མཉམ་འབྲེལ་རྒྱལ་ཚོགས་སྒོ་དྲུང་གི་མཐའ་མའི་མཆིད།

(བཀྲེས་ལྟོགས་ཉིན་ཉེར་བདུན་པའི་དབུགས་རྒྱུན་མཐའ་མའི་མགྲིན་ཚབ་ཏུ།)

ཨ་འཇམ།

ད་ལྟ་འཛམ་གླིང་མི་དམངས་ཀྱིས་གོ་མཚོན་ཐང་དུ་བཞག་ནས་རྒྱལ་ཁབ་བར་གྱི་རྩོད་གཞི་དག་ཀྱང་ཅོག་ཙེའི་སྟེང་ནས་ཐག་གཅོད་བྱེད་བཞིན་པའི་སྐབས་སུ་མཆིས། ངེད་ཚང་སྟེ་གངས་རིའི་རི་ཁྲོད་དུ་འཚོ་བའི་ངའི་སྤུན་ཟླ་རྣམས་ཉིན་རེ་ནས་ཉིན་རེར་དམར་གསོད་བྱས་པའི་གྲངས་ཚད་འཕར་བཞིན་ཡོད་ལ། དེ་བཞིན་དུ་ངའི་སྤུན་ཟླ་ཚོ་ཡང་གུ་དོག་པའི་འཚོ་གནས་ནས་འུ་ཐུག་པའི་སྣང་ཚུལ་ཛ་དྲག་གི་ངོ་བོར་འཕེལ་བཞིན་མཆིས་པས། རང་ཉིད་མེར་སྒྲོན་བཞིན་པའི་སྣང་ཚུལ་ནི་ད་སྔ་འཛམ་གླིང་གི་ལོ་རྒྱུས་སུ་བྱུང་མ་མྱོང་བའི་གྲངས་ཚད་ཅིག་ཏུ་འཕེལ་བཞིན་པའི་སྐབས་རེད། ད་ལྟའི་གནས་བབ་འདི་ཉིད་མུ་མཐུད་དུ་བཞག་ཚེ་ཡ་ང་བའི་གདུག་རྩུབ་དང་འུ་ཐུག་པའི་སྣང་ཚུལ་འདི་ལས་ངའི་མི་རིགས་འདི་ཉིད་འཛམ་གླིང་གི་ཉམས་རྒུད་ཀྱི་འགྲོས་ཚད་ཆེས་མགྱོགས་ཤོས་ཀྱི་སྟེང་ན་གནས་ཡོད། འདི་ནི་མཉམ་འབྲེལ་རྒྱལ་ཚོགས་ཀྱིས་སྤྱན་ཟུང་གིས་གཡོ་ཙམ་ཡང་མ་གནངས་པའི་གོ་ལ་འདིའི་གྲུ་ཟུར་གྱི་མུན་ནག་གི་ཆ་ཤས་ཤིག་རེད།
ད་ལྟ་ང་ཚོ་ཁྱོད་ཚང་གི་སྒོ་དྲུང་དུ་འབྱོར་ཡོད། སྒོ་མོ་འདི་ནས་ཀེར་གྱིས་ལངས་ནས་གནམ་ལ་ལྟ་བ་ནི་བརྗིད་ཆགས་པའི་མཉམ་འབྲེལ་རྒྱལ་ཚོགས་ཀྱི་ཕོ་བྲང་ལྟ་བུའི་ཁང་ཆེན་དེ་མིན། ཁང་རྩེག་ནང་ན་ཕར་འགྲོ་ཚུར་འོང་བྱེད་བཞིན་པའི་ཁྱེད་ཅག་བརྗིད་ཉམས་ནི་དེ་བས་ཀྱང་མིན། ང་ཚོ་རི་དང་ལུང་བ་བརྒལ་ནས་ཁྱེད་ཚང་གི་སྒོ་འགྲམ་ནས་ཉལ་འགོ་ཚུགས་ཡོད། འདི་ལ་རྒྱུ་མཚན་མང་པོ་མེད་དེ། ཁྱེད་ཅག་གི་ཅོག་ཙེའི་སྟེང་ན་བོད་པ་ཚང་ལ་མེ་འབར་བཞིན་