མཚོ་ཀློང་གི་གོ་གྲུ།

—-ཚེ་རིང་།

རླུང་བུའི་ཁ་ཕྱོགས་གཅིག་གིས
ང་རང་དཀྱིལ་ནས་དཀྱིལ་ལ་དེད་ཅིང
སོང་གིས་སོང་གིས
ནམ་ཡང་སྐམ་སར་ལོག་མི་ཐུབ་པའི་ཚོར་བ་ཞིག
མཚན་མོའི་མཚོ་ཀློང་དུ
ནམ་ཡང་མཐོང་ཐུབ་པ་ནི
གོ་རིམ་ངེས་མེད་ཀྱི་སྐར་མ་རྒྱུས་མེད་སྐོར་གཅིག་ཡིན
སྐར་མའི་ཚོགས   རང་རང་ས་ནས་འཆར་ཞིང
སླར་ཡང་རང་རང་ས་རུ་ནུབ་འགྲོ
ཕྲ་ལམ་ལམ་གྱི་སྐར་ཚོགས་དེ་སུ་ཞིག་གི་མིག་མདངས་ཡིན་ནམ
ནག་ཡོར་ཡོར་གྱི་ནམ་མཁའ་འདི་སུ་ཞིག་གི་ཞལ་རས་ཡིན་ནམ

རེ་ཐག་ཆད་པའི་ཚོར་བ་འདིའི་དབང་གིས
ངོ་གདོང་ནམ་མཁར་ཕྱོགས་ནས
བརྗོད་འདོད་པའི་སྐད་ཆ་གཅིག་བཤད་བསམ་དུས
སུ་ཞིག་གིས་གོ་ཨེ་འགྲོ་སྙམ་པའི་དོགས་འཆར་ཞིག་དང
ཡང་སུ་ཞིག་གིས་ཨེ་གོ་སྙམ་པའི་རེ་ཞགས་ཤིག

མཚོ་མོ་ཕྱོགས་གང་སར་འཐེན་པའི་ལམ་བུ་ཞིག་དང་འདྲ་ལ
མཚོ་མོ་འགྲོ་ས་ཅི་ཡང་མེད་པའི་ལམ་བུ་ཞིག་དང་ཡང་འདྲ

རླུང་བུ་ད་དུང་ང་ཡི་རྒྱབ་ཕྱོགས་ནས་གཡུགས་ཀྱིན་འདུག

2013/9/10