བཀྲ་ཤིས་དོན་འགྲུབ།
འཁོར་བའི་གནས་འདི་འཁོར་བ་སུས་མི་ཤེས།།
འཁོར་འདས་གཉིས་ཀྱི་སྣོལ་མཚམས་མི་རྙེད་པས།།
འཁོར་བའི་འཕྲུལ་འཁོར་འཆི་བའི་ཟློས་གར་དེ།།
འཁོར་བདག་བུ་ཆུང་མགོ་ལ་བབས་སམ་ཅི།།
སེམས་ཀྱི་ལྷ་མོ་མི་མངོན་དབྱིངས་ན་བཞུགས།།
སེམས་ཀྱི་བྲན་མོ་མྱ་ངམ་ཐང་ན་འཁྱམས།།
ཡུད་ཙམ་མངོན་ལ་རྦད་དེ་ཡལ་འགྲོ་བའི།།
སེམས་ཀྱི་གནས་མལ་དེ་ལ་ཞེ་འཁྲེང་ངམ།།
དགྲ་ཡི་ཁྲོ་བ་གྲོགས་ཀྱི་དུང་བས་བསུ།།
ལས་ཀྱི་འབྲས་བུ་ལུས་ཀྱི་ཁུར་པོ་ཉིད།།
གཅིག་གི་སྣེ་མོ་གཞན་གྱིས་འདྲེན་པ་འདི།།
རྒྱུ་འབྲས་དྲེད་མོའི་ཁྲོ་འཛུམ་འཕྲུལ་འཁོར་ལགས།།
བླུན་པོའི་ཚོགས་རྣམས་ཆགས་སྡང་ཆོས་ལ་ཞེན།།
མཁས་པའི་གནས་ལ་མཁས་པ་ལྷག་པར་ཞེན།།
རིག་པའི་བུ་ཆུང་བརྒྱལ་དང་སངས་ས་ན།།
མཁས་བླུན་གཉིས་ཀྱི་བབས་སོ་གཅིག་པ་ཉིད།།
ང་ཡིས་སྐྱེ་བ་བླངས་པར་མཐའ་མེད་ཅིང་།།
ཁྱོད་ཀྱིས་འཆི་བ་བསུས་པའང་གྲངས་མ་མཆིས།།
སྐྱེ་འཆི་འདུ་འབྲལ་སྲིད་པའི་རྒྱལ་ཁམས་ནས།།
ཁྱོད་དང་ངེད་གཉིས་སླར་ཡང་གྱེས་ཏེ་འགྲོ།།
འདི་ནི་སྐྱོ་བ་མིག་ཆུའི་རྒྱ་མཚོ་ཡིན།།
འདི་ནི་དགའ་བ་ཆོས་ཉིད་ཟད་ས་ཡིན།།
འདི་ནི་འཁོར་འདས་ལམ་གྱི་འགག་མདོ་སྟེ།།
འདི་ནས་བར་དོའི་ས་མཚམས་ཟིན་པ་ལགས།།
—ཞེས་པ་འདི་ཡང་བཙན་བྱོལ་བོད་མིའི་ཁྲོད་ཀྱི་ན་གཞོན་ཡོན་ཏན་པ་སྤྲོ་ཚིགས་ཆོས་གྲགས་ལགས་སྐུ་གཤེགས་པའི་མྱ་ངན་སྙན་ཚིག་ཏུ་སྤེལ་བའོ།།