དགའ་ཉག་འཁྱམ་པོས།
དེ་རིང་གི་ཉིན་མོ་ནི་ངེད་ཅག་ལ་མཚོན་ན་ཆེས་རླབས་ཆེ་ཞིང་ཧ་ཅང་གཟི་བརྗིད་ལྡན་པ་ཞིག་སྟེ། འཛམ་གླིང་ཞི་བདེའི་དེད་དཔོན་གངས་ལྗོངས་འགྲོ་བའི་སྐྱབས་གཅིག་༧གོང་ས་༧རྒྱལ་བ་ཡིད་བཞིན་ནོར་བུ་མཆོག་ལ་བཀའ་དྲིན་གྱི་ཕུང་པོ་ཆ་ཤས་ཙམ་གསབ་སླད་བརྟན་བཞུགས་དགའ་སྟོན་གྱི་ཆོ་ག་ལེགས་འགྲུབ་བྱུང་སོང་བ་རེད། ཨ་ཕའི་ཁ་ཕོར་གཙང་ཞེན་མིན་རུང་ད་ཐེངས་ཀྱི་བརྟན་བཞུགས་ལ་གཞན་དང་མི་འདྲ་བའི་ཁྱད་ཆོས་འགའ་ཡོད་པ་སྟེ།
གཅིག ༽བརྟན་བཞུགས་འབུལ་མཁན་བྲག་གཡབ་ཚང་ལ་མཚོན་ན་བོད་གཞུང་དགའ་ལྡན་ཕོ་བྲང་དབུ་བརྙེས་པ་ནས་ད་ལྟའི་བར་ལྷ་སྡེ་མི་སྡེ་སྐྱ་སེར་ཡོད་དོ་ཅོག་འཛུབ་གུ་གར་བཙུགས་ཤར་དང་། ཕ་བོང་གར་བཞག་ཐབ་ལ་བརྩིས་ཏེ་གཞུང་གི་ལམ་ཆེན་གང་ན་ཡོད་པ་དེར་ཐེ་ཚོམ་མེད་པར་ཤར་བསྐྱོད་བྱས་པ་མ་གཏོགས་གཞུང་གི་ལངས་ཕྱོགས་དང་མི་མཐུན་ཞིང་རྩ་བའི་དམིགས་ཡུལ་དང་རྒྱབ་འགལ་བྱས་ཏེ་གཞན་ལ་མགོ་བཏགས་པ་དང་། རང་ཉིད་ཟུར་ཐོན་ཚུལ་གྱིས་ཚོགས་པ་སྐྱིད་སྡུག་དང་དགོན་པ་གཞིས་ཆགས་སོགས་གསར་འཛུགས་བྱས་མྱོང་མེད་པས་བྲག་གཡབ་བརྟན་བཞུགས་ལ་རྒྱབ་ལྗོངས་ཡོད་པ།
གཉིས ༽ བརྟན་བཞུགས་ཀྱི་ཐོག་མཐའ་བར་གསུམ་ཡོད་ཚད་ཀྱི་རྩ་བའི་ངེས་སྟོན་པ་དང་། རྡོ་རྗེ་སློབ་དཔོན། མཎྜལ་བཤད་པ་གསར་རྩོམ་དང་རྒྱས་བཤད་བྱེད་པོ་བྲག་གཡབ་༧སྐྱབས་མགོན་དགུ་པ་ཆེན་པོ་ནི་མདོ་ཁམས་བྲག་གཡབ་ཡུལ་གྱི་ཆོས་སྲིད་གཉིས་ཀྱི་བདག་པོར་མངའ་གསོལ་ཞུས་པ་ནས་ད་ལྟའི་བར་གཞིས་བྱེས་སྐྱ་སེར་ཡོངས་ཀྱི་སེམས་ཀྱི་དབུས་དང་དད་པའི་ཀློང་ན་ཉི་ཟླ་ལྟར་གསལ་ཞིང་རི་རབ་ལྟར་བརྗིད་པས། ལོ་རྒྱུས་དང་དད་མོས་གང་ཅིའི་ཐད་ནས་བྲག་གཡབ་ཀྱི་ཚབ་མཚོན་དང་མགྲིན་ཚབ་པ་བྱེད་ཆོག་པས་ཁོང་གིས་ལམ་སྟོན་གནང་བའི་བརྟན་བཞུགས་འདི་ཡང་བྲག་གཡབ་ཚང་གི་བརྟན་བཞུགས་ཡིན་པ།
