བྱམས་པ་ལྷུན་གྲུབ།
དེ་ཡང་དེ་སྔོན་༧གོང་ས་མཆོག་གིས་དགོན་པའི་ཉེ་ཁོར་གྱི་ཉམས་ཐག་མི་མང་ལ་ལྟ་སྐྱོང་གནང་ཐུབ་ན་ཕན་རླབས་ཆེ་སྐོར་བཀའ་སློབ་ཕེབས་དོན་ལྟར། སེར་བྱེས་མཁས་སྙན་གྲྭ་ཚང་གིས་དགོས་ངེས་ཅན་གྱི་བོད་པའི་སློབ་མ་ཁག་ཅིག་ལ། མཐོ་རིམ་སློབ་གཉེར་གནང་བའི་སློབ་ཡོན་འབུལ་བའི་ལས་གཞི་ཞིག་ཕྱག་བསྟར་གནང་འདུག་པས། འདི་ནི་དངོས་གནས་མིག་དཔེ་འོས་པ་ཞིག་ཅིས་མིན།
དེ་ཡང་རང་རེའི་བོད་མིའི་སྤྱི་ཚོགས་ནང་དུ་མཐོ་རིམ་སློབ་གཉེར་གནང་འདོད་ཡོད་པའི་སློབ་མ་གང་འཚམས་ཡོད་ཀྱང་། དེ་དག་གི་ཁྲོད་ན་མཐོ་སློབ་སློབ་ཡོན་ཕུལ་བར་དཀའ་ངལ་ཡོད་མཁན་མང་དག་ཡོད་པས། དེའི་རྐྱེན་གྱིས་སློབ་མ་ཇི་སྙེད་ཅིག་ལ་སློབ་འདུན་ཤུགས་དྲག་ཡོད་ཀྱང་སློབ་ཆེན་འགྲིམས་མ་ཐུབ་པ་བྱུང་དང་འབྱུས་མུས་ཡིན། དེར་བརྟེན་བོད་པའི་ན་གཞོན་སློབ་མ་མི་ཉུང་བ་ཞིག་ལ་རང་གི་ཕུག་འདུན་བཞིན། མཐོ་རིམ་སློབ་གཉེར་བྱ་མ་ཐུབ་པའི་གྱོང་གུད་དང་སེམས་སྡུག་ཡོང་གི་ཡོད་པ་ཡང་དངོས་ཡོད་ཡིན།
དེ་ཡང་དེ་སྔོན་སྦེང་ལོར་ཏཱ་ལའི་བླ་མ་མཐོ་སློབ་ཏུ་སྐབས་དགུ་པའི་མཐོ་རིམ་སློབ་མའི་ཚོགས་ཆེན་ཚོགས་སྐབས་རང་ཉིད་དངོས་སུ་ཞུགས་རྒྱུ་བྱུང་ལ། སྐབས་དེར་ཚོགས་བཅར་བའི་མཐོ་རིམ་སློབ་མ་ཕལ་མོ་ཆེས་ཞལ་གཅིག་གྲགས་ཀྱིས་སློབ་ཆེན་དང་རིགས་གཅིག་རྐང་འཛིན་གྱི་སློབ་གཉེར་གནང་འདོད་ཡོད་པའི་སློབ་མ་མང་དག་ལ་སློབ་ཡོན་ཕུལ་མ་ཐུབ་པའི་དཀའ་ངལ་ཆེན་པོ་ཡོད་སྐོར་གླེང་སོང་ལ། དཀའ་ངལ་དེ་དག་སངས་བར་ཐབས་ལམ་ཇི་དགོས་སོགས་ཀྱི་སྐོར་བགྲོ་གླེང་ཡང་ལྷུག་པོར་གནང་སོང་།
དེས་ན། སྤྱིར་དཀའ་ངལ་འདི་རིགས་སེལ་བར་རང་རེ་བོད་མི་སྒྲིག་འཛུགས་ཤེས་རིག་ལས་ཁུངས་ཀྱིས་སྔར་ལྷག་སྐུ་ངལ་བསྐྱོན་ཏེ། སློབ་ཡོན་ཇེ་མང་འབུལ་བ་སོགས་ཐབས་ཤེས་གང་དྲག་གནང་བཞིན་ཡོད་ཀྱང་། བོད་མི་སྒྲིག་འཛུགས་ལ་དཔལ་འབྱོར་འབེལ་འབེལ་ལྷུག་ལྷུག་ཀྱང་མེད་པས་དཀའ་ངལ་འདི་དག་རིམ་གྱིས་སེལ་དགོས་པ་ལས། འཕྲལ་མར་སེལ་མི་ཐུབ་པའི་གནས་དོན་ཞིག་ཆགས་ཡོད།
