རྟ་ནག་སྐལ་བཟང་ལུང་རིགས།
ནོར་གླིང་མཐོ་སློབ་ཀྱི་སྙན་ངག་མ་ཞིག་ལ་བསྟབས་པ།
སིལ་སྙན་ཁྲོལ་ཁྲོལ་དཀྲོལ་མཛད་ཀྱི་ལྷ་མོ་གང་ནས་ཕེབས་ཡིན།།
པི་ཝང་ལྡེམ་ལྡེམ་འཁྲོལ་མཁན་གྱི་ལྷ་མོ་གང་ན་བཞུགས་འདུག།
དར་གོས་ཤམ་ཤམ་མནབས་པོ་ཡི་ལྷ་མོ་གང་ནས་ཕེབས་ཡིན།།
སྙན་ངག་ལྷང་ལྷང་གྱེར་པོ་ཡི་ལྷ་མོས་ཅི་ཞིག་གསུངས་སོང་།།
སེམས་པ་ཕྱེད་ཀར་གཏོང་མཛད་ཀྱི་ལྷ་མོ་བྱང་དུ་བཞུགས་བསམས།།
མིག་འོད་ཆེམ་ཆེམ་གཟིགས་པོ་ཡི་མི་རྐྱང་ལྷོ་ནས་བསྒུགས་ཡོད།།
གནམ་ས་ཧྲལ་ཧྲུལ་གསིགས་བྱེད་ཀྱི་བརྩེ་བར་ལྕེབ་ཐག་བཞག་ཡོད།།
སྙིང་དྲོད་ལམ་ལམ་འབར་བ་ཡི་ལྷ་མོས་སྤྱན་ཐག་རྐྱོངས་དང་།།
སུན་སྣང་ཚུར་ཚུར་བཅར་བ་ཡི་འཇིག་རྟེན་མཚན་ཞག་ཡིན་པས།།
སེམས་པ་ཕར་ཕར་ཤོར་བ་ཡི་སྒྲོལ་མ་སྡུག་བསྔལ་ཡིན་པས།།
སྙིང་ཤ་ལྷོག་ལྷོག་འབབ་པ་ཡི་རེ་སྒུག་གཅོང་ནད་ཡིན་པས།།
མི་ཚེ་སྐྱོ་སྐྱོ་འདས་པ་ཡི་གཏམ་རྒྱུད་ལས་ཀྱིས་བསྐོས་འདྲ།།
རོལ་དབྱངས་སིལ་སིལ་བབ་རྗེས་ཀྱི་སྙན་ངག་མེ་ཕུང་འདྲ་སྟེ།།
མི་སེམས་ཤིག་ཤིག་བསྒུལ་རྗེས་ཀྱི་བྲང་གཞུང་ཧྲིལ་གྱིས་བསྲེགས་སོང་།།
བཞིན་རས་འཛུམ་ཙམ་བྱས་རྗེས་ཀྱི་སྒེག་ཉམས་ཐོག་སེར་ཡིན་སྟེ།།
མིག་ཆུ་ཁོག་ལ་མིད་རྗེས་ཀྱི་སྙིང་ལ་སེར་ཀ་བཀས་སོང་།།
“ཁྱེད་དང་ནར་སོན་ལོ་ཟླ”1ཡི་གོམ་འགྲོས་དལ་ཙམ་བྱོས་དང་།།
ཁྱེད་དང་ནམ་ཞར་འབྲལ་མེད་ཀྱི་བརྩེ་བ་དྭ་ཕྲུག་འདྲ་འོ།།
ངུད་མོ་སྦུད་སྦུད་གཏོང་མཛད་ཀྱི་མི་ལ་སེམས་ཤིག་སྟོན་དང་།།
སྐྱུར་ཤ་གཟེར་གཟེར་མྱོང་སྣང་གི་འཁྲུལ་བ་ད་དུང་གདའ་འོ།།
1མཆན། སྙན་ངག་མ་གང་གི་ཐེངས་འདིའི་གྱེར་འདོན་སྙན་ངག་གི་ཁ་བྱང་།
2011.8.22 མཚན་མོར་བྲིས།
མཛེས་མ་སྒྲོལ་མ་འདྲ་བོ་དེར་སེམས་པ་ཞིག་ཡོད་ན།།
འདོད་ཆགས་བརྩེ་བ་ལ་ནོར་བའི་གྲ་ཟུར་དེའི་དོན་དུ།།
འགྲོ་སོང་སྐར་མ་གང་མེད་པའི་ཁ་ཡག་ཅིག་བྲིས་ཏེ།།
ཀ་ཐ་མན་ཀྲུ་ལ་འགྲོ་བའི་བྷ་སི་དེར་སྐུར་རོགས།།