པའི་ཡིག་ཆ་མེད་པས་ཡིན། བོད་པ་ཞེས་པའི་མི་རིགས་འདི་ཉིད་ལ་གཅར་རྡུང་བྱེད་བཞིན་པའི་ཐམ་ག་མེད་པས་ཡིན། ང་ཚོས་ཉིན་རེ་ནས་ཉིན་རེ་ཁྱོད་ཚང་གི་སྒེའུ་ཁུང་ལ་ཅེར་ནས་བསྡད་ཡོད། ཡིན་ནའང་། ཁྱེད་ཅག་དེ་རིང་ཚགས་ཤོག་ངོས་སུ་འཛུམ་ཤིག་ཤིག་གིས་རྒྱལ་ཁབ་གང་རུང་ཞིག་གི་གནད་དོན་ཐག་བཅད་ཚུལ་གྱི་གསར་འགྱུར་མང་དུ་འབྱོར་གྱིན་འདུག ཁང་རྩེག་དེའི་སྒེའུ་ཁུང་ནང་ནས་ཁྱོད་ཚོས་ཉིན་རེ་བཞིན་ལྟོགས་ཤི་ཁོ་ནར་སྒུག་པའི་བོད་པ་ཉམ་ཐག་ངེད་ཅག་དངོས་གནས་མཐོང་མེད་པ་འདྲ། ང་ཚོས་རང་ཉིད་ཁོ་ནའི་ཁ་ཟས་རྫོགས་ཏེ་རྩམ་པ་སློང་ཕྱིར་ཁྱེད་ཚང་གི་སྒོ་འགྲམ་དུ་བཅར་བ་ག་ལ་ཡིན། ང་ཚོ་ཡང་ཁྱེད་ཅག་བཞིན་གནམ་ལ་ཟུག་པའི་ཁང་རྩེག་ཏུ་སྡོད་མ་ཐུབ་ཀྱང་རང་ཉིད་དང་འཚམ་པའི་སྡོད་ཁང་དྲོད་ཁོལ་ལེ་བ་རེད་ཡོད། འོན་ཀྱང་ང་ཚོ་ལ་བསྒྲགས་གཏམ་གཅིག་གིས་ཉམ་ཐག་མི་རིགས་སྐྱོབ་ཐུབ་པའི་རྐུབ་སྟེགས་དང་ཅོག་ཙེ་དེ་མེད། ད་ལྟ་ང་ཚོས་བསམ་བཞིན་དུ་རང་ཉིད་ལྟོགས་ཤི་ལ་འཇུག་པ་འདི་ནི་ཁྱོད་ཚོས་མི་ཞེས་པར་འདྲ་མཉམ་དུ་ལྟ་མ་ཐུབ་པས་ཡིན། གལ་སྲིད་ཁྱོད་ཅག་འཛམ་གླིང་ཞི་བདེ་ལ་དགའ་མཁན་ཞིག་ཡིན་ན། གལ་སྲིད་ཁྱོད་ཅག་ཉམ་ཐག་རྒྱབ་དཔུང་དུ་ལངས་མཁན་ཞིག་ཡིན་ན། གལ་སྲིད་ཁྱོད་ཅག་བདེན་པའི་གནས་ལུགས་ལ་དགའ་མཁན་ཞིག་ཡིན་ན། གལ་སྲིད་ཁྱོད་ཅག་མིའི་རིགས་འདྲ་མཉམ་དུ་ལྟ་མཁན་ཞིག་ཡིན་ན། བལྟས་བལྟས་རིག་རིག་ལ་མེ་ནང་དུ་མཆོངས་བཞིན་པ་དང་། དྲག་གནོན་གྱིས་གསོད་བཞིན་པའི་ངའི་མི་རིགས་ཀྱང་འཛམ་གླིང་མི་རིགས་གཞན་དང་འདྲ་མཉམ་དུ་ལྟ་རོགས། བལྟས་པས་མ་ཟད་ལོ་ངོ་འདི་དག་ཏུ་དམག་ཤུགས་ཀྱི་མནར་གཅོད་ཚད་ལས་བརྒལ་བའི་འོག་གི་ ངའི་ཕ་ཡུལ་བཙོན་ཁང་དུ་བསྒྱུར་བར་གཟིགས་རོགས་གྱིས། ངའི་སྤུན་ཟླ་ཉེས་མེད་དུ་རྡུང་བར་སྐྱོབ་རོགས་གྱིས།
