ལག་ཟུང་ཐལ་མོ་གྱེན་དུ་བསྒྲེངས། དབུ་ཡི་གཙུག་ཏོར་ཐུར་དུ་སྒུར་བཞིན་གངས་ཅན་པའི་བདེ་སྡུག་ཞུ་འབོད་བྱེད་ཀྱིན་ཡོད་ལ་ལས་དབང་གླེང་གིན་ཡོད།
བླ་མ་ལགས། ངས་སེམས་གཏིང་ནས་དངངས་འཚབ་དང་སྐྱོ་གདུང་ལྷན་དུ་ཁྱེད་ལ་རེ་བསྐུལ་ཞུ་རྒྱུར། ད་ནི་དགུང་ལོའི་བབ་དང་སྐུ་གཟུགས་ཀྱི་གནས་སྟངས། བོད་མིའི་བསམ་སྤྱོད་སོགས་ཕྱོགས་གང་ནས་གཞིགས་ཀྱང་ཁྱེད་ཉིད་སྐུ་ངལ་མང་ཙམ་གསོ་བའི་དུས་ཚོད་ནི་ཕྱི་མ་དྲགས་ན་སྔ་དྲགས་མི་འདུག་སྙམ།
རྒྱུ་མཚན་ནི་འདས་ཟིན་པའི་ལོ་ཟླའི་ཕྲེང་བའི་བརྒྱུད་རིམ་ལ་ཕྱིར་མིག་རེ་ཅེར་སྐབས་དམ་པའི་ལྷ་ཆོས་དང་འཇིག་རྟེན་མི་ཆོས་སོགས་ཕྱོགས་གང་གི་ཐད་ནས་ཁྱེད་ཀྱིས་འབད་བརྩོན་གནང་མ་མྱོང་བ་དང་ལམ་སྟོན་གནང་མ་མྱོང་བ་གང་ཡང་མེད། འོན་ཏང་མདུན་རྒྱབ་མི་མཚུངས་པའི་བོད་པ་ཚོས་ཁྱེད་ཀྱི་མདུན་ནས་མིག་ཆུ་ཤར་ཤར་བཏང་བ་དང་རྒྱབ་ནས་ཟུར་ཟ་ཤུར་ཤུར་བྱེད་མཁན་ཉུང་ཉུང་མིན་པའི་ཚོར་སྣང་ངང་གིས་སྐྱེས་ཀྱིན་འདུག །
གང་ལྟར་ཨ་ཕོ་རང་གིས་འཇོན་ན་འདས་མ་ད་གསུམ་གང་ལའང་སུ་གང་གིས་ཀྱང་གནང་མི་ནུས་པའི་ཁྱེད་ཀྱི་བླང་དོར་ལམ་སྟོན་ནི་མང་མེད་ན་ཉུང་སྐྱོན་གཏན་ནས་མ་མཐོང་། འོན་ཏང་བོད་པ་ཚོས་ནི་དོན་དངོས་ཉམས་སུ་ལེན་རྒྱུའི་དོད་དུ་ད་དུང་སྣང་མེད་བསྐྱུར་བ་དང་། ཆེས་ཐབས་སྡུག་པ་ཞིག་ལ་ཟུར་ཟའི་མདའ་མོ་འཕེན་མཁན་ནི་ལོ་རེ་ནས་ལོ་རེར་སྡུག་ཏུ་འགྲོ་གིན་ཡོད་པའི་བདག་ལ་ཚོར་སྣང་ཟབ་མོ་ཡོད།
ལྷག་པར་དུ་བཙན་བྱོལ་བའི་སྐབས་འཚོལ་རིང་ལུགས་པ་མི་སྒེར་དང་ཚོགས་སྡེ་དག་གིས་ནི་སྒེར་དོན་ཁོ་ནར་དམིགས་ཏེ་ཁྱེད་ཀྱི་མཚན་གནས་བེད་སྤྱོད་བྱ་རྒྱུར་ཧམ་སེམས་ཇེ་ཆེར་དང་། ཟློས་གར་ཇེ་མང་། བཀྲ་ལག་ཇེ་ཚ་ཡིན་སྟབས། ད་ནི་མི་ཆེན་དཔོན་ཆེན་ཡིན་པས་ངོ་སོ་དང་། ཚོགས་པ་སྒྲིག་འཛུགས་ཡིན་པས་དོན་ཆེར། སྤྱི་པའི་རྩ་དོན་ཡིན་པས་འགངས་ཆེར། དད་པ་དམ་ཚིག་གཙང་ཚུལ་གྱིས་ངོ་ཆེན་སོགས་སྒོ་གང་གི་ཐད་ནས་ཀྱང་ཟུར་མཇལ་མི་དགོས་ལ་གདན་ཞུ་མི་དགོས། བཀའ་ཆོས་མི་དགོས་ལ་བརྟན་བཞུགས་མི་དགོས།
