མདོ་ལུང་འགའི་དོགས་དཔྱོད།

ལྡོང་ཆུ་ཤེལ། ༼སྐད་འཕྲིན་ལས་བཤུས་པའོ།། ༽

དོགས་དཔྱོད་དང་པོ།
དེ་ཡང་སྟོན་པའི་གསུང་རབ་དང་དེའི་དགོངས་འགྲེལ་གྱི་བསྟན་བཅོས་མཐའ་དག་ལ་རིགས་ལམ་དྲི་མ་མེད་པས་དཔྱད་ནས་ཡིད་ཆེས་ཀྱི་ངེས་པ་རྙེད་པའི་སྟེང་ནས་འཇུག་དགོས་པ་ནི་དབང་རྣོན་ཆོས་ཀྱི་རྗེས་སུ་འབྲང་བའམ་རིགས་པའི་རྗེས་སུ་འབྲང་བ་དག་གི་ལས་སུ་བྱ་བ་ཡིན་ནོ་ཞེས་ལུང་གི་རྒྱབ་རྟེན་དང་བཅས་ཏེ་མང་པོ་ཞིག་གི་ཁ་ན་རླུང་ལྟར་གྲག་གོ།།
དེས་ན་ཁོ་བོས་འདིར་བརྗོད་འདོད་པ་ནི་བོད་ཀྱི་མཁས་མི་མཁས་ཐམས་ཅད་ཀྱི་ཁ་བྱང་ལག་བྱང་དུ་གྱུར་ཅིང་། སྟོན་པ་སངས་རྒྱས་ཀྱི་བཀའ་ཡིན་ན་བསྲེགས་བཅད་བརྡར་གསུམ་གྱིས་གསེར་ལ་བརྟག་པ་ཇི་བཞིན། ལུང་དོན་ལ་ཚད་མ་གསུམ་གྱིས་ཡང་དང་ཡང་དུ་དཔྱད་ནས་ཁས་ལེན་པ་ལས་རང་གར་ཁས་མི་ལེན་པར་གདམས་པའི་ཚིགས་བཅད་ཅིག་ཡོད་པ་ནི། འདི་ལྟར། “དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །”ཞེས་པ་དང་། མདོ་སྡེ་རྒྱན་ལས་ཀྱང་། “ཆོས་བཟང་རིགས་པས་རྣམ་དཔྱད་བསམ་པ་ཅན། །རྟག་ཏུ་བདུད་ཀྱིས་བར་ཆད་བྱེད་པ་མེད། །”ཅེས་པ་ལ་སོགས་པ་ཡིན་ནོ།།

འོ་ན་གོང་དུ་དྲངས་པའི་སངས་རྒྱས་ཀྱི་གསུང་ཚིག་ཤོ་ལོ་ཀ་གཅིག་པོ་དེ་སྟོན་པས་གནས་གང་ཞིག་ཏུ་འཁོར་སུ་ཞིག་ལ་བཀའ་བསྩལ་པ་ཡིན་ནམ་ཞེས་དྲིས་ཚེ། མཁས་པར་རློམ་པ་ཕལ་མོ་ཆེ་ཞིག་ཁ་མུག་མུག་ཙམ་གྱིས་སྨྲ་བ་འགགས་ནས་ལྐུགས་པར་འགྱུར་ངེས་པ་ཁོ་བོས་ཡིད་ཚོད་བྱས་ཆོག་གོ།།
དེས་ན་འགའ་རེས་ཇི་སྐད་དུ་ཞེས་པ་ཙམ་གྱིས་ལུང་ཚིག་དེ་འདྲེན་རྐྱང་བྱེད་བཞིན་ཡོད་པ་དང་། མང་པོ་ཞིག་གིས་མདོ་ལས་ཞེས་པ་ཙམ་མ་གཏོགས། མདོ་གང་གི་ནང་དུ་གསུངས་ཡོད་པ་འཆད་རྒྱུ་མེད་ལ། ཞུ་ཆེན་པ་ཚུལ་རིན་སོགས་མཁས་པ་སྐོར་ཞིག་གིས་ཆོས་མངོན་པའི་མདོ་ལས་ཞེས་གསུངས་པ་དང་། ཡང་མཁས་པ་ལ་ལས་སྟུག་པོ་བཀོད་པའི་མདོ་ལས་ཞེས་བྲིས་ཡོད་ནའང་། དོན་དམ་དུ་སྟུག་པོ་བཀོད་པའི་མདོར་ཚིགས་བཅད་དེ་འདྲ་བ་ཞིག་གཏན་ནས་མི་སྣང་ངོ་།།
གཅིག་བྱས་ན། བོད་འགྱུར་གྱི་མདོ་དེ་ལ་བམ་པོ་བཞི་དང་ལེའུ་དགུ་བཞུགས་པ་དང་། ལེའུ་དགུ་པ་དེ་ཡང་གཤམ་ནས་ཁ་མི་ཚང་བའི་བཤད་ཚུལ་ཡོད་ལ། ད་དུང་མདོ་དེ་སྟོང་ཕྲག་བཅུ་གཉིས་པའི་རྒྱན་སྟུག་པོ་ལས་ཇི་སྙེད་པའི་མདོ་ཡིན་པ་ལས། སྟུག་པོ་བཀོད་པའི་མདོ་ཁ་ཚང་ནི་མིན་པར་ངེས་སོ།།
བོད་འགྱུར་མ་ཡིན་པའི་སྟུག་པོ་བཀོད་པ་གཞན་ཞིག་ཏུ་ཡོད་ན་ནི་བརྟག་པར་བྱ་དགོས་པ་ཡིན་ལ། དེ་མིན་བསྟན་པ་ཕྱི་དར་གྱི་སྐབས་རྒྱལ་བའི་བཀའ་འགྱུར་རོ་ཅོག་ཕྱོགས་གཅིག་ཏུ་བསྒྲིགས་པ་ནས་དེང་གི་བར་བྲིས་མ་དང་པར་མའི་རྒྱུན་ཇི་སྙེད་ཅིག་བཞུགས་པའི་ཁྲོད་དུ་སྟུག་པོ་བཀོད་པར་ཚིག་དེ་འདྲ་ཞིག་མ་བྱུང་ཞིང་། མདོ་དེ་ལ་འགྱུར་མི་འདྲ་བ་གཞན་ནི་ཕལ་ཆེར་མ་བྱུང་བ་འདྲ་ཡང་། ད་དུང་བརྟག་དཔྱད་དང་འཚོལ་ཞིབ་བྱེད་རྒྱུ་གལ་ཆེའོ།།