ད་ལྟ་ངེད་ཅག་ཁྱེད་ཅག་གི་སྒོ་དྲུང་ན་འཆི་བ་ལ་ཉེ་བར་ཕྱོགས་ཡོད། དང་ཐོག་གི་སྔོ་ཡུག་ཡུག་གི་ཁང་རྩེག་སྒེའུ་ཁུང་དེ་ཡང་ད་ནི་རབ་རིབ་ཙམ་ལས་མཐོང་ཐུབ་ཀྱི་མི་འདུག ཉིན་ཉེར་བདུན་ཕྱིན་པའི་དེ་རིང་འཇིག་རྟེན་འདིར་བདེ་བའི་ངང་གསོན་པའི་མི་ང་ཚོ་ཕལ་ཆེར་ཁྱོད་ཅག་གིས་བསྐྱབས་མ་སོང་། དེ་ཡང་ང་ཚོ་མི་གསུམ་འཆི་རུ་བཅུག་པ་ནི་གནད་དོན་ཆེན་པོ་ཅི་ཡང་མིན་ཏེ། ང་ཚོའི་རྒྱབ་ཏུ་འཆི་བར་ཕྱོགས་གཞིས་ལུས་ཁྲི་ཕྲག་མང་པོ་བསྐྱབས་མ་སོང་བ་དེ་ནི་ཁྱོད་ཅག་གི་ནག་ཉེས་ཆེ་ཤོས་དེ་ཡིན། མ་འོངས་པར་མུ་མཐུད་དུ་ངའི་སྤུན་ཟླ་ཚོས་ཁྱོད་ཀྱི་སྒོ་དྲུང་ནས་རྣམ་ཤེས་གཏའ་མར་བཞག་སྟེ། དེ་རིང་གི་མེ་ལྕེ་ལྟར་འཆི་བར་ཕྱོགས་མཁན་གྱི་རྣམ་ཤེས་མང་པོས་འཚང་ག་ཤིག་ཤིག་གིས་ཁྱོད་ཀྱི་སྒོ་མོ་བརྡུང་སྲིད། དེ་དུས་ཁྱོད་ཀྱི་ཡིག་ཆ་དེ་འབྱོར་ལྡན་རྒྱལ་ཁབ་ཀྱི་ངོ་སོའི་ཆེད་དུ་མ་ཡིན་པར། ཉམ་ཐག་པའི་མིའི་རིགས་སྐྱོབ་བྱེད་ཅིག་ཏུ་བསྒྱུར་ཐུབ་པའི་རེ་བ་ཡོད། ད་ནི་ཉིན་ཉེར་བདུན་གྱི་དབུགས་རྒྱུན་མཐའ་མ་ཡིན། ང་ཚོ་རང་ཉིད་ལ་དབང་བའི་ཚེ་སྲོག་འདི་ཉིད་འུ་ཐུག་པའི་ངང་ཁྱོད་ཀྱི་སྒོ་དྲུང་ནས་ཞི་བའི་ངང་བཀོལ་ཚར་བ་ཡིན། འདི་ནི་མི་དཀྱུས་མ་ཞིག་ལ་ཡོད་པའི་རང་ཉིད་ཀྱི་རིན་ཐང་དང་ནུས་པ་ཆ་ཚང་ཞིག་བཀོལ་ཟིན་པ་ཡིན། ད་ནི་མགོ་ཡོམ་འཁོར་ཚད་ཀྱང་ཧ་ཅང་མགྱོགས་པས། གནམ་ས་ངོས་ཟིན་དཀའ་བའི་ཚོད་དུ་མཆིས། དེ་ལྟར་ཁྱོད་ཀྱི་ཁང་རྩེག་རྩེ་མོ་ཡོམ་ཡོམ་དཀྲུག་བཞིན་མཆིས། ཕལ་ཆེར་དེ་ལྟར་དེ་ལྟར་ང་ཚོ་ཡང་ཁྱོད་ཀྱི་སྒོ་འགྲམ་ནས་དེ་ལྟར་མཇུག་བསྡུས་འགྲོ་བ་འདྲ།
༢༠༡༢ ༣ ༢༠ ལ་བྲིས།