——མར་མེ———
བྱིས་པ།
ཀ་ཁ་སྦྱོར་ཀློག་དགའ་བའི་བྱིས་པ་ཆུང་ཆུང་།།
ཁ་བའི་སྐྱེས་མ་ཞིག་གི་རེ་བ་གཏད་ས།།
ག་པར་གཏད་སོ་མེད་པ་ནུ་ཐུང་བྱ་བ།།
ང་ཡི་དྲན་པའི་ཁྲོད་ན་སྤྲོ་བའི་སྐབས་ཤིག །
ཅ་ཅོ་རྩེད་རའི་ནང་གི་མིག་གི་འབྲས་བུ།།
ཆ་བྱས་གཅེན་མོའི་ལག་གི་དོར་མེད་འགན་འཁྲི།།
ཇ་ཆང་ཟས་ཀྱི་ཉིང་ཁུ་དྲངས་སའི་གཞི་མ།།
ཉ་རྒྱས་བྱིས་པའི་དུས་དེ་སྤྲོ་བས་རྫོགས་འདུག །
གཞོན་ནུ།
ཏ་ལའི་ལོ་མར་བྲིས་པའི་ཐུབ་པའི་གསུངས་རབ།།
ཐ་དག་སྒྲུབ་ལ་གཞོལ་བའི་བཤེས་ཀྱི་དྲུང་ན།།
ད་དུང་ཟོལ་བྲལ་གྲོགས་དང་ལྷན་དུ་སྡེབ་སྟེ།།
ན་གཞོན་དུས་དེ་འབྲོག་རིར་དོན་སྙིང་ལྡན་སྙམ།།
པ་བཟང་བྱི་བས་བསྐྲུན་དཀའ་གཞོན་ནུའི་དལ་བཟང་།།
ཕ་མའི་རེ་བའི་ལྕགས་ཀྱིས་ནན་དུ་བསྐུལ་ཏེ།།
བ་གླང་མི་ཁྱུར་བཅུག་ར་འབྲོག་གི་གླིང་ནང་།།
མ་ལུས་ཐོབ་རྩོད་ཁྲོད་ན་གཞོན་དུས་ཡོལ་སྙམ་།
དར་མ།
ཙག་ཙིག་ཡར་ཡེར་སེམས་པས་འདུན་པ་བསྐུལ་ཏེ།།
ཚ་བའི་ཡུལ་གྲུ་ཞིག་ལ་དལ་གྱི་བསླེབས་ཐལ།།
ཛ་འཛོར་ཁོར་ཡུག་དེ་ལ་ཡིད་བསུན་སྐྱེས་པས།།
ཝ་བཞིན་གྲོང་ཉུལ་བྱེད་པའི་དུས་འགོ་བརྩམས་ཐལ།།
ཞྭ་སེར་རིང་ལུགས་ཁྲོད་ན་སློབ་ལ་བརྩོན་སྐད།།
ཟ་རོཊ་གྲོཊ་དགའི་གཏམ་གྱིས་སྣང་བ་བསླུས་ཐལ།།
འ་འུར་ཟང་ཟིང་འཚོ་བར་གསར་འདྲིས་བྱས་པས།།
ཡ་ཁོག་དར་མའི་དུས་འདིར་འགྱོད་ཀྱིས་ཁེངས་ཐལ།།
ར་བ་གངས་རི་མུ་འབྲེལ་བསིལ་ལྡན་ལྗོངས་དེར།།
ལ་ལུང་བྱི་བས་ཆོད་པ་སུད་སིའི་ཡུལ་ནས།
ཤ་རུས་གཏིང་ནས་ཞེན་པའི་དར་མའི་མི་ཚེ།།
ས་རྒྱུས་ཆ་མེད་ཡུལ་འདིར་རྒྱུ་འགོ་བརྩམ་ཐལ།།
ཧ་ཅང་འགྲན་རྩོད་ཆེ་བའི་སྤྱི་ཚོགས་ནང་དུ།།
ཨ་ཅོ་ཧད་དེ་ལུས་པའི་ཐབས་ཟད་མིན་ཡང་།།
ཧ་ལས་ཡ་མཚན་དགོས་པའི་སྙིང་པོ་མ་མཐོང་།།
ཨ་ལ་ལན་གཅིག་ཕྱིར་དྲན་ཀློང་ན་འཐིམ་ཐལ།།
ཀ་ར་གུ་རམ་བོད་དུ་ཟས་།
ཁ་ལམ་རྒྱུད་ནས་སུད་སིར་འབྱོར་།
དགའ་སྐྱིད་འཛོམས་པའི་ས་ཆ་ལ་།
ང་ཡང་དེ་རུ་ཐེ་གཅིག་སླེབས་།
ཀ་ཁ་བོད་ནང་སྦྱངས། །
ཁ་བྱང་རྒྱ་གར་བྲིས། །
ག་ས་ག་རུ་སླེབས། །
ང་ཡི་མི་ཚེ་འདི། །