མདོར་ན་ཁྱེད་ཀྱིས་སྐུ་ཚེ་ཧྲིལ་པོར་འཇིག་རྟེན་སྤྱིའི་བདེ་རྩ་དང་། ལྷག་པར་དུ་བོད་བསྟན་སྲིད་ཀྱི་དོན་དུ་བཏང་ཡོད། ད་ནི་སྐུ་གཟུགས་འཕྲོད་བསྟེན་གང་མང་གནང་དགོས། མཐར་དོན་ང་ལ་དགོས་པ་ནི་ཁྱེད་ཉིད་འཇིག་རྟེན་འདིར་བདེ་ཐང་ངང་དུ་སྐུ་ཚེ་ཡུན་རིང་དུ་བརྟན་དགོས་པ་ལས་མཇལ་ཁ་མི་དགོས་ལ་གསུང་ཆོས་ཀྱང་མི་དགོས། དེ་ལས་གོ་སྐབས་མིན།
བླ་མ་ལགས། ཁྱེད་ཉིད་སྐུ་ཚེ་བརྟན་པའི་སྨོན་མདུན་གདུང་ཤུགས་དྲག་པོ་དང་ལྷན་དུ་གསང་སྔགས་རིག་པ་འཛིན་པའི་སྡེ་ཆེན་པོ་ནས་གྱི་ན་བ་ལྷ་རྒོད་ཀྱིས་འགན་ཁུར་གྱི་སྤོབས་པ་དང་བཅས་ཏེ་སྤྱི་ལོ་2016/7/5 ཉིན་བྲིས།།
ལྷ་རྒོད་ལགས་ཀྱིས་ལེགས་པོ་བྲིས་འདུག དངོས་གནས་གསུངཆོས་དང་་མཇལ་ཁ་མང་དྲག་འདུག
ང་འདི་ལྟ་བུ་ཀློག་རྒྱུར་ཤིན་ཏུ་དགའ། སེམས་ཚོར་དང་འདྲེས་ཏེ་ཡག་པོ་ཞིག་བྲིས་འདུག ངས་བཤད་བསམ་པ་དང་ཡིད་ལ་མ་འཁོར་བ་མཐའ་དག་གསུངས་འདུག
སླུ་མེད་རྒྱུ་འབྲས་བདེན་མཐུས་བོད་ཡུལ་འདི།།
སྐྱོང་ལ་ཟླ་བྲལ་ཕྱག་ན་པད་མོ་ཡིས།།
སྤྲུལ་བའི་ཟློས་གར་རྒྱལ་དབང་རིམ་བྱོན་དབུས།།
ཏོག་ལྟར་འཕགས་པ་བསྟན་འཛིན་རྒྱ་མཚོར་བསྟོད།།
༅༅།་ལྷ་རྒོད་ལགས་ནས་དཔེ་ཡག་པོ་བྲིས་འདུག་་་ལེགས་སོ་ཞུ།
ངས་ཀྱང་ཚིག་རེ་གཉིས་ཞུ་རྒྱུ།
༅༅།ཤར་གངས་རི་དཀར་པོའི་རྕེ་མོ་ནས།། གསལ་ལྷང་ལྷང་ཉི་མ་ཤར་བའི་ཚེ།།
ངའི་དྲིནཆེན་བླ་མ་སྙིང་ནས་དྲན།། སྐུ་མི་འགྱུར་ཁྲི་ལོ་བརྟན་པར་ཤོག།
མཐོ་རི་རྒྱལ་ལྷུན་པོའི་རྕེ་མོ་ནས།། འོད་དུང་མདོག་ཟླ་བ་ཤར་བའི་ཚེ།།
ངའི་དྲིན་ཆེན་བླ་མ་སྙིང་ནས་དྲན།། ཚེ་འདི་དང་བར་དོ་ཕྱི་མ་གསུམ།།
མགོན་ཁྱེད་ཀྱི་རྗེས་སུ་འཛིན་པ་ཞུ།།
དངོས་གནས་བདེན་པ་ཡག་པོ་ཞིག་བྲིས་འདུག
ཡིན་ཡང་དེང་གི་དུས་འདིར་སྐད་ཆ་འདི་འདྲ་བཤད་ས་ཡོད་མ་རེད།
ཁྱོད་བཀའ་དྲིན་ཆེ།
གོང་ས་མཆོག་གི་དགུང་ལོ་མཐོ་བའི་ཆ་ནས་ཁྱེད་
ཀྱི་གསུང་པ་ལ་མངོན་པར་བསྟོད་དོ་།