འདྲེན་བྱེད་དངོས་ཀྱི་སྤྱོད་ཡུལ་དུ་མ་གྱུར་པར་རྣ་ཐོས་ཙམ་གྱིས་གཡམ་ལ་རྒྱུག་པ་འདི་མཁས་ཉམས་སུ་མི་ཆེ་ནའང་། གནའ་ནས་དེང་གི་བར་བོད་ཀྱི་སྲོལ་དུ་གྱུར་ཡོད་པས་ཐབས་ཅི་ཡོད། དེས་ན་ཁོ་བོས་མཚམས་འདིར་སྐད་གསང་མཐོན་པོས་བརྗོད་རྒྱུ་ཞིག་ལ། ཚིགས་བཅད་འདི་རྒྱན་སྟུག་པོ་བཀོད་པའི་ལུང་ཚིག་ལྟ་ཅི། ཐ་ན་ཚིགས་སུ་བཅད་པ་འདི་ཇི་མ་ཇི་བཞིན་ཞིག་ད་སྔར་ལག་སོན་བྱུང་བའི་བཀའ་མདོ་རྒྱུད་གང་དུའང་མི་རྙེད་ལ། ད་དུང་མཁས་པ་འགའ་རེས་ལང་ཀར་གཤེགས་པའི་མདོ་ལས་ཞེས་འཁོད་ཡོད་པའང་མཐོང་མོད། བཀའ་འགྱུར་དུ་ལང་གཤེགས་ཀྱི་ཆོས་ཚན་གཉིས་བཞུགས་པའི་ནང་དུ་ལུང་ཚིག་འདི་འདྲ་ཞིག་གཏན་ནས་མེད་དོ།།
འོན་ཀྱང་། གསང་སྔགས་ཀྱི་རྒྱུད་གསར་རྙིང་རྣམས་སུ་ཚིག་ཟུར་མི་འདྲ་བ་ཙམ་མ་གཏོགས་དོན་འདྲ་བ་གཅིག་མིན་དུ་མར་བྱུང་སྟེ། རྒྱ་གར་གྱི་མཁན་པོ་ག་ཡ་དྷ་ར་དང་། ལོཙྪ་བ་དགེ་སློང་ཤཱཀྱ་ཡེ་ཤེས་གཉིས་ཀྱིས་བསྒྱུར་བའི་《དཔལ་སྟོབས་པོ་ཆེའི་རྒྱུད་ཀྱི་རྒྱལ་པོ་》（སྡེ་པར་བཀའ་འགྱུར། རྒྱུད་འབུམ། ༼ག༽ ལྡེབ་༢༡༦སྲིབ་ཕྲེང་༦པ་）ལས། “བསྲེགས་བཅད་བདར་བའི་གསེར་བཞིན་དུ། །ཡོངས་སུ་བརྟགས་ནས་ང་ཡི་བཀའ། །བླང་བར་བྱ་ཡི་མོས་པ་འམ། །གཞན་གྱིས་མཁས་པ་འཇུག་མི་བྱ། །”ཞེས་དང་། གུ་ཧྱ་གསང་བ་དང་འབྲོག་མིས་བསྒྱུར་བའི་སྔ་འགྱུར་《མ་མོའི་ལམ་རྒྱུད་ལུང་》（སྡེ་པར་རྙིང་རྒྱུད། ༼ཟ༽ ལྡེབ་༣༠༤སྲིབ་ཕྲེང་༥པ་）ལས། “དཔའ་བོ་དག་གམ་རིག་འཛིན་གྱིས། །བསྲེག་བཅད་བརྡར་བའི་གསེར་བཞིན་དུ། །ཡོངས་སུ་བརྟགས་ནས་མ་མོའི་ལམ། །བླང་བར་བྱ་ཡི་མོས་པ་འམ། །དད་པ་ཙམ་གྱིས་འཇུག་པ་མིན། །”ཞེས་དང་། ཡང་སྔ་འགྱུར་གྱི་རྒྱུད་ཤྲཱི་སིངྷ་དང་། བཻ་རོ་ཙ་ནས་བསྒྱུར་བའི་《བྱང་ཆུབ་ཀྱི་སེམས་ཀྱི་མན་ངག་རིན་པོ་ཆེའི་ཕྲེང་བ་བང་མཛོད་འཕྲུལ་གྱི་ལྡེ་མིག་ཅེས་བྱ་བ་》（སྡེ་པར་རྙིང་རྒྱུད། ༼ཆ༽ ལྡེབ་༡༦༡ཉིན་ཕྲེང་༥པ་）ལས། “ཁྱོད་ལ་སོགས་པའི་འཁོར་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ཡོངས་སུ་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །”ཞེས་གསུངས་ཡོད་ལ། གོང་གི་འཕྲུལ་ལྡེའི་ལུང་འདིའི་རྐང་པ་དང་པོ་དང་། རྐང་པ་གསུམ་པའི་ཡོངས་སུ་ཞེས་པ་མ་གཏོགས་ཡོངས་གྲགས་ཀྱི་ལུང་དེ་དང་འདྲ་བ་ཡིན་ནོ།།
ད་དུང་《བསྟན་འགྱུར་》ཁྲོད་དུའང་བྱུང་ཡོད་དེ། 《བསྡུས་པའི་རྒྱུད་ཀྱི་རྒྱལ་པོ་དུས་ཀྱི་འཁོར་ལོའི་འགྲེལ་བཤད་རྩ་བའི་རྒྱུད་ཀྱི་རྗེས་སུ་འཇུག་པ་སྟོང་ཕྲག་བཅུ་གཉིས་པ་དྲི་མ་མེད་པའི་འོད་ཅེས་བྱ་བ་》（སྡེ་པར་བསྟན་འགྱུར། རྒྱུད། ༼ད༽ ལྡེབ་༢༣༢སྲིབ་ཕྲེང་༤པ་）ལས། “ཡོངས་སུ་བརྟག་པ་དང་བྲལ་བ་ནི་བཅོམ་ལྡན་འདས་ཀྱི་གསུང་དུ་མི་འགྱུར་ཏེ། བཅོམ་ལྡན་འདས་ཀྱི་གསུང་ནི་ཐོག་མར་དགེ་བ་བར་དུ་དགེ་བ་ཐ་མར་དགེ་བའོ། །དེ་བཞིན་དུ་བཅོམ་ལྡན་འདས་ཀྱིས་གསུངས་པ། བསྲེགས་བཅད་བརྡར་བའི་གསེར་བཞིན་དུ། །མཁས་པ་རྣམས་ཀྱིས་ཡོངས་བརྟགས་ནས། །བདག་གསུང་བླང་བྱ་དགེ་སློང་དག །གུས་པའི་ཕྱིར་ནི་མ་ཡིན་ནོ། །”ཞེས་གསུངས་ཡོད་ལ། ཆོས་ཚན་འདི་ལི་ཐང་དང་སྡེ་དགེའི་《བཀའ་འགྱུར་》ཁྲོད་དུའང་བཞུགས་ཡོད་དོ།།