དེའི་ཕྱིར། དེ་ལ་ཞོར་འདེབས་ཀྱིས་མཐོ་སློབ་སློབ་ཡོན་འབུལ་བའི་རོགས་སྐྱོར་ཕན་རླབས་སྒྲུབ་ཐུབ་མཁན་དང་རེ་བ་བཅོལ་ས་གཙོ་བོ་གཞན་ཞིག་ཡོད་པ་དེ་ནི་གདན་ས་གསུམ་གཙོས་པའི་དགོན་སྡེ་ཁག་དང་། རྒྱལ་ཕྱི་ནང་གི་བོད་མི་འབྱོར་ལྡན་རྣམས་དང་འཚོ་ཐབས་བཟང་བ་རྣམས་ཡིན།
དེང་སྐབས་བོད་མི་འབྱོར་ལྡན་དང་ཕྱི་རྒྱལ་གནས་བཞུགས་སོགས་སྤྱི་སྒེར་ཁག་ཅིག་གིས་ལས་གཞི་འདི་རིགས་ལ་རྒྱབ་སྐྱོར་གནང་འགོ་ཚུགས་བཞིན་ཀྱང་ཡོད་པས། དེ་དག་ནི་ཞབས་འདེབས་རླབས་ཆེན་ཡིན་པས་དངོས་གནས་ཡི་རངས་དང་བསྔགས་བརྗོད་འོས་པའི་ཡུལ་ཅིས་ལ་མིན།
དེ་ཡང་སེར་བྱེས་མཁས་སྙན་གྲྭ་ཚང་གིས་ཀྱང་དགོས་ངེས་ཅན་གྱི་ཉམས་ཐག་སློབ་མ་ཁག་ལ་དམིགས་ཏེ། ༢༠༡༥-༢༠༡༦ ནང་སློབ་མ་ཁག་ཅིག་ལ་བཀའ་དྲིན་རྗེས་དྲན་སློབ་ཡོན་དེ་ཕུལ་ཡོད་འདུག་ལ། ད་ལོ་ཡང་༧གོང་ས་མཆོག་དགུང་གྲངས་༨༡ སོན་པའི་འཁྲུངས་སྐར་ཉིན་ལྷོ་ཕྱོགས་སྦེལ་ཀོབ་ལུགས་བདེ་གཉིས་ཀྱི་ཉམས་ཐག་ཁོངས་སུ་ཡོད་པའི་མཐོ་སློབ་འགྲིམས་པའི་ཉམས་ཐག་སློབ་མ་གྲངས་༡༣་དང་། གསར་འབྱོར་ཁོངས་ནས་ཉམས་ཐག་སློབ་མ་གཉིས་བཅས་ཁྱོན་སློབ་མ་ ༡༥ ལ་ ༢༠༡༦-༢༠༡༧ ལོའི་བཀའ་དྲིན་རྗེས་དྲན་གྱི་སློབ་དེ་ཕུལ་ཡོད་འདུག
སློབ་ཡོན་དེ་ཡང་སློབ་མ་སོ་སོའི་དགོས་མཁོ་དང་གནས་བབ་ལ་གཞིགས་ནས་མང་ཆ་ལ་ཧིན་སྒོར་ཁྲི་དྲུག་རེ་{༦༠༠༠༠}དང་། ཉུང་ཆ་ལའང་ཁྲི་གསུམ་རེ་{༣༠༠༠༠} བཅས་ཕུལ་གནང་འདུག་པས། དངོས་གནས་ལས་གཞི་འདི་རིགས་ནི་བསྟན་སྲིད་ཞབས་འདེབས་དང་རྒྱལ་བ་དགྱེས་པའི་མཆོད་སྤྲིན་ཡིན་ལ། དོན་དམ་པའི་རྒྱལ་བའི་ཞབས་བརྟན་ཀྱང་ཡིན་ངེས་སྙམ།།
དེས་ན། འབྱུང་འགྱུར་ལོ་ཟླའི་ནང་ལ་བོད་མི་ཉམས་ཐག་ལ་རོགས་སྐྱོར་དང་མཐོ་རིམ་སློབ་ཡོན་འབུལ་བ་སོགས་ཀྱི་ལས་གཞི་འདི་རིགས་ལ། དགོན་སྡེ་གྲྭ་ཚང་དང་འབྱོར་ལྡན་མི་སྣ་འཚོ་ཐབས་བཟང་བ་སོགས་རྒྱབ་སྐྱོར་རོགས་རམ་གནང་མཁན་གང་མང་བྱུང་ན། བོད་མི་བྱིངས་རྣམས་ཀྱི་འཚོ་ཐབས་ཇེ་བཟང་དང་རང་རེའི་སྤྱི་ཚོགས་ནང་ཤེས་ལྡན་མི་སྣ་གང་མང་གསོ་སྐྱོང་ཡོང་བར་ཕན་རླབས་ཤིན་ཏུ་ཆེ་ངེས།།
