དེ་རིང་སྟེ་ཕྱི་ཟླ་༡༡ཚེས་༢༩ཉིན་གྱི་བོད་ནང་གི་ཆུ་ཚོད་གཉིས་དང་ཕྱེད་ཀའི་སྟེང་བོད་མདོ་སྨད་ཀླུ་ཆུའི་ཟམ་ཚ་རོང་གི་ལོ་ཚོ་སྡེ་བའི་རང་ལོ་༣༡ཡིན་པ་ཚེེ་རིང་རྣམ་རྒྱལ་(གཅེས་མིང་ལ་ཚེ་ཁོ་ཟེར།)གྱིས་ཟམ་ཚ་ཡུལ་ཚོའི་སྲིད་གཞུང་གི་ཉེ་འདབས་སུ་བོད་བསྟན་པ་ཆབ་སྲིད་ཀྱི་དོན་དུ་རྒྱ་གཞུང་གི་དྲག་པོའི་སྲིད་ཇུས་ལ་ངོ་རྒོལ་གྱིས་རང་ལུས་མེ་རུ་བསྲེགས་ཏེ་སྐུ་གྲོངས་འདུག དེ་ཡང་བོད་ནས་ཁུངས་ལྡན་གནས་ཚུལ་མཁོ་སྤྲོད་བྱས་དོན་ལྟར་ན། རྒྱལ་གཅེས་དཔའ་བོ་ཚེ་རིང་བཀྲ་ཤིས་ནི་ཀླུ་ཆུ་རྫོང་ཟམ་ཚ་ཞང་ལོ་ཚོ་སྡེ་བའི་ཕ་ཆོས་རོ་(ཕྱུགས་ལས་སྨན་པ་ཞིག་ཡིན་འདུག)དང་། མ་རྟ་མགྲིན་འཚོ་གཉིས་ལ་བུ་བུ་མོ་བཞི་ཡོད་པའི་ཁྲོད་ཀྱི་བུ་གཅིག་བུ་དེ་ཡིན་འདུག ཁོང་གི་གཅེན་མོ་ཆེ་བའི་མིང་ལ་རྟ་མགྲིན་འཚོ་དང་། གཅེན་མོ་ཆུང་བའི་མིང་ལ་བསོད་ནམས་སྐྱིད། གཅུང་མོའི་མིང་ལ་རྡོ་ཁོ་བཅས་ཟེར། ཁོང་གི་བཟའ་ཟླའི་མིང་ལ་ཆོས་སྐྱོང་འཚོ་ཟེར་ཞིང་ཁོང་གཉིས་ལ་བུ་མོ་གཉིས་ཡོད་པའི་བུ་མོ་ཆེ་བའི་མིང་ལ་རྡོ་རྗེ་སྐྱིད་ཟེར་ཞིང་ད་ལྟ་རང་ལོ་བདུན་ཡིན་པ་དང་། བུ་མོ་ཆུང་བའི་མིང་ལ་སྐལ་བཟང་སྒྲོལ་མ་ཟེར་ཞིང་ད་ལྟ་རང་ལོ་གསུམ་ཡིན་འདུག ཁོང་གིས་ཟམ་ཚ་ཞང་གི་སྲིད་གཞུང་ཉེ་འདབས་ནས་རང་ལུས་མེ་སྲེག་བྱས་ཏེ་སྐུ་གྲོངས་པ་དང་། ས་གནས་བོད་མིས་སྐུ་ཕུང་འདས་པོའི་རང་ཁྱིམ་དུ་གདན་འདྲེན་བྱས་ཤིང་། ད་ལྟ་ཟམ་ཚའི་རྡོ་ཟུག་དགོན་པའི་དགེ་འདུན་པ་ཚོ་ཆེད་ཕེབས་ཀྱིས་སྨོན་ལམ་གསུང་འདོན་གནང་བཞིན་ཡོད་པ་རེད། མེ་སྲེག་གནས་ཚུལ་བྱུང་རྗེས་རྒྱ་གཞུང་གི་དྲག་པོའི་དམག་མི་རླངས་འཁོར་བཅུ་གཉིས་ལྷག་སླེབས་ཏེ་གནས་ཚུལ་རྩད་ཞིབ་དང་དམ་དྲག་བྱེད་བཞིན་ཡོད་འདུག
རྒྱལ་གཅེས་དཔའ་བོ་ཚེ་རིང་རྣམ་རྒྱལ་གྱིས་རང་ལུས་མེ་སྲེག་བྱས་པ་ནི་མདོ་སྨད་ཀླུ་ཆུའི་ཡུལ་དུ་བོད་བསྟན་པ་ཆབ་སྲིད་ཀྱི་སླད་དུ་རང་ལུས་མེ་སྲེག་བྱས་པ་ཐེངས་གསུམ་པ་ཡིན་ཞིང་། དེ་ཡང་ཐེངས་དང་བོ་དང་གཉིས་པ་ནི་ཕྱི་ཚེས་ ༢༢ དགོང་མོར་རང་ལུས་མེ་སྲེག་གཏོང་མཁན་རང་ལོ་ ༢༣ ཡིན་པའི་ཤིས་ཚང་དཔལ་སྒུར་བ་རྟ་མགྲིན་སྐྱབས་དང་། ཕྱི་ཚེས་ ༢༦ ཉིན་རང་ལུས་མེ་སྲེག་གཏོང་མཁན་རང་ལོ་ ༢༤ ཡིན་པའི་ཨ་ལ་སྦོག་ཚའི་མགོན་པོ་ཚེ་རིང་གཉིས་ཡིན་འདུག
རྒྱལ་གཅེས་དཔའ་བོ་ཚེ་རིང་རྣམ་རྒྱལ་གྱིས་རང་ལུས་མེར་བསྲེགས་མ་གནང་སྔོན།
རྒྱལ་གཅེས་དཔའ་བོ་ཚེ་རིང་རྣམ་རྒྱལ་གྱིས་རང་ལུས་མེར་བསྲེགས་རྗེས་ཀྱི་རྣམ་པ།
དགེ་འདུན་པ་རྣམས་ཀྱིས་སྨོན་ལམ་གསུངས་འདོན་གནང་སྐབས།
གནས་ཚུལ་མཁོ་གཏོང་བ། བྱེས་འབྱོར་ཀླུ་ཆུ་བ་ཁག་ཅིག་གིས།
ༀ་མ་ཎི་པད་མེ་ཧཱུྃ།