སྐར་ཆེན།་
ཟླ་འོད་སྔས་སུ་བཞུར་པའི་མཚན་ངོགས་དེ་ལ།།
ང་ཡི་སེམས་པའི་ཀློང་གི་ཁུག་སོ་ཞིག་ནས།།
ཁྱེད་ལ་སྙིང་གཏམ་འདི་ཞེས་འཇོག་རྒྱུ་མེད་ཀྱང༌།།
སེམས་ཀྱི་ཚོར་སྣང་ཙམ་ཞིག་ཡི་གེར་བསྡེབས་ཡོད།།
བགྲང་བྱ་བདུན་ཙམ་བསྐྱལ་བའི་སློབ་གྲྭའི་མི་ཚེ།།
མཚན་མོའི་ཀློང་ནས་ཕྱིར་དྲན་ཅུང་ཙམ་བྱས་ན།།
ཐོབ་བྱའི་གྲུབ་འབྲས་འདི་ཞེས་སྟོན་རྒྱུ་མེད་ཀྱང༌།།
ཁྱེད་རང་ལན་པ་ཡིན་ཞེས་བརྗོད་རྒྱུ་ང་མེད།།
ཅུང་ཙམ་བརྩོན་སེམས་ཡོད་པའི་སྙིང་རུས་དེ་ཡིས༌།།
གོམ་ཁ་ནུབ་ལ་རྐྱང་བའི་ལམ་ཞིག་རེག་སོང༌།།
འོན་ཀྱང་ང་ཡི་སེམས་ན་སྤྲོ་སྣང་དབེན་པས།།
བྲལ་ཁར་བདེ་མོ་འཇོག་རྒྱུ་སེམས་ནས་མ་ཡོང༌།།
གཏན་དུ་འགྲོ་བསྐྱོད་ཆོག་པའི་ཡུལ་ཞིག་མི་འདུག
ཕུགས་ཀྱི་བསམ་པ་བཅོལ་སའི་གནས་ཤིག་མ་རྙེད།།
སྐྱབས་བཅོལ་ལག་འཁྱེར་ཞིག་ལས་ང་ལ་མེད་པས།།
གནམ་ཐང་ཆེན་པོའི་ཁ་ནས་བརྙས་བཅོས་རེག་སོང༌།།
མི་རིགས་སྣ་མང་འདུས་བའི་སློབ་གླིང་དེ་རུ།།
མཐུན་རྐྱེན་དགོས་མཁོ་སོགས་ལ་དཀའ་ངལ་མེད་ཀྱང༌།།
རང་དབང་རང་བཙན་མེད་པའི་སྡུག་བསྔལ་དེ་ཡིས།།
མགོ་བོ་མཐོ་རུ་འདེགས་པའི་སྤོབས་པ་མ་རྙེད།།
ང་ཡི་བྱ་བཞག་ཁྱེད་ལ་རྒྱབ་ཏུ་གཏད་ཅིང༌།།
ཁྱེད་ཀྱིབསམ་ཚུལ་ང་ལ་དཀའ་ངལ་ཆགས་དུས།།
ཕན་ཚུན་གཉིས་མོས་མེད་པའི་ལམ་ཁ་འདི་ནས།།
ང་ལ་བདེན་པ་ཡོད་པའི་ཨུ་ཚུགས་མི་བྱེད།།
དྲང་བོར་དྲང་ལན་མེད་པའི་མི་ཡུལ་འདི་ནས།
དངུལ་དང་གོ་ཐོབ་མེད་པའི་སྤྲང་བོ་ཞིག་གིས།།
བདེན་པ་གསེར་སྲང་གང་བོ་ཐང་ལ་བརྡལ་ཡང༌།།
ཁྱེད་ཀྱི་རྡོག་པས་དེ་ལ་ཞབས་བཅགས་གནང་སོང༌།།
མི་ཡི་མི་ཚེ་ཟེར་བ་སྐྱིད་སྡུག་ཆ་འདྲེས།།
བཟའ་མི་བུ་ཕྲུག་ཟེར་བ་སེམས་ཀྱི་ཁུར་བོ།།
གཉེན་ཉེ་མཛའ་གྲོགས་ཟེར་བ་གཞོགས་ཀྱི་འཐེན་ཤུགས།།
ཡང་ཡང་བསམ་ན་སེམས་ནས་ཨ་ཐང་ཆད་གི།།
མི་ཚེའི་སྐྱིད་སྡུག་ལས་ལ་གོ་བ་རྙེད་དུས།།
མི་ཚེ་མཉམ་སྐྱེལ་ཟེར་བའི་རྡོག་ཁྲེས་འདི་དང༌།།
ཕོ་མོའི་བརྩེ་དུང་ཟེར་བའི་འཁྲིག་སྲེད་འདི་ལ།།
ང་ཡི་སེམས་ནས་རིན་ཐང་འཇོག་སྟངས་མ་ཤེས།།
སྤྱི་ལོ་༢༠༠༨ལོའི་ཟླ༧ཚེས་༡༩ཉིན་རྡ་ལམ་ས་ལར་བྲིས།