གཞན་ཡང་། 《དཔལ་མཁའ་འགྲོ་རྒྱ་མཚོ་རྣལ་འབྱོར་མའི་རྒྱུད་ཀྱི་རྒྱལ་པོ་ཆེན་པོའི་འགྲེལ་པ་གྲུ་གཟིངས་ཞེས་བྱ་བ》（སྡེ་པར་བསྟན་འགྱུར། རྒྱུད། ༼ཛ༽ ལྡེབ་༡༢སྲིབ་ཕྲེང་༦པ་）ལས། “འདིར་གལ་ཏེ་དེ་སྲིད་སྐྱོན་མེད་ཀྱང་། དེའི་ཚེ་འདིར་སློབ་དཔོན་དུ་མའི་དགོངས་པ་འདིར་བཅུག་པ་དེ་ལ་སྐྱོན་ཡོད་དོ། །སྨྲས་པ། ཕྱི་མའི་ཚེ་ཕྱི་མའི་དུས་སུ་གང་རྡོ་རྗེ་སློབ་དཔོན་གྱི་གོ་འཕང་ལ་གནས་པའི་སློབ་དཔོན་དེ་རྣམས་ཀྱི་ཡང་དག་པར་ཡིད་ཆེས་པར་བྱ་བའི་དོན་དུ། སློབ་མ་སྣ་ཚོཊ་ལ་གནས་པའི་དགོངས་པ་རྣམས་ཀྱི་གཅིག་ནས་གཅིག་ཏུ་བརྒྱུད་པ་གཅིག་ལ་གཅིག་མངོན་པར་འདོད་པ་རྣམས་ཀྱིས། དེ་ལྟར་སློབ་དཔོན་གྱི་དགོངས་པ་ལ་ཡང་དག་པར་ཡིད་མི་ཆེས་པ་དེའི་ཕྱིར་དེ་རྣམས་ཀྱིས་བཅུག་པའི་དོན་ཏོ། །གཞུང་འདིར་བྱས་པའི་སློབ་དཔོན་སྣ་ཚོགས་ཀྱི་བཞེད་པ་གསུངས་པ་ལ་མོས་པ་རྣམས་ཅིག་ཅར་དུ་རྣམ་པར་དཔྱད་པ་ན། གང་དང་གང་ལ་རང་གི་སེམས་ཀྱིས་བསམས་པ་དེ་དང་དེ་ལ་འདི་བསྟན་ཏོ། །དེའི་ཚེ་གལ་ཏེ་བློ་གྲོས་དང་ལྡན་པས་དེ་བཞིན་གཤེགས་པའི་གསུང་གོ་བར་འགྱུར་རོ། །དེ་བཞིན་དུ་ཡང་། བསྲེགས་བཅད་བདར་བའི་གསེར་བཞིན་དུ། །དགེ་སློང་དག་གམ་མཁས་པ་ཡིས། །ཡོངས་སུ་བརྟགས་ནས་བླ་མའི་བཀའ། །བླང་བར་བྱ་ཡི་གུས་ཕྱིར་མིན། །ཞེས་བྱ་བས་སྐྱོན་མེད་དོ། །”ཞེས་ཀྱང་གསུངས་ཡོད་དོ།།
ད་དུང་དེ་ལས་ཀྱང་རྒྱུན་དུ་ལུང་འདྲེན་བྱེད་པ་དེ་དང་ཆེས་འདྲ་བ་ནི། སློབ་དཔོན་ཞི་བ་འཚོས་མཛད་པའི་《དེ་ཁོ་ན་ཉིད་བསྡུས་པའི་ཚིག་ལེའུར་བྱས་པ་》（སྡེ་པར་བསྟན་འགྱུར། ཚད་མ། ༼ཟེ༽ ལྡེབ་༡༣༠སྲིབ་ཕྲེང་༧པ་）རུ། “དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ཡོངས་སུ་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །”ཞེས་པའི་ཚིགས་བཅད་འདི་བྱུང་ཡོད་ལ། ཚིག་འདི་གང་ནས་དྲངས་པར་གསལ་ཁ་མེད་ནའང་སངས་རྒྱས་ཀྱི་གསུང་ཡིན་མིན་ལ་ཐེ་ཚོམ་བྱེད་མི་དགོས་ཏེ། ཚིགས་བཅད་འདིའི་གོང་དེ་མ་ཐག་ཏུ་”བདག་ཉིད་ཆེན་པོ་གང་དག་གིས། །གང་གསུངས་རིགས་ལྡན་དོན་ཉིད་དང་། །བདག་ལ་དེ་དོན་ནུས་པ་ནི། །གསལ་བར་ངེས་པར་མཛད་པ་ཡིན། །མུ་སྟེགས་ངན་གླང་ཆེས་སྨྱོས་པའི། །དྲེགས་པ་ཉམས་པར་མཛད་པ་ཅན། །སྐྲག་པ་མ་ལུས་མི་མངའ་བ། །འདི་ལྟར་དེ་དག་སེང་སྒྲ་སྒྲོགས། །དགེ་སློང་དག་གམ་མཁས་རྣམས་”ཞེས་གསུངས་ཡོད་ལ། ཀ་མ་ལ་ཤཱི་ལས་མཛད་པའི་དེ་ཁོ་ན་ཉིད་བསྡུས་པའི་དཀའ་འགྲེལ་དུ་གཟིགས་ཚེའང་ཅུང་ཟད་ངོ་འཕྲོད་ཡོང་། དེས་ན་བོད་ཀྱི་མཁས་པ་རྣམས་ཀྱིས་ལུང་འདྲེན་བྱས་པ་དག་ཀྱང་ཕལ་ཆེར་འདི་ལ་བརྟེན་ནས་དྲངས་ཀྱང་སྲིད་ལ། རྒྱུ་མཚན་ནི་ཡོངས་སུ་ཞེས་པའི་ཡིག་འབྲུ་གཉིས་མ་གཏོགས་འདྲ་བས་སོ།།