གསུམ༽ མདོ་ཁམས་བྲག་གཡབ་ཡུལ་གྱི་སྐྱ་སེར་ཉུང་ཤས་མ་གཏོགས་ཡོད་ཚད་ཟམ་པ་གཅིག་གི་ཆུ་དང་རྩིག་པ་གཅིག་གི་རི་མོ་ལྟར་༧རྒྱལ་བ་ཡིད་བཞིན་ནོར་བུ་ལ་དད་མོས་དང་རེ་འདུན་གྱི་ནམ་ཟླ་འགྱུར་མ་མྱོང་ལ་གསོལ་འདེབས་ཀྱི་སྒྲ་དབྱངས་ཆད་མ་མྱོང་བས། བྲག་གཡབ་བརྟན་བཞུགས་འབུལ་བའི་འོས་ཆོས་ཚང་བ།
བཞི ༽ ༧གོང་ས་ཡིད་བཞིན་ནོར་བུའི་ཞལ་སྔ་ནས། བྲག་གཡབ་རིན་པོ་ཆེ་ནི་ངོས་དང་ཆུང་དུས་ནས་ངོ་ཤེས་ཤིང་། དེ་སྔོན་ངོས་དང་འདྲ་བར་དོལ་རྒྱལ་བསྟེན་གསོལ་གནང་གི་ཡོད་རུང་། ངོས་ཀྱི་དཔྱད་གསུམ་དག་པའི་སྐད་ཆ་ལ་ཉན་འཇོག་གནང་སྟེ་རྗེ་རྒྱལ་བ་གཉིས་པའི་དགོངས་པ་དང་མཐུན་པར་མཚམས་འཇོག་གཙང་མ་གནང་བ་མ་ཟད་ངོས་ལ་དད་པ་ཡིད་ཆེས་བསླུ་བ་མེད་པ་ཡོད་ཅིང་། རེ་བ་རྦད་དེ་བཅོལ་མཁན་ཞིག་ཡིན་པས་དམིགས་བསལ་གྱིས་ལྟ་རྟོག་དགོས། ད་ཐེངས་དུས་ཚོད་ཛ་དྲག་དང་ཐུང་ཐུང་ཡིན་ཞིང་དད་དམ་གཡོ་བ་མེད་པའི་བརྟན་བཞུགས་ཁ་ཤས་ཡོད་རུང་། ཁོང་གིས་རེ་བ་བཞིན་བྲག་གཡབ་པ་ཁ་གཙང་གིས་བརྟན་བཞུགས་འབུལ་ཆོག་པར་བྱས་ཡོད། ཚུར་བློ་གཏད་དང་རེ་བ་བརྒྱ་ཆ་བརྒྱ་བཅོལ་མཁན་ཚོར་ཕར་ཡང་དེ་ལྟར་ཡིན་ཞེས། ས་གསུམ་ཡངས་པའི་ཁྱོན་དུ་གསེར་གྱི་སྒྲོན་མེས་བཀང་རུང་རྙེད་དུ་མེད་པའི་རིན་བྲལ་གསུང་གི་གནང་བ་དགྱེས་བཞིན་ཐོབ་ལ། མཎྜལ་བཤད་པ་རྒྱས་བསྡུས་ག་རེ་ཡོད་ཀྱང་དབུལ་ཆོག་པའི་བཀའ་ཁྲོལ་ལེགས་པར་ཐོབ་པས། བྲག་གཡབ་བརྟན་བཞུགས་ལ་གཟི་བྱིན་དང་ལྗིད་ཁོག་ཡོད་པ།
ལྔ༽ བརྟན་བཞུགས་དགའ་སྟོན་གྱི་མཛད་སྒོ་འདི་ཡང་ཆོས་དང་མཐུན་ཞིང་དོན་ལ་ཕན་པ་ཞིག་འོང་ཆེད་བྲག་གཡབ་ཚང་དང་ལས་ཀྱིས་འབྲེལ་བའི་བླ་མ་བློ་ལྡན་ཤེས་རབ་ཀྱི་དངོས་སློབ་གྲོ་ལུང་པ་བློ་གྲོས་འབྱུང་གནས་ཀྱི་གསུང་བྱང་ཆུབ་ལམ་རིམ་ཆེན་མོའི་ཁུངས་དང་རྒྱབ་རྟེན་ལྟ་བུ་བསྟན་རིམ་ཆེན་མོ་རིན་ཆེན་ཕྲེང་བ་པར་རྩ་ཐབས་ཤེས་དང་ཞུ་དག་ངེས་འདྲོངས་ཐོག་རྒྱལ་སྤྱིའི་དཔེ་རྟགས་ཡོད་པའི་དེང་རབས་ཀྱི་དེབ་གཟུགས་སྤུས་ལེགས་ཐོག་པར་སྐྲུན་ཞུས་ཏེ་བོད་ཡིག་འབྲི་ཀློག་ཐུབ་པའི་ཆོས་ཞུ་བ་ཡོངས་ལ་རིན་མེད་འགྲེལ་སྤེལ་གནང་བས། བྲག་གཡབ་བརྟན་བཞུགས་ལ་ཉར་རྒྱུ་དང་ཀློག་རྒྱུ་ཡོད་པ།
