རྔ་བ་ཀུན་བཟང་།
མཐོ་སྒང་གི་རྣམ་ཤེས་ལགས། རང་ཡུལ་རང་སྟོབས་ཀྱི་མྱོང་དུས། རང་གཟུགས་རང་སེམས་ན་ཤར་དུས། ཁྱེད་གང་ན་ཡོད། མཐོ་སྒང་ན་ཁྱོད་མེད་པས། ངའི་རྩ་བ་ཆུ་ཡི་འཁུར་ནས་རྩེ་མོ་རླུང་གིས་གཏོར་སོང་། ངས་བཟོད་སྒོམ་གྱི་མཐའ་ལ་ཐུག་ཏེ་ཨུ་ཚུགས་ཀྱི་སྙིང་ཁ་གཟར་བྱུང་། ངས་སྙིང་གཏམ་གྱི་རླུང་ཁ་འགྱུར་ནས་བརྩེ་དུང་གི་བཟི་གཏམ་ཤོར་སོང་།
མཐོ་སྒང་གི་རྣམ་ཤེས་ལགས། བྱུ་རུ་དམར་ཆུང་ཟད་པ་འཇིག་རྟེན་གྱི་ཆོས་ཉིད་ཡིན་ནམ། སྡོང་མགོའི་བྱ་ཚང་འཐོར་བ་འཁོར་བའི་གནས་ལུགས་ཡིན་ནམ། གཟུགས་མེད་སེམས་པ་འཁྱགས་ནི་འཚོ་བའི་མྱོང་བ་ཡིན་ནམ། སྡོང་མགོའི་བྱ་ཚང་འཐོར་ནས་རང་རང་གི་འཕུར་ལམ་བསྙད་དུས་ཁྱེད་གང་ལ་འགྲོ། བྱུ་རུ་དམར་ཆུ་ཟད་ནས་ཕྲེང་ཐག་རིང་མོ་ལྷུང་དུས་སུ་ལ་བཤད། སྡོང་ལོ་ས་ལ་ལྷུང་ནས་ལོ་མའི་མཛེས་ཉམས་ཤོར་དུས་སུ་ལ་འབོད།
མཐོ་སྒང་གི་རྣམ་ཤེས་ལགས། ཁྱེད་གང་ན་ཡོད། དཀར་དཀར་གོ་རེ་རུས་ལ་ཐུག་ནས་དམར་དམར་གྱི་ཤ་ཁྲག་འཐུང་དུས་ཁྱེད་རང་དྲན་གིས། ཞིམ་མངར་འོ་ཇ་ཁ་ནས་འཁྱེར་ནས་མིག་རྣ་ལྕེ་ལ་ལྕགས་དམར་བཙུག་དུས་ཁྱེད་རང་དྲན་གིས། རི་ལུང་ནགས་ཆུའི་རྩ་བ་སྐམ་ནས་རྩི་ཤིང་ལོ་མ་མུ་གེས་འཆི་དུས་ཁྱེད་རང་དྲན་གིས། ཆགས་སྡང་རྨོངས་ཀྱི་རྩ་བ་འཕེལ་ནས་ཡན་ལག་སྟོང་གི་བཅར་རྡུང་བྱེད་དུས་ཁྱེད་རང་དྲན་གིས།
མཐོ་སྒང་གི་རྣམ་ཤེས་ལགས། ཁྱེད་གང་ན་ཡོད། མཚོ་སྔོན་པོ་གཡུ་ཡི་མེ་ལོང་ནང་ལ་འགྲོ་རེད། གངས་དཀར་པོ་ཤེལ་གྱི་མཆོད་རྟེན་མཇལ་ལ་འགྲོ་རེད། རྩྭ་རབ་དཀར་མེ་ཏོག་སྣ་རྒྱན་དབུས་ན་འགྲོ་རེད།
རྟ་ནོར་ལུག་གཡང་དཀར་ལུག་ཕྱུགས་འཚོལ་ལ་འགྲོ་རེད།
མཐོ་སྒང་གི་རྣམ་ཤེས་ལགས། ཁྱེད་གང་ན་ཡོད།
2021/11/16