དེས་ན་འདིར་བསྟན་འགྱུར་དུ་བྱུང་ཡོད་པ་ཐམས་ཅད་ཕྱོགས་གཅིག་ཏུ་དྲངས་ན། སློབ་དཔོན་རབ་ཏུ་དགའ་བའི་འབྱུང་གནས་གོ་ཆས་མཛད་པའི་《དཔལ་གསང་བ་འདུས་པ་རྒྱུད་ཀྱི་རྒྱལ་པོའི་བཤད་པ་ཟླ་བའི་འོད་ཟེར་ཞེས་བྱ་བ་》（སྡེ་པར་བསྟན་འགྱུར། རྒྱུད། ༼ཇི༽ ）ལས། “འདི་ཉིད་བཅོམ་ལྡན་འདས་ཀྱིས། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བདར་བ་གསེར་བཞིན་དུ། །ཡོངས་སུ་བརྟགས་ཏེ་ང་ཡི་བཀའ། །བླང་བར་བྱ་ཡང་གུས་ཕྱིར་མིན། །ཞེས་བྱ་བ་གསུངས་སོ། །”ཞེས་དང་། སློབ་དཔོན་དྲི་མེད་སྦས་པས་མཛད་པའི་《དཔལ་གསང་བ་འདུས་པའི་རྒྱན་ཞེས་བྱ་བ་》（སྡེ་པར་བསྟན་འགྱུར། རྒྱུད།༼ཏི༽ ）
ལས། “གང་བཅོམ་ལྡན་འདས་ཀྱིས། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བདར་བའི་གསེར་བཞིན་དུ། །རིགས་པས་བརྟགས་ནས་ང་ཡི་བཀའ། །བླང་བར་བྱ་ཡིས་གུས་ཕྱིར་མིན། །”
ཞེས་དང་། མཁས་པ་ཆེན་པོ་རཏྣཱ་ཀ་ར་ཤནྟིས་མཛད་པའི་《དཔལ་གཤིན་རྗེ་དགྲ་ནག་པོའི་རྒྱུད་ཀྱི་རྒྱལ་པོ་ཆེན་པོའི་དཀའ་འགྲེལ་རིན་པོ་ཆེའི་སྒྲོན་མ་ཞེས་བྱ་བ་》（སྡེ་པར་བསྟན་འགྱུར། རྒྱུད། ༼བི༽ ）ལས། “དེ་ལྟར་ན། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བདར་བའི་གསེར་བཞིན་དུ། །ཡོངས་སུ་བརྟགས་ནས་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །”ཞེས་དང་། སློབ་དཔོན་ལྷན་ཅིག་སྐྱེས་པའི་རྡོ་རྗེས་མཛད་པའི་《དེ་ཁོ་ན་ཉིད་བཅུ་པའི་རྒྱ་ཆེར་འགྲེལ་པ་ཞེས་བྱ་བ་》（སྡེ་པར་བསྟན་འགྱུར། རྒྱུད། ༼ཝི༽ ）ལས། “དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བདར་བའི་གསེར་བཞིན་དུ། །ཡོངས་སུ་བརྟགས་ནས་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་གསུང་རབ་ལས་སོ། །”ཞེས་དང་། སློབ་དཔོན་འཕགས་པ་ལྷས་མཛད་པའི་《དུག་ལྔ་སྤངས་པའི་ལམ་མཆོག་ཏུ་གསང་བ་བསམ་གྱིས་མི་ཁྱབ་པ་ཞེས་བྱ་བ་》（སྡེ་པར་བསྟན་འགྱུར། རྒྱུད། ༼ཟི༽ ）ལས། “དེ་ཡང་གསུངས་པ། བསྲེགས་བཅད་བདར་བའི་གསེར་བཞིན་དུ། །ཡོངས་སུ་བརྟགས་ཏེ་ང་ཡི་བཀའ། །བླང་བར་བྱ་ཡིས་གུས་ཕྱིར་མིན། །”ཞེས་དང་། སློབ་དཔོན་འཇམ་དཔལ་གྲགས་པས་མཛད་པའི་《རྡོ་རྗེ་ཐེག་པའི་རྩ་བའི་ལྟུང་བའི་རྒྱ་ཆེར་བཤད་པ་ཞེས་བྱ་བ་》（སྡེ་པར་བསྟན་འགྱུར། རྒྱུད། ༼ཟི༽ ）ལས། “གཞན་ཡང་། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བདར་བའི་གསེར་བཞིན་དུ། །ཡོངས་སུ་བརྟགས་ནས་ང་ཡི་བཀའ། །བླང་བར་བྱ་ཡིས་གུས་ཕྱིར་མིན། །ཞེས་འབྱུང་བ་དང་།” ཞེས་དང་། འཇམ་པའི་དབྱངས་མིའི་དབང་པོ་གྲགས་པས་མཛད་པའི་《རང་གི་ལྟ་བའི་འདོད་པ་མདོར་བསྟན་པ་ཡོངས་སུ་བརྟག་པ་ཞེས་བྱ་བ་》（སྡེ་པར་བསྟན་འགྱུར། རྒྱུད། ༼ཝུ༽ ）ལས། “སྲེགས་བཅད་བརྡར་བས་གསེར་བཞིན་དུ། །མཁས་པ་རྣམས་ཀྱིས་ཡོངས་བརྟགས་ནས། །བདག་གསུངས་བླང་བྱ་དགེ་སློང་རྣམས། །གུས་པ་ཙམ་གྱིས་མ་ཡིན་ནོ། །”ཞེས་དང་། སློབ་དཔོན་ཆེན་པོ་འཕགས་པ་ལྷས་མཛད་པའི་《ཡེ་ཤེས་སྙིང་པོ་ཀུན་ལས་བཏུས་པ་ཞེས་བྱ་བ་》（སྡེ་པར་བསྟན་འགྱུར། དབུ་མ། ༼ཚ༽ ）ལས། “བསྲེགས་བཅད་བདར་བའི་གསེར་བཞིན་དུ། །དགེ་སློང་དག་གམ་མཁས་རྣམས་ཀྱིས། །ཡོངས་སུ་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །”ཞེས་དང་། སློབ་དཔོན་བྱང་ཆུབ་བཟང་པོས་མཛད་པའི་《ཡེ་ཤེས་སྙིང་པོ་ཀུན་ལས་བཏུས་པ་ཞེས་བྱ་བའི་བཤད་སྦྱར་》（སྡེ་པར་བསྟན་འགྱུར། དབུ་མ། ༼ཚ༽ ）ལས། “བསྲེགས་བཅད་བདར་བའི་གསེར་བཞིན་དུ། །དགེ་སློང་དག་གམ་མཁས་རྣམས་ཀྱིས། །ཡོངས་སུ་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །”ཞེས་དང་། སློབ་དཔོན་ཀ་མ་ལ་ཤཱི་ལས་མཛད་པའི་《རིགས་པའི་ཐིགས་པའི་ཕྱོགས་སྔ་མ་མདོར་བསྡུས་པ་ཞེས་བྱ་བ་》（སྡེ་པར་བསྟན་འགྱུར། ཚད་མ། ༼ཝེ༽ ）ལས། “འདི་ནི་བཅོམ་ལྡན་འདས་ཀྱང་བཞེད་པ་ཁོ་ན་ཡིན་ཏེ། ཇི་སྐད་དུ། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བདར་བས་གསེར་བཞིན་དུ། །ཡོངས་སུ་བརྟགས་ནས་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་གསུངས་པ་ལྟ་བུའོ། །”ཞེས་དང་། སློབ་དཔོན་ཀ་མ་ལ་ཤཱི་ལས་མཛད་པའི་《དེ་ཁོ་ན་ཉིད་བསྡུས་པའི་དཀའ་འགྲེལ་ཞེས་བྱ་བ་》（སྡེ་པར་བསྟན་འགྱུར། ཚད་མ། ༼ཟེ༽ ）ལས། “འདི་ནི་བཅོམ་ལྡན་འདས་ཀྱང་བཞེད་པ་ཡིན་ཏེ། ཇི་སྐད་དུ། དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བདར་བས་གསེར་བཞིན་དུ། །ཡོངས་སུ་བརྟགས་ན་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་གསུངས་པ་བཞིན་ནོ། །”ཞེས་པ་ལ་སོགས་པ་ཡིན་ནོ།།

དོགས་དཔྱོད་གཉིས་པ།
གཞན་ཡང་གནའ་དེང་གི་མཁས་པ་མང་པོ་ཞིག་གིས་རང་ཉིད་ཀྱིས་བརྩམས་པའི་བསྟན་བཅོས་སོགས་ཀྱི་མཇུག་ཏུ་དགེ་བསྔོའི་ཕན་ཡོན་བརྗོད་སྐབས་ཀུན་གྱིས་ལུང་འདྲེན་པའི་ཚིགས་བཅད་ཅིག་སྟེ། “ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང་། །རྒྱ་མཚོ་མ་སྐེམས་བར་དུ་དེ་མི་སྐེམས། །དེ་བཞིན་བྱང་ཆུབ་ཡོངས་བསྔོས་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་ཟད། །”ཅེས་པ་འདི་ཡིན་ལ། འདི་དང་ཚིག་ཟུར་ཅུང་མི་འདྲ་བ་གཞན་འདྲེན་མཁན་ཡང་མང་། ཚིགས་བཅད་འདི་ཡང་གོང་དང་འདྲ་བར་འགའ་ཞིག་གིས་མདོ་ལས་དང་། ཇི་སྐད་དུ་ཞེས་པ་ཙམ་དང་། འགའ་རེས་《བློ་གྲོས་རྒྱ་མཚོས་ཞུས་པའི་མདོ་》ལས་ཞེས་ལུང་ཁུངས་ཇེ་གསལ་དུ་བཏང་བའི་ཚུལ་གྱིས་ལུང་ཚིག་དེ་ཤར་གྱིས་འདྲེན་པར་བྱེད་དོ།།
འོན་ཀྱང་། བཀའ་འགྱུར་དུ་བཞུགས་པའི་《འཕགས་པ་བློ་གྲོས་རྒྱ་མཚོས་ཞུས་པའི་མདོ་》ལ་བམ་པོ་བཅུ་དང་། ལེའུ་བཅུ་གཉིས་བཞུགས་ཤིང་། དེའི་ནང་དུ་གོང་གི་ཚིགས་བཅད་དེ་ལྟ་བུ་ཞིག་རྩ་བ་ཉིད་ནས་མེད་ལ། མདོ་དེ་རྒྱ་གར་གྱི་མཁན་པོ་ཛི་ན་མི་ཏྲ་དང་། དཱ་ན་ཤཱི་ལ་དང་། བུདྡྷ་པྲ་བྷ་དང་། ཞུ་ཆེན་གྱི་ལོཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་བཅད་ཀྱིས་ཀྱང་བཅོས་ནས་གཏན་ལ་ཕབ་པར་དཀར་ཆག་རྣམས་སུ་ཡོངས་གྲགས་ཡིན་པས་འགྱུར་གཞན་ཡང་མེད། འདིའི་ལེའུ་དགུ་པ་ནི་བསྔོ་བའི་ལེའུ་ཡིན་མོད། དེ་ཡང་ཚིག་ལྷུག་གི་རྣམ་པ་ཅན་ཡིན་པ་དང། རྒྱ་མཚོ་དང་ཆུ་ཐིགས་ཀྱི་དཔེར་བྱས་ནས་བསྔོ་བའི་ཕན་ཡོན་སྟོན་པའི་ཚིག་ཀྱང་བཙལ་ནས་མི་རྙེད་དོ།།