འོ་ཡ། ལོ་མང་རིང་རེ་སྒུག་བྱས་ཏེ་བསྡད་པའི་དོན་བཟང་དེ་ད་གཞི་ནས་མགོ་བཙུགས་སོང་། བཀའ་དྲིན་ཆེ། དགེ་འདུན་པའི་སྡེ། ང་ཚོར་ཐུན་མོང་གི་གནད་དོན་ཞིག་ཡོད་པ་ནི་ཆོས་ལུགས་པ་དང་མང་ཚོགས་ཀྱི་བར་ཐག་རིང་དྲག་པ་དེ་རེད། འདི་དངོས་ཡོད་ཀྱི་གནས་ཚུལ་རེད། ཡེ་ཤུ་ཆོས་པ་ཚོར་མཚོན་ན་མང་ཚོགས་དང་གཞི་གཅིག་ཏུ་འདྲེས་ཏེ་ཁ་ཡོད་ལག་ཡོད་ཀྱིས་སྤྱི་ཚོགས་ཀྱི་ཞབས་ཞུ་གནང་གི་འདུག འདི་ནི་མང་ཚོགས་དང་ཆོས་ལུགས་པའི་བར་ཐག་སྦྲེལ་བྱེད་ཀྱི་ཟམ་པ་ལྟ་བུ་རེད། འུ་བུ་ཅག་ལ་མཚོན་ན་ཆོས་ལུགས་པ་མང་ཚོགས་དང་རྒྱང་བཀྱེད་བྱས་ཡོད་པས་མང་ཚོགས་ལ་ཆོས་དད་ཡོད་ཀྱང་ཆོས་ལུགས་པར་ལྟ་སྟངས་ཡག་པོ་གཏན་ནས་མེད། ལྷག་པར་དུ་སློབ་མ་ཚོའི་ཁྲོད་ན་གནད་དོན་འདི་ཆུང་ཆུང་ཞིག་མིན། ད་རེས་ཕན་ཚུན་ལ་རྒྱབ་སྐྱོར་དང་རོགས་འདེགས་བྱས་བ་འདིས་འབྱུང་འགྱུར་འུ་ཚོ་འདུན་ལམ་ལ་སྔར་ལས་འོད་སྟོང་འཕྲོ་དངོས་རེད། སླར་ཡང་བཀའ་དྲིན་ཆེ་ཞུ།
༅༅།་རྒྱལ་བའི་བཀའ་བཞིན་གྲུབ་པར་བཀྲིས་བདེ་ལེགས་དང་སྙིང་ནས་བསྔགས་བརྗོད་ཞུ།
དེ་ནི་ཆོས་ཡིན། དེ་ནི་རྒྱལ་བའི་བཀའ་སློབ་ཡིན། འདི་ནི་གཞན་གཅེས་པར་འཛིན་པའི་ནང་པའི་
ལྟ་གྲུབ་ཡིན། འདི་ལྷག་ཅི་ཡོད།
སྐུ་མདུན་གྱིས་བཀའ་གནང་བ་བཞིན་དགོངས་པ་བཞེས་པ་་་བཀའ་དྲིན་ཆེ།
༅༅།་རྗེ་བཀའ་དྲིན་ཅན་ལ་གསོལ་བ་འདེབས། དུས་ནམ་ཡང་བསླུ་བ་མེད་པ་ཡིན།
༅༅། ང་བོད་པ་ཡིན་པའི་བོད་ལ་དགའ།
བོད་ཁ་བ་གངས་རིའི་ལྗོངས་ལ་དགའ།
ཆོས་སྟོན་པ་སངས་རྒྱས་ཁོང་ལ་དགའ།
ཚེ་འདི་ཕྱི་གཉིས་ཀྱི་སྐྱབས་གནས་ཡིན།
༅༅། མཐོ་ནམ་མཁའི་བྱ་ལམ་གོང་མ་ནས།། བྱ་ཐང་དཀར་ཞིག་གི་ཡར་ཤོག་ཟེར།།
ཡར་མི་ཡོང་ཐང་དཀར་སྐུ་ཚེ་རིང།། ཁྱེད་འདྲ་བའི་ནམ་འཕང་ང་ལ་མེད།