སོག་མདའ།
ཟོར་དབྱིབས་ཟླ་བ་ཁོང་དགུང་ནས་འོད་ཀྱིས་འཚེར་དུས།
རས་གུར་ཁ་འཚུབ་ཀྱིས་བརྔུབས་པས་ཟླ་ཐིག་དཀར་བོ།།
མ་བོས་མགྲོན་པོ་ཡི་ཚུལ་དུ་དལ་གྱིས་འཕྲོས་པས།།
དངན་པ་རིང་མོ་ཞིག་ཐོལ་བྱུང་མགྲིན་ནས་ལྷུང་བྱུང་།།
གཡག་རོག་གོམ་ཁ་འདི་སྡེ་ཆེན་གྲོང་ལ་བསྲིངས་དུས།།
སྒོ་ཁྱིའི་ཟུག་སྐད་ཀྱིས་རི་ལུང་གཉིད་ལས་དཀྲོགས་ཞིང་།།
སྐར་ཆེན་སྨིན་དྲུག་གིས་ང་ལ་ཁྲེལ་དགོད་བྱེད་དུས།།
བརྩེ་གླུ་སིང་སིང་ཞིག་རྒྱང་ནས་རླུང་ལ་འཕུར་སོང།།
སྦྲ་ནག་སྒོ་བྱང་འདི་ཆོན་ཐག་སྒང་ལ་སྤྲིངས་དུས།།
ཕ་ལོའི་ལུ་སྐད་དེ་རྣ་བའི་གར་ལ་ལྷུང་བས།།
འཚབ་འཚབ་བྲེལ་བྲེལ་གྱིས་མཛའ་མོའི་གོང་ནས་འཐེན་དུས།
མཚན་མོའི་གསང་བ་ཡི་ངོ་མཚར་གཏམ་རྒྱུད་བྲིས་སོང།།
དཀར་འཇམ་བལ་དཀར་གྱི་མལ་ཐུལ་དྲོན་པོ་གྱོན་ནས།།
བརྩེ་དགའི་ཆགས་སེམས་ཀྱི་མེ་ཏོག་གཅིག་ལ་སྦྱར་ཞིང་།།
ཤ་མཆིན་དྲོན་མོ་ཡི་སྟེང་འོག་གཅིག་ལ་བརྒྱུས་དུས།
འཕྲོད་སྦྱོར་ཆགས་སེམས་ཀྱི་རོལ་མོ་ངག་ལས་དྲངས་ཐལ།།
ཞོགས་པའི་སྐྱ་རེངས་ཀྱི་འབོད་པས་སྦྲ་སྒོ་ཕྱེས་པས།།
གཡག་རོག་རྭ་རིང་གིས་གོར་མོ་ལྷས་ན་སྒུག་འདུག །
སྐར་མ་མཛོ་འདོགས་ཀྱི་འོད་ཀྱང་མོག་མོག་ཁྲོད་ནས།།
མཛའ་གཞས་རི་ལུང་དང་འདྲེས་ནས་རང་སར་བསྙེགས་སོང་།།
༢༠༡༥་༢་༡༢ ཉིན་རང་ཤག་ནས་བྲིས།།