དཔེར་ན། འཇིགས་མེད་གླིང་པས་མཛད་པའི་རྙིང་རྒྱུད་དཀར་ཆག་གི་དགེ་རྩ་བྱང་ཆུབ་ཏུ་བསྔོ་བའི་སྐབས་སུ། “དེ་སྐད་དུ་བློ་གྲོས་རྒྱ་མཚོས་ཞུས་པར། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང་། །རྒྱ་མཚོ་མ་ཟད་བར་དུ་དེ་མི་ཟད། །དེ་བཞིན་བྱང་ཆུབ་ཡོངས་བསྔོའི་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་འཛད། །ཅེས་པ་དང་ཚུལ་མཐུན་པ་བློ་གྲོས་མི་ཟད་པའི་མདོར་ཡང་འབྱུང་བ་ཡིན་ནོ། །”ཞེས་གསུངས་ཡོད་པ་ལྟ་བུ་སྟེ། བློ་གྲོས་རྒྱ་མཚོས་ཞུས་པར་ལུང་ཚིག་དེ་མེད་པ་གོང་དུ་བརྗོད་པ་ལྟར་ཡིན་ལ། འོན་ཀྱང་། བློ་གྲོས་མི་ཟད་པས་བསྟན་པ་ཞེས་བྱ་བའི་མདོར་དེ་དང་ཚུལ་མཐུན་པར་བྱུང་བ་ཤིན་ཏུ་བདེན། མདོ་དེ་ཉིད་ལས།（སྡེ་པར་བཀའ་འགྱུར། མདོ་སྡེ། ༼མ༽ ལྡེབ་༡༠༧ཉིན་ཕྲེང་༡པ་） “བཙུན་པ་ཤ་ར་དྭ་ཏིའི་བུ། འདི་ལྟ་སྟེ་དཔེར་ན། ཆུའི་ཐིགས་པ་རྒྱ་མཚོ་ཆེན་པོར་ལྟུང་བ་ནི་བསྐལ་པས་མ་བསྲེགས་ཀྱི་བར་དུ་བར་མ་དོར་ཡོངས་སུ་ཟད་པའམ། གཏུགས་པར་མི་འགྱུར་རོ། །དེ་བཞིན་དུ་བྱང་ཆུབ་ཏུ་ཡོངས་སུ་བསྔོས་པའི་དགེ་བའི་རྩ་བ་ཡང་བྱང་ཆུབ་ཀྱི་སྙིང་པོ་ལ་མ་འདུག་གི་བར་དུ་བར་མ་དོར་ཡོངས་སུ་ཟད་པའམ། གཏུགས་པར་འགྱུར་བ་གང་ཡང་མེད་དོ། །”ཞེས་གསུངས་ཡོད་དོ།།
བསྔོ་བའི་ཚིགས་བཅད་འདི་ལུང་འདྲེན་བྱེད་སའི་མདོ་དེ་ལའང་། འགའ་རེས་བློ་གྲོས་རྒྱ་མཚོས་ཞུས་པའི་མདོ་ལས་ཞེས་པ་དང་། ལ་ལས་བློ་གྲོས་མི་ཟད་པས་བསྟན་པའི་མདོ་ལས་ཞེས་པ་དང་། ཡང་ལ་ལས་བློ་གྲོས་མི་ཟད་པས་ཞུས་པའི་མདོ་ལས་ཞེས་རིགས་མི་འདྲ་བ་གསུམ་བྱུང་ཡང་དེ་དག་གི་མཚན་བྱང་ཅུང་ཟད་འདྲ་བས་ནོར་བར་ཟད།
བློ་གྲོས་རྒྱ་མཚོས་ཞུས་པའི་མདོ་ནི་གོང་ལྟར་ཡིན་ལ། བློ་གྲོས་མི་ཟད་པས་ཞུས་པའི་མདོ་ནི་དཀོན་བརྩེགས་ཀྱི་ལེའུ་གཅིག་ཡིན་ཞིང་། དེའི་ཚད་ནི་བམ་པོ་གཉིས་ཡོད་མེད་ཙམ་ཡིན། བློ་གྲོས་མི་ཟད་པས་བསྟན་པའི་མདོ་ལ་བམ་པོ་བདུན་བཞུགས་པ་ཡིན། མདོར་ན་གོང་གི་ཚིགས་བཅད་ཇི་ལྟ་བ་ཞིག་མདོ་དེ་གསུམ་ཀར་མེད་དོ།།
འོན་ཀྱང་། གོང་གི་ཚིགས་བཅད་དེ་དང་ཆ་འདྲ་བ་《བསྟན་འགྱུར་》ལས་བྱུང་སྟེ། མཁས་པ་ཨཱརྱ་ཤཱུ་རས་མཛད་པའི་《ཕ་རོལ་ཏུ་ཕྱིན་པ་བསྡུས་པ་》（སྡེ་པར་བསྟན་འགྱུར། དབུ་མ། ༼ཁི༽ ལྡེབ་༢༢༧ཉིན་ཕྲེང་༤པ་）ལས་བརྩོན་འགྲུས་ཀྱི་ལེའུའི་སྐབས་སུ། “རྒྱ་མཚོ་ཆེན་པོར་ཆུ་ཐིགས་གཅིག་བོར་བ། །རྒྱ་མཚོ་མ་ཟད་དུས་སུ་ཟད་མི་འགྱུར། །དེ་བཞིན་བྱང་ཆུབ་མཆོག་ཏུ་བསྔོས་པ་ཡི། །བསོད་ནམས་རྣམ་པ་ཟད་པར་འགྱུར་བ་མེད། །”ཅེས་པ་ལྟ་བུའོ།།