དྲུག ༽ ༧གོང་ས་ཡིད་བཞིན་ནོར་བུས་ཡང་ཡང་བསྔགས་ཤིང་རིས་མེད་མཁས་པའི་ཚོགས་ཀྱིས་རྟག་ཏུ་བསྙེན་ལ་མཚན་སྙན་གླིང་ལ་ཁྱབ་པའི་འཕགས་ཡུལ་པཎ་གྲུབ་བཅུ་བདུན་གྱི་སྐུ་བརྙན་རྒྱ་ནག་ལི་མས་བཞེངས་ཤིང་། དཀའ་བསྐྱེད་ངལ་བ་བསྟེན་ཏེ་ཉེ་དང་རིང་བའི་མཚམས་ནས་གནས་འདིར་འདུས་པའི་དད་ལྡན་ཆོས་ཞུ་བ་སྐྱ་སེར་དབྱེར་མེད་དང་ཤར་ནུབ་ཁྱད་མེད་སུམ་ཁྲི་བརྒལ་བར་འགྱེད་སྐལ་ཧིན་སྒོར་ལྔ་བརྒྱ་དང་བཅུ་རེ་ཕུལ་བས། བྲག་གཡབ་བརྟན་བཞུགས་ལ་གསར་གཏོད་དང་གུ་ཡངས་ཀྱི་ཆ་ཡོད་པ།
༧ ༽བར་སྐབས་ཤིག་ལ་མདོ་ཁམས་བྲག་གཡབ་ཡུལ་དུ་ཤུགས་ལྡན་ནམ་དོལ་རྒྱལ་བསྟེན་གསོལ་ཅུང་ཟད་ཙམ་ལས་མེད་མོད་དུས་ཡུན་ཐུང་ཐུང་ཞིག་ལ་དོལ་ཚོགས་ཀྱི་སྐབས་འཚོལ་བ་མང་པོས་འདྲེ་ལག་གང་སར་བརྐྱངས་ཤིང་ཨ་གསར་ཆེ་ཞིང་ཨུ་ཚུགས་རྒོད་པའི་མི་སྣ་ཉུང་ཤས་དང་ཕྱི་ནང་ངན་འབྲེལ་གྱིས་ལོག་བཤད་དང་འཁྱོག་བཤད་ཀྱིས་ཁེངས་པའི་དེབ་དང་འོད་སྡེར་སོགས་གང་སར་བཀྲམ་སྟེ་གསར་བུ་རྒྱུས་མེད་དག་ལོག་ལམ་དུ་འཁྲིད་ཐབས་དང་། བརྙན་དང་སྒྲ་སོགས་གཅིག་ཏུ་མ་ངེས་པའི་བརྒྱུད་ལམ་སྣ་ཚོགས་ཐོག་ཏུ་བྲག་གཡབ་མི་དམངས་ཁོ་ཚོའི་རྒྱབ་ཏུ་ཡོད་མདོག་གི་རྣམ་འགྱུར་འདི་ལ་བརྡ་ལན་གསལ་པོ་སྤྲད་ཡོད་པས། བྲག་གཡབ་བརྟན་བཞུགས་ལ་གོ་བརྡ་ཡོད་པ།
བརྒྱད ༽ ༧རྒྱལ་བ་ཡིད་བཞིན་ནོར་བུའི་བཀའ་དྲིན་གྱི་གྲིབ་བསིལ་འོག་ཏུ་འཚོ་བཞིན་པའི་བྲག་གཡབ་ཆེ་ཚང་༧སྐྱབས་མགོན་ དགུ་པ་ཆེན་པོ། བྲག་གཡབ་ཆུང་ཚང་སྤྲུལ་སྐུ། རྭ་སྟོད་སྐྱོང་བླ་རིན་པོ་ཆེ། བྲག་གཡབ་རྟོགས་ལྡན་རིན་པོ་ཆེ། རྭ་སྟོད་ཆུ་དབར་སྤྲུལ་སྐུ། ཉག་རེ་ཤར་སྤྲུལ་རིན་པོ་ཆེ། དེ་བཞིན་མཁན་སྤྲུལ་སོགས་ཀྱིས་གཙོས་གདན་ས་གསུམ་དང་རྭ་བ་སྟོད་པ། རྣམ་གྲོལ་གླིང་དང་བཙུན་དགོན་སོགས་ནས་ཕེབས་པའི་བཀའ་རབ་འབྱམས་དགེ་བའི་བཤེས་གཉེན་དང་གྲྭ་བཙུན་འདུས་མང་། བོོད་མི་མང་སྤྱི་འཐུས་བྲག་གཡབ་གངས་ལྷ་མོ་སོགས་ཀྱིས་གཙོས་རྒྱ་བལ་འབྲུག་གསུམ་དང་ཨ་རི་ཡུ་རོབ་སོགས་ནས་ཕེབས་པའི་སློབ་གཉེར་བ་དང་ཉམས་ཞིབ་པ། གསར་འགོད་པ་དང་ལག་རྩལ་བ། ཚོང་པ་དང་ལྷ་བྲིས་པ་འཚེམ་བཟོ་བ་སོགས་ལས་རིགས་མི་འདྲ་བའི་སྤུན་ཟླ་ཕོ་མོ་གང་མང་མཉམ་འཛོམས་ཐོག་བརྟན་བཞུགས་ལེགས་པར་གྲུབ་པས། བྲག་གཡབ་བརྟན་བཞུགས་ལ་གཏིང་དང་ཁྱབ་ཚད་ཡོད་པ་བཅས་སོ།
མཐར་བསྡོམས་༧གོང་ས་མཆོག་གི་གསུང་ཞིག་དྲངས་ཏེ་རེ་བ་ཆུང་ཆུང་ཞིག་གིས་མཇུག་བསྡུ་རྒྱུ་ཡིན།
མཎྜལ་བཤད་པ་དངོས་ཡོད་གནས་ཚུལ་ཡག་པོ་བྲིས་འདུག །འོན་ཀྱང་གཞིས་བྱེས་མཉམ་འཛོམས་སྐབས་བྲག་གཡབ་ཏུ་ཕེབས་རོགས་ཟེར་འདུག བྲག་གཡབ་ནང་གཙང་མ་མ་ཆགས་བར་ང་རང་འགྲོ་མི་ཐུབ། སྔོན་མར་ཤར་རྩེ་གྲྭ་ཚང་ལ་ཡང་དེ་འདྲ་བཤད་པ་ཡིན་ལྷག་པར་དོལ་ཚོགས་ཀྱིས་གནོད་ཅིང་འཚེ་བའི་བྱ་སྤྱོད་སྤེལ་སྲིད་པར་རྒྱ་གར་བདེ་སྲུང་ལས་ཁུངས་སོགས་ཀྱིས་བཤད་འོང་གི་འདུག་པས་ཉེན་ཁ་ཡང་ཆེན་པོ་རེད། ང་རང་ཚོང་པ་ནི་མིན། འགྲོ་དང་མི་འགྲོ་འདོད་པ་རེད། ཅེས་གསུངས། མཇུག་གི་རེ་བ་ནི་འཛམ་གླིང་ཤར་ནུབ་གང་སར་ཡོད་པའི་བྲག་གཡབ་ཀྱི་སྤུན་ཟླ་རྣམ་པས་ཤེས་ཡོན་དང་ཡ་རབས་གཞན་ཕན་ཕྱོགས་ལ་བརྩོན་འགྲུས་དང་དོ་སྣང་ཆེན་པོས་ཕ་ཡུལ་གྱི་སྣོད་བཅུད་ཡོངས་རྫོགས་གོང་ནས་གོང་དུ་འཕེལ་བ་གནང་རོགས། ང་ཚོ་གངས་ཅན་པའི་མགོན་པོ་གང་གི་སྔར་གྱི་དཔྱད་གསུམ་དག་པའི་གསུང་བཤད་དག་དང་། གོང་དུ་དྲངས་པའི་དེ་རིང་གི་གསུང་བཤད། དེ་བཞིན་བྲག་གཡབ་༧སྐྱབས་མགོན་དགུ་པ་ཆེན་པོས་ད་ཐེངས་ལྗགས་རྩོམ་གནང་བའི་མཎྜལ་བཤད་པ་བཅས་ལ་གསན་གཟིགས་ཚུལ་བཞིན་གནང་སྟེ་དངོས་ཡོད་དྲང་བདེན་ལ་གཞིར་བཅོལ། དངོས་སྟོབས་རིགས་པས་ཟུར་བརྒྱན། བཀའ་དང་དགོངས་འགྲེལ་གྱི་སྙིང་པོ་བསྡུས་པའི་དགེ་ལྡན་བསྟན་པའི་བྱ་བ་ལ་གཙོ་ཕལ་དང་མགོ་མཇུག་མི་ནོར་བ་ཅི་ནས་ཀྱང་གནང་རོགས།