དེ་སྔོན་བདག་གིས་རྩོམ་འབྲི་བྱས་པའི་《བཀའ་འགྱུར་དཔེ་བསྡུར་མའི་དཀར་ཆག་ཆེན་མོ་ཟླ་བ་ནོར་བུའི་མེ་ལོང་》གི་པར་དུ་བསྒྲུབས་པའི་དགོས་པ་དང་ཕན་ཡོན་གྱི་སྐབས་སུའང་། སྔོན་བྱོན་མཁས་པའི་སྲོལ་བཞིན་བློ་གྲོས་རྒྱ་མཚོས་ཞུས་པའི་མདོ་ལས་ཞེས་ཚིགས་བཅད་དེ་དྲངས་ཡོད་པ་ད་ལྟ་བསམས་ན་ངོ་གནོང་བ་ཞིག་གོ།།

དོགས་དཔྱོད་གསུམ་པ།

ཡང་སློབ་དཔོན་པདྨ་འབྱུང་གནས་ལུང་དུ་བསྟན་པའི་ཚིག་ཡིན་ཟེར་ནས་རྙིང་ཕྱོགས་ཀྱི་མཁས་བླུན་མང་པོས་སློབ་དཔོན་པདྨ་འབྱུང་གནས་ཀྱི་རྣམ་ཐར་གྱི་ཆེ་བ་བརྗོད་པ་དང་འབྲི་བའི་སྐབས་སུ། མྱང་འདས་ཆེན་པོའམ་མདོ་སྡེ་མྱང་འདས་ལས་ཞེས་མདོ་ཚིག་ཅིག་རྒྱུན་དུ་ལུང་འདྲེན་བྱེད་བཞིན་ཡོད་པ་འདི་ལྟར། མདོ་སྡེ་མྱང་འདས་ལས། “ཤིང་སཱ་ལའི་གྲོང་རྩྭ་མཆོག་གཉིས་ཀྱི་བར་ན་བཅོམ་ལྡན་འདས་ལ་འོད་སྲུང་དང་། གཅུང་དགའ་བོ་མ་གཏོགས་པ་དགེ་སློང་གི་དགེ་འདུན་བརྒྱ་ཕྲག་བཅུས་བསྐོར་ནས་ཉེ་གནས་ཆེན་པོ་ཀཱ་ཏྱཱ་ཡཱ་ན་དང་། ཙུན་དྷ་དང་མ་འགགས་པ་དང་ཀུན་དགའ་བོ་རྣམས་ལ་བཀའ་སྩལ་པ། ང་ནི་ཡོངས་སུ་མྱ་ངན་ལས་འདའ་འོ། །ཁྱེད་རྣམས་མྱ་ངན་མ་བྱེད་ཅིག །མདངས་ལྡན་དྲི་མེད་མཚོ་དཀྱིལ་ནས། །ང་ལས་ལྷག་པའི་སྐྱེས་བུ་འབྱུང་། །”ཞེས་པ་དང་། ཡང་། “ང་ནི་མྱ་ངན་འདས་འོག་ཏུ། །ལོ་ནི་བཅུ་དང་གཉིས་ཙམ་ན། །དྷ་ན་ཀོ་ཤའི་མཚོ་གླིང་དུ། །ང་བས་ལྷག་པའི་སྐྱེས་བུ་འབྱུང་། །”ཞེས་པ་ལ་སོགས་པ་འདི་ཡིན་ནོ།།
གོང་གི་འདི་ལྟ་བུ་ཡིན་ནའང་མདོ་སྡེ་མྱང་འདས་ཀྱི་ནང་དུ་རྩ་བ་ནས་མི་རྙེད། བོད་དུ་འགྱུར་བའི་མྱང་འདས་ཀྱི་མདོ་ལ་ཆེ་འབྲིང་ཆུང་གསུམ་ཡོད་ལ། མྱང་འདས་ཆེན་པོ་ལ་བམ་པོ་ལྔ་བཅུ་ང་དྲུག་དང་ལེའུ་བཅོ་ལྔ་བཞུགས་ཤིང་། རྒྱ་ནག་གི་མཁན་པོ་ཝང་ཕན་ཞུན་དང་། དྷརྨའི་གཞི་འཛིན་དགེ་བའི་བློ་གྲོས། ལོ་ཙཱ་བ་རྒྱ་མཚོའི་སྡེ་རྣམས་ཀྱིས་རྒྱ་ནག་གི་སྐད་ལས་བོད་དུ་བསྒྱུར་བ་ཡིན་ཞིང་། ད་དུང་རྒྱ་ནག་གི་སྐད་དུ་བཞུགས་པའི་མྱང་འདས་ཁ་ཚང་བསྒྱུར་ཐུབ་མེད། མྱང་འདས་འབྲིང་བོ་ལ་བམ་པོ་བཅུ་གསུམ་དང་ལེའུ་ལྔ་སྟེ། རྒྱ་གར་གྱི་མཁན་པོ་ཛི་ན་མི་ཏྲ་དང་། ཛྙཱ་ན་གཪྦྷ་དང་། ལོ་ཙཱ་བ་བནྡེ་དེ་བ་ཙནྡྲ་སོགས་ཀྱིས་རྒྱ་གར་གྱི་སྐད་ལས་བསྒྱུར། མྱང་འདས་ཆུང་བ་ཤོ་ལོ་ཀ་དྲུག་ཅུ་ཙམ་ཡོད་ཅིང་། པཎྜི་ཏ་ཀ་མ་ལ་གུཔྟ་དང་ལོ་ཆེན་རིན་ཆེན་བཟང་པོ་གཉིས་ཀྱིས་བསྒྱུར་བ་རྣམས་སོ།།
དེ་དག་སྡེ་དགེ་པར་མའི་བཀའ་འགྱུར་ལྟར་ན། མདོ་ཡི་པོད་རྟགས་ ༼ཉ༽ ༼ཏ༽ ༼ཐ༽ གསུམ་སྟེ་པོ་ཏི་ཆེ་བ་གསུམ་ཙམ་བཞུགས་ཡོད་ལ། དེ་དག་གི་ཁྲོད་དུ་ལུང་ཚིག་འདི་འདྲ་ཞིག་གཏན་ནས་བཙལ་ཏུ་མེད་དོ།།
འོ་ན་ལུང་ཚིག་ལྡོམ་པོ་འདི་འདྲ་བ་གང་ཞིག་ནས་ལུང་དྲངས་པ་ཡིན་ནམ། སཾ་སྐྲྀ་ཏའི་སྐད་དམ་རྒྱ་ནག་གི་སྐད། ཡང་ན་ཨོ་རྒྱན་དང་ཁ་ཆེའི་སྐད་གང་ཞིག་ལས་བསྒྱུར་བ་ཡིན་མིན་ཆ་མི་འཚལ་མོད། ཐོག་མའི་ལུང་འདྲེན་བྱེད་པོ་སུ་ཡིན་མིན་དང་། དེ་དུས་རབས་ནམ་ཞིག་གི་མི་ཡིན་མིན་རྩད་གཅོད་བྱ་རྒྱུ་ནི་གནད་ཀྱི་དོན་པོ་ཡིན་ནོ།།
ལྷག་པར་དུ་ལུང་བསྟན་གྱི་རིགས་འདི་འདྲ་ནི་ད་ལྟ་དཔེ་གང་དུ་གསལ་བ་དང་། དཔེ་དེ་མ་ཕྱི་གང་ལས་བསྒྱུར་བ་དང་། མ་ཕྱི་དེ་ཡང་དུས་རབས་ནམ་ཞིག་ལ་བྱུང་བ་དང་། དེ་ལ་རིགས་མི་འདྲ་བ་ག་ཚོད་ཡོད་པ། ཡིག་རིགས་མི་འདྲ་བ་(སཾ་སྐྲྀ་ཏའི་སྐད་དང་། པ་ལིའི་སྐད། རྒྱ་ནག་གི་སྐད་སོགས་)ཅི་ཙམ་གྱི་ཐོག་བཞུགས་པ་སོགས་ལ་ཞིབ་འཇུག་མཐིལ་ཕྱིན་པ་ཞིག་བྱེད་ཐུབ་ཚེ། དོན་དངོས་ཀྱི་ལོ་རྒྱུས་མང་པོ་ཞིག་ཀྱང་ཇེ་གསལ་དུ་འགྲོ་བའི་དགོས་པ་བླ་ལྷག་གིས་ཆེ་མོད། འོན་ཀྱང། དེ་འདྲའི་ཉམས་ཞིབ་པ་ནི་ཉིན་མོའི་སྐར་མ་ལྟར་གྱུར།
སྤྱིར་ལུང་འདྲེན་པ་ནི་རང་གཞན་ཀུན་ལ་ཡིད་ཆེས་དང་ངེས་པ་སྐྱེད་བྱེད་དང་། ཕ་རོལ་པོའི་ལོག་ལྟ་ཟློག་ཆེད་སོགས་ཡིན་ནའང་། གྲུབ་མཐའི་ཆགས་སྡང་གི་དབང་དུ་གྱུར་ཚེ། རིགས་པའི་རྒྱབ་རྟེན་ལ་ལུང་འདྲེན་བྱེད་པ་ནི་ཕ་རོལ་པོ་ཚར་གཅོད་པ་ཁོ་ནའི་ཕྱིར་ཡིན་པས་ལུང་ལའང་བདེན་རྫུན་ཅི་རིགས་འབྱུང་སྲིད་དོ།།
འདི་འདྲ་ལ་བསམས་ཚེ། སྔོན་ཀཱ་མ་ལ་ཤཱི་ལ་དང་རྒྱ་ནག་ཧྭ་ཤང་མ་ཧཱ་ཡ་ན་གཉིས་ཀྱིས་རྩོད་པ་གནང་སྐབས་རང་གི་རིགས་པའི་སྒྲུབ་བྱེད་དུ་མདོ་ལུང་བརྒྱད་ཅུ་དྲངས་པར་གྲགས་པ་དེ་ལ་ཡང་བློ་གཏད་རྒྱུ་ཅང་མེད་ལ། (མཁས་པའི་བཤད་རྒྱུན་དུ་སྐབས་དེར་ཧྭ་ཤང་མ་ཧཱ་ཡ་ནས་མདོ་སྡེ་བརྒྱད་ཅུའི་ཁུངས་ཟེར་བའི་དཔེ་ཆ་ཞིག་བརྩམས་པར་གྲགས། འོན་ཀྱང་། འགའ་ཞིག་གིས་དཔེ་ཆ་དེའི་རྩོམ་པ་པོ་ཧྭ་ཤང་མ་ཧཱ་ཡ་ན་མིན་པར་སྤུག་ཡེ་ཤེས་དབྱངས་ཞེས་པས་བརྩམས་པར་བཞེད།) མཁས་དབང་དགེ་ཆོས་ཀྱིས་འཇང་དགུན་ཆོས་ཤིག་ཏུ་རྣམ་འགྲེལ་རྩ་བའི་ཚིག་ཟུར་འགའ་རེ་བཅོས་ཏེ་རང་གི་སྒྲུབ་བྱེད་དུ་དྲངས་ནས་རྣམ་འགྲེལ་རྩ་བ་བློ་ན་ཡོད་པ་དག་ཀྱང་མགོ་བོ་འཁོར་དུ་བཅུག་པ་ལྟ་བུའི་བཤད་རྒྱུན་ཡོད་པ་སོགས་ཀྱང་འདྲའོ།།
དེས་ན་དོན་འདྲ་ཡང་ཚིག་མི་འདྲ་བ་ཤིན་ཏུ་མང་བ་འདི་ཡང་། ལུང་དེ་འདྲ་ཐོག་མར་ལུང་འདྲེན་གནང་སྐབས་མདོ་དངོས་ནས་ལུང་འདྲེན་མ་བྱས་པར་རྒྱ་གཞུང་གཞན་དང་གཞན་ནས་ལུང་དྲངས་པས་སྟབས་ཀྱིས་ཀྱང་ཡིན་སྲིད།
གཅིག་བྱས་ན་བཀའ་བསྟན་ཕྱོགས་བསྒྲིགས་ཀྱི་ནང་དུ་མ་འདུས་པའི་འགྱུར་མང་པོ་ཞིག་ད་དུང་ཡོད་པར་ངེས་ཏེ། ཆོས་འབྱུང་ལོ་རྒྱུས་མང་པོ་དང་མཁས་པའི་གསུང་འབུམ་སོགས་ལ་ཞིབ་མཇལ་བྱས་ཚེ། ཆོས་ཚན་གཅིག་ལ་འགྱུར་མི་འདྲ་བ་མང་དུ་བཞུགས་པར་རྟོགས་ཤིང་། སྟུག་པོ་བཀོད་པའི་མདོ་དང་མྱང་འདས་ཆེན་པོ་སོགས་ལའང་ང་ཚོས་མ་མཐོང་བའི་བོད་འགྱུར་གཞན་ཡང་ཡོད་ཆོག་གོ།།
མདོར་ན། ཁོ་བོས་གོང་དུ་བརྗོད་པ་འདི་དག་ནི་དཔེར་མཚོན་ཙམ་སྟེ། སྔོན་རབས་མཁས་པའི་གསུང་དུ་མདོ་ལས་ཞེས་པ་ཙམ་ལས་མདོ་གང་ཡིན་གྱི་གསལ་ཁ་མེད་པར་ལུང་ཚིག་མང་པོ་ཆུ་ཀླུང་བཞིན་དྲངས་ཡོད་པ་ནི་ཤིན་ཏུ་མང་ཞིང་། དེ་དག་ལས་རྩ་ཁུངས་མི་ཆོད་པའང་མང་ངོ་ཞེས་མདོ་ལུང་འགའི་གསལ་བྱེད་དམ་དོགས་དཔྱོད་ལྟ་བུ་འདི་རེ་ཞིག་རྫོགས་པར་བྱས་སོ།། །།