གོང་གི་གསུང་བཤད་དེ་ཚོ་དོན་དག་ལས་ཚིག་ཇི་བཞིན་མིན་པས་དགོངས་འཇགས་འཚལ། གདན་ས་དགའ་ལྡན་ནས། དགའ་ཉག་འཁྱམ་པོས། ཕྱི་ལོ། ༡༤/༡༢/༢༦ ཉིན།
བྲག་གཡབ་པ་ཚོ་ཡག་པོ་རེད། བཀའ་དྲིན་ཆེ། ཁྱི་རྒན་དོལ་ཚོགས་ནས་བྲག་གཡབ་་པ་ཡོངས་ནག་པོ་བཟོ་འདོད་པ་དེ་། ལམ་འགྲོ་མ་བྱུང་བ་རེད། ད་ལྟའི་དུས་ཚོད་འདི་བོད་མི་ཡོངས་ཆིག་བསྒྲིལ་དང་ནུས་ཤུགས་ཅིག་བསྡུས་ཀྱིས་ རྒྱལ་བའི་སྐུའི་ཉེས་སྲུང་དང། ང་ཅག་བོད་མིའི་སྙིང་ལ་གྲི་གཙུགས་པ་དེ་ནམ་ཡང་བརྗེད་ཐབས་མེད་། ཁྱི་རྒན་དོལ་འདྲེ་ཚོ།
་་་་་་་་་་་་་་་་་་ ༧ ༽བར་སྐབས་ཤིག་ལ་མདོ་ཁམས་བྲག་གཡབ་ཡུལ་དུ་ཤུགས་ལྡན་ནམ་དོལ་རྒྱལ་བསྟེན་གསོལ་ཅུང་ཟད་ཙམ་ལས་མེད་མོད་དུས་ཡུན་ཐུང་ཐུང་ཞིག་ལ་དོལ་ཚོགས་ཀྱི་སྐབས་འཚོལ་བ་མང་པོས་འདྲེ་ལག་གང་སར་བརྐྱངས་ཤིང་ཨ་གསར་ཆེ་ཞིང་ཨུ་ཚུགས་རྒོད་པའི་མི་སྣ་ཉུང་ཤས་དང་ཕྱི་ནང་ངན་འབྲེལ་གྱིས་ལོག་བཤད་དང་འཁྱོག་བཤད་ཀྱིས་ཁེངས་པའི་དེབ་དང་འོད་སྡེར་སོགས་གང་སར་བཀྲམ་སྟེ་གསར་བུ་རྒྱུས་མེད་དག་ལོག་ལམ་དུ་འཁྲིད་ཐབས་དང་། བརྙན་དང་སྒྲ་སོགས་གཅིག་ཏུ་མ་ངེས་པའི་བརྒྱུད་ལམ་སྣ་ཚོགས་ཐོག་ཏུ་བྲག་གཡབ་མི་དམངས་ཁོ་ཚོའི་རྒྱབ་ཏུ་ཡོད་མདོག་གི་རྣམ་འགྱུར་འདི་ལ་བརྡ་ལན་གསལ་པོ་སྤྲད་ཡོད་པས། བྲག་གཡབ་བརྟན་བཞུགས་ལ་གོ་བརྡ་ཡོད་པ། ་་་་་་་་་་་
བསྟོད་ར་མི་ལ་གཏོང་ཆུག ནོར་འཁྲུལ་རང་གི་བཅོས། འུར་མ་རྒྱབ། ཕ་ཡུལ་གྱི་མི་རྣམས་ཁ་ཕྱོགས་ཤེས་ཡོན་ཕྱོགས་སུ་བསྒྱུར་ཨེ་ཐུབ་རེ་བལྟོས། དངོས་གནས་བྲག་གཡབ་ཚང་ཡིན་ན་བྲག་གཡབ་ཀྱི་གཞོན་སྐྱེས་རྣམས་ལ་ཤེས་ཡོན་རེ་བསྐྲུན་ཨེ་ཐུབ་རེ་བལྟོས། དེ་མིན་ཅིག་ཅིག་ཉིག་ཉིག་བཤད་ནའང་དེ་ཙམ་མོ།